A nosa alumna Marta López Castro de 2º ESO A clasificouse para a fase final da Olimpiada Matemática organizada pola Asociación Galega de Profesorado de Educación Matemática (AGAPEMA), celebrada o pasado xoves 26 de maio en Lugo.

Na fase previa participaron un total de 453 estudantes de 100 centros de toda Galicia, dos que só 40 acadaron o pase á final galega. 

A xornada comprendía a realización da proba (resolución de 5 problemas en dúas horas), o xantar e unha xincana na Praza Maior de Lugo antes da cerimonia de clausura e entrega de premios.

Tras a proba recollemos as reflexións de Marta sobre a experiencia. Unha das primeiras cousas que salienta é que nesta fase final “os problemas plantexados eran bastante máis difíciles ca os da fase de zona. Estes eran máis de pensar e non se resolvían de maneira tan directa coma os anteriores”. Con respecto á xincana por equipos, na que se lles plantexaron cuestións sobre a cidade, comenta que “foi moi divertida porque entre unha proba e outra tiñamos que desprazarnos de distintas maneiras, e ao meu grupo ata nos deron puntos por facer o parvo polo camiño”.

Ademais da experiencia vivida, como recordo da xornada todos levaron un diploma acreditativo, unha camiseta, unha calculadora científica Casio, unha memoria USB e dous libros. Cando lle preguntamos se repetiría a experiencia, Marta responde que “si, estivo ben, os problemas gustáronme porque non son os típicos que temos que resolver en clase.”

A súa mensaxe para o alumnado de 1º da ESO que o vindeiro curso pode ter a oportunidade de participar é simple, directa e honesta:

“eu inicialmente tampouco quería ir, pero que se animen, que non teñen nada que perder e é algo distinto e divertido.” 

Noraboa, Marta! Es unha crack!!

Este mércores, día 1 de xuño, tivemos a gran sorte de contar no noso centro con Xosé Tomás Díaz (ilustrador, guionista, humorista gráfico...) para impartir un obradoiro de Banda Deseñada ao alumnado de 1º da ESO.

Xosé Tomás traballou con eles a etimoloxía dos diferentes vocábulos para nos referir a esta disciplina, a historia da Banda Deseñada, os principios e algunha das técnicas máis usadas, que logo puxeron en práctica.

Foi, pois, unha visita moi proveitosa coa que gozou a rapazada.

O concepto lingüístico de falso amigo vólvese recorrente así que iniciamos o estudo das linguas da nosa contorna, aínda que non só. Trátase pois dunha palabra existente neses outros idiomas que se semella, quer en forma quer en pronunciación, a un termo existente na propia lingua do falante. Mais, ollo!, esta palabra posúe un significado diferente, e en moitos casos incluso provoca interpretacións non desexadas, por equívocas ou incómodas, nos nosos interlocutores.

Partindo do anterior, o alumando de Lingua portuguesa de 1º e 2º da ESO elaborou uns cartaces exemplificando cun pequeno repertorio de falsos amigos entre a lingua galega e a lingua portuguesa que agardamos vos axuden nas próximas visitas ao país veciño.

Nunca te preguntaches como emites sons cando falas? Nunca reparaches en que órganos moves para facelo? E nunca pensaches se eses sons... teñen forma?

Para clarificar todas estas dúbidas o pasado mes de abril, co gallo da Semana da Ciencia, o alumnado da materia de Lingua galega e Literatura de 1º da ESO elaborou maquetas dos distintos órganos que conforman o aparato fonador coa fin de representar o seu funcionamento. Para alén diso, tamén convidamos aos visitantes a iniciarse no mundo da Fonética realizando espectogramas, a representación visual dos fonemas, de cadansúa vogal da lingua galega (7).

Por tanto, esta pequena exposición tentou axudar a entender un chisco mellor ese proceso que realizamos milleiros de veces ao día para nos comunicar.

Chegaron algunhas novidades á biblioteca que poden ser da vosa interese, todas elas están ao voso dispor nos carros de novidades editoriais.

Ciencias Naturais:

Pregunta á Dra. Peteiro sobre o Planeta Terra, Claire llewellyn. (Libro ilustrado).

Os Bolechas, máis que mel, Pepe Carreiro (guía, caderno de actividades e guía de traballo para o profesorado).

Volcanes. Fuego y  vida, Jon Chad (banda deseñada).

O raposo Rufo e a maxia da horta, Dani Viéitez e Iria Iglesias (libro ilustrado).

O arrecife de coral, Radka Piro e Martin Sojdr (libro ilustrado).

Baixo a terra, Petra Bartíková e Marcel Králik (libro ilustrado).

A colmea, Petra Bartíková e Marcel Králik (libro ilustrado).

O formigueiro,  Petra Bartíková e Magdalena Takavová (libro ilustrado).

Inventario de dinosauros, Virginie Aladjidi e Emmanuelle Tchoukriel (libro ilustrado).

Inventario dos mares, Virginie Aladjidi e Emmanuelle Tchoukriel (libro ilustrado).

¿Qué se esconde dentro del mar?, Aina Bestard (libro ilustrado).

La historia de la Ciencia: un relato ilustrado, Jack Challoner (libro ilustrado).

E logo... por que? Virus e bacterias, Xerais básicos de Ciencias (libro ilustrado).

La Ciencia día a día, Caterina López Rigo (libro ilustrado).

Cogomelos, Marisa Castro (libro ilustrado).

17 mulleres Premios Nobel de Ciencias, Hélène Marle-Béral.

Medio Ambiente:

Plasticus maritimus, unha especie invasora, Ana Pêgo (libro ilustrado).

Adeus, plástico! Chaves para unha vida sen residuos, Elisa Nicoli e Chiara Spadaro.

A problemática ambiental en Galicia, Elvira Cienfuegos López.

A negrura do mar, Ramón Caride.

Física:

Cómo explicar física cuántica con un gato zombi, Bigvan.

La física de los Superhéroes, James Kakalios.

Brevísima historia del tiempo, Stephen Hawking y Leonard Mlodinow.

Matemáticas:

Inventando números, Gianni Rodari.

A guerra dos números, Juan Darién.

As mulleres nas Matemáticas, Matilde Ríos Fachal.

Apocalipsis M4t3mático, Eduardo Sáenz de Cabezón.

Números pares, impares e idiotas, Juan José Millás.

Matecuentos / Cuentamates 1, Joaquín Collantes Hernáez e Antonio Pérez Sanz.

Matecuentos / Cuentamates 2, Joaquín Collantes Hernáez e Antonio Pérez Sanz.

Matecuentos / Cuentamates 3, Joaquín Collantes Hernáez e Antonio Pérez Sanz.

Historia:

Historia da Galicia pequeniña, César Cequeliños e Jorge Campos.

Deporte:

Pioneiras do deporte en Galicia, Cristina López Villar.

Biblioteca inclusiva:

Bárbaras! Unha achega desenfadada á menstruación para adolescentes diversos (e non só), María Reimóndez.

Llamadme Nathan, Catherine Castro e Quentin Zuttion.

Piratrans carabarco: guía didáctica e caderno de actividades para la igualdad, A.T.A. Asociación transexuales de Andalucía e VVAA.

Transtornos da alimentación, Carmen Senra.

Banda deseñada:

Curuxa: a voz de Azazel, Fon.

Tam 1, Anémona de Río.

Tam 2, Anémona de Río.

O día 16 de maio inauguramos no noso centro unha exposición sobre os autores e autoras homenaxeados no día das Letras Galegas desde o inicio desta efeméride, ano 1963, até a actualidade realizado polo alumnado de 1º e 2º da ESO.

Esta actividade realizouse en colaboración co Departamento de Lingua galega e literatura.

O Día dás Letras Galegas é un día de exaltación da lingua de Galicia a través da súa manifestación literaria. Comezou a celebrarse o 17 de maio do 1963, coincidindo co centenario da publicación do primeiro exemplar da obra "Cantares Gallegos", de Rosalía de Castro. Este ano está adicado a  Florencio Delgado Gurriarán

 Florencio Delgado  

Naceu en Córgomo, concello de Vilamartín de Valdeorras, en agosto de 1903. Desde pequeno, e con motivo do traballo do seu pai, perito agrónomo; pasou por continuos traslados, vivindo en cidades como Ourense, Palencia ou Valladolid, retornando a Valdeorras en 1928.  Tras finalizar a Guerra Civil marchou ao exilio en México, país no que se estableceu definitivamente.

 En México fundou a revista Vieiros, con Luís Soto e Carlos Velo, a Fundación do Padroado da Cultura Galega, a Irmandade Galeguista e o Ateneo de Galicia. A súa obra está recollida nos libros Bebedeira, Galicia infinda, Cantarenas, Poemas e Ou soño do guieiro. Encargouse ademais da selección e tradución de poemas franceses incluídos en Poesía inglesa e francesa vertida ao galego e da tradución de Cemiterio mariño de Paul Valéry.

Faleceu o 14 de maio de 1987 en  Fair  Oaks (Estados Unidos) aos 83 anos.

O pasado venres, día 13 de maio, o alumnado que está a cursar a materia de Lingua portuguesa en 1º e 2º da ESO viaxou a Guimarães para vivir un día de inmersión lingüística na vila lusa.

Comezaron a xornada realizando unha visita guiada ao Paço dos Duques de Bragança, para así descubriren como vivía a nobreza do século XV.

A continuación, iniciaron unha xincana agrupados por equipos polo centro histórico de Guimarães da man do Museu de Alberto Sampaio, para así coñeceren en profundidade a historia da vila, que se nomea a si mesma como o berce de Portugal, e os seus elementos máis característicos. 

Por último, a xeira concluíu coa ascensión en teleférico á Montanha da Penha e a visita ao centro de peregrinación e a súa contorna.

Finalizadas as 6 sesións de Inspira STEAM co alumnado de 1º ESO soamente queremos agradecer ás 6 mentoras e mentores que traballaron con nos durante estas semanas para dar visibilización as profesións do ámbito da ciencia e a tecnoloxía. 

Para o alumnado participantes déixovos un gran saúdo das vosas mentoras e mentores, e tamén esta enquisa final que debedes cubrir. Pinchade na imaxe.

Vémonos o ano que ven!!! 

Bos días:

Hoxe o alumnado de 3º da ESO disputou unha carreira de orientación nos arredores do curro da Valga (Loureza, Oia). Neste evento por parellas, os participantes tiñan que buscar no terreo as balizas coa axuda dun mapa e un compás.

Agradecemos a colaboración da comunidade de montes de Loureza, que cedeunos o espazo. Tamén agradecemos a colaboración das profesoras María Zapatero e Patricia Blanco.

Esta actividade forma parte do PVAD e o programa EduSaúde.

A etiqueta "Boomer" emprégase habitualmente para describir ás persoas nacidas durante o baby boom, un amplo período de tempo que abrangue dende os 50 ata os 40. Así, as persoas entre os cincuenta e os setenta e cinco anos con para os máis novos uns Boomers. 

A iniciativa de creación dun diccionario para boomers xorde pola necesidade de achegar o vocabulario xuvenil tanto ao profesorado como ao personal non docente, así como pais e nais do noso alumnado.

O traballo quedará exposto no enreixado do patio norte, entrada principal, durante un tempo para a súa consulta. 

Con motivo da semana da prensa, elaborouse un xornal da escola coas achegas do alumnado. Dentro do proxecto MeteoEscolas, en 2º de ESO confeccionamos a sección "Meteoroloxía e sociedade", na que se incluiron novas relacionadas coa chuvia recollida nas estacións da rede.

Está a ser un ano máis seco? Canto máis choveu en Baiona en anos anteriores? Que pasa coa chuvia e as festas da Arribada, Reconquista de Vigo e Feira Franca de Pontevedra? Esta e outras cuestións abordáronse nos artigos publicados, que se poden consultar nas fotografías adxuntas.

Este xoves, 21 de abril, unha representación do noso alumnado de 2º de ESO participou na fase de zona da Olimpiada Matemática organizada pola Agapema (Asociación Galega de Profesores de Matemáticas), e que tivo lugar no IES Castelao de Vigo.

Na zona de Vigo houbo un total de 19 centros participantes, e cerca de 100 en toda Galicia. Dirixida a alumnado de 2º da ESO, cada centro pode escoller un máximo de dous representantes por grupo-clase. A elección non foi doada pero sen dúbida deron a súa mellor versión para deixar o pavillón ben alto!

A competición consistiu na resolución individual de 5 problemas propostos, e sen dúbida foi unha experiencia positiva: "foi mellor do que pensaba", "non eran tan difíciles" foron algunhas das súas declaracións posteriores. 

Bo traballo, Noel, Marta, Manuel, Martín e Pedro!

O 13 de marzo celébrase o Día Mundial Sen Faltas de Ortografía mais a Brigada Antigrallas Sapoconchil (BAS) considera que un día non chega a nada e, por iso, convoca a III edición do concurso Á caza da gralla ortográfica. Fixádevos ben na vosa contorna, de seguro que atoparedes erros lingüísticos no lugar menos pensado!

Para participar no concurso, cómpre enviar un correo coa fotografía a lentinhashouse@gmail.com ou empregar a plantilla adxunta, achegando:

- Nome da/o participante e curso.

- A fotografía inédita e propia.

          - A gralla encontrada e a súa corrección

Cada participante poderá achegar un máximo de dúas fotografías.

A data límite de entrega é o venres 6 de maio ás 12h do mediodía.

Todas as fotografías recibidas que conteñan unha gralla ortográfica comprobada entrarán na urna que estará exposta en Conserxería. O día 16 de maio celebrarase o sorteo para sabermos quen será o afortunado ou afortunada que levará para a casa un fantástico Ebook. Alén diso, todos os participantes recibirán un pequeno agasallo pola captura dun cazapo lingüístico.

Boa e proveitosa caza!

Bos días:

O venres 8 de Abril visitou o noso centro a ciclista Mila López. A súa especialidede é o handbike, un tipo de ciclismo no que as participantes pedalean usando os brazos.

No palmarés de Mila figuran a Copa de España do 2015 ao 2020; Subcampiona de España de 2014 ao 2019 (excepto no 2016 no que foi Campiona); Campiona da Copa de Europa de Cáceres 2019, subcampiona no 2020. É deportista de alto nivel de Galicia desde 2019.

Conversou co alumnado sobre as características da súa disciplina e mesmo sorteou dous maillots entre os participantes.

A súa visita goza ademais dunha especial circunstancia: o domingo competirá na prestixiosa carreira VigBay.

Esta actividade forma parte do programa Iguala-T, Inclue-T, o PVAD (proxecto de vida activa e deportiva) e do programa EduSaúde.

Bos días:

O xoves 7 de Abril, o alumnado de 1º da ESO puido visitar unha das xoias da nosa comarca: os petróglifos de Outeiro dos Lameiros. Este conxunto de arte lítico atópase na serra da Groba. Constitúe unha das pegadas dos asentamentos humanos que habitaban nestes paraxes fai miles de anos.

Ademais de facer exercicio, realizando un percorrido a pé duns 12 quilómetros, tamén aproveitaron para:

• Recoñecer a fauna e a flora do lugar
• Dominar o vocabulario en lingua galega dos diferentes organismos
• Coñecer a nosa contorna e poñela en valor
• Planificar os materias que temos que levar nunha saída (auga, comida, roupa, calzado, crema solar...)
• Coñecer a toponimia do lugar
• Coñecer o noso patrimonio arqueolóxico

No desenvolvemento desta iniciativa traballaron conxuntamente os departamentos de Lingua Galega, Bioloxía e Xeoloxía, Xeografía e Historia e Educación Física.

Agradecemos a dedicación do IEM (Instituto de estudos miñoráns) pola charla oferecida e ao  profesorado acompañante: Rocío, Antonio, Luisa e Patri.

A actividade forma parte do proxecto de vida activa e deportiva (PVAD) e do programa EduSaúde.

No segundo trimestre, na materia de Educación Plástica, Visual e Audiovisual, traballamos a técnica do PUNTILLISMO aplicandoa nas obras de Vincent Van Gogh. Quedaron traballos de moita calidade do alumnado de 1º da ESO.

Notaboa a todos e todas!

Hoxe estivo con nós compartindo as súas experiencias Verónica Romero.

O alumnado de 1º da ESO puido falar con ela e preguntar sobre as peculiaridades da expedición ao Lago Baikal (700km) en territorio siberiano. Tamén andivo por terras canadenses na Illa de Baffin (200km) e fixo outra travesía no Lago Inari en Finlandia (130km).

Aínda que os inicios de Verónica comezan con carreiras a pé e raids de aventura, os contactos con outra aventureira como Chus Lago achégana ás expedicións polares. Estas aventuras buscan reivindicar o papel da muller e a concienciación sobre o cambio climático.

Esta charla forma parte dos contratos programa Iguala-T, PVAD (proxecto de vida activa  e deportiva) e EduSaúde.

Bos días:

Hoxe o alumnado de 2º da ESO, representando ao noso centro no campionato provincial escolar de deporte de orientación deportiva, acodou uns magníficos resultados nas diferentes categorías.

En categoría individual feminina conseguiron o 1º, 3º e 4º posto.

Categoría individual masculina: 2º,3º,4º e 6º posto.

Gañando en ámbalas dúas categorías o primeiro premio por equipos.

Noraboa a todos os participantes.

Disque o tempo anda revirado e tolo de todo... por mor do que os nosos sapoconchos lectores vos piden axuda para que lles axudedes a identificar fenómenos meteorolóxicos mediante unha fotografía e un pareado, en lingua galega, que o explique"-

Aquí vos deixamos as bases deste novo concurso para toda a comunidade educativa:

Para conmemorar o Día Mundial da Meteoroloxía, o 23 de marzo, propoñemos un concurso fotográfico sobre un fenómeno meteorolóxico.

Para participar no concurso, é necesario enviar un correo a meteocova@gmail.com, achegando:

• Nome da/o participante e curso.

• A fotografía inédita e propia.

• Un pareado que acompañe e explique a fotografía (estrofa formada por dous versos que riman) en galego.

Cada participante poderá achegar un máximo de dúas fotografías.

A data límite de entrega é o venres 8 de abril ás 12h do mediodía.

Estableceranse 5 categorías de premiados por nivel educativo e unha categoría de profesorado e persoal non docente, podendo quedar deserto algún premio:

• Infantil

• Primaria:

  • 1º, 2º e 3º

  • 4º, 5º e 6º

• Secundaria

  • 1º e 2º

  • 3º e 4º

A entrega de premios será efectuada á volta de Semana Santa.

AXUDADE AS TARTARUGAS NESTA NOVA AVENTURA TEMPORAL!!!