Xa se poden asociar á ANPA do IES Nº1.
É sumamente aconsellable, xa que obterán descontos nas saídas extraescolares dos seus fillos e fillas ao longo de todo o curso, á parte de estaren informados puntualmente das actividades que se organizan para as familias.
Para facelo, deben xuntar o xustificante do pagamento da cota anual única:15 €.
Datos da conta:
- ABANCA
Dende o 23 de xuño ao 5 de xullo está aberto o prazo para solicitar a admisión nun ciclo formativo de grao medio para o alumnado que obtivo o título da ESO ou superou a proba de acceso.
Dita solicitude realízase a través dunha aplicación web que xera un impreso con instrucións individualizadas para cada alumno/a.
Toda a información no seguinte enderezo web.
Calquera dúbida, no Departamento de Orientación do centro.
Arroupados polos seus compañeiros e compañeiras, polo profesorado e as familias, este mércores 21 de xuño celebramos a Graduación da Promoción 2019-2023. O acto foi conducido por Irene, Jéssica, Uxía e Pilar e interviñeron a titora Maite e Bea, a directora, que lembraron o seu paso polo centro nestes catro anos e transmitiron unha serie de consellos e desexos para a nova etapa que agora comezan. Noraboa a todos/as e moita sorte!
"Graduación", de María Lado
Este martes 20 de xuño vivimos o regreso da 'Revista Viva. Nós de Nós', unha gala na que o teatro, a música, o idioma e a literatura serviron de fíos condutores para repasar as actividades e os proxectos do curso que remata.
Beatriz, a nosa directora, puxo en valor o traballo da comunidade educativa e animounos a traballar man a man para fortalecela e proxectala no futuro.
Rubén Servide e o seu Combo e o grupo formado polos alumnos Marcos, Carla, Germán, Ainoa e Elier, coordinados polo profesor Lolo, puxeron a música. Un luxo.
Sara Espiño, Uxía, Irene, Jéssica, Noa Cabaleiro, Lía, Andrés, Alexandre, Yuriana, Alejandro, Noa Mendoza, Antonio, Mónica e Janet mergulláronos na maxia do teatro baixo a batuta da profesora, a actriz Cristina Andrade. Que gran traballo!
Marcos Borrageros, ex-alumno que volveu ao noso centro para dar aulas este ano,, compartiu con nós historias que nos cativaron. Deixaches unha fonda pegada en nós!
Helena, Martín, Sara Espiño, Uxía e Noa Cabaleiro forxaron con palabras versos e microrrelatos premiados dentro e fóra do centro. Parabéns!
Onte, derradeiro día do curso 22-23, celebramos a festa de despedida dos Clubs de Lectura e o Grupo de Teatro no Recreo Cultural. Tiñamos que festexar un ano de moitos libros, de ensaios, de representacións...
Foi un ano de lecturas compartidas dende a perspectiva da diversidade, da integración, da igualdade e da memoria e que, unha vez máis de forma excepcional, Javier e Laura de Catro Elefantes souberon transformar en intensos xogos dinámicos e creativos que requiriron toda a nosa atención e volver transitar polas páxinas dos libros de todo o curso (ver materiais nos ficheiros adxuntos), aos que lles sumamos para esta ocasión a lectura de Os seres invisibles, de Emma Pedreira, e O diario violeta de Carlota, de Gemma Lienas.
Despois, houbo tempo para o xantar colectivo, o primeiro mergullo do verán nas piscinas e os merecidos libros de agasallo que as profesoras Mónica, Patricia, Lurdes e Bea repartiron entre os rapaces e rapazas que forman parte de dúas das actividades máis gratificantes e enriquecedoras que se desenvolven no centro da man do Equipo da Biblioteca.
Gozade das vacacións e dun verán lector. Vémonos á volta!
23 xuño de 2022: Entrega e publicación cualificacións.
28 e 29 de xuño: Revisión e reclamación cualificacións; decisión promoción/titulación
No seguinte cadro presentamos o calendario de matrícula para o curso2023/2024
|
CURSO |
DATA |
Chega unha nova entrega de Dinamiza TV, a serie de noticieiros nacidos da colaboración do Concello da Estrada e Dinamizaestrada, o colectivo de Equipos de Normalización Lingüística dos centros de ensino do concello, co obxectivo de fomentar o uso do idioma no audiovisual e na mocidade.
Hoxe é a nosa quenda así que, sen máis dilación, quedades con Adriana e Anxo, que irán dando paso aos seus compañeiros e compañeiras. Recomendacións lectoras, actividades complementarias, celebracións, espazos de divulgación, o día a día no centro, entrevistas... Dentro vídeo!
"Na Estrada para o Porto" é a crónica en imaxes da excursión que o alumnado de portugués fixo en abril á cidade invicta. Tamén é unha humilde guía de viaxe que queren compartir con tod@s vós. Para o ano, máis.
Fiquem à vontade!
Cemiterio de barcos, de Francisco Castro, foi a lectura escollida para pechar o curso polo Club de Lectura o alumnado de 3º e 4º ESO no martes 6 de xuño. Tres foron os temas que tratamos nesta sesión do club: a Guerra Civil, o machismo e as drogas. Léronse diferentes textos do libro nos que se reflectían estes temas.
A partir das diferentes intervencións, decidiuse elaborar uns vídeos nos que buscarían testemuñas no seu contorno que lles falasen dos caciques, os golpistas, da posguerra…, ou calquera outra historia que acontecese a algún antepasado relacionado cun dos temas do libro: o legado que aínda pervive.
O xurado, composto polo alumnado de 4º ESO, valorou o uso normalizado da língua que fai este negocio familiar aberto dende 1984.
O recoñecemento entregarase na gala Revista Viva. Nós de Nós, que terá lugar no Teatro Principal o martes 20 a partir das 16:30.
O Premio IES-G que entrega o IES Nº 1 da Estrada chega á súa 8ª edición, tras o parón provocado pola pandemia, para sumar a Pastelería Mimela á nómina de comercios recoñecidos por empregar a lingua galega no seu día a día demostrando que o idioma engade un valor positivo nas relacións comerciais, que facilita a comunicación e achega confianza á clientela.
En concreto, o xurado formado polo alumnado de 4º ESO valorou o seu uso na atención oral á clientela, na cartelería interna e externa do establecemento, así como, especialmente, nas campañas de publicidade que realiza periodicamente e nos contidos publicados nas redes sociais, onde se percibe un uso coidado, rigoroso e de calidade do idioma.
Regresa a Revista Viva na súa 7ª edición. A anterior celebrouse en 2019 e, tras a paréntese da pandemia, chegou o momento de recuperala.
Revista Viva "Nós de Nós", un instituto vivo. Unha comunidade educativa aberta, dinámica, activa, comprometida co ensino público.
Revista Viva. Teatro, música, lingua, literatura, recoñecementos varios para dentro e para fóra. De Nós para Vós.
Revista Viva. Teatro Principal da Estrada. Martes 20 ás 16:30. Estades convidad@s!
Revista Viva. Deseño de Rosa de Cabanas.
O pasado martes o alumnado de 3º ESO gozou do merecido premio do Concurso do Entroido 2023. Acompañados polas profesoras Ana e Carmen, pasaron o día no Aquapark de Cerceda.
Se queredes lembrar como foi o entroido deste ano, podedes ver a crónica en imaxes.
Conta a propia autora que, de adolescente, encontrou nunha pintada na parede do seu instituto a definición que, segundo ela, mellor encerra o significado mesmo de literatura: "a arte comeza no punto en que vivir non abonda para expresar a propia vida". E, a partir deste fío, Andrea Maceiras foi desenredando as historias que transitan polas páxinas de Europa Express, O que sei do silencio e Que me pare o corazón se te esquezo, novelas que leron os mozos e mozas de 3º e 4º ESO e que centraron a conversa que mantivemos coa escritora o pasado martes 6 de xuño no marco do programa Letras Galegas 2023.
O encontro foi moderado polas alumnas Sara Espiño, Xiana Folgare Carolina Conde, Uxía Seoane e Pilar González nunha tarde de calmizo e treboada que tamén foi intensa e deu para conversar sobre a pegada das experiencias persoais na súa obra e arredor de diferentes motivos temáticos que tecen as vidas dos personaxes das súas novelas: o paso da adolescencia á madurez, a procura da liberdade e a loita polos soños, as relacións tóxicas, o acoso, a conformación da identidade e a imaxe que proxectamos ao exterior, a influencia das redes sociais nesa construción... A preguntas do alumnado, aínda deu tempo para falarmos sobre o oficio da escrita, os nosos gustos e intereses lectores ou o proceso de creación e edición dun libro, mesmo sobre as nosas expectativas e arelas nun futuro que xa non anda moi lonxe.
Con motivo da celebración do Día Mundial do Medio Ambiente, o pasado luns 5 de xuño o alumnado de 1º ESO particicipou na actividade Os ríos na Estrada, que promoveu o Departamento de Bioloxía en colaboración co Concello e baixo a supervisión e guía de Tesouros Novos, empresa de xestión cultural.
Os rapaces e rapazas, acompañados polos profesores Jorge e Jano, participaron na ruta didáctica orientada ao coñecemento dos ecosistemas fluviais dos ríos Ulla e Liñares e fixeron a ruta entre o couto de Ximonde e a Ponte Sarandón. Grazas a esta actividade, coñeceron diferentes métodos de vixilancia e monitorización da diversidade biolóxica e cumprimentaron unha ficha de diagnóstico da calidade da auga.
Seguimos a facer camiño, e xa van 10 anos, coa Festa das Palabras que organiza DinamizaEstrada, o colectivo que agrupa os Equipos de Normalización Lingüística dos centros escolares do noso concello.
Seguimos a tecer unha rede de complicidades e afectos arredor da lingua galega a través da pulsión literaria que atravesa os microrrelatos e micropoemas dos 62 rapaces e rapazas galardoados e mais as 14 ilustracións dos meniños e meniñas de infantil.
Seguimos a vernos no espello de Charo Golmar, madriña do evento, e de Rosa de Cabanas, que ilustrou a festa cun fermoso deseño que tomou corpo no cartaz, os marcapáxinas e mais no libro que recolle os textos e debuxos premiados.
Porque "camiño" e "espello" foron as palabras prestadas por don Francisco Fernández del Riego, autor homenaxeado no Día das Letras Galegas, o home que nunca se rendeu, que serviron de inspiración para estes mozos e mozas, especialmente, no caso do noso centro, para Martín Seoane Duro, Helena Castaño Pazos, Noa Cabaleiro Ribadulla e Sara Espiño Vaamonde, escollidos entre os máis de 200 textos presentados a concurso. Moitos parabéns!
Velaquí tedes as recomendacións das lecturas consensuadas entre as bibliotecas dos IES Losada Diéguez, Manuel García Barros e Nº1.
Podedes vir buscalas á biblio e gozar da lectura durante o verán.
Hoxe coñecemos un pouquechiño máis a nosa profesora de teatro. Baixo a coordinación da profesora Rosario, as alumnas Noa Mendoza, Noa Cabaleiro, Uxía Seoane e Sara Espiño entrevistaron a Cristina Andrade para un novo episodio das "Historias non contadas" dentro do proxecto A Ollada da Sospeita (@aolladadasospeita).
Cristina, actriz en teatro e televisión, contounos cales foron as súas motivacións para formarse nesta profesión, como foi e como é a súa experiencia no teatro e na televisión, o seu labor de docente, proxectos, emocións, sensacións... e, estade atent@s, o grupo de teatro do IES está a preparar unhas novas pezas para estrear en breve.
Fotografía de R.G. para La Voz de Galicia Deseño de Rosa de Cabanas
A cita coas coas palabras terá lugar este martes 6 de xuño no Teatro Principal da Estrada a partir das 20.00 horas. A X Festa das Palabras pon o ramo aos concursos de micropoemas e microrrelatos organizados polos Equipos de Normalización Lingüística dos centros escolares e serán 62 alumnos e alumnas os que recibirán o seu premio: un exemplar do libro que recolle todos os textos gañadores de Primaria e Secundaria, acompañados por 14 ilustracións feitas por estudantes de Infantil, con portada da deseñadora gráfica Rosa de Cabanas. A escritora Charo Golmar exercerá de madriña.
E botamos a lingua fóra! Na casa, na escola e onde esteamos. Onte, acotío, mañá e sempre.
E hoxe, mércores 31 de maio, botámola tamén nas rúas da Estrada co Correlingua 2023. Os rapaces e rapazas de 1º e 2º da ESO sumáronse aos compañeiros e compañeiras do IES Losada Diéguez para se xuntaren co alumnado dos colexios do noso concello, o CPI de Cuntis, o CRA de Caldas e mais do IES Chano Piñeiro de Forcarei. Ao son das pandeiretas e con pancartas e bandeiras, percorreron as rúas para regresar á Praza do Concello. As rúas estaban ateigadas de xente por cadrar en día de feira.
Alí, a actriz Isabel Risco leu o manifesto e a rapazada coreou o lema... "Na casa, na escola, bota a lingua fóra". Despois actuou a Mekanika Rolling Band, tomouse o bocata e houbo tempo para conversar cos antigos mestres e mestras dos seus colexios.
Comunicámoslle que comezou o prazo para solicitar axudas de material escolar e libros de texto, que remata o próximo 21 de xuño (incluído).
O alumnado matriculado no IES ata 3º de ESO está excluído da participación do fondo solidario de libros de texto, xa que no centro temos o proxecto E-DIXGAL.
Por tanto, só os de 4º de ESO poderán beneficiarse das axudas aos libros, pero todo o alumnado poderá solicitar a axuda para adquirir material escolar.
Pode consultarse toda a información e documentación AQUÍ.
"Seremos quen de xuntar 10.000 seguidores nun ano publicando contidos galegos no Facebook?". Corría o ano 2016 cando os creadores de Orgullo Galego se fixeron esta pregunta, que axiña tivo resposta, porque en apenas un mes superaron esa cifra e en 6 meses xa contaban nada máis e nada menos que con 70.000 seguidores. Dende entón, Orgullo Galego non parou de medrar até aglutinar máis de 420.000 persoas nas redes sociais (FB, IG, Twitter, Twitch, TikTok, Sportify, Ivoox, Telegram ou Mastodom), unha web na que publican contido propio, tenda en liña e milleiros e milleiros de post publicados. Este labor vén de ser recoñecido co premio Rosalía de Castro á Normalización Lingüística 2023 que concede a Deputación da Coruña, na categoría de "Entidades" por representar "unha nova expresión de transmisión da lingua e cultura galegas".
O pasado mércores 24 visitou o noso centro o profesor Esteban Folgar Brea para impartir un obradoiro ao alumnado de 2º ESO. Nesta actividade, a activación da escritura creativa faise mediante un proceso que se inicia cunha primeira tarefa de quecemento, continúa cun traballo máis activo e remata coa escrita dunha historia breve e un poema.
No quecemento, o alumnado, mediante o xogo de palabras encadeadas, vai dicindo substantivos (ata catro), dos que despois haberá que buscar unha posible relación entre eles, e logo xerar unha pequena historia. Collendo as primeiras letras dunha das verbas e as últimas doutra, créanse catro palabras novas, inexistentes na nosa lingua, ás que os rapaces deben dotar de significado.
Unha vez coñecidos os significados destas palabras, en grupos, redactan unha historia que as inclúa. Despois, deben escribir unha frase na que cada unha das súas verbas se inicie con unha das letras das palabras creadas.
Por último, o traballo final é compoñer un poema, con rima, en acróstico coas palabras que se xeraron na actividade anterior, e no que aparezan polo menos dous dos termos creados no xogo.
O pasado venres día 26 de maio o alumnado de 1º da ESO participou, xunto co alumnado dos restantes centros de secundaria da Estrada, nun taller de reanimación cardiopulmonar, organizado pola Concellería de Sanidade da Estrada, o centro de saúde e emerxencias e a Axencia Galega de Emerxencias. A actividade estivo guiada por instrutores do 061 e médicos da zona.
Velaquí a súa implicación e interese nunha práctica fundamental para salvar vidas.
Xunta de Galicia - Consellería de Educación, 2013 | ||
