CPInclúe
3 DE DECEMBRO. DÍA INTERNACIONAL DAS PERSOAS CON DIVERSIDADE FUNCIONAL.
Este domingo, 3 de decembro, conmemórase este día internacionalmente. Dende os centros educativos sempre nos facemos eco do mesmo para axudar a sensibilizar ao alumnado para colaborar na súa educación en termos de inclusión e respecto da diversidade. Como onte era domingo, pasamos os actos para hoxe.
Por un lado, na entrada do cole temos unha exposición coas fotos que todas as familias enviastes baixo o lema "TODAS BAIXO O MESMO PARAUGAS".
Ademais desta actividade, varias persoas que forman parte da asociación DISCAMINO viñeron na mañá de hoxe ao centro para contarnos as súas experiencias vitais e axudarnos na concienciación do alumnado sobre toda a diversidade existente. O alumnado maior, de segundo e terceiro ciclo, asistiron atentas á charla que fixeron e aprenderon moito.
Por último, o profe Manu, traballara este baile que o alumnado representou para as persoas que viñeron a dar a charla e tamén para o resto de compañeiros de Infantil, 1º e 2º.
25N
Hoxe celebramos no centro o 25N.
Cando o alumnado chegou topouse coas escaleiras de cor lila coas frases que elas mesmas decidiran e crearan.
Consideramos que, moitas veces, a violencia machista xérase por mor das desigualdades que existen entre homes e mulleres que están sustentadas en estereotipos que nos identifican como homes ou mulleres facendo o que se "supón" de nós e creando unha imaxe de nós que condiciona o xeito en que se nos trata e no que tratamos aos demais. Por isto, dende o cole quixemos poñer o foco nos estereotipos, porque cremos que se acabamos con eles e axudamos a formar unha sociedade na Igualdade, este tipo de violencia desaparecería. Ademais é a parte na que a escola pode colaborar máis e facer máis traballo.
Ademais destas novas escaleiras que estreamos hoxe, todo o alumnado na biblioteca do centro asistiu ao estreo do vídeo que creamos entre todas con estas frases e outras moitas que recollen estereotipos comúns e habituais.
Aquí tedes e podedes desfrutar do traballo feito polos nenos e as nenas do centro.
25N
Como todas saberedes mañá é o 25N e conmemórase o día contra a violencia de xénero. No cole levamos toda a semana a traballar esta temática, pero o acto conmemorativo levarémolo a cabo o luns, pero non queriamos pasar por alto a xornada de contacontos en Igualdade que desfrutaron hoxe as alumnas e alumnos de Infantil grazas a un pai comprometido coa causa e que sempre está disposto a vir a colaborar co centro.
O alumnado desfrutou dun contacontos en prol da igualdade a través de contos tan coñecidos como Artur e Clementina ou O libro dos porcos. Fixémolo ao soliño no patio do cole e resultou unha xornada fantástica.
Grazas David por vir ao cole e axudar nesta importante labor de educar en igualdade!!
E o luns ensinarémosvos máis!!
- « primeira
- ‹ anterior
- 1
- 2
- 3
- 4
- 5
- 6
- 7
- 8
- seguinte ›
- última »
![RSS - CPInclúe Distribuir contido](/centros/ceipabelendo/misc/feed.png)