CEIP PLURILINGÜE A CRISTINA

A comunidade educativa do CEIP Plurilingüe A Cristina deséxavos un BO NADAL e un 2023 cargado de ledicia e saúde. Queremos  expresar o noso agradecemento a todas as familias pola vosa implicación e compromiso e, principalmente, aos grandes protagonistas: os vosos fillos/as. 

Desfrutade das festas con responsabilidade e alegría compartida.

BO NADAL!

A Federación Galega de Atletismo acaba de publicar as clasificacións da Fase Local de campo a través celebrada onte, e podemos dicir, que estamos de noraboa, xa que, vinte  e seis nenos/as do noso centro conseguiron clasificarse para o Campionato Intercomarcal de campo a través, que se celebrará o sábado 14 de Xaneiro do 2023, no circuito do parque  de Acea da Má( Culleredo)

Un ano máis, o noso centro terá unha amplia representación na Fase Local de campo a través escolar, xa que, serán 99 atletas do noso centro,os que participarán mañá martes 20 de decembro( sempre que as condicións metereolóxicas o permitan) nesta proba.

11.00:  Infantil masculino ( 6º E.Primaria)
11.15:  Infantil feminino ( 6º E.Primaria)
11.30:  Alevín masculino ( 4º e 5º E.Primaria) 
11.45:  Alevín feminino ( 4º e 5º E.Primaria) 
12.00:  Benxamín masculino ( 2º e 3º E.Primaria) 
12.15:  Benxamín feminino ( 2º e 3º E.Primaria) 

Moita sorte a tod@s!

Este martes os nosos/as alumnos/as de 5º e 6º de primaria sentíronse coma auténticos políticos e políticas xa que realizaron unha visita guiada ao Parlamento e á Xunta de Galicia para coñecer o seu funcionamento, facilitando así a comprensión da separación de poderes propia das democracias. Así mesmo, estas dúas institucións asumiron os custos do desprazamento.

No CEIP Plurilingüe A Cristina estamos de noraboa!! As nosas alumnas de 3º nivel de educación primaria, Valeria Martínez González e Mara García Suárez, resultaron condecoradas no certame "Contos de Nadal" coas historias que levaban por título "Que listas son as avoas" e "Na Costa da Morte os desexos cúmprense", respectivamente.

O acto de entrega de premios celebrarase na Casa da Cultura de Cee o sábado día 17 ás 12:00 h. 

Pinchade AQUÍ para ver a nova online na páxina da Voz de Galicia.

Noraboa a estas campionas! Sentímonos moi orgullosas delas! Bravo!!

Descargade os arquivos en audio para escoitar as súas historias!

O Clube Balonmán Xiria acaba de enviarnos o dossier detallando a excursión de fin de curso a Madrid, dirixida ao alumnado de 6º de EP. Dito documento figura como adxunto, co cal podedes descargalo.

A viaxe, nun principio, sería desde o 26 ata o 30 de xuño, cun custe aproximado de 450 euros. Como todos os anos, aos rapaces e rapazas facilitaráselles unha serie de talonarios, con rifas, para axudarlles no custe desta saída.

Para poder falar cos organizadores sobre dita viaxe, pasámosvos o seu contacto:

balonmanxiria@gmail.com
administracion@balonmanxiria.com

O clube estimou como prazo para inscribirse ata este mércores 14 de decembro, para que así os rapaces e rapazas poidan ter as rifas para poder vendelas nas vacacións de Nadal.

O link para inscribirse é o seguinte:

Os xogos coa luz permiten xerar un clima de experimentación e creatividade. Ao longo deste curso publicaremos actividades para xogar coa luz, co simple obxectivo de pasalo ben e de explorar as múltiples posibilidades deste material tan máxico e atraínte. Ollade neste vídeo como os nosos pequenos/as de tres anos xoguetean e se divirten coa luz!!! 

Que obradoiro tan especial tiveron o Josinho e a Lorena cos pequerrechos e pequerrechas de 4º de Educación Infantil!! Están feitos todos uns regueifeiros e regueifeiras!! Noraboa campións!!

Pinchade aquí para acceder ao enlace de Enreguéifate en Instagram

Lembrámosvos que o martes 6 e o xoves 8 de decembro non haberá clase por ser festivos nacionais (Día da Constitución e Día da Inmaculada Concepción, respectivamente) pero sí haberá clase o luns día 5, o mércores día 7 e o venres día 9.

Un saúdo.

Os/as nenos/as de 3º de primaria botan a lingua a pacer co Enreguéifate!! No día de hoxe participaron nun obradoiro coa axuda do Rabelo e Nuria. Xuntos compuxeron uns versos seguindo un mesmo cantar:

Cando eu estaba xogando

pinchóuseme a pelota.

Logo eu fun ver o río

e despois eu fun á horta

e despois eu fun á horta.

Manchóuseme o pantalón

e despois mirei ao ceo.

E vin pasar un avión

e vin pasar un avión.

Había fume na cociña

e eu fun ao galiñeiro.

E mirei unha galiña...

"Thanksgiving Day" ou "Día de Acción de Gracias" é unha festa nacional celebrada o cuarto xoves do mes de novembro nos países de EEUU e Canadá. Trátase dunha festa de agradecemento. Por este motivo, a nosa auxiliar de conversa Kate organizou unha actividade ao redor dunha árbore na que as follas eran mensaxes nas que tiñamos que escribir o motivo polo cal nos sentimos agradecidos/as.

A clave de todo é ser sinxelos e saber que é o importante.

"I am thankful for watching races with my dad..."

"I am thankful for my rabbit Tipi..."

"I am thankful for Mc Donald´s..."

"I am thankful for my family and friends..."

O pasado luns desprazámonos ao Pabellón Municipal de Vimianzo para asistir á "Exhibición Solidaria da Garda Civil", un acto no que poidemos coñecer máis de preto esta profesión así como todos aqueles instrumentos, automóbiles e útiles que empregan para levala a cabo.

Asistimos á simulación dun rescate na montaña.

Presenciamos unha exhibición cinolóxica con Zero desactivando un explosivo!!

E disfrutamos dunha mañá moi interesante participando en todo tipo de experiencias!!!

No CEIP Plurilingüe A Cristina traballamos a prol dunha sociedade máis xusta, equitativa e igualitaria que condene todo tipo de violencia, especialmente a de xénero, polo que este 25N as nosas mans convertéronse en folliñas de esperanza, de forza e de empoderamento; pero tamén de ánimo e apoio colectivo a todas aquelas mulleres supervivintes e de lembranza para as que non.

Durante a última sesión saímos todos/as ao patio a poñerlle voz e danza á canción de Merche "Somos unas valientes".