O conselleiro de Educación e Ordenación Universitaria, Xesús Vázquez Abad, inaugurou o acto oficial de acollida aos 361 dos novos auxiliares de conversa que no presente curso apoiarán aos estudantes e profesores na aprendizaxe de novas linguas.

No acto de recepción tamén estivo presente o director xeral de Educación, Formación Profesional e Innovación Educativa, José Luis Mira, e o subdirector xeral de Ordenación, Innovación Educativa e Formación do Profesorado, Manuel Vila. Xunto a eles estiveron un asesor técnico docente do Ministerio de Educación e unha asesora de idiomas da Consellería, Miguel García Caraballo e Elena Castro Villalón, respectivamente. Todos eles deron unha cordial benvida aos novos auxiliares de conversa, que asistiron acompañados polos membros dos equipos dos diferentes centros educativos receptores.

Nesta benvida o conselleiro agradeceu tanto a auxiliares como aos profesores titores dos centros educativos galegos o seu traballo para contribuír á mellora das competencias do alumnado galego en linguas estranxeiras. “Temos un binomio perfecto: auxiliares de conversa nas aulas e titores que os guían no seu tránsito por elas. Desde a Consellería de Educación somos plenamente conscientes de que e o traballo de cada docente se verá reforzado pola presenza destes nativos de outros países que hoxe nos acompañan”, destacou. Por outra parte, fixo referencia ao importante papel que xogan os 18 séniors, profesores nativos xubilados que prestarán o seu apoio en centros plurilingües do rural galego.

A todos eles Vázquez Abad ofreceulles o noso idioma, costumes, cultura, e “o máis valioso que temos, as nosas nenas e nenos, que son o  expoñente máis puro, sincero e directo dos seus maiores”. Ademais, o conselleiro invitou ao auxiliares a contar cadansúas historias na súa lingua propia. “O noso obxectivo é que o alumnado galego por comprendela nesa mesma lingua”, dixo.

Auxiliares de conversa

Durante a xornada os novos auxiliares de conversa recibiron información detallada sobre o Plan de Potenciación de Linguas Estranxeiras, impulsado polo departamento educativo da Xunta de Galicia. Cómpre recordar que este plan, destinado ao impulso e mellora das competencias idiomáticas dos estudantes galegos, gozou de gran acollida por parte dos centros educativos dependentes da Consellería. De feito a estratexia de fomento do plurilingüismo desenvolvida pola Consellería de Educación supera xa este curso, con máis de 40.800, o número de cidadáns beneficiados previstos para o final da lexislatura

O número de auxiliares de conversa que desenvolverán a súa labor nos 110 centros plurilingües públicos, 1.863 seccións bilingües e Escolas Oficiais de Idiomas, incrementouse chegando a un total de 339 auxiliares, isto supón un 30 % mais ca no pasado curso, e de máis dun 400% desde o comezo desta lexislatura.

Ademais dos auxiliares de conversa, o presente curso académico tamén contará co apoio de 18 mestres xubilados, que desenvolveran a súa labor de apoio a aprendizaxe nos centros plurilingües das zonas rurais.

Aposta polas linguas estranxeiras

Outra das novidades é que grazas aos distintos convenios de colaboración acadados pola Consellería, incorporaranse 3 profesores estadounidenses visitantes, que apoiaran o ensino do inglés en centros galegos durante todo o ano académico. Tamén se realizou un convenio coa Academie de Amiens, polo cal se incorporará 1 novo mestre, que pretende reforzar as competencias dos alumnos en lingua francesa.

Deste xeito e tendo en conta os auxiliares, os sénior e as devanditas colaboracións, no presente curso 2011/2012 serán 361 as persoas nativas que colaboren nos centros de ensino de Galicia, un 438 % máis das que había ao inicio da lexislatura

Entre todos os principios que rexen as actuacións do Plan Galego de Potenciación de Linguas Estranxeiras, cabe destacar a formación de calidade para todas as galegas e galegos, que desexen mellorar as súas competencias idiomáticas noutras linguas, independentemente do seu lugar e recursos económicos. Deste xeito, o departamento educativo dirixido por Xesús Vázquez Abad, demostra a súa aposta pola educación pública de calidade, a través da posta en marcha de programas de formación lingüística que oferten as melloras oportunidades posibles para todos os cidadáns galegos.

A Consellería de Educación e Ordenación Universitaria continúa co camiño de renovación e integración dos espazos web temáticos no seu Portal Educativo. No marco desta actuación presenta a nova web de linguas estranxeiras, un sitio temático que recolle toda a información e recursos relevantes relacionados co ámbito das linguas estranxeiras, mellorando as canles de comunicación con toda a comunidade educativa.

A actuación forma parte do proxecto global de integración dos Sitios Temáticos no Portal Educativo, grazas ao que se irán renovando e integrando os existentes ao tempo que se crearán os novos espazos de Innovación Educativa, Atención á Diversidade e Orientación, Lexislación e Educación Viaria.

Fácil acceso á información

Deste xeito, a través desta nova web, os interesados poden coñecer todo o relativo ás iniciativas postas en marcha pola Consellería para a potenciación das linguas estranxeiras.Desde a súa portada pódese acceder directamente a calquera das súas seccións, dende programas ata recursos, pasando por formación, normativa e novas. Ademais disto, conta cos datos de contacto desta sección e ofrece a posibilidade de seleccionar subscricións RSS ás novas xeradas na web.

A integración no portal educativo optimiza o xeito de xestionar a información ofrecida e facilita a pescuda temática mediante a utilización dun mesmo buscador común a todos os espazos temáticos integrados. O feito de formar parte dunha mesma estrutura mellorará a accesibilidade e facilitará a utilización dos recursos e da información que se ofrece á comunidade educativa.

Este portal é unha nova demostración do traballo de actualización dos espazos web que esta a desenvolver a Consellería, os cales supoñen unha clara aposta polas novas tecnoloxías e a transparencia na información pública.

O novo acceso non só beneficiará a todas as galegas e galegos, senón que pasa a ser un novo punto de información para os profesionais da educación, permitíndolles un acceso máis rápido á información que precisan para desenvolver o seu labor educativo. Neste punto a Consellería destaca a profesionalidade e bo facer do profesorado e o seu constante interese a prol da Educación, que é clave na formación dos estudantes galegos

O conselleiro de Educación e Ordenación Universitaria, Xesús Vázquez Abad, destacou hoxe no Parlamento de Galicia a participación dos centros públicos nos proxecto educativos punteiros que está a desenvolver o departamento que dirixe, nomeadamente no Proxecto Abalar e no Plan de Potenciación das Linguas Estranxeiras.

Neste sentido, Vázquez Abad lembrou que o 79% das aulas Abalar –estratexia de integración das tecnoloxías da información e a comunicación no sistema educativo- son públicas, fronte ao 21% de aulas concertadas. Ademais, explicou que “no curso 2011-2012 a Rede de Centros Abalar está composta por 374 centros, dos que 287 son públicos e 87 son concertados”, o que significa que “máis do 76% dos centros participantes son públicos”.

Respecto do Plan de Potenciación das Linguas Estranxeiras, o conselleiro explicou o ensino público se beneficia do 87,75% do orzamento destinado pola Consellería a potenciar os idiomas estranxeiros, fronte ao 12,25% que lle corresponde á concertada.

Con todo, Vázquez Abad fixo fincapé en que “é unha obriga da Administración educativa, do Estado e da nosa Comunidade, ofrecer un modelo educativo común para o conxunto dos escolares”. “Por tanto – engadiu- a Consellería de Educación estende o seu modelo educativo e garante aos estudantes da pública e aos estudantes da concertada o acceso aos proxectos que apostan pola integración das TIC e pola potenciación das linguas estranxeiras; principais retos educativos nos tempos actuais”.

Educación universal e gratuíta

O titular do departamento educativo da Xunta de Galicia quixo aproveitar a súa intervención no pleno do Parlamento para incidir na necesidade de traballar pola mellora da calidade do ensino sostido con fondos públicos no seu conxunto. Neste sentido lembrou que “a Constitución e a lexislación educativa vixente amparan un sistema educativo no que coexisten unha rede de centros públicos e unha rede de centros privados-concertados. Cada unha delas cumpre coa súa importante función e así o entenden os pais e as nais”.

Tal e como explicou, a Consellería destina ao ensino concertado o 11% do total do seu orzamento, co que se atende ao alumnado que estuda nestes centros,  entre un 27 e un 28 % do total de Galicia. A dotación orzamentaria a estes centros prodúcese, dixo, “porque así o establece a legalidade”, desde que quedara recollido no Real Decreto 2377/1985 do 18 de decembro, polo que se aproba o Regulamento de Normas Básicas sobre concertos educativos. “Hai que lembrar que para a universalización da educación ata os 16 anos, nun determinado momento, o Estado tivo que contar co sector privado para poder facer en poucos anos un crecemento espectacular do servizo educativo”, unha medida que foi adoptada por un goberno socialista.

Ademais, o conselleiro recordou que desde o inicio da lexislatura ata o curso 2010/2011 o orzamento achegado pola consellería ao ensino concertado experimentou un descenso  de 8,4 millóns de euros, fronte ao incremento de 205 unidades concertadas que se produciu nos anos do Goberno Bipartito.