Este venres, iniciamos proxecto novo!
Cando estás en Bacharelato, especialmente en 2º Bac, toda axuda é pouca. A un curso excepcionalmente denso, enciclopédico e esixente, únese a incertidume de ter que enfrontarse á Selectividade, as dúbidas sobre o que facer e a frecuente falta de información práctica e en detalle das moitísimas opcións que se abren ante un. Se hai un momento no que un sinta que precisa dun deses "coach" que guían, acompañan e axudan na consecución de novas metas, se cadra é este.
Os I Encontros Motivacionais queren ser precisamente esa axuda: unha oportunidade para que outros, que tamén estiveron onde están eles, os guíen a partir da súa experiencia, como fai un faro. Pero os "coach", neste caso, serán exalumnos nosos. Doce mozos e mozas que levan entre dous e cinco anos fóra do IES San Paio, e que desta vez volven a el para poñer a súa mochila da vida enriba da mesa, baleirala e compartir co noso alumnado de 2º Bacharelato todas as dúbidas, experiencias, eleccións, éxitos, fracasos e aventuras polas que pasaron desde que estaban aquí, nestas aulas, ata este preciso momento no que volven.
Son exalumnas/os, con biografías e perfís diferentes, que estudan graos e ciclos como:
- Belas Artes
- Ciencias da Actividade Física e o Deporte
- Ciencias Políticas e da Administración
- Conservatorio Profesional de Música
- Educación Infantil
- Axencias de Viaxes e Xestión de Eventos
- Historia
- Marketing e Actividades Comerciais
- Publicidade e Relacións Públicas
- Traballo Social
- Tradución e Interpretación
- Xornalismo
Con eles, estará o noso alumnado actual de 2º Bacharelato da rama de Ciencias Sociais e Humanidades (o venres 6 de marzo será o turno ou rolda da parte II: rama de Ciencias, Enxeñerías, etc.). Dúas horas de charla moi coloquial, na que todos (exalumnado, alumnado e profe moderador) interactuaremos para sacar proveito do maior recurso, activo ou patrimonio que pode ter unha sociedade: a experiencia das persoas. Ouro puro! Agardamos que sirva para informar, para motivar e que sexa a primeira de moitas máis edicións.