E como novidade con respecto a anos anteriores, desde o EDLG quixemos facer a nosa achega para a Semana da Ciencia organizada polos departamentos de Bioloxía e Física e química baixo o nome de Interciénciate. Coa colaboración do departamento de Tecnoloxía, elaboramos un vídeo que recolle ao tempo tres vídeos de divulgación de ciencia en galego, que se poden ver de maneira independente no seguinte enderezo:https://praza.gal/temas/concienciadas. Neles, Iria Veiga e Javier Balea fálannos de cousas tan interesantes como: A que cheiran os libros? Como se fai ciencia? Como funcionan as vacinas? Nas últimas semanas saíu un novo vídeo que xa podedes ver, este vai sobre o cambio climático. Aquí tendes algunha imaxe de como o noso alumnado aproveitou a proxección do vídeo que se elaborou.
Coincidindo ademais coa Semana da Ciencia e aproveitando a campaña para escoller Rosalía como nome dunha estrela, desde o equipo quixemos facer promoción para que a ninguén lle esquecese votar para que a nosa autora máis célebre tivese luz propia no ceo e, de feito, conseguiuse. Aquí tedes a imaxe que ilustra o cartel que estivo na entrada do instituto ata que finalizou o tempo para poder votar.
E para despedirmos a 1ª avaliación, quixemos reivindicar a figura do Nadal galego, o Apalpador; para isto, a carón da identificación do personaxe (do que tamén se falou nas aulas), o alumnado formuloulle unha serie de desexos para a normalización plena do noso idioma. Ademais, aproveitando o esqueleto do laboratorio e grazas á colaboración da rapazada que trouxo diferentes pezas de roupa, creamos o Apalpador do IES Faro das Lúas. Aquí deixamos algunha imaxe.
Por último, no derradeiro día de clase do ano 2019, visitaron o centro as contacontosCharo Pita e Patricia McGill. O EDLG xunto co Departamento de Lingua galega e literatura e Inglés, convidámolas para escoitarmos os seus contos bilingües (inglés/galego). O alumnado gozou moito coa súa actuación. Deixámosvos algunhas imaxes e podedes ver un pequeno vídeo aquí.
