A Consellería de Educación e Ordenación Universitaria ven de dar novos pasos de cara a lograr unha maior calidade, a través de conversas e un protocolo cos concellos de Berlín e a Acádemie de Amiens, respectivamente, a prol da adquisición de coñecementos e da empregabilidade.
Futuro acordo con concello de Berlín
Respecto do encontro mantido hai uns días entre o conselleiro e unha representación do concello de Berlín Vázquez Abad recordou que “estivemos a falar sobre o desenvolvemento dun programa de acollida recíproca do profesorado e alumnado de FP entre centros de ambas poboacións. A finalidade do acordo é o de lograr o perfeccionamento dos docentes e que este repercuta positivamente no proceso de aprendizaxe dos estudantes que tamén poderán mellorar no coñecemento de linguas”.
Asemade dixo que “o obxectivo de estas accións é favorecer a empregabilidade e a calidade das ensinanzas de FP. Ao mesmo tempo búscase a promoción da cooperación entre os centros de ensino e incrementar o intercambio de información e experiencias sobre cuestións comúns nos sistemas de formación dos estados membros da Comunidade Europea”.
Os protocolos
No encontro entre ambos representantes falouse sobre que cada unha das partes asinantes seleccionará centros en Berlín e Galicia, en distintos sectores profesionais, para acoller as estadías dun número determinado de profesores e alumnos.
Esta é outra das accións que está a ser desenvolvida desde a Consellería de Educación para fomentar a empregabilidade do alumnado de FP.
Académie de Amiens
Por outra banda o conselleiro ven de asinar un protocolo de cooperación coa Académie de Amiens para o desenvolvemento dun programa de intercambios escolares e distintas accións de cooperación a prol de reforzar e impulsar os nexos de unión entre ambas institucións.
Respecto de dito acordo o conselleiro asegurou que “procuramos reforzar a colaboración entre ambas institucións, englobadas dentro da Unión Europea. Cumprimos así co indicado no Marco común europeo de referencia para as linguas (MCERL) no que se asegura o desenvolvemento e coñecemento das linguas e das culturas europeas que constitúen un elemento fundamental ao servizo da educación das mozas e mozos europeos. E o principal obxectivo é a promoción e desenvolvemento das linguas a través dun programas de intercambio, visitas e encontros entre grupos de estudantes e profesores de calquera nivel e tipo de ensinanza”, ao que engadiu que “co fin de establecer a estrutura para o desenvolvemento de ditas actuacións tamén se promoverá a realización de proxectos e guías de actuacións entre centros escolares de Galicia e Amiens”.
Adquisición de competencias lingüísticas
“Este é un protocolo que permitirá que se leve a cabo un traballo conxunto sobre temas educativos, profesionais e culturais de interese común entre as poboacións dos organismos asinantes, en beneficio das correspondentes comunidades educativas”, dixo Vázquez Abad, ao tempo que recordou que durante o encontro co presidente da Académie de Amiens, Jean-Louis Mucchielle, tamén se puxo en valor importancia que ten a Formación Profesional na actualidade. Así, e co fin de darlle un novo impulso a estas ensinanzas, sinalou que “o acordo asinado tamén inclúe a promoción de sinerxías e a realización de accións conxuntas en torno a estes estudos, favorecendo o intercambio de estudantes e de profesores nas empresas de ambas rexións”.
No caso do acordo coa Académie este inclúe a organización de programas recíprocos lingüísticos e pedagóxicos de perfeccionamento para os profesores de ensinanza bilingüe a través de formación inicial e continua de ditos mestres. Do mesmo xeito promovese a mobilidade de profesores a través de estancias profesionais, da acollida de auxiliares de conversas en ambas zonas europeas do programa “Julio Verne”. Ademais o documento de cooperación tamén inclúe o impulso á mobilidade individual dos estudantes en forma de intercambio por un período máximo de catro semanas, durante as correspondentes vacacións escolares.
A través das citadas conversas e do protocolo asinado, a Consellería continúa a dar conta do traballo que desenvolve a prol da Educación, e neste caso no impulso da adquisición de competencias lingüísticas e da Formación Profesional, buscando o maior abanico de oportunidades tanto para os estudantes como para os profesores, o que repercutira no beneficio de toda a sociedade.
