blogue deadmin

Para o coñecemento de toda a comunidade educativa, comunícase o restablecemento do proceso de matrícula de cara ao curso 20-21. Toda a información está nesta dirección web:

http://www.edu.xunta.gal/portal/node/31003

No caso concreto do noso centro educativo este procedemento afecta ao alumnado que comeza a súa escolarización no CRA de Oroso (4º de Educación Infantil - 3 anos) no curso 20-21 e ao alumnado que o curso 20-21 cursará os seus estudios nos colexios de Sigüeiro, ben en 1º (alumnado de Deixebre) ou 3º de Primaria (alumnado de Trasmonte e Vilacide).

Os novos prazos do proceso de matrícula son os seguintes:

• Restablecerase o prazo para a presentación das solicitudes de admisión de alumnado en centros docentes sostidos con fondos públicos, polo tempo que restaba cando se de­clarou o estado de alarma, de xeito que se iniciará o día 11 de maio de 2020 e rematará o día 18 do mesmo mes. Este proceso so o teñen que facer as familias que non presentaron a documentación nos prazos anteriores: febreiro (alumnado que vai para o CEIP Sigüeiro) e marzo (alumnado que se matricula por primeira vez no CRA ou vai para o CEIP Camiño Inglés).

• Presentación da documentación acreditativa dos criterios de baremo: ata o día 26 de maio de 2020.

• Publicación das listaxes provisionais do alumnado admitido e non admitido: antes do 9 de xuño de 2020.

• Poderanse formular reclamacións contra as listaxes provisionais no prazo de 3 días hábiles contados desde o seguinte ao da súa publicación.

• Publicación das listaxes definitivas do alumnado admitido e non admitido: ata o 26 de xuño de 2020.

• Formalización da matrícula en educación infantil e primaria: do 1 ao 10 xullo de 2020. Este proceso ten que realizalo todo o alumnado que inicia a súa escolarización no CRA de Oroso (4º de Educación Infantil - 3 anos) ou ben cambia de centro educativo para o curso 20-21 (alumnado de Deixebre e alumnado de Trasmonte e Vilacide).

Coa finalidade de garantir a atención a toda a comunidade educativa, os equipos directivos dos centros desenvolverán tarefas de atención directa con presenza no centro educativo. No caso do noso centro, a normativa existente establece o seguinte procedemento:

"Nos centros de menos de 6 unidades é obrigada a presenza do director ou profesor responsable os días precisos para a realización dos trámites de escolarización e presentación da documentación ou doutros procedementos".

Tendo en conta esta disposición, o director do centro permanecerá na sede de Vilarromarís o mércores 13 de maio, en horario de 10:00 a 13:00 para a atención presencial ás familias que precisen tramitar documentación para o proceso de matrícula.

Para a atención doutros procedementos, ou en días distintos do indicado, será preciso concertar cita previa mediante chamada telefónica ao 628 07 14 38 (horario de 10:00 a 13:00) ou ben por correo electrónico á seguinte dirección: cra.oroso@edu.xunta.gal

De cara a regular a entrega de documentación para as familias deste alumnado, publícaronse estas recomendacións sanitarias:

http://www.edu.xunta.gal/portal/node/30999

Achégase como arquivo adxunto unha guía de conexión para participar en videochamadas entre o profesorado e o alumnado. 

A partires da vindeira semana comezaremos a usar esta aplicación para facer as videochamadas, en lugar da aplicación ZOOM. 

A principal vantaxe da aplicación WEBEX é que está regulada pola Consellería de Educación, co cal queda garantida a protección de datos do alumnado. Ademais, para familias que non teñan boa conexión de Internet, ofrece a opción de participar cunha chamada de teléfono (so con voz).

 Recomendamos ver este video publicado pola Consellería:

E despois, recomendamos ler a guía simplificada para o noso CRA, que achegamos a esta publicación, para poder facer a conexión cando cada titora convoque ás familias da súa escola. Non é preciso descargar a aplicación para participar nas videochamadas. 

Para calquera dúbida, podedes consultar ás titoras ou escribir ao correo do centro: cra.oroso@edu.xunta.gal 

Saúdos e boa fin de semana!

Estimadas familias:

O martes 14 de abril da comezo o terceiro trimestre deste curso escolar. Polo momento, non hai instrucións por parte da Consellería de Educación para desenvolver este terceiro trimestre, polo que durante uns días seguiremos con propostas máis abertas do estilo de contos, videos, tarefas sinxelas de repaso....

As titoras de cada escola facilitaranvos información máis detallada nas videoconferencias que se celebrarán o martes 14 de abril. Para as familias que non poidan participar nesta videoconferencia, publicarase un resumo da información tratada nesta páxina web.

Nos vindeiros días cambiaremos de aplicación para as videoconferencias, pero de momento seguiremos usando Zoom, unha vez que xa se arranxaron os problemas de seguridade. Lembrade que tedes que actualizar a aplicación antes de conectarvos (ao abrir a aplicación xa vos aparece a opción de actualizar).

Para retomar o contacto coa escola, achegamos como arquivo adxunto unha proposta de traballo moi sinxela cun pequeno conto.

Esperamos que esteades todos/as moi ben.

Unha forte aperta.

Queridas familias:

Publicamos como arquivo adxunto a proposta de traballo para estes días. Coma sempre, incluimos unhas recomendacións de traballo, destacando a voluntariedade de realizar todas as tarefas. Xa que é a última semana deste 2º trimestre, publicamos unhas tarefas conxuntas para Infantil e Primaria, con pequenas variacións en función da idade de cada alumno/a.

Unha aperta!

Estimadas familias, achegamos como arquivos adxuntos as propostas de traballo para os días 30 e 31 de marzo.

Para estes días fixemos dúas propostas de traballo: unha para Educación Infantil e outra para Educación Primaria. Hai moitas cousas comúns para todas as idades e nalgúns casos tamén hai tarefas diferentes segundo a idade.

Queremos lembrarvos que non é preciso facer todas as tarefas propostas. É unha proposta de traballo que cada familia debe de adaptar ás súas circunstancias e aos intereses do alumnado. 

Unha forte aperta!