Un alumno do noso instituto foi seleccionado entre varios centos de mozos para tocar co pianista Lang Lang. Onte, 1 de xuño, o Telexornal da TVG fixo unha reportaxe da nova.

Os días 19 e 20 de abril un grupo de corenta alumnos de 3º da ESO fixo unha visita da vila portuguesa de Melgaço. Esta é unha saída máis das que o noso instituto ten organizado baixo o programa do Proxecto Terra, como en anos anteriores aconteceu por terras de Ferrol, Allariz, Guimarães, co obxectivo de aprender e vivir experiencias ao redor da defensa do patrimonio, a paisaxe, e a ordenación do territorio.

Nesta ocasión puidemos decatarnos, unha vez máis, da unidade territorial que forman Galicia e o Norte de Portugal, unha das eurorrexións da Unión Europea. O xoves 19 visitamos o Parque da Peneda-Gerês entrando por unha das súas portas, Lamas de Mouro, e tamén Castro Laboreiro. O grupo hospedouse na Pousada da Juventude, en Melgaço. Visitamos esta vila ao día seguinte: a súa torre medieval, o Museo do Cinema e mais o da Memoria (Museo da Memoria Fronteira). Reafirmámonos na nosa identidade galego-portuguesa e viñemos cheos de experiencias que nos indican o que somos e o que debemos ser. Os nosos meninos saudaron o río Miño e ficaron obrigados con Portugal.

Dende o día 23 ata o 29 de abril, un grupiño de 11 alumnos de 3º e 4º  da ESO desprazaranse a Francia acompañados pola profesora de francés Mª Jesús Quintáns Rodríguez. Durante a súa estadía no país veciño serán acollidos no collège de Fontenilles, localidade situada a 25 km. de Toulouse. A viaxe ten dous obxectivos principais: lingüístico (facer progresar aos alumnos e suscitar o interese pola lingua e a cultura francesas) e social (descubrir a rexión mediante a inmersión familiar e escolar).

Ademáis das actividades realizadas no collège, o grupo  visitará as cidades de Toulouse e Carcasonne.

O traballo en común co collège de Fontenilles vense dando dende o curso 2010-11 mediante a correspondencia epistolar dos alumnos que continúa no presente curso. Mediante esta viaxe que agora se leva a cabo, é intención do departamento de francés sentar as bases para poder efectuar un intercambio de alumnos nos vindeiros anos.

O alumnado de 3º da ESO e 1º de Bacharelato non tiveron reparo en posar co empresario coruñés tras a súa charla do venres 30 de marzo. Pola súa participación no turno de preguntas e polo interese que amosaron polas experiencias que Daniel Ramos contaba, sen dúbida que a actividade resultou moi instructiva para todos.

O pasado 16 de marzo tivo lugar a sétima edición da entrega dos premios do concurso literario de relato curto e poesía que se  celebra cada ano en lembranza de Rita Suárez Amado. O acto foi presidido polo conselleiro de Cultura e Educación Xesús Vázquez Abad. Os asistentes foron agasallados coa actuación do Coro do Instituto.

Os medios de comunicación recolleron amplamente o alí acontecido. Aquí tedes os enlaces:

• Eusebio TV.
• Diario La Opinión Coruña.
• Diario La Voz de Galicia.
• Diario El Ideal Gallego.
• Enlace Xunta de Galicia.

Parabéns a todos os premiados!

Este martes 6 de marzo unha trintena de alumnos de 3º da ESO, en compaña de tres profesores do centro, foi ao centro penitenciario de Teixeiro devolvendo así a visita que un grupo de internos e educadores da UTE (Unidade Terapéutica Educativa) ‘Concepción Arenal’ realizara ao noso instituto. A experiencia podemos cualificala de profundamente humana e educativa. Participamos nunha especie de comuñón das súas vivencias. O traballo destes internos e destes funcionarios permeables á esperanza, abre un espazo novo, rico, un espazo que debe ser coñecido e socialmente estimado.

Teñen un blog: “di-k-non.blogspot.com”, e contan coa inestimable cooperación económica da coruñesa Fundación Barrié.

Desde aquí, desde o instituto, valoramos a iniciativa e mandamos un saúdo fraternal e estes homes, educadores e mais internos, que están vivindo unha experiencia de futuro.

(Este texto foi elaborado polos profesores acompañantes)

O equipo de EusebioTV.

Resultado da campaña feita por EusebioTV:

A web de EusebioTV, cada día con máis visitas:

O pasado martes 27 de febreiro visitáronos varios internos do Centro Penitenciario de Teixeiro que participan na UTE (Unidade Terapéutica Educativa “Concepción Arenal”, cuxo lema é a reinserción é posible). Levaron a cabo unha representación teatral, dous deles tocaron a guitarra e cantaron… Tamén nos relataron dúas experiencias persoais con sinceridade por veces crúa… Cantando reflexionaban sobre o concepto do valor. Eles son valerosos. Son poucos, a participación no programa é voluntaria. Pero o labor que fan é unha porta aberta á esperanza. O próximo 6 de marzo un grupo de alumnos de 3º da ESO devolveralles a visita. Ánimo e a seguir!

Un recordo da sua visita