Un grupo de alumnas e alumnos do primeiro curso de Bacharelato, coordinados e dirixidos pola súa compañeira Begoña, puxeron en escena a caracterización dos personaxes históricos e abordaron os fascismos e a Segunda Guerra mundial. Ante un público curioso e expectante, desfilaron: Adolf Hitler, Mussolini, Stalin, Schindler, Rosa de Luxemburgo, Eva Braun, un republicano español que estivo preso nun campo de concentración e Magda Goebbels. Falaron da súa vida e do que lles aconteceu na guerra.
Por un momento parecía que eran reais e representaron o papel de forma impecable, memorizando un montón de datos. Pero no fondo todo serviu para reivindicar a paz no mundo, a non violencia. Que a guerra non volva a repetirse.
A escenificación teatral complementouse cunha exposicion de material da Segunda Guerra Mundial acompañada dunha explicación impartida por Terko.gal que estivo interesantísima.
Toda unha lección nas mensaxes, pero tamén na que o alumnado demostrou que cando se se sente motivado dá o mellor e o máximo. Noraboa polo traballo, noraboa a Begoña pola proposta. Un ensino vivo e experiencial é o que se defende.
Esta foi a derradeira actividade do curso desenvolvida polo alumnado matriculado na materia de Historia do Mundo Contemporáneo de primeiro curso de bacharelato. Destacar tamén un ciclo de conferencias que o alumnado tivo que preparar e impartir a proposta da profesora, abarcando temáticas como a guerra fría, a descolonización, a UE e a globalización.
