O Correlingua está de volta e, como sempre, o noso alumnado implicouse ao cento por cento coa defensa do galego e así o demostrou polas rúas da Coruña. O resultado: un ano máis que gañamos o concurso.
Do 25 de marzo ao 2 de abril, 10 alumnos de 4º de ESO participaron no programa de intercambio con alumnado dun centro educativo da rexión académica de Bretaña en Francia.
O alumnado cercedense asistiu ás clases no "Collège du Kerdurand" en Riantec e aloxouse na casa dunha familia francesa. Tamén aproveitou para visitar os lugares máis destacados da zona.
O obxectivo deste intercambio é potenciar a aprendizaxe da lingua francesa, perfeccionando non só o coñecemento da lingua e a realidade cultural do país, senón desenvolvendo actitudes positivas de convivencia, ademais de ampliar novos horizontes académicos e persoais.
O pasado sábado 15 de abril de 2023, participamos en Palexo (A Coruña) na XVI Feira Matemática organizada por Agapema. As alumnas de 3º ESO Sara Pereiro Vázquez e Yurena Rodríguez Rey, en representación das súas compañeiras e compañeiros, xunto co seu profesor de Bioloxía e Xeoloxía, Xacobo de Toro, atenderon o stand do Colexio oficial de Médicos de A Coruña amosando o seu proxecto RCP e convidaron aos asistentes á feira a fabricar os seus torsos con materiais reciclados.
O Pasado mércores 12 de abril a directora, Gema Castro, e a xefa de estudos de ESO, Raquel Veira, asistiron ao VI Encontro de Experiencias "Arteixo Innovación" no que Marta Marzoa, Xerente da Asociación de Empresarios do Polígono de Sabón, compartiu co resto de asistentes, nomeadamente representantes de empresas e centros educativos, as experiencias educativas de emprendemento desenvolvidas en colaboración entre AEPI Sabón e o CPI O Cruce, desde os inicios co PROEM ata UnReCre o Erasmus+ sobre emprendemento, reciclaxe e creatividade que nos levou de viaxe a Grecia no curso anterior.
O mércores 22 de marzo conmemoramos o día mundial da auga, traballando nas aulas con actividades de sensibilización para fomentar un consumo responsable e o alumnado de 2ºESO A elaborou un mural no que se pon de manifesto que cada pinga de auga conta. Para iso contou coa colaboración do alumnado de infantil e primaria xa que cada estudante desas estapas pintou a súa propia pinga e se foron pegando todas xuntas ao longo da mañá.
O martes 21 de marzo de 2023 conmemoramos o día internacional dos bosques cunha recollida de lixo en espazos naturais na contorna do centro. O alumnado de 2ºA que traballa neste curso na conmemoración das datas máis sinaladas da axenda verde planificou e desenvolveu a actividade.
O pasado luns 20 de marzo o profesorado do CPI Plurlingüe O Cruce participou nun curso de soporte vital básico e uso de desfibrilador externo automático organizado polo Concello de Cerceda no centro. Unha formación moi interesante para estar preparados no caso de ter que actuar ante unha emerxencia.
