IES Maximino Romero de Lema

Publicados hoxe os resultados definitivos das notas da convocatoria ordinaria da ABAU 2024, o noso Centro ocupa o posto número 32 no ranking de notas da fase xeral, entre todos os centros públicos de Galicia. 

En concreto, acadamos unha nota media de 7,171 puntos, a máis alta dos institutos das comarcas de Bergantiños, Soneira e Fisterra.

Estamos moi contentos e satifeitos por estes resultados e trasladamos os parabéns a toda a Comunidade Educativa.

O Director Xeral do Instituto Galego do Consumo  e da Competencia, Gabriel Alén, xunto con Sol Vázquez, Xerente do mesmo, visitaron hoxe o noso Centro, para entregar ao alumnado de 1ºFPB os diplomas acreditativos de gañar o 1º premio do certame Consumópolis na categoría de 3º e 4º ESO e FP básica cunha cuantía de 1000 euros. 

Gabriel Alén apelou entre os escolares a facer sempre un consumo responsable e sostible coñecendo sempre os dereitos básicos dos consumidores.

O concurso constou de dúas partes: a primeira, unha cidade virtual na que o alumnado tivo que superar 10 probas aprendendo sobre un consumo máis responsable, crítico, consciente e sostible, así como os seus dereitos como potenciais persoas consumidoras; e unha segunda parte, a realización dun traballo en equipo, que consistiu na realización du vídeo no que Los Pozzez, Javier Lema, Álvaro Rivera, Zaira Calo, Joel Fernández e Daniel Rojo, interpretan un rap no que denuncian o derroche da sociedade actual.

Parabén a tod@s  e ao profesor  Gonzalo de Castro-Acuña, coordinador do Plan Proxecta Consumópolis no que se inclúe esta iniciativa e que os animou  a participar.

Un vídeo didáctico á vez que divertido do que vos deixamos aquí o enlace.

Hoxe celebrouse en Santiago o acto de entrega dos premios INNOVAGAL de Innovación Educativa, concedido pola Consellería de Educación, Ciencia, Universidades e Formación Profesional, nos que o noso Centro gañou o segundo premio, pola nosa traxectoria de compromiso coa innovación educativa.

Este premio é un recoñecemento ao importante labor que se desenvolve neste Centro desde hai moitos anos e en ámbitos moi variados, como a igualdade, a lingua, a literatura, o medio ambiente, a música e as artes escénicas, o consumo responsable, a informática, a ciencia e a tecnoloxía, … recibindo recoñecementos e premios tanto a nivel galego como a nivel nacional.

Neste labor colaborou e participou toda a Comunidade Educativa:  alumnado, profesorado, persoal non docente, familias, ANPA, Concello de Zas e moitas outras entidades, asociacións e persoas que a título individual e de maneira desinteresada estiveron e están implicadas nun proxecto educativo multidisciplinar e enriquecedor que fixo e fai deste Centro un referente e ao que todos e todas estamos orgullosos de pertencer.

Queremos compartir este premio con todos e todas as persoas da Comunidade Educativa actual e pasada, así como coas institucións e persoas alleas a ela, por facer posible e contribuír a este proxecto educativo que agora foi recoñecido, que levamos moitos anos desenvolvendo e que esperamos continúe no futuro.

Para todos e todas, este é o noso premio, este é o voso premio. PARABÉNS!!

Para evitar aglomeracións, pregamos que se respecte o seguinte calendario en horario de 09:00 a 13:30 horas

• 26 de xuño: 1º ESO, 2º BACHARELATO, 2º FP BÁSICA E 2º CICLO MEDIO

• 27 de xuño: 2º E 4º ESO

• 28 de xuño: 3º ESO

• 1 de xullo: 1º BACHARELATO

• 24 de xuño ao 4 de xullo ás 13:00 horas: 1º Ciclo Medio de Sistemas Microinformáticos e Redes, previa cita. Será o proceso de admisión.

• 24 de xuño ao 4 de xullo ás 13:00 horas: 1º e 2º Ciclo Superior Desenvolvemento de Aplicacións Web. Réxime semipresencial e a distancia, previa cita. Será o proceso de admisión.

• 24 de xuño ao 4 de xullo ás 13:00 horas: FP Básica I.  Será o proceso de admisión.

Para facer a matrícula haberá que entregar a seguinte documentación, xunto co formulario, na Administración do Centro:

• Fotocopia do DNI do alumno/a e do pai/nai/titor-a legal

• Fotocopia da tarxeta sanitaria

• 2 fotos tamaño carné

• Xustificante do pago do seguro escolar 1,12€ (alumnado de 1º e 2º ESO e alumnado maior de 28 anos exentos)

• Impreso de autorizacións debidamente cuberto e asinado

Non se recollerá ningunha matrícula con documentación incompleta.

Achéganse, como documentos anexos, os impresos de matrícula, de transporte e de autorizacións. Poden ser descargados e cubertos.

O IES Maximino Romero de Lema participou no programa “Talentos inclusivos” que pretende espertar vocacións STEM entre os xoves e dar a coñecer a realidade da discapacidade a través de equipos colaborativos de traballo para resolver retos tecnolóxicos propostos por persoas con parálise cerebral. 

O noso IES participou neste curso con dous proxectos: “Pechadura intelixente” coordinado pola profesora Marta Diz que traballou con alumnado de ciclos formativos, e co proxecto “DesexarIA”, coordinado por Fina Paulos Lareo e Óscar Manuel Rey Calo e no que participou alumnado de 4o da ESO. 

Ámbolos dous proxectos pretenden romper barreiras, por un lado a da mobilidade e por outro lado as barreiras comunicativas das persoas con parálise cerebral. 

“Talentos inclusivos” tivo o seu acto de peche este venres 13 de xuño no centro Ágora da Coruña onde se puideron ver os dous proxectos funcionando, e tamén os traballos levados a cabo por outros centros de Galicia. 

No caso de “Pechadura intelixente”, o que se buscou foi aportar un mecanismo de apertura-peche de porta mediante pulsador e tecnoloxía Arduino. O alumnado participante expuxo o proxecto ós asistentes, que amosaron un gran interese no mesmo. Incluso foi probado polos propios usuarios de ASPACE con moita curiosidade e todo un éxito final. 

Por outro lado, “Desexaría” é un sistema de selección de pictogramas para Paula, usuaria de ASPACE que ten dificultades de comunicación oral. Unha vez se selecciona o pictograma, reprodúcese un vídeo xerado con IA no que Paula fai a súas peticións: “Preciso axuda”, “Teño fame”, “Necesito beber”, etc. Este proxecto causou moita boa imaxe xa que se pode ver a Paula, que grazas á IA pode falar e transmitir as súas necesidades. 

Para o noso centro foi toda unha honra participar no proxecto porque supuxo poder visualizar o gran traballo que se está a realizar pola comunidade educativa do noso centro. Ademais o alumnado puido comprobar como un pouco do noso tempo ó servizo dunha boa causa pode axudar a resolver problemas cotiás da sociedade a persoas que teñen moitas dificultades na fala e na mobilidade. 

Agradecemos ó CITIC, Centro de Investigación en Tecnologías de la Información y las Comunicaciones, e a ASPACE que nos permitisen participar neste programa e coñecer cales son as dificultades das persoas con parálise cerebral. 

https://www.youtube.com/watch?v=cLYWO83z1Z8%0A&feature=youtu.be&themeRefresh=1

O venres, 7 de xuño, o alumnado de 2º ESO levou á practica na praia de Arou en Camariñas o aprendido sobre o deporte do surf nas sesións que tiveron no Centro. 

Empezaron cuns exercicios grupais para quentar e estirar os músculos antes de meterse na auga. Tamén recolleron lixo da praia para analizalo e reflexionar sobre a contaminación dos océanos, concluíndo que é tarefa de todos e todas implicarnos no seu coidado. Finalmente repasaron sobre a area as posturas a manter sobre a táboa e, xa preparados/as, navegaron sobre as ondas seguindo as intrucións dos monitores con maior ou menos éxito, pero, iso si, todos e todas pasárono moi ben. 

Agradecémoslle ao Concello de Zas que fixese posible que o alumnado de 2º, 3º e 4º ESO puidesen desenvolver esta actividade. O próximo xoves será a quenda de 4ºESO que pechará a actividade de Aprende co surf .

O IES Maximino Romero de Lema ven de presentar o proxecto “Namórate do rural” que ten coma finalidade recuperar o patrimonio inmaterial da zona da Costa da Morte e que se levou a cabo grazas á participación de toda a Comunidade Educativa do noso IES.

“Namórate do rural” é un proxecto vivo enviado aos premios de proxectos educativos “Somos rurais”, convocado pola Confederación de ANPAS GALEGAS e foi presentado o pasado 11 de xuño no auditorio do IES Concepción Arenal de Ferrol, onde se fixo entrega dos diplomas acreditativos da participación no evento a todos os institutos e coles participantes. 

O proxecto implica a toda comunidade educativa: alumnado da educación secundaria obrigatoria, formación profesional e primaria. Contouse coa participación do profesorado de distintos departamentos, así coma as familias do alumnado (pais, nais, avós e avoas, irmáns), e tamén de persoal non docente do centro, coma o noso Conserxe Manuel que nos narrou unha historia sobre a Illa da Estrela en Corme-Aldea.

Con este proxecto quixemos espertar o espírito investigador do noso alumnado, que recuperou e colectou lendas, contos, refráns, historias, ditos populares, romarías e outros elementos da tradición oral da zona, que conforman o patrimonio inmaterial das comarcas de Bergantiños e Soneira, creando repositorios audiovisuais que se poden ver no blog que os profesores Fina Paulos e Óscar Rey crearon “maxi.iesmaximinoromerodelema.gal/wp” coa axuda de alumnado de 2º de Ciclo Medio.

As novas tecnoloxías, no caso destes dous profesores o uso de aplicacións de Intelixencia Artificial, así coma de software vario para a edición audivisual e a súa publicación na rede, teñen un papel relevante no proxecto, xustificando o seu uso a grande capacidade de difusión que ofrecen e tamén as opcións de creatividade para a elaboración das diferentes pezas audivisuais.

Fomentouse o traballo colaborativo do alumnado, familias e profesorado. A coordinación recaeu sobre estes dous profesores de FP da rama de Informática (Fina Paulos e Óscar Rey) o que permitiu fornecer de recursos ós participantes para poder utilizar tecnoloxías ó servizo da preservación do patrimonio inmaterial, pero tamén hai que agradecer a colaboración doutros profesores que se encargaron de recopilar historias co seu alumnado e tamén de narralas.

Outra das cousas que destacamos de “Namórate do rural” foi o seu papel transversal entre xeracións implicando a distintos rangos de idade, así temos a avós e avóas contando historias ou un refrán, a nais/pais cantando ou recitando un dito ou canción, sen olvidarnos dunha irmá que nos explica unha romaría... , trátase dun proxecto que debería ser extensible a outros centros educativos polo valor que ten na recollida da tradición oral na zona rural, en verdadeiro risco de perderse.

Mantivéronse reunións de coordinación previas para captar o gran número de participantes cos que conta «Namórate do rural» e distribuir o traballo e tarefas que cada un tiña que facer dentro do proxecto.

Fina e Óscar queren agradecer á Directiva do Centro toda a axuda e colaboración, unha vez máis, para poder levar a cabo este proxecto así coma as xestións que fixeron para que se puidera presentar.

O noso proxecto combina novas tecnoloxías de vangarda como a Intelixencia Artificial, sumadas a outras coma aplicacións de xeolocalización para situar nun mapa da zona as diferentes pezas recollidas polo alumnado (pezas que foron interpretadas por avós, nais...), ou unha plataforma para subir os audios, e finalmente xuntar todo nun blogue que recolle a nosa tradición oral.

Este traballo pode verse no blog do proxecto: 

·       

https://maxi.iesmaximinoromerodelema.gal/wp/

O profesorado quere continuar con este proxecto para o vindeiro curso, xa que considera que no rural inda hai moitas cousas por descubrir, hai moi tradición oral que non debe perderse e que os xóvenes deben aprender para coñecer e valorar as súas orixes, para apreciar o noso entorno rural.

No evento foi presentado o vídeo promocional do proxecto que podedes consultar:

·       

https://youtu.be/4UmYKMZuoRs

A memoria técnica do proxecto foi publicada para a súa posta en coñecemento da comunidade educativa galega e que poida ser utilizada como exemplo de implantación de todas estas ferramentas noutros lugares de Galicia. Pode consultarse aquí: 

·       

https://somosrural.anpasgalegas.gal/wp-content/uploads/2024/04/04-NamorateRural_memoria.pdf

Ó acto acudiu o profesorado coordinador: Fina Paulos Lareo e Óscar Rey Calo, xunto con unha das persoas participantes no proxecto Irene Fernández Paulos, como exemplo do alcance que tivo o proxecto na participación da comunidade educativa e das familias. 

Agradecemos o convite feito pola Confederación de Anpas Galegas, á cal animamos a seguir creando este tipo de iniciativas que nos permiten ás comunidades educativas difundir as nosas iniciativas e proxectos singulares. 

O pasado venres, sete de xuño, estivo co alumnado de 4º de ESO, Carme Tobar. Veunos falar dos bens recollidos no artigo 612 do Código Civil, e a sorpresa foi maiúscula! 

A nosa amiga empregou a técnica do desconcerto, para introducirnos, desvelarnos o apaixonante mundo das abellas e dos enxame. Como se dunha "Indiana Jones" se tratara, embarcounos no recoñecemento da historia do patrimonio galego inmaterial e material: os cereiros, os abelleiros, os albaneis, os ebanistas, os canteiros, os tecedores, os modistos.... traballaban arreo para chegar a recolleita dos centos de produtos que brinda o mel.

Coma unha cineasta da terra, remexeu as luces, as cores, os  sabores e os aromas para entregarmos o seu traballo de vida.

Grazas Carme. Choramos contigo, grazas pola paixón.

Volta cando queiras.