O conselleiro de Cultura, Educación e Ordenación Universitaria, Xesús Vázquez Abad, compartiu hoxe parte da xornada cos 135 estudantes de 3º da ESO que están a mellorar as súas competencias lingüísticas en inglés no Centro Residencial Docente de Vigo, nas estadías organizadas pola Consellería no marco do Plan de Potenciación das Linguas Estranxeiras.

Ao longo do verán, ata case catrocentos estudantes de 2º e 3º da ESO participarán nos restantes cursos de inglés e francés que se impartirán neste espazo. Hoxe Vázquez Abad estivo acompañado por responsables da empresa que está a desenvolver os cursos na cidade olívica; o xefe territorial de Educación en Pontevedra, César Pérez Ares; e o director xeral de Educación, Formación Profesional e Innovación Educativa, Manuel Corredoira.

Durante a súa visita o conselleiro lembrou ás alumnas e alumnos a importancia das linguas estranxeiras para se desenvolveren tanto na vida académica como no seu futuro profesional. Neste sentido a Xunta de Galicia mantén un firme compromiso co impulso do ensino dos idiomas, e o vindeiro curso será o terceiro que se aplique o Plan de Potenciación das Linguas Estranxeiras.

Estadías

Os estudantes cos que se reuniu hoxe Vázquez Abad están a participar nas estadías formativas organizadas pola Consellería para que o alumnado de 6º de Primaria, ESO, Bacharelato e Ciclos Formativos mellore as súas competencias en linguas estranxeiras durante o verán. Así este ano convocáronse 2.568prazas para que os estudantes participen en estadías, tanto en ‘vilas inglesas’ en Galicia, como no estranxeiro, en Canadá, Reino Unido, Francia e Alemaña.

Este ano, o programa de estadías contemplou por segunda vez prazas para que estudantes de FP de grao superior que teñan un módulo profesional de lingua estranxeira no currículo do seu ciclo poidan realizar estadías de tres semanas en Canadá.Ademais repítese, por terceira vez, a experiencia de integración dun grupo de 20 estudantes de 1º de bacharelato que durante 4 semanas, a principios de curso no sistema educativo canadense, compartiran aulas cos seus alumnos e profesores.

Impulso ao plurilingüismo

Co fin de que os estudantes galegos poidan ter acceso a un ensino plurilingüe, a Consellería de Educación, a través do devandito Plan, está a desenvolver numerosas iniciativas, entre as que destacan a creación da Rede Galega de Centros Plurilingües e o impulso das seccións bilingües. Cómpre lembrar que a Consellería vén de autorizar,de forma provisional,a autorización de 39 novos centros plurilingües e  do funcionamento de preto de 459 novas seccións bilingües, un 25% máis que o ano pasado, e que se sumarán ás 1.863 que estaban a funcionar no curso 2011/2012.

O conselleiro de Cultura, Educación e Ordenación Universitaria, Xesús Vázquez Abad, comprobou hoxe o funcionamento de dous dos proxectos máis punteiros impulsados polo seu departamento, o Plan de Potenciación das Linguas Estranxeiras e o Proxecto Abalar, nos centros educativos do concello de Guitiriz. Ademais nestas visitas o conselleiro, que estivo acompañado pola delegada da Xunta na provincia, Raquel Arias, aproveitou para achegarse á comunidade educativa dos IES Poeta Díaz Castro e CEIP de Lagostelle, co fin de coñecer en primeira persoa os seus intereses.

Vázquez Abad visitou a primeira hora da mañá o IES Poeta Díaz Castro, que conta con aulas Abalar desde o primeiro curso de implantación do proxecto, o 2010/2011. Deste xeito, 80 alumnas e alumnos contan con cadanseu ordenador ultraportátil para o seu uso na clase. Tal e como explicou o conselleiro, as 4 aulas Abalar do centro supuxeron un investimento de 48.600 euros, co fin de acadar a integración das novas tecnoloxías da información e a comunicación no ensino.

O conselleiro coñeceu ademais, acompañado pola directora Olga Aguiar, as actividades que se desenvolven na biblioteca escolar do centro, inserida no Plan de Mellora de Bibliotecas Escolares desde a súa primeira edición, para as que a Consellería leva achegado 27.895 euros, no marco do Plan LÍA 2010/2015 de bibliotecas escolares para a Lectura, a Información, e a Aprendizaxe.

Cómpre lembrar, ademais, que o IES Poeta Díaz Castro foi un dos primeiros 144 centros educativos de Galicia en asinar un contrato-programa coa Consellería para a mellora da calidade do ensino. En concreto, este instituto desenvolve a primeira das liñas de actuación desta iniciativa, a de reforzo, orientación e apoio (PROA), na modalidade de acompañamento fóra do horario lectivo, co que se procura potenciar a aprendizaxe e o rendemento de 16 estudantes do primeiro ciclo da ESO, mediante a adquisición de hábitos de organización e constancia no traballo, o alento ao estudo, e o fornecemento dos coñecementos e das destrezas nas áreas instrumentais. Para o desenvolvemento desta iniciativa, que conta coa implicación directa de dous docentes do centro no acompañamento dos alumnos, a Consellería destinou ao instituto unha achega de 11.500 euros.

CEIP de Lagostelle

Vázquez Abad visitou tamén o CEIP de Lagostelle, que forma parte da rede de 110 Centros Plurilingües de Galicia. Xunto ao director do centro, Domingo Lodeiro, visitou a aula dixital da que se dotou ao centro grazas ao convenio con Red.es, polo que o presente curso foron instalados 782 kits de aula dixital en 645 colexios que non forman parte do Abalar.

Neste centro tivo tamén a oportunidade de coñecer as actividades de fomento do hábito lector entre os máis novos que se están a desenvolver a través da biblioteca escolar – no Plan de Mellora desde o curso 2010/2011-, á que a Consellería leva achegado 15.225 euros.

Melloras nos centros de Guitiriz

Con estas visitas o conselleiro reafirmou o compromiso que o departamento que dirixe mantén cos centros educativos do concello de Guitiriz, nos que ten investido preto de 114.000 euros para obras de reforma e mellora, dos que máis de 85.200 euros se destinaron aos dous centros hoxe visitados, ademais dos traballos desenvolvidos no outro colexio da localidade, o CEIP Santo Estevo de Parga.

Tal e como explicou Vázquez Abad, grazas a este investimento, remodelouse a cociña do IES Poeta Díaz Castro, onde tamén se realizaron melloras nos despachos e na rede sanitaria e de incendios, que redundan no beneficio dos seus 207 alumnas e alumnos.

No caso, do CEIP de Lagostelle, realizáronse traballos de reforma na instalación eléctrica, nos aseos de infantil e nos baños da planta baixa, e na cuberta do colexio; melloras das que se benefician os 211 estudantes do centro.

Vázquez Abad lembrou ademais que a Consellería inviste máis de 616.500 euros para a prestación dos servizos de transporte escolar en ambos os centros, e de comedor escolar no CEIP de Lagostelle.

O conselleiro de Cultura, Educación e Ordenación Universitaria, Xesús Vázquez Abad, entregou hoxe os certificados aos 16 docentes de 12 países da Unión Europea que dentro do programa Lifelong Learning Programme estiveron en Galicia ao longo desta semana. Unha visita que volve a dar conta da importancia que ten o Plan de Potenciación das Linguas Estranxeiras desenvolvido e impulsado pola Consellería e que é un referente tanto a nivel nacional como europeo.

Deste xeito os profesores, directores e inspectores do campo do ensino das linguas estranxeiras da Unión Europea, realizaron desde o luns e ata hoxe a visita de estudos Plurilingualism in the Galician Educational System integrada no Programa de Aprendizaxe Permanente, do Parlamento e o Consello Europeo, que se desenvolve desde o 2007 ata o ano que ven.

A todos os integrantes desta convocatoria o conselleiro dirixiuse hoxe sinalando que “estou convencido que de os nosos docentes, alumnado e técnicos puxeron todo da súa parte para que poidan levarse unha idea clara de como funciona o plurilingüÍsmo en Galicia: asociando estudo de linguas, innovación e aprendizaxe autónomo” ao tempo que aproveitou para recordar que “son os docentes un dos piares básicos nos que se apoia este plan. Sen eles, o seu compromiso, entrega, dedicación e esforzo non sería posible estar formando ao noso alumnado nas dúas linguas oficiais do estado e ademais nun terceiro idioma estranxeiro”.

Ao longo destes días os participantes no encontro visitaron os IES de Ames; CPI Plurilingüe do Dices; CEIP Plurilingüe Alenxandre Rodríguez Cadarso; o IES Virxe do Mar; o IES San Clemente; o IES Xelmírez I e o IES Plurilingüe Rosalía de Castro. En todos os centros mantiveron reunións de traballo co profesorado e intercambiaron experiencias sobre a iniciativa galega, así como sobre o tratamento integrado de linguas. Ademais participaron en mesas redondas con profesorado e alumnado.

Programa europeo

Cómpre recordar que dito programa interveñen coordinadores de relacións internacionais, directores de centros, asesores, orientadores pedagóxicos, profesores universitarios, investigadores e profesorado das linguas estranxeiras das nacionalidades alemán, belga, británica, checa, finlandesa, francesa, húngara, irlandesa, italiana, polaca, portuguesa e sueca.

O proxecto está integrado no programa Lifelong Learnig Programme, coordinado polo European Centre for the Development of Vocational Training (CEDEFOP), e ten como obxectivo contribuír ao desenvolvemento de política se cooperación en materia de aprendizaxe permanente en Europa.

Expectativas superadas

A Consellería xa ten superado amplamente as expectativas establecidas nun primeiro momento para este Plan. De feito, neste curso 2011/2012 hai 110 centros plurilingües en Galicia, 52 máis que no 2010/2011; e 1.863 seccións bilingües, 344 novas respecto ao curso anterior. Así, só a través destas iniciativas, máis de 40.800 estudantes e profesores beneficiaranse dun ensino plurilingüe, o que supón superar as previsións anunciadas inicialmente para o Plan, polas que se estimaba que 40.000 galegas e galegos terían mellorado as súas competencias noutros idiomas ao final da lexislatura.

O departamento dirixido por Xesús Vázquez Abad xa iniciou a terceira fase do Plan, o que supón reforzar o seu compromiso coa capacitación das galegas e galegos nas linguas estranxeiras, competencia que se está a amosar fundamental en eidos como o do acceso ao mercado laboral.

Membros da comunidade educativa de centros con seccións bilingües e plurilingües analizaron as vantaxes do Plan de Potenciación das Linguas Estranxeiras, posto en marcha pola Consellería de Cultura, Educación e Ordenación Universitaria, no marco do congreso que se está a celebrar na Mostra do Ensino 2012. Na sesión da tarde deste evento, organizado polo departamento que dirixe Xesús Vázquez Abad, docentes e un auxiliar de conversa nativo intercambiaron experiencias e boas prácticas desenvolvidas a partires da aplicación do devandito plan nos seus respectivos centros.

Tal e como explicou o subdirector xeral de Ordenación, Innovación Educativa e Formación do Profesorado, Manuel Vila – que moderou a mesa redonda-, Galicia duplicou do curso pasado a este o número de centros plurilingües, que superan xa o centenar en toda a comunidade autónoma. Actualmente, “hai máis de 450 centros en Galicia con seccións bilingües e 110 plurilingües, o que supón, en total, máis de 40.000 alumnos en máis de 560 centros”, explicou . “Estamos moi satisfeitos, porque xa cumprimos o obxectivo da lexislatura e aínda nos queda un ano”, engadiu Vila, quen destacou a “implicación enorme do profesorado” para poder lograr esta meta, que permite que “o 17% de todos os alumnos de Galicia estea en programas plurilingües”.

Experiencias en centros

No debate participaron diversos expertos, como Manuela Iglesias Baltar, directora do CEIP Vilar de Barrio, en Ourense, quen expuxo o modelo que se aplica no seu centro, na contorna rural e con 42 alumnos, que reciben ensino plurilingüe desde o curso pasado, ademais de estar incluídos no Proxecto Abalar e contar cunha aula virtual.

Pola súa banda, Hilda Fraga López, coordinadora do programa plurilingüe do IES Rafael Dieste da Coruña, asegurou que esta circunstancia “dálle carácter ao centro” e permite, entre outras vantaxes, mellorar as relacións internas.  “Son profesora de inglés desde hai dez anos. Agora teño alumnos que non se cohiben, que usan o inglés de forma máis natural, que son falantes efectivos dunha lingua estranxeira”, concluíu Fraga.

Segundo, Estevan Cochenet , auxiliar de conversa da Escola Oficial de Idiomas de Pontevedra, estas institucións “son fantásticos centros de ensino de adultos” e defendeu o papel dos lectores coma el, que tratan de “garantir a espontaneidade, de que non haxa momentos en branco e de que todos falen; en definitiva, de perderlle o medo á lingua”. “Cada lector leva un anaco do seu país, con cancións, debates, reportaxes de televisión…  ata produtos gastronómicos, polo que o alumno cóllelle agarimo ao idioma”, relatou Cochenet.

A visión dos inspectores achegouna Isabel Serna Masiá, quen destacou entre os puntos fortes deste sistema a implicación de mestres e profesores, os procesos de innovación e a incorporación de novas tecnoloxías, a satisfacción obtida por alumnos e familias e, en definitiva, conseguir a democratización da competencia en comunicación lingüística.Ademais, realizou unha serie de propostas de mellora, que inclúen incrementar a cooperación, incluír auxiliares de conversa, implicar ás familias, fomentar o equipo de dinamización lingüística, elaborar un currículo integrado e renovar o proceso de ensino do profesorado.

Jesús Fidalgo Fernández, profesor de Física e Química no IES de Ames, recordou a implantación das seccións bilingües hai anos, nas que ao principio o profesorado “foi nadando como sabía, con mellor ou peor estilo” para poder dar as clases. Pola súa experiencia, impartir física e química en inglés achega unha “utilidade á educación, ao ‘para que me vale isto?’ que preguntan os alumnos”, o que ademais se pode medir en resultados externos como, por exemplo, a mellora de notas en inglés dos escolares en selectividade. “O importante non é ensinar en inglés, senón con e a través do inglés”, sentenciou.

Programa para o sábado

A xornada final da Mostra do Ensino e o Congreso estará dedicada a Diversidade e familia, e será de portas abertas á cidadanía. Ás 10 da mañá haberá una mesa redonda sobre “Convivencia, un labor de todos”, na que intervirán o xuíz José Antonio Vázquez Taín; o presidente de Confapa Galicia, Virxilio Gantes Gómez; o presidente de Congapa,  Jorge Javier Villarino Rodríguez-Rey; o director do Centro de Formación e Recursos de Ferrol, Manuel Losada Cabanas; e a avogada Beatriz Seijo Méndez. Esta mesa será moderada polo secretario xeral técnico da Consellería de Cultura, Educación e Ordenación Universitaria da Xunta de Galicia, Jesús Oitavén Barcala.

Ás doce celebrarase outra mesa redonda co tema “Diversidade nas aulas: a inclusión como oportunidade para o sistema educativo”. Intervirán nela o presidente de COGAMI, Anxo Queiruga Vila; o director do centro de recursos educativos da Once en Pontevedra José Ángel Abraldes Rodeiro; o presidente de Down Galicia, Delmiro Prieto González; e Manuel Rei Fernández, da Dirección Xeral de Educación, FP e Innovación Educativa. Esta mesa estará moderada polo xornalista Manuel Ferreiro. Posteriormente ás 14 horas procederase á clausura deste evento.