O conselleiro de Educación e Ordenación Universitaria, Xesús Vázquez Abad, asistiu esta maña, á inauguración da ampliación do museo do Centro de Recursos Educativos (CRE) da Once de Pontevedra con novas maquetas artesanais. Previamente o conselleiro mantivo un encontro con 20 dos 55 estudantes invidentes que ao longo deste verán asisten ao Curso de Perfeccionamento de Inglés.

Acompañado polo delegado territorial da ONCE en Galicia, a presidenta do Consello Territorial en Galicia e o director do CRE; Manuel Martínez Pan, Dolores Venancio e José Ángel Abraldes Rodeyro, respectivamente o conselleiro percorreu as instalacións no centro. Xunto a eles tamén estivo o persoal técnico e docente do centro, así como o delegado da Xunta en Pontevedra, José Manuel Cores Tourís e o xefe territorial de Educación en Pontevedra, César Pérez Ares.

Unha vez realizada a visita Vázquez Abad sinalou que “accións como esta promoven medidas para que a invidencia sexa cada vez menos sinónimo de illamento, de xeito que se logre un entorno físico axeitado para a plena integración”. Asemade o conselleiro destacou que “é importante o traballo desenvolvido polo centro a prol da integración dos seus usuarios. Deste xeito non podo deixar de resaltar o labor educativo que se desenvolve aquí día a día a beneficio dos estudantes”.

O museo

Cómpre destacar que as maquetas artesanais que conforman a mostra son representacións das máis diversas construcións, como a Mámoa do Rei, o labirinto de Mogor, un castro celta; o cacereño ponte de Alcántara; a igrexa de Santa Comba de Bande, en Ourense; un porto comercial; un parque eólico; a Ponte dos Tirantes, de Pontevedra; e unha paisaxe de costa e outra de interior entre outras, ata sumar 22 recreacións.

Todas elas dan resposta á necesidade dos invidentes de comprender determinados conceptos artísticos, arquitectónicos, xeográficos, e sociais. Así, o máis importante en todas as maquetas é o releve para que, deste xeito, os estudantes e visitantes invidentes poidan identificar texturas, estruturas e materiais.

Estas novas maquetas forman parte dun museo, que foi inaugurado no 2003 co obxectivo de mostrar a historia e evolución da ensinanza de invidentes desde o século XX ata a actualidade. Entre os fondos do CRE atópanse máquinas de braille, instrumentos de escritura, traballos manuais e documentación.

Os estudantes de inglés

Durante a visita ao CRE o conselleiro aproveitou para saudar a 20 dos 55 alumnas e alumnos invidentes que están a realizar un dos tres cursos de perfeccionamento de inglés que se imparten no centro, ao longo do verán.

Cómpre destacar que están divididos en varias quendas, sendo esta a primeira con vinte estudantes, de entre 12 e 14 anos, que estarán ata o 15 deste mes. Os seguintes 20 nenas e nenos, de entre 15 e 17 anos, estarán do 18 ao 29 de xullo. Así os últimos 15 estarán asistiran ao curso que vai desde o 1 ata o 12 de agosto. Entre os asistentes a este están inscritos catro estudantes invidentes procedentes de Italia e un de Portugal.

Os estudantes destes cursos teñen divididas as xornadas entre clases lectivas e actividades varias, como visitas culturais, excusións, actividades deportivas, veladas musicais e talleres.

Coa presenza de Vázquez Abad, a Consellería volve a demostrar o seu apoio para con todas aquelas iniciativas e actividades que melloren a educación, a formación e a integración de todos os nenos e nenas invidentes, tanto galegos como de fóra da comunidade.

O conselleiro de Educación e Ordenación Universitaria, Xesús Vázquez Abad, destacou hoxe o traballo de docentes e orientadores na atención á diversidade do alumnado galego, e lembrou que a Consellería traballa para “poñer os recursos necesarios para que todo o alumnado, independentemente das súas potencialidades e das súas necesidades educativas, reciba as atencións necesarias”.

No acto de apertura na I Xornada de Formación sobre a Atención ao Alumnado con Altas Capacidades, que se celebra hoxe na Escola Galega de Administración Pública, en Santiago de Compostela, e na que participan 190 docentes e orientadores, o conselleiro recordou “a dificultade de cuantificar ao alumnado con altas capacidades” - estímase que entre un 4 e un 5% da poboación podería telas-. Por iso insistiu na necesidade de manter o sistema educativo "nunha evolución permanente, nunha reflexión orientada a que todo o alumnado acade un adecuado desenvolvemento persoal, social e profesional”.

Nesta tarefa, engadiu, ademais dos docentes e orientadores “é precisa a implicación activa das familias”, que están cada vez máis comprometidas co labor educativo, e que son para estes estudantes “un apoio imprescindible”.

Doutra banda, o conselleiro fixo fincapé nas ferramentas coas que conta o sistema educativo galego para desenvolver esta tarefa. “Contamos cunha moi potente rede de orientación, cun considerable número de profesorado de apoio, e cun profesorado disposto a innovar e a promover o éxito escolar”, dixo. Ao mesmo tempo Vázquez Abad animou aos profesionais do ensino a “abrir as aulas, establecer redes, espazos de comunicación e conexión, compartindo experiencias, establecendo retos, buscando respostas, e contando coas familias”.

Experiencias de centro

A xornada de formación conta coa participación de reputados expertos, así como de membros de colexios e institutos galegos que presentan aos asistentes as súas experiencias de centro na atención ao alumnado con altas capacidades.

Tras o acto de apertura, o coordinador do Equipo de Orientación Específico de Pontevedra, Eladio Ferro, abordou os xeitos de identificar a estes estudantes no relatorio ‘As cores da diversidade. Identificación de altas capacidades’. Pola súa parte Mª Francisca Roger Cruz, especialista neste eido da administración educativa de Canarias, presentou na súa conferencia os programas de atención educativa que se están a desenvolver nas illas.

A sesión da tarde foi a quenda para as experiencias dos centros, nomeadamente do CEIP Pintor Laxeiro (Vigo), coa intervención da mestra de Educación Primaria Mª del Mar Álvarez Silva, e do IES O Couto (Ourense), representado pola orientadora Purificación Losada Fuente e pola especialista en Pedagoxía Terapéutica Pilar Ferreira Rivera.

A xornada pecharase co relatorio ‘Educación e talento investigador. Reflexións sobre o sistema educativo’, impartido polo catedrático de Medicina Legal da Universidade de Santiago de Compostela e director da Fundación Pública galega de Medicina Xenómica, Ángel Carracedo Álvarez.
 

Once orientadores europeos coñecen desde hoxe ata o vindeiro 25 de marzo os sistema educativo galego no marco do Programa de mobilidade ‘Academia’. Así, e co fin de que a visita sexa frutífera, a Consellería de Educación e Ordenación Universitaria organizou as xornadas ‘A Orientación académica e profesional no noso sistema educativo. Transición á vida activa e laboral’, que comezaron hoxe co recibimento da subdirectora xeral de Orientación Profesional e Relación coas Empresas, Mª Eugenia Pérez, aos visitantes.

Durante o primeiro acto destas xornadas, a subdirectora informou aos orientadores europeos das distintas accións que a Consellería está desenvolver nesta materia, e destacou a posta en marcha do Plan de Emprendemento no Sistema Educativo de Galicia ‘eduemprende’, que  supón unha aposta clara e firme pola implantación na comunidade educativa dos niveis non universitarios da cultura do empredemento, “que favorece a empregabilidade entre o noso alumnado, e mellora a inserción laboral e a creación de emprego”.

Ademais valorou as repercusións positivas de programas como o ‘Academia’, “no que se ofrece a posibilidade de poñer en común diversas experiencias e boas prácticas que no campo da orientación profesional se están a realizar en diferentes países”.

Percorrido polo sistema educativo galego

Tras o acto de recibimento os once profesionais da orientación, procedentes de Francia, Noruega, Eslovenia, Finlandia, Bélxica, Reino Unido e Italia, visitaron o Centro Integrado de Formación Profesional Compostela, acompañados por persoal da Consellería. Nos vindeiros días percorrerán varios centros galegos nos que se imparten ensinanzas de formación profesional. Neles poderán coñecer en primeira persoa os servizos de información e orientación desenvolvidos na nosa Comunidade para axudar aos mozos e mozas no período de transición do sistema educativo ao mundo laboral.

Ademais, os visitantes coñecerán o funcionamento dos centros integrados de formación profesional en Galicia, terán tamén a oportunidade de ver como traballan os servizos de información e orientación no ámbito universitario, e nos Equipos de Orientación Específicos. Para completar a súa estadías estes profesionais visitarán o Museo Pedagóxico de Galicia (MUPEGA), en Santiago de Compostela.

Academia é un proxecto europeo anual de mobilidade, dirixido aos profesionais da Orientación Profesional, principalmente orientadores e profesorado de Formación e Orientación Laboral (FOL); encadrado dentro do Programa Leonardo da Vinci. Está organizado polo Ministerio de Educación, a través do Centro Nacional de Recursos para a Orientación Profesional (CNROP), en colaboración coas Comunidades Autónomas.

Máis de 250 orientadores reúnense hoxe nas II Xornadas de Formación de Xefes dos Departamentos de Orientación, organizadas pola Consellería de Educación e Ordenación Universitaria co fin de actualizar os coñecementos destes profesionais e de acadar un enfoque coordinado e cooperativo do seu traballo. O conselleiro de Educación e Ordenación Universitaria, Xesús Vázquez Abad inaugurou este encontro, que se celebra ao longo do día de hoxe na Escola Galega de Administración Pública (EGAP), en Santiago de Compostela. No acto estivo tamén presente o director xeral de Educación,  Formación Profesional e Innovación Educativa, José Luis Mira.

Durante a súa intervención, o conselleiro lembrou o frutífero da anterior xornada de formación, celebrada en maio deste ano; e destacou o valor desta experiencia para informar aos orientadores “de todas as posibilidades formativas e de todos os servizos postos a disposición do alumnado e das persoas adultas para se formaren e buscaren alternativas profesionais ante calquera continxencia”. “Non queremos facer da orientación educativa e profesional espazos estancos”, dixo; “queremos que todo o servizo de orientación participe dun enfoque que vai máis alá da súa etapa. Camiñar na dirección dunha orientación ao longo da vida”.

O conselleiro de Educación incidiu ademais na importancia da orientación educativa, xa que, “en pleno século XXI, inmersos nunha crise que abanea os cimentos dunha sociedade cada vez máis plural, complexa e diversa, temos que tratar de buscar na educación unha vía de solución”. Neste escenario, engadiu, “o servizo de orientación resulta imprescindible para ir trazando os vieiros e buscando as solucións para que todo o alumnado acade un adecuado desenvolvemento persoal, social e profesional e ao longo de toda a súa vida”.

Coordinar actuacións

Estas xornadas dan mostra do apoio da Consellería de Educación aos equipos de orientación dos centros escolares, como ferramenta fundamental para atención á diversidade do alumnado galego, un labor que debe ser desenvolvido desde a Administración educativa en cooperación cos centros escolares, as familias e o conxunto da sociedade. Así, os asistentes abordarán contidos relacionados coas funcións do departamento de orientación e da  coordinación cos de outros centros, a orientación preventiva, a intervención por programas, o Plan de emprendemento no ensino non universitario ‘Eduemprende’, ou a intervención dos Equipos de Orientación Específicos nos centros educativos. Ademais presentarase a guía de información académica e profesional para o presente curso académico.

O obxectivo é afondar na interpretación e unificación de criterios de actuación derivados das funcións xerais establecidas para os departamentos de orientación, para definir así accións concretas e estratexias de intervención. Ao tempo, este encontro favorecer a actualización científica, o intercambio de experiencias e a formación de grupos de traballo entre estes profesionais.

Neste sentido cómpre lembrar que Galicia foi a primeira comunidade autónoma en regular a orientación educativa e profesional, integrando estes servizos nos propios centros escolares. Ademais, a Consellería de Educación conta cos Equipos de Orientación Específico (EOEs)- un por cada provincia-, que funcionan como servizo de orientación externo aos centros educativos. Este servizo ten unha composición profesional que pretende dar resposta ás necesidades de intervención externa ligadas a aspectos psicopedagóxicos específicos e a cuestións sociais ou mesmo familiares que teñen incidencia no ámbito educativo.

A Consellería de Educación e Ordenación Universitaria vén de por en marcha a colaboración coa Federación Galega de Institucións para o Síndrome de Down (Down Galicia), co fin de prestar apoio especializado ao alumnado afectado por este síndrome ou outras discapacidades intelectuais, escolarizados en centros educativos públicos da Comunidade.

O conselleiro de Educación, Xesús Vázquez Abad, e o presidente de Down Galicia, Delmiro Prieto González, asinaron hoxe un acordo polo que se facilitará a presenza dos especialistas da federación nos centros de ensino que conten con alumnas e alumnos afectados polas devanditas necesidades educativas específicas.

Ao abeiro deste convenio, entre estes profesionais, o profesorado, os orientadores e persoal de servizos complementarios dos centros, estableceranse diversas liñas de colaboración. Deste xeito, as partes comprométense ao intercambio de información sobre o perfil e necesidades educativas do alumnado, para a colaboración no seu proceso de avaliación psicopedagóxica. Así mesmo, o persoal de Down Galicia asesorará ao equipo docente e departamento de orientación da cada colexio e instituto sobre o axuste da intervención educativa necesaria para cada estudante, ademais dos recursos tecnolóxicos e estratexias didácticas e organizativas favorecedoras da inclusión.

O obxectivo é coordinar as accións de todos quen atenden a estes escolares, co fin de facilitarlles a cada un deles unha atención educativa inclusiva e adaptada á súa particular forma de ser e de aprender.

Formación docente

Asemade, e de acordo co hoxe asinado, a Consellería organizará actividades formativas para o profesorado sobre a atención ao alumnado con Síndrome de Down ou discapacidade intelectual, cursos nos que o persoal da Federación poderá participar en calidade de relator.

Co mesmo espírito de colaboración, os profesionais da Consellería poderán participar nas accións de formación organizadas por Down Galicia, na busca do deseño de programas, actuación inclusivas e de boas prácticas para a atención deste alumnado.

Interacción coas familias

Co fin de conseguir unha atención coordinada para os escolares, o profesorado titor manterá unha liña de comunicación permanente con cada familia, que recibirá ademais formación específica por parte de docentes e persoal de Down Galicia.

Ademais, todas as partes deberán colaborar nos procesos de avaliación psicopedagóxica deste alumnado e no deseño das medidas educativas que procedan.

Impulso á innovación pedagóxica

Doutra banda, A Consellería seguirá a estimular os proxectos de innovación pedagóxica que aborden o tratamento e a intervención educativa para estes escolares, no marco do impulso e mellora da calidade do ensino que está a desenvolver a Administración educativa galega.

Así mesmo, e co fin de informar e formar a todas as persoas que interveñen na educación destas persoas, promoverase a elaboración, publicación e difusión de materiais destinados á atención á diversidade, especialmente daqueles materiais que facilitan o acceso ás tecnoloxías da información e da comunicación.

Coa sinatura deste acordo, a Consellería de Educación presta o seu decidido apoio á atención ás necesidades educativas específicas da diversidade do alumnado galego, con profesionais cualificados para o desenvolvemento das capacidades de todos os escolares.

A Consellería de Educación e Ordenación Universitaria está a organizar a I Xornada de Formación dos Xefes e as Xefas dos Departamentos de Orientación do sistema educativo galego, nas que máis de 600 destes profesionais poderán afondar nos principais aspectos desta tarefa fundamental nas escolas e institutos.

O director xeral de Educación, Formación Profesional e Innovación Educativa, José Luis Mira; inaugurou este encontro, que se celebra ao longo do día de hoxe en Santiago de Compostela. Durante a súa intervención, José Luis Mira aproveitou para agradecer aos orientadores o importante traballo diario que desenvolven a prol da convivencia dos centros escolares e do benestar da comunidade educativa.

O director xeral de Educación lembrou ademais que Galicia foi a primeira comunidade autónoma en regular a orientación educativa e profesional, integrando estes servizos nos propios centros escolares. Ademais, a Consellería de Educación conta cos Equipos de Orientación Específico (EOEs)- un por cada provincia-, que funcionan como servizo de orientación externo aos centros educativos. Este servizo ten unha composición profesional que pretende dar resposta ás necesidades de intervención externa ligadas a aspectos psicopedagóxicos específicos e a cuestións sociais ou mesmo familiares que teñen incidencia no ámbito educativo.

Relatores de prestixio

Ao longo do día de hoxe, os xefes e xefas destes departamentos terán a posibilidade de escoitar conferencias de relatores de prestixio no eido da orientación. Así, a xornada comezará co relatorio “O diagnóstico e a atención do alumnado con discapacidade visual”, do que será responsable a pedagoga do centro de recursos educativos da ONCE en Pontevedra, Pilar Carballo Lado. Esta charla servirá para aproximar aos participantes á tarefa de atención educativa que realiza a ONCE, describindo a heteroxeneidade da poboación con discapacidade visual e das súas necesidade, así como as técnicas e recursos dispoñibles para a intervención dos orientadores nestes casos.

Posteriormente, o coordinador e especialista en trastornos xeneralizados do desenvolvemento do EOE de Ourense, Manuel Ojea Rúa, abordará a síndrome de Asperger, co fin de facilitar a súa identificación e tratamento educativo, contando coa colaboración da familia e os servizos sociocomunitarios.

Xa pola tarde, o especialista en discapacidades sensoriais do EOE da Coruña, Serafín Gala Merino; e a mestra de Audición e Linguaxe Fátima María García Doval, explicarán aos asistentes as formas de detección precoz e atención ás necesidades do alumnado con discapacidade auditiva, presentando os recursos máis actuais e menos coñecidos para desenvolver este tipo de intervención educativa. Ademais, Gala Merino afondará na necesidade de facilitar a incorporación ao ámbito laboral das persoas con deficiencia auditiva.

No último relatorio da xornada, o asesor de orientación educativa da Consellería de Educación Manuel Rey Fernández presentou aos asistentes os instrumentos nos que se está a traballar para a recollida de datos relacionados co servizo de orientación, tanto a nivel interno dos centros educativos, como externo, nos EOEs.

Finalmente, o subdirector xeral de Ordenación e Innovación Educativa e Formación do Profesorado, José Graña Carrodeguas; e o xefe de servizo de Ordenación, Innovación e Orientación Educativa, Gonzalo Sanmartín; clausuraron o encontro.

Con esta actividade formativa a Consellería de Educación presta de novo o seu apoio firme e decidido á atención á diversidade no alumnado, un labor que debe ser desenvolvido desde a Administración educativa en cooperación cos centros escolares, as familias e o conxunto da sociedade.

O director xeral de Educación, Formación Profesional e Innovación Educativa, Jose Luis Mira Lema, recibiu esta mañá a 9 orientadores de Francia, Noruega, Eslovenia e Dinamarca; que visitan Galicia esta semana, no marco do programa europeo de mobilidade Academia. O obxectivo desta expedición é coñecer os principais servizos de orientación ofrecidos pola Consellería de Educación para axudar aos mozos e mozas no período de transición do sistema educativo ao mundo laboral.

Jose Luis Mira deu as grazas a estes profesionais por ter escollido a nosa Comunidade como exemplo das boas prácticas nos servizos de orientación profesional, “un dos obxectivos prioritarios da Consellería de Educación e da Unión Europea”.

Non en balde, explicou o director xeral de Educación, ea Consellería conta con servizos de orientación en máis de 600 centros educativos, así como equipos de orientación específicos de ámbito provincial”. Este traballo esténdese, engadiu, “ás institucións universitarias, ás oficinas de orientación financiadas pola Administración Laboral ou pola Administración Local, e ao Instituto Galego das Cualificacións Profesionais”. Deste xeito, “integramos os recursos existentes, facendo accesible ao público o seu potencial orientador, aproveitando a súa interconexión”, destacou Jose Luis Mira.

Este compromiso da Consellería co asesoramento da mocidade entronca, explicou o director xeral, co espírito do programa Academia, de “ofrecer a todos os europeos a posibilidade de adquirir a cualificación e competencia que necesiten para se integrar completamente na sociedade e contribuír á mellora profesional mediante a aprendizaxe permanente”. “Neste marco - engadiu - os servizos de orientación deben proporcionar aos usuarios información e asesoramento sobre formación e emprego, especialmente en momentos clave da súa traxectoria persoal e profesional, como é o da transición do sistema educativo ao mundo laboral”.

Jose Luis Mira fixo ademais unha mención especial ás posibilidade de recoñecemento e acreditación das competencias profesionais obtidas polas persoas ao longo da súa vida, tanto a través do ensino regulado, como da experiencia laboral e de vías non formais de formación, "temática que cobra cada vez maior transcendencia na nosa sociedade e na que están a colaborar tamén os responsables da orientación”.

Colaboración e intercambio de experiencias

Á vista da importancia da súa tarefa, o director xeral de Educación incidiu na necesidade de que estes profesionais traballen  de forma coordinada, e de que se establezan redes integradas de servizos que ofrezan aos usuarios información e asesoramento unificado, global e accesible. Neste mesmo sentido, Jose Luis Mira apostou por que “o noso sistema integrado de información e orientación camiñe ao unísono con outras Comunidades Autónomas de España, e consonancia coas tendencias europeas neste terreo”.

Con este obxectivo, a Consellería de Educación está a traballar con orientadores de diversas comunidades e, especialmente, co Centro Nacional de Recursos para a Orientación Profesional que, como membro da rede europea Euroguidance, sirve de ponte para unificar criterios entre as diversas iniciativas neste campo que se realizan en todo o Estado e en outros países europeos. Ademais, e facendo explícita referencia ao  Academia, o director xeral gabou a importancia deste programa de mobilidade “no que se ofrece a posibilidade de poñer en común diversas experiencias e boas prácticas que se están a realizar en diferentes países”.

A expedición Academia visita Galicia

Desde hoxe e ata o venres unha expedición de 9 orientadores de 4 países europeos percorrerán varios centros galegos nos que se imparten ensinanzas de formación profesional. Neles poderán analizar en primeira persoa os servizos de información e orientación desenvolvidos na nosa Comunidade para axudar aos mozos e mozas no período de transición do sistema educativo ao mundo laboral.

Ademais, os visitantes coñecerán o funcionamento dos centros integrados de formación profesional en Galicia, terán tamén a oportunidade de ver como traballan os servizos de información e orientación no ámbito universitario, de orientación Laboral, no Servizo Galego de Emprego; e outras do ámbito educativo, nos Equipos de Orientación Específicos.

Para completar a súa estadía, estes profesionais europeos da orientación coñecerán as experiencias de atención á diversidade en centros de educación especial e de atención a persoas con discapacidades; e visitarán o Museo Pedagóxico de Galicia (MUPEGA), en Santiago de Compostela.

Aposta pola información e asesoramento

Academia é un proxecto europeo anual de mobilidade, dirixido aos profesionais da Orientación Profesional, principalmente orientadores e profesorado de Formación e Orientación Laboral (FOL); encadrado dentro do Programa Leonardo da Vinci. Está organizado polo Ministerio de Educación, a través do Centro Nacional de Recursos para a Orientación Profesional (CNROP), en colaboración coas Comunidades Autónomas.

Academia constitúe outra das accións a través das que a Consellería de Educación favorece a preparación dos alumnos e alumnas que cursan ciclos formativos para se enfrontar ao mercado de traballo. Grazas a estas iniciativas, os titulados en graos de grao medio e superior de FP acadan altos niveis de empregabilidade, que superan o 80% na maior parte dos casos. Desta forma ademais, a Consellería de Educación pon en valor a imaxe da FP, que supón un auténtico sistema de oportunidades de acceso ao emprego e de mobilidade cara aos estudos universitarios, cuestións fundamentais nestes tempos de crise económica.