Ola a todos:

Con motivo do 50 aniversario do colexio, o alumnado da ESO, especialmente o de 1º da ESO, participou nunha acción sorpresiva, organizada e grupal onde representaban un baile previamente aprendido, esta é a esencia do flashmob.

Catro alumnos sen previo aviso comenzaron a bailar e pasados uns segundos os que estaban ao redor foron sumándose á coreografía. O alumnado de primaria que nese momento estaba no patio foron os espectadores.

Esta actividade forma parte de varios proxectos: PVAD (proxecto de vida activa e deportiva), EduSaúde, Convive-T, Iguala-T e Inclúe-T.

APÍPOLIS

     No día de onte o noso alumnado de segundo de primaria desfrutou dunha xornada en Apípolis.

Deixámosvos en adxuntos un video que é un pequeno resumo do ben que o pasaron e do moito que aprendimos sobre as abellas .

Recórdase que como consecuencia da aplicación da ORDE do 27 de decembro de 2022 de modificación da Orde do 20 de maio de 2022 pola que se aproba o calendario escolar para o curso 2022/23 nos centros docentes sostidos con fondos públicos na Comunidade Autónoma de Galicia (ver ficheiro adxunto), no mes de xuño xa non hai un período destinado á recuperación das materias suspensas. Os exames de recuperación levaranse a cabo seguindo os criterios establecidos por cada departamento nas programacións didácticas.

Segundo afirma a orde mencionada anteriormente, "a sesión da terceira avaliación parcial da educación secundaria obrigatoria deberá coincidir coa sesión de avaliación final", de modo que volven a unificarse a 3ª avaliación e a avaliación ordinaria.

Cómpre recordar que as materias pendentes que non se superen iranse sumando ás do curso ordinario suspensas a efectos de promoción de curso e de titulación en 4º de ESO.

As titorías entregarán o boletín de pendentes ao alumnado o venres 12 de maio, ás 11:00h, nas súas aulas de referencia.

O departamento de Educación Física promoverá varias iniciativas durante a Semana da Ciencia.

• Enquisa sobre a actividade física diaria e a importancia que o alumnado lle outorga a este hábito
• Exposición dos datos xerais das probas DAFIS que correlacionan os parámetros antropométricos e funcionais coa saúde.
• Baremo de saúde. O alumnado poderá facer unha estimación do seu nivel de saúde a través de dous elementos esenciais: a dieta e o exercicio físico regular.
• Actuación no caso dunha parada cardíaca. Compártese o algoritmo de SVB (soporte vital básico) que o alumnado da ESO practicou durante a semana do RCP. Este elemento serve de complemento á exposición sobre enfermidades cardíacas que expón o departamento de Bioloxía.

Publicada a convocatoria de bolsas e axudas para alumnado con necesidades específicas de apoio educativo para o curso 2023-2024.

Prazo de presentación de solicitudes: do 8 de maio ao 20 de setembro de 2023.

O alumnado de 2º de ESO desenvolveu un proxecto de matemáticas consistente en explicar conceptos matemáticos mediante un vídeo stopmotion. A actividade forma parte do proxecto Polos Creativos e para a confección dos vídeos empregáronse as tablets e trípodes que forman parte da dotación material do devandito proxecto.

Os produtos finais pódense visualizar nos arquivos adxuntos a esta publicación, e son os seguintes:

• Extracción de factor común: Lía, Sara, Lucía R. e Raquel.
• Identidades notables: Naiara, Aitana, Carolina M. e Carolina L.
• Cálculo de potencias: Julia, Antía, Uxía e Mario.
• Signo de potencias de base negativa: Daniela, Leyre, Lucía A. e Lola.
• Teorema de Pitágoras: temos a versión de Bruno, Benjamín, David e Aarón, e a de Rosana, Xiana, Aitor e Lucas.
• Valor dunha expresión alxebraica: Catalina, Sarai, Uxía e Lucía S.

Nesta segunda feira, 24 de abril, o alumnado de 1º ESO, acompañado dos compañeiros e compañeiras de 3º ESO da materia de Cultura Clásica e mais de 4º ESO da materia de Latín, acudiu aos restos arqueolóxicos do campamento romano de Aquis Querquennis e mais ao Parque Natural do Xurés, nos concellos de Bande e Lobios, acompañado polos docentes Diana, Tania, Rubén, Carlos, José e Anxo.

Á mañá, desprazámonos ao Centro de Interpretación de Aquis Querquennis, no municipio de Bande, aberto exclusivamente para o noso alumnado. A seguir, todo el, guiado por algunhas compañeiras e compañeiros de 1º ESO e de 4º ESO Latín, coñeceu as principais características dos restos arqueolóxicos do campamento militar e mais da mansio que se sitúa nas inmediacións.

Na interpretación dos diversos elementos do campamento militar participaron: Carla P., Oriana, Vanesa, Sofía e Manuel, dirixidos polo profesor Rubén. Nas explicacións do conxunto monumental do campamento e a mansión romana participou parte do alumnado de 1º ESO:

Ao mediodía, o xantar tivo lugar na desembocadura do río Caldo, ao carón da piscina termal. Unha vez rematado, o alumnado aproveitou a oportunidade de probar as augas termais da piscina e mais das pozas que se forman no propio río.

Á tarde, o alumnado dirixiuse aos restos arqueolóxicos doutra mansio, Aquis Originis, onde tamén recibiu as explicacións dos guías intérpretes de 1º ESO. Seguindo o trazado da vía romana XVIII, que unía as cidades romanas de Bracara Augusta (Braga) e mais Asturica Augusta (Astorga).

Os e as participantes nesta ruta puideron ascender por ela até a chegada a un punto medio no camiño, ao carón dos miliarios que se foran recollendo durante as escavacións e estudos arqueolóxicos realizados na zona. Alí mesmo, o alumnado de 1º ESO realizou a interpretación dos principais valores naturais do Parque Natural do Xurés.

O regreso a Baiona tivo lugar ás 21.30 horas, despois dunha xornada inesquecíbel para o noso alumnado e para o profesorado acompañante.

O alumnado de 3º ESO que participa na Spring Week, un programa de inmersión lingüística en inglés, xa está desde a tarde do 23 de abril nas instalacións do Centro Peares. Alí permanecerán ata o 29 de abril, realizando actividades prácticas e obradoiros, xunto con xogos, deporte... co fin de mellorar a súa competencia na lingua inglesa.

 MASTER CHEF JUNIOR

Last term some of our 2nd Eso students participated in a project called “Master Chef Junior”. It was a fantastic project in which we enjoyed both, improving our language skills and learning about other countries' culinary culture. We’ve learned about cooking utensils and procedures from the recipes of famous British chefs like Jamie Oliver.

Thanks to Bernice, our teaching assistant, not only did we discover new Filipino dishes but  also shared our traditional Galician recipes with her. We even learnt about typical Easter dishes around the world!

At the end of the project, we were able to write our own recipes and record a video in English showing how to cook, step by step, some delicious desserts. With all the recipes, we’ve created a cookery book and ,today, we had a wonderful time watching all the videos in class.

I would like to thank Bernice and all the students that participated in the project for their enthusiasm and hard work, and their families for their support. 

We are looking forward to our next project!

O 14 de abril de 2023 o alumnado de 2º ESO e 4º ESO realizou unha visita guiada ao Real Mosteiro de Oia. Nesta actividade os alumnos e alumnas puideron coñecer os feitos máis significativos dos 600 anos nos que estivo activa esta institución, a cal foi o lugar de residencia dos coñecidos como "monxes guerreiros", ata chegar a converterse durante a Guerra Civil Española nun campo de concentración do bando sublevado. 

Desta forma, o alumnado puido coñecer o modo de vida dos monxes, apreciar a arte románica e barroca que forman deste monumento, e ver os grafitos realizados sobre as paredes polos prisioneiros republicanos que estiveron presos neste lugar.

O 9 de Marzo o alumnado de CUALE desprazouse ata Ourense para participar nunha actividade de Escape Room na Sala Enigma. 

Tiveron que resolver o misterio de "Romasanta" a través de probas e pistas, todas en inglés.

Todos os alumnos e alumnas estiveron moi implicados na actividade, descifraron os códigos e conseguiron, traballando en equipo, resolver o misterio e saír da Escape Room con vida!!

As titorías entregarán o boletín de pendentes ao alumnado o venres 21 de abril, ás 11:00 horas, nas súas aulas de referencia.

O alumnado de 2º e 3º da ESO está a participar no programa "apuntámonos a non beber". O obxectivo desta intervención é previr o consumo de bebidas alcohólicas e enerxéticas en menores de idade ou atrasar o inicio do seu consumo no caso de que xa se este producindo.

O venres 31 de marzo, como primeira parte do programa, asistiron a unha charla onde se lles falou das consecuencias que ten o alcohol no organismo e das estratexias de mercadotecnia que teñen as empresas para comercializar o seu produto.

Na segunda parrte do programa o alumnado terá que elaborar unha mensaxe de contrapublicidade denunciando as consecuencias do consumo de bebidas alcohólicas.

Esta actividade forma parte do plan Proxecta "apuntámonos a non beber" e tamén do programa EduSaúde.

Dentro do proxecto de Meteoescolas, o alumnado de 2º ESO estivo realizando un traballo de investigación na materia de Xeografía e Historia no que tiveron que buscar imaxes sobre os distintos tipos de paisaxes que existen no territorio español, e relacionalos coas características climatolóxicas asociadas a cada tipo, co fin de amosar a influencia do clima sobre as características paisaxísticas.

Para facer este traballo formaron grupos de 4 persoas, nos que crearon unha presentación seguindo as indicacións da Guía da actividade (ver adxunto).

Os mellores traballos aparecen recollidos na documentación adxunta.

O alumnado de 4º ESO de Matemáticas Orientadas ás Ensinanzas Académicas desenvolveu este segundo trimestre un proxecto para analizar as características das raíces dun polinomio. Para iso, aplicaron os conceptos traballados en clase e empregaron GeoGebra para representar os polinomios e deducir a relación entre a natureza e multiplicidade das raíces co observado. 

Así mesmo, deberon elaborar un documento en LibreOffice Writer cunha serie de requisitos (emprego dos estilos, paxinación, inclusión dun índice automático...) orientados á mellora da súa competencia dixital co procesador de textos.

Nos arquivos adxuntos pódese consultar algún dos traballos entregados.

O xoves, 23 de marzo, os profesores María José Torres e Rubén Nogueira implementaron nos tres cursos de 3o ESO a ficha número 5, “A relación dos sexos a través da tecnoloxía”. Buscando que o noso alumnado, “nativo dixital”, reflexionase sobre o uso responsable da tecnoloxía nas relacións interpersoais propiciouse un debate que partía do cuestionario proposto na ficha e que se estendeu durante o visionado de dous recursos audiovisuais. Neste punto facilitóuselle un documento que, baixo o título de “Netiqueta”, recollía as principais normas de conduta socialmente aceptadas en Internet. Léndoas xurdiron dúbidas, reflexións e experiencias propias e alleas que se compartiron publicamente ou que foron, polo seu desexo, recollidas de modo anónimo para ser resoltas nunha última sesión do Programa Quérote+.

Ao abeiro do proxecto Polos Creativos, a tarde do xoves 16 de marzo celebramos o obradoiro de Stop Motion dirixido á comunidade educativa. A participación foi todo un éxito, cun total de 25 participantes conformados por parellas de nais/pais e fillas/fillos.

Durante dúas horas coñecemos a técnica de gravación de vídeos chamada "Stop Motion", empregada no mundo audiovisual dende hai moitos anos (especialmente antes do desenvolvemento da animación dixital por computador), e puxémola en práctica empregando os equipos de Polos Creativos (tabletas e trípodes).

O obxectivo era producir un vídeo Stop Motion no cal uns personaxes convidados presentaban algunhas das novidades da nosa biblioteca, Lentiña's House. Para iso, tras a produción do vídeo cada grupo tivo que editalo para engadir un diálogo orixinal que fixera referencia aos libros escollidos.

En vindeiras publicacións daremos difusión aos produtos finais. Non perdades detalle das novas porque paga a pena ver os resultados! 

Durante o primeiro trimestre, na materia de Ciencias Sociais realizamos un proxecto na aula de 4ºA de Primaria.

Este proxecto chamouse "A Terra" e cada alumno fíxose experto de contidos específicos. Entre outros, traballamos a atmosfera, o tempo atmosférico, a medición do tempo atmosférico e os diferentes climas.

Resultou moi motivador traballar estos contidos a través de grupos de expertos dentro dun proxecto.

A autora do libro Cantan los Gallos, Marisol Ortiz de Zárate, visitou esta semana o CPI Cova Terreña para falarnos da súa obra. 

O público asistente, alumnado de 3º da ESO, tivo a oportunidade de expoñer os seus traballos na Sala de Actos; conversar coa autora dunha das lecturas deste curso; facerlle preguntas ben interesantes e, como se pode apreciar no vídeo,  presentar á escritora con mestría.