Projeto 10.000 calcomanias da Galiza. Tattoos da Galiza.

10.000 decalcomanias para a infância e a juventude!

O Clube da Língua do IES Marco do Cambalhom, o projeto educativo Semente de Compostela e o local social A Gentalha do Pichel organizam o projeto “Tattoos da Galiza: 10.000 decalcomanias para a infância e a juventude” com o objetivo de distribuír 10 modelos de tatuagens temporais –decalcomanias- com motivos de desenho gráfico da história da Galiza.

Em passados cursos, o Clube da Língua do IES Marco do Cambalhom de Vila de Cruzes tem recolhido mais de 500 fotografias de tatuagens da Galiza, em galego ou de tema galego. O projeto “Tattoos da Galiza” conseguiu visibilizar tatuagens de centos de persoas que imprimirom sobre a pel a identidade galega através das redes sociais e com a publicaçom dum livro, “Tattoos da Galiza”, fruto dum processo de micromecenado que envolveu centos de persoas.

Nesta ligaçom podem-se ver as fotografías do projeto: http://www.blogoteca.com/tattoosdagaliza/

A Escola de Ensino Galego Semente é um projeto autogestionado que fai da criaçom de materiais próprios –elaborados pola comunidade educativa, alunado e persoas colaboradoras- um dos recursos de dinamizaçom da língua entre a infância mais ativos da nossa sociedade. Se bem o impulso deste projeto tem como co-protagonista a Escola de Primário de Compostela, a Semente dispóm umha rede de escolas –Vigo, Lugo, a Corunha, Ames, Trasancos, Compostela,…- que participarám no processo de socializaçom deste projeto.

Neste curso 2019-2020, o Clube da Língua e a Escola de Ensino Galego Semente aliam-se para elaborar decalcomanias ou tatuagens temporais em galego e de tema galego para a infância e a juventude galega. E procuramos a colaboraçom da Comisom de História da Associaçom A Gentalha do Pichel, como terceiro pé, o do associacionismo do movimento socio-cultural galego.

A passada quarta-feira, mércores, 18 de dezembro o Clube da Língua, a Semente e a Gentalha do Pichel reunirom-se em Compostela para decidir as dez imagens históricas que se vam converter em decalcomanias, das que se farám 10.000 exemplares que se ham distribuír por todo o país.

Os dez desenhos escolhidos som:

-Um petroglifo.
-A caetra galaica
-A bandeira sueva.
- Umha ferrenha de pandeireta.
- Um tojo.
- O escudo da sereia de Castelao
- Um polbo com umha gaita
- O cartaz a favor do estatuto de Autonomia de 1936 realizado por Camilo Diaz Baliño
-Um mapa da Galiza com a bandeira galega da estrela.
- A boca dos Rolling Stones com a bandeira galega na língua.

Desde o ponto de vista sociolinguístico, esta atividade quer colocar diante dos olhos da infância e a mocidade a importáncia da comunicaçom visual desde umha perspetiva galega. Esta intervençom procura articular um processo de comunicaçom social na nossa língua para a visibilizaçom da referentes visuais, icónicos, plásticos e de desenho gráfico próprios da história e actualidade da Galiza.

Neste sentido, queremos projetar a nossa língua como elemento clave na construçom do imaginário coletivo galego, abrindo um processo de participaçom social que envolva comunidades educativas –do IES Marco do Cambalhom e da Semente- num primeiro círculo expansivo, para abrir a rede desde o local ao global, implicando o maior número de agentes sociais possível: movimento social, instituiçons, medios de comunicaçom, redes sociais, etc.

Objetivos

- Activar um processo de comunicaçom social em galego implicando a comunidade educativa e múltiples agentes sociais.

- Conhecer alguns dos principais desenhos gráficos, elementos artísticos e iconas do imaginário artístico coletivo galego, desde os petroglifos até os graffitis contemporáneos, passando polo desenho gráfico de Castelao e o primeiro nacionalismo galego ou a imagineria medieval.

- Seleccionar um número de imagens e desenhos da história e actualidade da Galiza.

- Adaptar para público infantil e juvenil as imagens selecionadas.

- Converter esses desenhos em decalques, decalcomanias ou tatuagens temporais para a pel, criando umha coleçom de “Tattoos da Galiza”.

- Visibilizar socialmente os valores do patrimonio gráfico e icónico galego .

- Distribuír milheiros de decalcomanias em galego e de tema galego entre a gente joven da Galiza