Bueu, 5 de xuño de 2020. Texto prescritivo ou como elaborar un decálogo...

Eis vos presentamos dous modelos de cartaces e mais un vídeo elaborados por alumnas de 4º de ESO (Antía, Diana e Marta), en que nos recomendan como levar a cabo unha alimentación saudábel. De seguro que se seguimos as súas recomendacións recuperaremos a figura previa ao confinamento. Ánimo!!!

 

 

 

 

 

A crise da Covid-19 tronzou pola metade a quinta edición do Laboratorio de Educación para o Desenvolvemento (EpDLab) (https://epdlab.gal/), un proxecto de innovación educativa e cambio social que desenvolvemos no IES Illa de Ons, xunto coa ONGD Agareso (https://www.agareso.org), co obxectivo de educar en valores e incrementar o pensamento crítico do noso alumnado.

Ao longo de 9 sesións (unha ao mes), o alumnado de 2ºA estivo traballando este curso cuestións como o sexismo, o racismo ou a xenofobia ao tempo que explora conceptos como a obxectividade e a subxectividade, a ficción e a non-ficción ou as fake-news en fotografía, cine e series, redes sociais, canles de youtube... Cada mes, abordamos unha temática concreta a través da súa representación nos medios e coñecemos as técnicas, os recursos narrativos que fan posible que ese imaxinario mediático se integre no cultural e, polo tanto, na sociedade en si mesma.

O peche dos centros de ensino impediunos celebrar nas aulas os últimos obradoiros, nos que tiñamos previsto achegar ao alumnado do proxecto a realidade de mozas e mozos da República Dominicana e traballarmos man a man con elas e eles conceptos como medio ambiente, consumo responsable e economía solidaria ou cooperación internacional, voluntariado, activismo e cambio social. Pero a distancia física non ten porque ser tamén social e pedagóxica, así que o equipo do proxecto apostou por trasladar os contidos e metodoloxías presenciais á contorna dixital, creando actividades on-line de participación asincrónica, con dinámicas gamificadas e recursos interactivos. 

A primeira actividade, que nos achega a realidade da rapazada da República Dominicana a través de videocartas, xa está dispoñible na plataforma Moodle Cloud. Podedes botarlle un ollo aquí https://bit.ly/epdlab_online, empregando bueu como nome de usuario e como contrasinal. Nas seguintes semanas iremos pendurando os outros obradoiros que tiñamos pendentes, coa vontade de que o profesorado que queira empregar estes novos recursos poida facelo libremente. Se vos parece interesante e queredes empregar algunha das actividades co voso alumnado, só tedes que contactar con organizacion@agareso.org.

O EpDLab está deseñado e desenvolvido polo equipo técnico de Agareso e financiado por Cooperación Galega. Podedes coñecer máis sobre o proxecto nesta reportaxe que publicou o xornal dixital Praza Pública (https://vinte.praza.gal/artigo/adolescentes-que-reflexionan-sobre-a-desi...) ou no artigo Narrativas Dixitais para potenciar la creatividade, la participación y el pensamento crítico en la ensinanza obrigatoria, publicado no Congreso Internacional sobre Aprendizaje, Innovación y Cooperación (CINAIC). https://www.agareso.org/wp-content/uploads/2019/10/EpDLab-CINAIC19.pdf

 

 

 EpDLab: Proxecto Multimedia de Educa-Colaboración

 

Bueu, 11 de abril de 2019. O alumnado de 1º de ESO do IES Illa de Ons de Bueu participou hoxe nunha actividade de educación medioambiental ao longo de toda a mañá, percorrendo o Sendeiro Litoral de Bueu e descubrindo algúns dos seus fabulosos tesouros.

A actividade iniciámola na praia de Agrelo, onde realizamos observacións e medicións na zona intermareal, a duna e a vexetación propia deste hábitat, así como fomos descubrindo algunhas das características dos seres vivos que o habitan. A continuación, e despois de merendar, todos nos diriximos á zona de Pescadoira e logo ao Museo Massó, onde asistimos á proxección dun vídeo e a unha visita guiada. Finalmente, xa na praia da Banda do Río, realizamos unha recollida e identificación de residuos de orixe humana, que logo foron depositados en colectores de lixo. Foron máis de seis quilómetros e medio, toda unha maratón...

Quedounos moito por ver e por facer, así que haberá que repetir!!!

(Redacción: Xoán, lingua galega; Fotos: Anxo, lingua galega; e José Almendral)

 

 

 

 

 

 

 

A Asociación Galega de Reporteiros Solidarios volveu escoller Silleda para celebrar o seu hackaton con alumnos de cinco institutos galegos. Un hackaton é un evento colaborativo, un intercambio de ideas, que se realiza nun curto espazo de tempo. O de onte durou pouco máis de sete horas e permitiu que un centenar de rapaces dese renda solta á súa creatividade para deseñar memes, gifs e outros elementos moi usados en internet cos que poder combater as noticias falsas e os discursos xenófobos que circulan nos últimos tempos polas redes sociais.

Enlace RTVG

Enlace Faro de Vigo

O alumnado de 3ºA, mediante un recital de poemas e textos da autora, e o alumnado de 4ºC, coa realización dun vídeo creado na aula Chroma, homenaxean á autora máis importante da nosa literatura galega e a autora romántica por excelencia.

Bueu, 25 de febreiro de 2019. Redacción.

Ademais dos textos lidos polas alumnas e alumnos de 3ºA, aproveitamos a xornada para reivindicar a figura de Rosalía lendo o manifesto que publicou Ana Romaní para a AELG e que vos reproducidos a continuación. Máis abaixo, engadimos o enlace ao vídeo protagonizado polo alumnado de 4º C.

*Manifesta que escribe, escribe, escribe. E a escritura é unha acción.

*Manifesto eu que escribir ela así no seu tempo é unha acción contra os grillóns da escravitude. Libre o seu pensamento

*Manifesta o poema

o espolio                     dunha perenne miseria,

as violacións                a roupa de cote puñéronma en tiras,

a inxustiza social          sin abrigo tembra,

os desafiuzamentos      embargaránnos todo,

o abuso laboral            que se amargo pan vos ganan / dádesllo envolto en veneno

os éxodos                    en errantes hordas.

Do XIX ao XXI

*Manifesto eu que un poema con palabras da lingua que eu falo –que non é aquela que bastardean nas mais ilustradisimas provincias– aínda hoxe é un Manifesto. A miña infeliz patria tan desventurada

*Aqués que tén fama de honrados na vila. Galicia. Ano 2017. 82 agresións sexuais

raposos de sangre maldita. Galicia. Ano 2017. 6436 denuncias por violencia de xénero

vendéume a xusticia. manda, manda, manda, fato, rabaño

Dun golpe!

                                – Manifesta acción o poema –

*Na xa vella baranda un corpo fala. Arrima o seu seo e no frío da reixa tatúa incisións. Traspasa as nosas carnes.

*Estas migallas de liberdade. Alertou. Tenteamos nós compracentes os rostros que nos cegan.

*Aquelas escuras e valerosas heroínas que viven e morren levando a cabo feitos marabillosos por sempre ignorados. – Manifesta que existen –

*De humanos seres a compauta linea polas fronteiras pechadas en columnas nómades, en fronte o arame.

Do XIX ao XXI

*Escrito en medio de todos-los desterros. – Manifesta que sabe que non a escoitan –

*Do meu dor sin igual i a miña afrenta traidora se mofaban. Prende o computador, algún dispositivo. Ladran.

*Manifesta que o poema é o lugar onde a voz afía a sombra.

*Indóciles nos camiños desertos eses versos.

*Cantos de independencia e liberdade. Manifesto.

*Acción que se inunda e anega. Cantarte hei

Ana Romaní

Asociación de Escritoras e Escritores en Lingua Galega (AELG)

#LibreOMeuPensamento_rdc_19

 

Alumnado participante na lectura pública:

Paula Fernández

Carla Moital

Antía Novas

Diana Ogando

Alejandro Pérez

Alba Porto

Sara Soliño

Sheila Verde

 

A seguir, amosamos o vídeo creado polo alumnado de 4º C na Aula Chroma do noso instituto en homenaxe á nosa grande autora:

 

Traballo realizado polas alumnas Teresa Bernárdez e Iris Reinosa (4ºB) sobre os poemas vangardistas incluídos en De catro a catro, do autor rianxeiro Manuel Antonio.

 

O alumnado de 4º de ESO inicia un proxecto que ten como finalidade estudar o rico patrimonio da súa vila natal, Bueu, e que se completará coa edición dun mapa-guía que recolla todas as investigacións levadas a cabo.

Bueu, 20 de decembro de 2018. Redacción.

O alumnado de 4º de ESO aproveitou unha xornada de ceos parcialmente cubertos e sen chuvia para achegarse ao adro da igrexa de San Martiño e ao río Frade-Bispo, no que constitúe a primeira visita de moitas que se celebrarán ao longo deste curso 2018-2019. O obxectivo é procurar a edición dun mapa-guía con recursos do patrimonio de Bueu, tanto culturais e etnográficos, civís e relixiosos, coma naturais e medioambientais. Divididos en varios grupos de catro e cinco persoas, todos e todas as participantes tiveron que completar unha ficha facilitada polo profesor Anxo coa que lles pedía que reflexionasen e anotasen aqueles datos máis significativos dos elementos que estaban a visitar: estrutura da igrexa, situación con respecto ao centro da vila, elementos arquitectónicos salientables; no río, especies autóctonas e alóctonas, canalización do río, o lavadoiro do tramo final, etc. Ademais, aproveitamos a sinaléctica que o Concello de Bueu ten instalado en todo o percorrido para recoller datos de cara ás nosas investigacións.

O alumnado inicia o seu percorrido polo río Frade-Bispo observando os paneis interpretativos existentes.

Os diversos grupos van anotando todo aquilo que lles resulta interesante para o estudo.

O alumnado de 4º de ESO viaxa a Compostela para coñecer a Cidade da Cultura, a exposición do cadro A última lección do mestre e o Parlamento de Galicia.

Bueu, 19 de decembro de 2018. Redacción.

Practicamente todo o alumnado de 4º de ESO sumouse á iniciativa do Departamento de Lingua e Literatura Galegas e mais do Equipo de Normalización para acudir a Compostela e visitar varios espazos que nos amosa esta incrible cidade. Principiamos a xornada nunha visita guiada pola Cidade da Cultura da man dos nosos profesores Anabel (profesora de Francés) e Anxo, momento que aproveitamos para facernos algunhas fotos, ver o famoso cadro de Castelao titulado "A derradeira lección do mestre", co que homenaxea, entre outros, ao seu grande amigo Alexandre Bóveda; e esvarar polos teitos dos edificios. O máis destacado, non houbo feridos... Para rematar a mañá acudimos a unha sesión plenaria do Parlamento de Galicia. Alí vimos como debatían todos os nosos parlamentarios. Sen dúbida, foi unha das cousas máis impactantes da xornada. Logo viría un dos mellores momentos, tempo libre para xantar!!! Quedamos nos arredores do parque Rosalía de Castro cos profesores e fixamos unha hora para vernos novamente. Despois do xantar demos unha volta pola rúa do Franco, ao redor da Catedral e do pazo arcebispal, e pola rúa Nova até chegar novamente ao Parlamento de Galicia, onde nos esperaba a segunda sorpresa da xornada, pois despois de visitar o interior do Parlamento, puidemos coñecer o despacho e, en persoa, ao Presidente do Parlamento de Galicia, a Miguel Santalices, ao que tamén lle puidemos facer algunhas preguntas... Finalmente, bus e para o noso Bueu querido, pero con ganas de volver á cidade eterna.

 

Algúns alumnos e alumnas do noso centro educativo co cadro de Castelao “A derradeira lección do mestre” (Foto: Laura Bernués).

Diante da bóla de libros "Singularidade", da artista Alicia Martín, na Cidade da Cultura.

Diante da Catedral, na Praza do Obradoiro.

Nas escaleiras de acceso ao pleno, no Parlamento de Galicia.

O alumnado de 4º de ESO do IES Illa Ons visita a Cidade da Cultura e o Parlamento de Galicia (Foto: Laura Bernués).