O alumnado do IESP. Eusebio da Garda está pasando unha semana en Varsovia como parte dun intercambio en Inglés do noso instituto con Zespól Szkól STO TORUNSKA. En marzo acolleremos nas nosas casas ao alumnado polaco, como segunda parte do intercambio.

 Accede ao artigo  de La Opinión

O luns 25 de setembro en representación do IES P Eusebio da Guarda a directora, María Isabel Ruso de Lago, a xefa de estudos María del Carmen Aquino Acuña e a xefa de departamento de hostaleria e turismo Irene Gil Ruíz, asistiron á presentación do programa Innovatech FP no recen inaugurado centro de Innovación de FP Eduardo Barreiro en Ourense. Este programa articúlase no marco da rede de aulas de emprendemento, proxecto  ao que o noso centro se incorporou este ano. O departamento de turismo inicia o seu traballo no mesmo con esta visita, á que lle seguirán numerosas actividades e talleres dirixidos ao alumnado.

Os estudantes Bruno Bolaño Molezún, Aarón Deus Torío e Mencía Cardesín Rial, do IESP Eusebio dá Garda, da Coruña,  acaban de recibir o venres 30 de Xuño varios premios dentro do 34 Congreso de Mozos Investigadores que convoca ,a nivel nacional, o Ministerio de Universidades e o Instituto da Mocidade, INJUVE, dependente do Ministerio de Dereitos Sociais e Axenda 2030. Nesta ocasión eles foron os únicos representantes galegos de entre os 40 relatorios. Por unha banda, Bruno Bolaño obtivo un terceiro premio co seu traballo titulado " Efecto da Ansiedade sobre as vías moduladoras da dor ", que xa foi galardoado cun segundo premio no concurso Stephen Hawking, convocado polo IESP Rosalía De Castro.  Ademais, recibiu unha estancia de 14 días nun centro de investigación do CSIC. Doutra banda, o grupo formado por Aarón Deus e Mencía Cardesín, co seu traballo titulado "Reaparecen as londras nas costas da Coruña e Sada ", foron agraciados cun primeiro premio. Ambos os proxectos foron titorizados pola profesora Mª Jesús Mourazos González, pertencente ao Departamento de Bioloxía e Xeoloxía e coordinadora do STEMbach do IES. O traballo de Bruno pescudou que a ansiedade dificulta a capacidade persoal para modular a dor, o que demostra que sería conveniente incluír terapias psicolóxicas no tratamento da dor crónica. Cambiando de área de estudo, Aarón e Mencía descubriron por primeira vez a capacidade das londras para colonizar áreas densamente poboadas, a condición de que as augas conteñan pouca carga de contaminación.  Así mesmo, propoñen utilizar este descubrimento para monitorizar a calidade das augas dunha maneira sinxela e pouco custosa, probando o valor deste mustélido a nivel ambiental e repasan a toponimia galega das nosas londras (ou lontras). Á súa vez, convidan as institucións a que tomen medidas de protección ambiental nas áreas estudadas (A Coruña e Sada).

 Para acceder a máis imaxes pinchar no enlace

Para acceder ao artigo publicado en prensa pinchar no enlace

O 29 de xuño do 2023 ficará para sempre nas miñas lembranzas máis felices. Nin en soños imaxinei que aquela fermosa homenaxe que tiven o pracer de organizarlle a esta excelsa escritora o pasado 8 de maio tivese como broche de ouro tan magnífica e merecida noticia: a escritora coruñesa Luísa Villalta, emérita antiga alumna do Instituto Eusebio da Guarda, ten un oco de seu entre os grandes persoeiros das nosas letras. En efecto, tras rematar os estudos primarios no desaparecido Colexio das Xosefinas, entrou no curso 1967-1968 no noso centro, para proseguir a súa vida académica no ensino medio, obtendo o título de Bacharel no ano 1973.

Este vello instituto foi o espazo que habitou unha adolescente con múltiples aptitudes. Un vello edificio, testemuña quizais das súas primeiras creacións literarias e inquedanzas artísticas e sociais. Uns mudos corredores de rexa madeira que se aledan por ter sido pisados por mozos e mozas que, coma Luísa, despregaron as súas ás para voar moi alto. Vénme á memoria a canción do tamén tristemente desaparecido a unha idade temperá, Antonio Vega: “El sitio de mi recreo”. Nela fala deses lugares que imos coñecendo ao longo da vida, desas “paisaxes” cargadas de nostalxia. Abofé Luísa Villalta ten aquí para sempre “o sitio do seu recreo”, ese lugar “onde nos levou a imaxinación/ onde cos ollos pechados/ se albiscan infinitos campos”. Día grande hoxe para a voz dunha muller comprometida coa PALABRA con maiúsculas, para unha coruñesa de pro, para a Gran Dama da Cidade Alta. En toda Galicia o 17 de maio de 2024 haberá festa, pero aquí, na nosa cidade, haberá “festa rachada”, porque como ela manifestou no seu Poema da Cidade Alta “veño de aquí/ unha historia de palabras/ nas casas da cabeza e nos chanzos do corazón...”. A Coruña foi a súa Matria e levou o seu nome coma bandeira enarborada, aquí “onde se creou a primeira luz, / xermolou a semente do ceo azul/ volverei a ese lugar onde nacín”, collendo de novo as letras da nomeada canción de Vega, Hoxe o día amenceu con choiva, ou iso parecía. Pero, non; foron as bágoas de ledicia de Luísa dende o ceo, agradecendo tan xusto recoñecemento polo vindeiro e gorentoso ano 2024, inzado cada un dos seus días das súas verbas inmorredoiras. Parabéns, Luísa! É de xustiza.

Teresa Pastor Novo

(Profesora de Lingua Galega e Literatura

e coordinadora do EDLG)

Para acceder a todas as imaxes pinchar no enlace

E xa vai o curso! Como remate das actividades do EDLG, este montou unha pequena exposición sobre esta festividade tan de noso e máis aquí na nosa cidade, A Coruña, onde se achegan milleiros de persoas ata o areal de Riazor, nunha festa Declarada de Interese Turístico Nacional. Así, nas aulas foron tratados diversos aspectos sobre as tradicións desta efeméride e o alumnado de 1º ESO A e D, cooordinados pola súa profesora Teresa Pastor Novo, realizaron distintas actividades, entre as que cómpre subliñar: elaboración dunha cacharela con cartolinas, recompilación de coplas e refraneiro do San Xoán e procura de información das herbiñas de San Xoán e os seus poderes espirituais e terapéuticos. Ademais disto, e para poñer en práctica os seus coñecementos de semántica adquiridos neste curso, escribiron hipónimos do hiperónimo “San Xoán”.

Con esta actividade, O EDLG ponlles fin ás múltiples actividades desenvoltas durante este curso 2022-2023 e quérelles agradecer a todas as persoas que se implicaron (alumnado, profesorado, persoal non docente, ...) a súa inestimable achega e entusiasmo, que nos dá azos para seguirmos traballando os vindeiros cursos con tanta ou máis ilusión por prestixiar a nosa lingua.

Moitas grazas e feliz verán!!!!!

Teresa Pastor Novo

(Coordinadora do EDLG)

Para acceder ao programa pinchar no enlace

Con motivo do 34 Congreso de Mozos Investigadores que terá lugar do 28 ao 30 de xuño no Centro Eurolatinoamericano de Mocidade en Mollina (Málaga), inclúese a seguinte documentación:

· Dossier do 34 Certame de Mozos Investigadores, co Programa Definitivo do Congreso. As intervencións serán retransmitidas por streaming a través da canle de youtube do Injuve:

 https://www.youtube.com/user/injuvejuventud

Un ano máis, o alumnado de francés pasou con éxito as probas DELF.

16 de 17 alumnos e alumnas presentados obtiveron a acreditación do nivel B1 e 6 de 7 a do nivel B2.

Noraboa polo seu esforzo fóra do horario lectivo para continuar a súa formación na lingua estranxeira francés!!

Para acceder a todas as fotos pinchar no enlace

Hoxe 21 de xuño de 2023 o alumnado do grupo específico de 4º E recompilou todas as actividades feitas neste curso, lembranzas dos seus profesores, fotos de saídas didácticas, música que lles gusta, comentarios diversos e frases que os caracterizan, debuxos feitos por eles, algúns exames e traballos que fixeron ao longo do ano… para gardar no sobre da cápsula do tempo. 

A continuación fomos á aula dos nosos devanceiros e a profesora do Ámbito Lingüístico- Social Beni Vidal deulles unha pequena clase. A delegada e o subdelegado depositaron o sobre coas súas achegas do curso e marchamos despois de deixar constancia da visita nas fotos que acompañamos.

Para rematar este curso no que a maioría do alumnado do grupo nos abandona para cursar un ciclo noutros centros, Beni agasallounos cun libro a cada un é unha visita ao observatorio do instituto, algo que lles encantou como despedida.

Moita sorte a todos eles e feliz verán!

Beni Vidal, profesora do Ámbito Lingüístico- Social