Biblioteca

 O 23 de febreiro celébrase o aniversario do nacemento da nosa poetisa máis coñecida, Rosalía de Castro. Este ano modificouse a data da conmemoración do Día de Rosalía, que antes se celebraba o 24 de febreiro, día do seu bautismo. Agora sábese que ela naceu o 23 de febreiro, razón pola que se cambiou o Día de Rosalía para esta data. 

Para coñecer algo máis a obra desta autora, o alumnado de 3º ESO e 1º de Bacharelato asistirá a un recital musicado que terá lugar ás 13:15h na Casa da Cultura de Burela. 

Por outra banda, rapazas e rapaces de 4º ESO elaboraron videopoemas con versos da autora. Presentámosmovos o de Laura González Freire e o de Silveria Patricia Varela Rocha. 

Podedes ver tamén nestes enlaces os videopoemas de Paula López Martínez e Sara Pedreira González.

Na materia de Cultura Clásica como estábamos a traballar coa mitoloxía, o alumnado fixo unha narración da historia do mito de Eros/Cupido xunto coa incorporación de poemas orixinais de contido amoroso e unha ilustración que o representaba.

O alumnado de Latín aportou frases de amor escritas na lingua que está a estudar, o latín.

O mesmo fixeron o resto dos grupos, cada quen aportou a súa frase de amor escrita na lingua que traballamos na aula, uns en galego e os outros en francés.

Accede á reportaxe fotográfica AQUÍ.

Efigenia Maseda Paz, Xefe de Departamento de Latín

Participantes: alumnado de Latín I (1º BAC B), de Cultura Clásica (3º ESO B e C), de agrupamento de Lingua Galega (1º ESO A e B), de Francés de 1º ESO A e B.

Adícalle á persoa que aprecias uns dos teus mellores versos. Deixa a túa carta na caixa instalada no hall de entrada. Non esquezas indicar o destinatario/a e o seu curso.

Poderanse dirixirte as cartas a calquera membro da comunidade educativa, sempre e cando estean escritas dende o respecto.

Tes ata o día 11 para mandar versos afectuosos a quen queiras.

Despois de estar as cartas en cuarentena repartiranse o luns 14.

Esta mañá Miruca Parga, Vicedirectora, e Ruth Adrio, xefa do departamento de Educación Plástica e Visual, entregaron os diplomas e premios aos gañadores do certame especial Postal de Nadal.

• Alexandre García Pousa de 3º ESO A acadou o 1° premio polo seu detallismo e limpeza escapando da imaxe clásica de Nadal. O seu debuxo representará a postal institucional do centro.
• Shiva Eliska Alinda Nurhakim de 3º ESO B obtivo o 2° premio polo minucioso traballo do fondo e a transformación dunha estampa de Nadal clásica en anime.
• Uxía Oroza Combarro de 1º ESO B recibiu o 3° premio pola súa atrevida composición, con collage e diferentes técnicas, rescatando a figura tradicional do apalpador.

Parabéns a estes 3 grandes debuxantes que ten o Perdouro!!

O 16 de novembro a doutora e neurocientífica Sonia Villapol falounos sobre o tema da pandemia e un pouco da súa vida fóra de Galicia.

Contounos cousas moi interesantes como a existencia das “Fake News”, noticias que provocan moita desinformación. Acompañou isto cunha mensaxe da OMS (Organización Mundial da Saúde): “Non só loitamos cunha pandemia senón cunha infodemia, debido á abundacia de noticias”.

En francés, a raíz do éxito televisivo e tirón da serie Lupín en Netflix, estivemos lendo unha versión adaptada das aventuras de Arsène Lupin e xogamos a un escape game da casa de edición francesa Marabout que nos serviu de inspiración para confeccionar as estratexias de 5 xogos bilingües de mesa articulados con robots preprogramados polo alumnado de tecnoloxía.

Tendo en conta os éxitos nas pantallas, o alumnado escolleu aventuras e persoeiros próximo ao seu recente mundo da infancia para elaborar os xogos de mesa.

Así pois a primeira elección foi as aventuras dun polo moi coñecido e algo desafortunado, Calimero. Máis para ir avanzando no xogo, había que resolver retos: compoñer quebracabezas, adiviñas, cálculo e unhas cantas preguntas sobre os tipos de mamíferos.

A segunda escolla, foi Xulio Vernes, autor de moitas das mellores aventuras. O libro escollido foi A volta ao mundo en 80 días para medir os coñecementos en xeografía e astucia dos xogadores. Houbo que lembrar o debuxo animado de Willy Fog e ler a versión adaptada do libro para idear as misións do xogo.

Outro xogo máis exótico inspirouse dun debuxo animado de Disney. O protagonista ía ser Stitch. Nos retos e enigmas para pasar de etapa había que saber idiomas, nomes de froitas e verduras, matemática e ter astucia e enxeño.

Un xogo polo que todos pasaron de novo é Super Mario. Neste taboleiro, Gomba, un fungo inimigo de Mario, está en busca da princesa. Gomba ten que ir levantando tarxetas para tratar de conseguir obxecos que lle permitirá seguir ou non o xogo.

Finalmente, o circo foi outro mundo que non podía faltar. O mono "patillo" tiña como misión atopar os plátanos agochados. Para iso tivo que seguir unhas pistas e descifrar enigmas: adiviñas, código morse, etc....

Como traballamos despois de acordar os equipos de traballo:

1º) Idear un mínimo de 5 retos / adiviñas / pistas / recompensas sobre o tema escollido: granxa, planisferio, illa deserta, circuíto, circo.
2º) Definir a situación de partida e o propósito/misión do xogo, e o premio final.
3º) Definir a puntuación: ganar puntos e/ou perder puntos.
4º) Crear as tarxetas do xogo: tarxetas narrativas, tarxetas pistas/falsas pistas, tarxetas recompensa, tarxeta retos/enigmas. O alumnado deseño as tarxetas en Canva cunhas medidas especiais que logo montaron nun documento odt para a súa impresión a dobre cara.
5º) Deseñar e fabricar o taboleiro nunha cartolina con elementos impresos en papel e plastificados. Algúns taboleiros teñen elementos 3D para que pare o robot e poñer a proba os seus sensores. O alumnado tivo que buscar por internet os debuxos que ía utilizar para ambientar o seu taboleiro. Tivo que escoller imaxes dunha certa calidade de resolución e redimensionalas á escala da súa impresión.

O alumnado ademais de ser competente en linguas (Francés, Galego e Castelán) tivo que empregar as TIC para a elaboración do material dos taboleiros e botar man dos seus coñecementos en cálculo, xeografía, bioloxía e cultura xeral para redactar as enigmas e adiviñas. Evidentemente demostraron moita creatividade tanto no deseño do taboleiro e tarxetas como na redacción das narracións de cada taboleiro.

Antes de último reto colectivo, estivemos xogando aos xogos dos compañeiros/as para probar que todo funcionarse e/ou corrixir algunha proba algo difícil de resolver.

Finalmente, chegará o gran día da Feira TecnoCienciArte onde divulgar estes proxectos interdisciplinares. O alumnado de 4ºESO será o mestre do xogo e poñerá a proba aos seus compañeiros de ESO.

Accede ás fotos do proceso AQUÍ.

O día 22 de novembro na hora de titoría tivemos un obradoiro de regueifa dirixido por Cristián Gómez, un compañeiro do Perdouro, estudante  de Electrónica que participa no Modelo Burela e que tamén é técnico e locutor de radio en Proxecto Neo.

Cristián explicounos que son as regueifas, como se fan, que versos teñen que rimar, os significados da palabra ( aparte dun canto tamén pode ser un baile ou un pan de voda). Despois fixemos as nosas propias regueifas, unha delas a partir do noso nome.
Gustounos moito esta actividade porque nos deu a coñecer unha nova forma de entreter coa linguaxe, da que non tiñamos coñecemento. Cristián explicounos todo dunha maneira divertida e fácil de comprender.
Tamén tivemos outras persoas na aula, xa que viñeron uns cámaras para gravar e sacar fotos para un documental.
Foi unha actividade entretida e recomendamos que se realice noutros cursos. 

Accede á reportaxe de fotografías aquí.

Uxía Oroza Combarro, Brais Vila Salgueiro, Iker Trillo Souto e Antón Míguez Rubiños. 1º ESO B