Comezamos este curso dándolles continuidade a varias actividades que xa son tradición no percorrido do equipo de dinamización lingüística do noso centro. En primeiro lugar, como vai ser costume cada mes, expuxemos no noso taboleiro en outubro, novembro e decembro, as palabras do noso proxecto para a aprendizaxe de léxico: 8 meses, 8 causas para usarmos o galego. Este supón un traballo continuado por parte do alumnado, de tal maneira que, en cada aula, recóllese mensualmente unha serie de vocabulario en que habitualmente fallamos, principalmente pola influencia do castelán. Do conxunto de termos seleccionados, a rapazada vota pola palabra do seu grupo e todas son expostas no taboleiro do equipo acompañadas sempre cun debuxo que un alumno ou alumna de cada aula elabora de maneira voluntaria.
Aquí vos deixamos a selección dos meses desta primeira avaliación:
Outubro: Onda (e non *ola), augamar (e non *medusa), cativerio (e non *cautiverio), fregar (e non *frotar), almorzo (e non *desaiuno), Samaín (e non *halloween), lagostino (e non *langostino), cóxegas (*cosquillas), picadiscos (e non *DJ)
Novembro: Defunto (e non *difunto), lóstrego (e non *relámpago), salón de peiteado (e non *peluquería), espírito (e non *espíritu), cogomelos (e non *setas), dicionario (e non *dicionario), subliñar (e non *subraiar), sobremesa (e non *postre), floco (e non *flequillo)
Decembro: Monstro (e non *monstruo), cascada (e non *fervenza), padiola (e non *camilla), lavalouza (e non *lavavaixelas), lixivia (e non *lexía), cambadela (e non *zancadilla), macela (e non *manzanilla), candea (e non *vela).
Que tal se poñemos a proba os nosos coñecementos da lingua galega? Xogamos á ruleta?
Ademais, o noso taboleiro ten unha sección dedicada á información relevante sobre a lingua e cultura galega en xeral; da mesma maneira, botamos man del para ir publicitando aqueles concursos que levamos a cabo, e no mes de outubro convocamos o de relatos de terror pola festividade do Samaín. O primeiro e segundo premio recaeron nas alumnas de 2º da ESO B Sabela Romero e María Oubiña, respectivamente e o terceiro na alumna de 1º da ESO A, Maira González.
