E nesta ocasión gozamos dun conto representado.

  Almudena, nai de Sofía, achegounos a historia de "Pepiño Cebola" de Sandra Alonso, un neno moi ben abrigadiño con tantas capas de roupa como unha cebola.

  Moitas grazas por vir! Encantounos!

  Cúmprense 60 anos da creación da conmemoración do "Día das Letras Galegas" que este ano se dedican a Francisco Fernández del Riego. 

  A existencia desta festividade debémoslla a este escritor nacido en Lourenzá, galeguista, estudososo e amante das nosas tradicións e cultura.

  A nosa pequena homenaxe a Francisco Fernández del Riego fixémola moi preto do cole, a carón do río, visitando o muíño dos Fernández (recentemente rehabilitado), lendo textos do autor deste ano e levando nas nosas mans a todos os escritores e escritoras que foron homenaxeados neste día das nosas letras.

  Esta tarde, xunto con usuarios da residencia "Domus VI", puidemos disfrutar da función teatral "Rúa Francisco Fernández del Riego" organizada dende a biblioteca municipal de Bóveda.

  Dun xeito ameno e divertido, achegámonos á figura do autor homenaxeado no "Día das Letras Galegas" deste ano, coñecendo diversas facetas da súa vida.

  Moitas grazas por convidarnos a asistir a este espectáculo!

  Nesta terceira edición de "Conto en familia", Verónica e Martín (nai e pai de Maia) viñeron acompañados de María, Jesús e Azul para levarnos a dar unha volta ao mundo musical.

  Con temas de Brasil, Australia, Cuba, Italia e Galicia; asistimos a un divertido espectáculo que rematou bailando todos e todas nun tren polos corredores. Foi divertidísimo!!

  Moitas grazas por vir! Sodes xeniais!!

  Na xornada do mércores, o alumnado dende 6º de Infantil ata 6º de Primaria, acudiu a unha charla afectivo-sexual impartida por dúas matronas do colexio de Enfermería de Lugo na biblioteca do noso centro. O obxectivo era dar a coñecer a súa profesión e tratar diversos aspectos relacionados coa reprodución e cambios corporais ligados á puberdade entre outros. A actividade foi ofrecida pola FAPACEL e xestionada pola nosa ANPA.

  Este martes puxemos en marcha a campaña "TOMATEIRAS SOLIDARIAS" para colaborar coa ONG "Hospitaleiros sen Fronteiras".

  Enmarcado no proxecto do horto escolar que se promove e organiza dende a biblioteca, o alumnado do noso centro sementou, coidou e trasplantou (tamén coa axuda das familias) unhas 250 plantas de tomate que agora ofrece a cambio dun donativo para a escolarización dos nenos "Talibé" do Senegal.

  As sementes proceden da produción da nosa propia horta (como o tomate azul ou o tomate cherry amarelo) e tamén achegadas polas familias do centro (tomates de bendilló, tomates de inverno ou tomates do bisavó).

  Podedes facer os vosos encargos a través do alumnado do centro!!

Moitas grazas adiantadas pola vosa colaboración!!

  E nesta segunda edición de "Conto en familia" tivemos a sorte de escoitar, en primicia, a primeira lectura en público do conto "O misterio do tulipán" escrito e ilustrado por Yolanda Álvarez.

  Moitas grazas por compartir a túa arte con nós!

  Este xoves, na "hora de ler", veu Santiago, (pai de Santi), para responder ás preguntas que lle tiñamos preparadas sobre as pitas do noso galiñeiro. Santiago respondeu a todas as cuestións unha por unha e aclarou todas as nosas dúbidas.

  Moitas grazas pola túa visita e os teus consellos!!

  Este xoves o avó de Theo, a súa nai e o seu pai viñeron ata o cole para axudarnos a preparar a terra do horto. O alumnado de Infantil observou moi atento o proceso para despois sementar un rego de millo branco. Moitas grazas pola vosa axuda!

  Máis tarde chegoulle a quenda aos maiores que remataron de sementar o millo e plantaron unha ducia de leitugas.

  Os peques aproveitaron para levarlle un pouco de millo ás pitas e observar as plantas de amorodo que pronto producirán.

  Neste terceiro trimestre, da comezo a actividade "CONTO EN FAMILIA".

  Na "Hora de ler" dos venres, contaremos con diferentes familias que virán a contar, cantar, interpretar ou representar historias para nós. 

  A actividade iniciouse co conto ¡Nunca te olvidaré" que trouxeron Daniela, Dylan e a súa nai Alba: unha fermosa e emocionante historia pensada para nenos e nenas que aborda con moito tacto e naturalidade os temas da enfermidade de alzheimer e a morte.

  Moitas grazas por tan fermoso e emotivo comezo!