Lexislación

Summary: 

A nosa Comunidade presenta un total de nove proxectos á convocatoria da Liña FID do Ministerio de Ciencia, Innovación e Universidades

“Cremos no valor da I+D+i e na calidade e talento que atesoura o noso sector tecnolóxico”, salienta o conselleiro

Idioma Gallego

O conselleiro de Educación, Ciencia, Universidades e FP, Román Rodríguez, acompañado polo director da Axencia para a Modernización Tecnolóxica de Galicia, Julián Cerviño, clausurou esta mañá o acto de presentación dos proxectos impulsados por diferentes departamentos da Xunta que participan na convocatoria da Liña de Fomento da innovación desde a demanda (FID) de Compra Pública de Innovación (CPI) promovida polo Ministerio de Ciencia, Innovación e Universidades. Na xornada interveu tamén a directora da Axencia Galega de Innovación, Carmen Cotelo, entidade que impulsa na Xunta de Galicia o proceso de identificación de desafíos, desenvolvemento das ideas e valoración das propostas recibidas.

O titular do departamento de Ciencia da Xunta destacou a posición de referencia da nosa Comunidade a nivel estatal en Compra Pública de Innovación, con nove iniciativas moi diversas presentadas ás liñas de Fomento da innovación desde a demanda. “Somos referentes nacionais neste eido porque cremos no valor da I+D+i e na calidade e talento que atesoura o noso sector tecnolóxico”, salientou.

As iniciativas que concorren á Compra Pública de Innovación abranguen desde solucións con hidróxeno verde, emprego de vehículos aéreos non tripulados, fomento da aprendizaxe da intelixencia artificial nas aulas ou melloras na atención médica personalizada, entre outras. Neste sentido, o conselleiro felicitou a todos os departamentos implicados polo traballo realizado “que volve poñer de manifesto o poder de tracción que posúe Galicia e a súa aposta polo fomento da innovación desde a Administración”.

Máis de 252 M€ ata 2020

A Compra Pública de Innovación é un instrumento de fomento da innovación orientado a potenciar o desenvolvemento de solucións innovadoras desde o lado da demanda a través do instrumento da contratación pública. O obxectivo é mellorar os servizos públicos mediante a incorporación de bens ou servizos innovadores, o fomento da innovación empresarial e o impulso á internacionalización da innovación empregando o mercado público local como cliente de lanzamento ou referencia.

Entre 2007 e 2020 Galicia executou preto de 252 M€ a través deste instrumento. Nestes momentos, no marco que vai ata 2027, xa se están a executar máis de 75 M€, con perspectiva de incremento a través de novas propostas.

Sustentabilidade, educación e saúde

A Consellería de Medio Ambiente e Cambio Climático presentou ao proceso o proxecto SICLE CO2, cun orzamento de 6,8 M€. A proposta ten como obxecto o desenvolvemento de solucións innovadoras que promovan unha compensación de emisións de proximidade que axuden ademais de forma máis directa á redución da pegada de carbono en Galicia. A tal efecto, prevese un banco de parcelas público, unha plataforma de colaboración para o intercambio de compensacións, o seguimento de proxectos de compensación e unha ferramenta preditiva para determinar a absorción de CO₂ dos terreos agrícolas e as áreas costeiras en Galicia.

Esta consellería presenta tamén Augatech. Cun orzamento de 6 M€, a proposta prevé o desenvolvemento de ferramentas de intelixencia artificial para mellorar a información á cidadanía e para crear un xemelgo dixital dos ríos da cunca hidrográfica de Galicia-Costa, coa finalidade de aumentar a transparencia e mellorar a xestión dos recursos hídricos fronte o cambio climático.

Pola súa banda, a Consellería de Educación, Ciencia, Universidades e FP concorre con EdugalIA. A finalidade da proposta, cun orzamento de 16 M€, é mellorar a equidade e calidade do sistema educativo galego, especialmente nas súas etapas de ensino obrigatorio mediante unha gobernanza ben fundamentada e informada e baseada en evidencias, o expediente dixital único do alumnado e o establecemento dun novo modelo no acceso de alumnos e familias á información de interese en materia educativa, cun punto único de contacto e ferramentas informáticas específicas.

A Consellería de Economía e Industria impulsa cinco proxectos. Un deles é o Centro Galego de Experimentación en almacenamento enerxético e solucións innovadoras vinculadas ao hidróxeno verde, cun orzamento de 7 M€. A proposta procura o desenvolvemento e implantación dun centro demostrador (en rede) para a posta en marcha de solucións innovadoras para aumentar as capacidades industriais en materia de produción, almacenaxe, transporte, distribución e consumo de hidróxeno renovable (Prototipo de xeración de hidróxeno verde a partir de auga de mar).

Cun investimento previsto de 15 M€, Solucións Civil UAVs Initiative 2030 ten como obxectivo o desenvolvemento de solucións empregando tecnoloxías de vehículos aéreos non tripulados en cinco ámbitos (terras produtivas e protección da paisaxe, Parque Natural das Illas Atlánticas, repoboación e patrimonio natural, estradas seguras e sociedade segura).

Pola súa parte, Smartmin Tech, con 8,5 M€ de orzamento, está orientado á obtención e dixitalización de datos xeolóxico-mineiros de Galicia, cun sistema de información avanzada e unha plataforma de xestión. Así mesmo, compleméntase co desenvolvemento de solucións innovadoras relacionadas coa integración ambiental e a economía circular.

Innomar conta cun orzamento de 5,2 M€ para desenvolver novas solucións tecnolóxicas para a zona experimental de enerxías mariñas de Punta Langosteira (Arteixo, A Coruña). Contempla o deseño, desenvolvemento e implementación dunha estrutura que albergue un multiconector flotante e sensorizado que permita a interconexión de prototipos de xeración eléctrica renovable no medio mariño.

Finalmente, Solucións innovadoras con base en recursos forestais de proximidade prevé un investimento de 3 M€ para dar solucións baseadas na natureza, novas técnicas de rehabilitación e materiais sostibles para as construcións tradicionais dos núcleos rurais galegos.

Precisaúde é o proxecto da Consellería de Sanidade nesta convocatoria. Cun orzamento de 20 M€, a proposta baséase na medicina 5P (personalización, prevención, predición, participación e poboación) procurando solucións innovadoras de biomarcadores en oncoloxía, sistemas de simulación innovadores, solucións de análise xenómico avanzado integrado e solucións innovadoras de terapias.

En caso de ser aprobados, o Ministerio financiará parte do orzamento con fondos FEDER plurirrexional e a Xunta de Galicia o restante con fondos propios.

Información xeral Consellería de Educación, Ciencia, Universidades e Formación Profesional

Summary: 

A directora xeral de FP, Eugenia Pérez, participa na inauguración de ‘Erasmus+. O camiño da FP cara unha Europa máis sostible’ organizada por SEPIE

Esta cita, que se prolongará ata o 11 de xullo, busca que cada centro teña as ferramentas necesarias para desenvolver metodoloxías sobre sustentabilidade

Idioma Gallego

A directora xeral de FP, Eugenia Pérez participou hoxe na inauguración da xornada Erasmus+. O camiño da FP cara unha Europa máis sostible organizada polo Servizo Español para a Internacionalización da Educación (SEPIE) en colaboración coa Xunta de Galicia. Unha cita que se realiza a través do equipo National VET Team España, integrado por cerca de 30 profesionais da materia, e na que se explora como os proxectos Erasmus+ ofrecen oportunidades únicas para potenciar a mobilidade e a cooperación internacional no sector da Formación Profesional.

“Estamos nun momento no que os proxectos deste tipo deben abordar o medio ambiente e a loita contra o cambio climático como valores centrais”, salientou a representante da Consellería de Educación, Ciencia, Universidades e FP, considerando fundamental enriquecer “os perfís profesionais dos estudantes e fortalecer os lazos entre institucións educativas europeas”. Eugenia Pérez tamén aproveitou a súa intervención para enxalzar a FP galega, un “modelo de referencia en toda España, que busca estar actualizado segundo as demandas e necesidades da sociedade, e impulsar a internacionalización ”.

Nesta xornada, pensada para as redes e organizacións dedicadas á Formación Profesional e ao aprendizaxe de adultos, búscase conformar unha FP máis sostible, onde cada centro teña a oportunidade de cambiar mentalidades. O obxectivo principal é dotar aos centros das ferramentas necesarias para desenvolver estratexias e metodoloxías nesta materia, plans de estudo orientados ao futuro e iniciativas que apoien os enfoques previstos das organizacións expertas en sustentabilidade medioambiental.

Tres días de aprendizaxe

A xornada prolongarase ata o 11 de xullo contando con mesas redondas, conferencias e visitas a centros de Formación Profesional. Tras a inauguración, profesionais do sector e expertos internacionais porán o foco na internacionalización, na sustentabilidade medioambiental e na Formación Profesional, así como na presentación de accións sostibles Erasmus+, como os espazos verdes galegos e as sendas de Santiago de Compostela.

Xa o mércores, os asistentes a estas xornadas anuais de difusión do National VET Team España poderán profundizar nos retos do futuro e na combinación da formación, o Pacto Europeo polo Clima e as mobilidades. Finalmente, o xoves realizaranse visitas aos centros integrados de FP CIFP Someso da Coruña, CIFP Carlos Oroza de Pontevedra e CIFP Politécnico de Santiago, para conformar unhas conclusións sobre a importancia da oferta formativa de cara á internacionalización.

Información xeral Consellería de Educación, Ciencia, Universidades e Formación Profesional

Idioma Gallego

O secretario xeral de Universidades, José Alberto Díez, e o reitor da Universidade da Coruña, Ricardo Cao, participaron hoxe nunha proba de matrícula a modo de simulacro para comprobar de primeira man o correcto funcionamento do sistema que posibilita a medida da Xunta de Galicia da matrícula gratuíta. Con isto reflíctese o firme compromiso que o Goberno galego ten no apoio ás familias e na igualdade de oportunidades no acceso á educación, neste caso á educación superior.

A Consellería e as universidades levan varios meses traballando na configuración técnica desta aplicación, que estará dispoñible a partir de mañá, cando as tres universidades públicas galegas abran a primeira quenda de chamamentos para inscrición. O proceso, que é o habitual de todos os anos, ten como única novidade que agora, ao cargar os datos persoais, no apartado de bonificacións ou exencións aparece unha nova opción que é o abono do 99% da Xunta de Galicia. Unha vez concluída a matrícula e comprobado que se cumpran os requisitos, o beneficio é automático. 

Información xeral Consellería de Educación, Ciencia, Universidades e Formación Profesional

Summary: 

O procedemento é o habitual de todos os anos, a través da aplicación informática específica que incorpora por primeira vez a medida de gratuidade da Xunta

O conselleiro subliña que a bonificación “é automática”, polo que as familias non teñen que adiantar ningunha contía pola matrícula universitaria dos seus fillos

Subliña que se materializa así o compromiso do Goberno galego de apoio ás familias blindando a igualdade de oportunidades no acceso á educación superior

Teñen matrícula de balde todos os que inicien estudos en primeiro curso así como os de segundo e posteriores cursos que superen unha porcentaxe de créditos entre o 65% e o 90% segundo a área de coñecemento

Idioma Gallego

O conselleiro de Educación, Ciencia, Universidade e Formación Profesional, Román Rodríguez, e o reitor da Universidade de Santiago de Compostela, Antonio López, participaron esta mañá nunha proba de matrícula gratuíta a modo de simulacro para comprobar de primeira man o correcto funcionamento do sistema a partir do mércores, cando as tres universidades públicas galegas abren a primeira quenda de chamamentos para matrícula.

O obxectivo disto é, segundo detallou Román Rodríguez, asegurar que a nova medida “se aplica correctamente” para todos os estudantes que inician por primeira vez estudos universitarios de grao, así como para aqueles de continuidade nas tres universidades públicas galegas. Non en balde, a Consellería e as universidades levan varios meses traballando na configuración técnica desta aplicación.

O conselleiro explicou que o proceso “é o habitual de todos os anos” a través da aplicación informática da universidade onde o alumno resultara admitido: “A única novidade é que agora, ao cargar os datos persoais, no apartado de bonificacións ou exencións aparece unha nova opción que é  a bonificación do 99% da Xunta de Galicia”. Tamén subliñou que, unha vez concluída a matrícula e comprobado que se cumpren os requisitos, a bonificación “é automática”, polo que as familias “non terán que adiantar ningunha contía”.

Román Rodríguez aproveitou para poñer en valor a importancia desta medida, que “reflicte o firme compromiso que temos no apoio ás familias e na igualdade de oportunidades no acceso á educación, neste caso á educación superior”.

Así pois, esta semana comeza a aplicarse a gratuidade da matrícula para os estudos de grao universitario, así como para os de ensinanzas artísticas superiores (Música, Arte Dramática, Deseño e Conservación e Restauración de Bens Culturais) en centros públicos galegos, tanto no caso de novo ingreso como no de continuidade de estudos.

Bonificación do 99%

No que atinxe aos estudos de grao, todo o alumnado de novo ingreso obtén unha bonificación equivalente ao 99% da matrícula para iniciar os seus estudos nas tres universidades públicas galegas ou nun centro público galego de ensinanzas artísticas superiores. Isto supón que os alumnos que cumpran os requisitos tan só aboarán o 1% do custe da matrícula, o que se traduce nunha cantidade simbólica de 7,1 euros ao ano de media como taxa. É dicir, 0,6€ de media ao mes.

Para iso deberá cumprir co requisito de ter superado a ABAU nas convocatorias de 2024 ou ben as probas específicas para maiores de entre 25 e 45 anos organizadas pola Comisión Interuniversitaria de Galicia (CIUG), ou ter superado un ciclo formativo de grao superior no curso 2024.

No caso do alumnado de continuidade de 2º curso en adiante, deberá ter cursado estudos de grao en Galicia no 2023-24 e matricularse no curso 2024-25 na totalidade dos créditos correspondentes ás materias previstas para o curso de que se trate, nunha das tres universidades públicas galegas.

A maiores, deberá ter superado as porcentaxes de crédito matriculados, algo que varía segundo a área de coñecemento: 90% dos créditos para as áreas de Artes e Humanidades e de Ciencias Sociais e Xurídicas, 80% para Ciencias da Saúde e 65% para as de Ciencias e Enxeñaría e Arquitectura.

Doutra banda, para aqueles alumnos universitarios que non cumpran cos requisitos de gratuidade, poderanse beneficiar de novo da conxelación das taxas de grao e máster para o vindeiro curso, co que Galicia levará 14 anos consecutivos coas taxas universitarias conxeladas. Así pois, todos os alumnos que cursen un máster universitario e aqueles que cursen un grao e queden excluídos da gratuidade por non cumprir os requisitos aboarán un prezo medio de 11,89€/crédito.

Ensinanzas artísticas Superiores

Así mesmo, o alumnado de ensinanzas artísticas superiores tamén se beneficia da gratuidade da matrícula destes estudos que, no caso dos de novo ingreso, deberán ter superado as probas específicas de acceso en Galicia. Quedan exentos deste requisito os que acceden directamente aos estudos superiores de Grao en Deseño ou en Conservación e restauración de Bens Culturais sen necesidade de realizar a proba específica de aceso ao ter acadado un título de técnico superior de Artes Plásticas e Deseño.

Para o alumnado de continuidade (de 2º a 4º curso), para optar á bonificación do 99%, requírese estar matriculado en curso completo nun centro público de Galicia no curso anterior e ter superado en primeira matrícula como mínimo o 90% das totalidade deses créditos.

Información xeral Consellería de Educación, Ciencia, Universidades e Formación Profesional

Summary: 

Un total de 511 centros que imparten Infantil, Primaría, ESO ou Bacharelato participarán nestes programas, un 60% máis ca no curso 2017/18

Tamén se benefician desta iniciativa as etapas de Formación Profesional e as escolas de ensinanzas artísticas, cuxas convocatorias aínda se atopan en marcha

Máis auxiliares de conversa, seccións bilingües ou bolsas para acreditar o nivel de idiomas forman parte do paquete de medidas da Xunta nestas aprendizaxes

O informe de EF, considerado como a referencial na avaliación destas competencias, sitúa ao alumnado galego como o segundo con mellor nivel de inglés en España

Idioma Gallego

O 75% dos centros educativos sostidos con fondos públicos na nosa Comunidade desenvolverán o vindeiro curso académico algún programa de plurilingüismo nas etapas de Infantil, Primaria, ESO ou Bacharelato. Así o recolle o informe analizado hoxe no Consello da Xunta, segundo o que 511 centros beneficiaranse desta iniciativa desde setembro, un 60% máis ca no curso 2017/18. Son 11 máis que no curso que vén de rematar, pero esta cifra aínda medrará, pois nestes momentos están en marcha as convocatorias para os centros de Formación Profesional (pendente de resolución) e de ensinanzas artísticas, en prazo de presentación de solicitudes ata o 17 de xullo.

Por etapas, 250 centros imparten plurilingüismo en Infantil. Isto multiplica por tres os que se sumaron á iniciativa desde a súa creación. En Primaria ou ESO, ou en ambas etapas son 460. Outros 15 centros formarán parte do programa en Bacharelato. A falta de datos do vindeiro curso para FP, cómpre lembrar que este ano formaron parte del 26 centros, así como dúas escolas de arte e superiores de deseño na Coruña e Lugo.

Esta fórmula -que implica impartir ata un terzo do horario lectivo en lingua estranxeira, entre outras medidas e beneficios- comezou no curso 2010/11 en Primaria e Secundaria. A partir do curso 2017/18, a Consellería de Educación ampliouno a Infantil, Bacharelato e FP. Ademais, no curso 2022/23 completouse a oferta coas ensinanzas artísticas.

Avance na aprendizaxe de idiomas

Para facilitar este avance na aprendizaxe de idiomas (maioritariamente inglés), a Consellería de Educación, Ciencia, Universidades e FP ten despregados numerosos recursos a través da Estratexia Galega de Linguas Estranxeiras, EDUlingüe2030. Un dos máis destacados son os auxiliares de conversa de apoio, que no próximo curso acadarán a cifra récord de 665, o que multiplica por 100 os 67 que había en 2009. Grazas a estas iniciativas, o alumnado galego sitúase hoxe como o segundo con mellor nivel de toda España, segundo o informe de avaliación de EF, referencia nesta materia.

As persoas auxiliares achegan a realidade cultural e lingüística dos seus países de orixe, aportan a compoñente de multiculturalidade aos centros e levan a cabo un importante servizo complementario para o apoio ao ensino-aprendizaxe dunha lingua estranxeira.

Ademais dos centros plurilingües, outros moitos optan por contar con seccións bilingües, na que un grupo de alumnos cursa unha área, materia ou módulo de materias non lingüísticas de maneira bilingüe. Trátase dunha iniciativa en marcha desde hai máis de 15 anos, que no seu momento foi pioneira en España, e que no curso que vén de rematar acadou as 5314 seccións. Para o próximo curso, a convocatoria debe aínda resolverse.

Acreditación do alumnado

A Estratexia Galega de Linguas Estranxeiras contempla que o alumnado que participa na mesma debe finalizar a súa escolarización cunha acreditación dos niveis B1, B2 ou C1 co obxectivo de mellorar o seu acceso a outra formación superior ou ao mercado laboral.

Para facilitar a todo o alumnado de 4º de ESO, Bacharelato e FP a certificación do seu nivel en linguas estranxeiras, a Consellería de Educación ofrece unha bolsa de 100€ por estudante para sufragar o custo das probas das destrezas orais e escritas

No curso 2023/24 participaron nestas probas financiadas pola Xunta un total de 5.500 alumnos. O número de prazas ofertadas multiplicouse por 6 desde 2017/18.

Información xeral Consellería de Educación, Ciencia, Universidades e Formación Profesional

Summary: 

O Consello deu luz verde ao decreto que suporá un impulso deste oficio fomentando a innovación e a tecnoloxía e atendendo ás demandas do sector

Refórzase a oferta formativa con catro ciclos, incluído a nova titulación de alta especialización de Pedra natural en cantería

Con este, son xa 28 os centros integrados de FP, o triplo que en 2009, que son referentes en formación de calidade, emprendemento e empregabilidade

Idioma Gallego

O Goberno galego vén de reforzar a Rede de Centros Integrados de FP coa incorporación á mesma do novo CIFP Escola de Cantería de Galicia, en Poio, como centro especializado no sector da edificación, a construción e a cantería, tal e como se reflicte no decreto de transformación desta escola en CIFP aprobado hoxe no Consello da Xunta.

Con este paso, o Goberno galego reforza a estrutura estratéxica da FP galega, aumentando ata 28 o número de CIFP dependentes da Consellería de Educación, Ciencia, Universidades e Formación Profesional para o curso 2024/2025, fronte aos nove que había en 2009, o que significa multiplicar por tres o número total.

Na práctica, a transformación desta escola en centro integrado tradúcese nun reforzo da oferta académica con catro novas titulacións para o vindeiro curso, entre as que se atopa a titulación de alta especialización en Pedra Natural en cantería, unha das 13 novas deste tipo que se incorporan a partir de setembro en Galicia, con 22 prazas.

A maiores, neste novo CIFP tamén se poderá cursar o ciclo básico en Reforma e Mantemento de Edificios (18 prazas), e os ciclos de FP dual en Construción (22 prazas) e en Proxectos de Edificación (30 prazas). Suman un total de 92 prazas de nova oferta para o vindeiro curso e o compromiso de seguir incrementando o número ano a ano ata superar as 300.

Plásmase así o reforzo da oferta vinculada á construción e restauración de edificacións en pedra e ao deseño a produción e á restauración de pezas artísticas en pedra. Ademais, tamén se impulsa a formación no ámbito artístico mediante a produción de elementos escultóricos en pedra, incluíndo a súa restauración.

Títulos homologados

Este impulso enmárcase no compromiso acadado logo de que o Goberno autonómico asumira o ano pasado a titularidade da Escola de Cantería de Poio, -ata aquel momento dependente da Deputación de Pontevedra-, para convertese nun centro público docente dependente da Consellería de Educación.

Un cambio que se traduce en melloras importantes para o alumnado, xa que a partir deste curso, ensinanzas que eran consideradas como formación non formal pasan a ser títulos oficiais, ademais de permitir que os antigos alumnos, que non tiñan un título homologado, poidan acreditar a experiencia profesional.

Por outra parte, a ampliación da rede de centros de FP enmárcase nun dos obxectivos recollidos na Estratexia de FP Galicia 2030, que establece como un dos seus eixes promover o papel dos centros integrados de excelencia como referencia para cada familia profesional e sector produtivo e que estes centros desenvolvan accións de innovación do profesorado coa participación activa do tecido empresarial e de institucións.

Na pasada lexislatura creáronse sete novos centros integrados, aos que se engade agora a Escola de Cantería de Galicia.

Información xeral Consellería de Educación, Ciencia, Universidades e Formación Profesional

Summary: 

Ata o 22 de xullo pódense solicitar axudas de entre 1.700€ e 2.500€ para participar o vindeiro curso en programas de mobilidade con países extracomunitarios

Un total de 186 estudantes mellorarán as súas competencias en idiomas este verán a través das bolsas da Xunta para estadías formativas no estranxeiro

A maiores, dentro do programa Erasmus+, este curso concedéronse bolsas de entre 366€ e 2.255 € a un total de 1050 estudantes das universidades galegas

Idioma Gallego

A Xunta apoia un curso máis a mobilidade dos estudantes galegos e a súa participación en cursos de idiomas no estranxeiro. Para iso, a Consellería de Educación, Ciencia, Universidades e FP ten aberta a convocatoria das bolsas para o alumnado das universidades públicas do Sistema Universitario de Galicia (SUG) que participe en programas de mobilidade con países extracomunitarios no curso 2024-2025 fóra do ámbito do programa Erasmus+.

Cun orzamento total de 284.000€, o importe consignado para cada estudante nas súas estadías varía en función do país de destino, así será de 1.700€ para intercambios realizados en Europa e de 2.500€ para o resto do mundo. O prazo de presentación de solicitudes está aberto ata o 22 de xullo e formalizaranse obrigatoriamente por medios electrónicos, a través do formulario normalizado dispoñible na sede electrónica da Xunta de Galicia.

Para solicitar a bolsa, o estudante deberá estar matriculado no curso 2024/25 en calquera grao das universidades públicas galegas e participar no devandito programa de mobilidade. Non poderán recibir a axuda os que xa gozaran dela en convocatorias anteriores e mais o alumnado que, con nacionalidade distinta á española e con dobre nacionalidade, realice a mobilidade nos seus países de orixe. No curso 2023/24 recibiron estas axudas un total de 65 estudantes das universidades públicas galegas.

Estadías para a mellora de idiomas

Ademais, un total de 186 estudantes das universidades públicas galegas mellorarán as súas competencias en idiomas este verán a través das bolsas da Xunta para estadías formativas no estranxeiro. O Diario Oficial de Galicia publicou xa a resolución destas axudas, que teñen como obxectivo que os estudantes melloren as súas competencias en linguas estranxeiras, capacidade de estudo e de traballo no contexto internacional. Cada alumno recibe unha axuda de entre 1.200€ e 1.500€ para realizar estadías de formación lingüística nalgún país estranxeiro entre o 15 de xuño e o 31 de agosto.

Do total dos 186 bolseiros, 137 (o 73%) son mulleres e 49 (o 26%) son homes. Por universidades, 79 estudan na de Santiago de Compostela, 59 na de Vigo e 48 na da Coruña. O país ao que máis se desprazan os alumnos é Malta (62 estudantes), seguido de Irlanda (54) e Reino Unido (24). Séguenlle Italia (11), Canadá e Francia (ambos 10 alumnos).

A rama de coñecemento na que están matriculados máis bolseiros é Ciencias Sociais e Xurídicas (95 estudantes), seguida de Ciencias da Saúde e Artes e Humanidades, ambas as dúas con 27 alumnos. A maiores, 23 beneficiados cursan estudos de Enxeñaría e Arquitectura e outros 14 da rama de Ciencias. O ano pasado participaron neste programa 160 universitarios.

Complementarias Erasmus

A maiores, a Xunta concedeu neste curso 2023/24 axudas complementarias ás do programa de mobilidade europea Erasmus+ a un total de 1.050 alumnos –650 mulleres e 400 homes– das tres universidades públicas. Segundo a resolución publicada polo Diario Oficial de Galicia, 468 dos beneficiarios cursan estudos na Universidade de Santiago de Compostela, 323 na Universidade de Vigo e 259 na Universidade da Coruña.

Por área de coñecemento, 533 dos beneficiarios son alumnos de Ciencias Sociais e Xurídicas, 147 de Enxeñería e Arquitectura, 146 de Ciencias da Saúde, 118 de Artes e Humanidades e 106 de Ciencias. Os países nos que máis realizan o Erasmus os beneficiados son, ao igual ca no curso pasado, Italia (278) e Polonia (219).

A Consellería destina un orzamento de 1,5M€ a esta convocatoria. A contía das bolsas oscila, en función da duración da mobilidade (entre tres e nove meses) e do país de destino, entre os 366€ e os 2.255€, sendo a axuda media de 1.555€. Cómpre sinalar que, ademais do importe por duración e destino, 688 alumnos perciben unha asignación adicional de 500€ por ter unha estadía igual ou superior aos cinco meses.

Igualdade de oportunidades

Estas axudas enmárcase dentro das iniciativas do Goberno galego a prol dun sistema educativo de calidade e con igualdade de oportunidades independentemente dos recursos económicos das familias. Así, a Consellería de Educación apoia aos estudantes para que poidan completar os seus estudos universitarios fóra do territorio español e favorece un ano máis a mobilidade estudantil, no sentido de adquirir, actualizar e completar as súas capacidades, coñecementos, habilidades, aptitudes e competencias para o seu desenvolvemento persoal e profesional.

As axudas teñen como obxectivo mellorar e perfeccionar o progreso do alumnado das universidades galegas. De esta maneira, tamén se consegue o progreso da sociedade no seu conxunto e constitúe a base para proporcionar o capital humano altamente cualificado e formado que precisa Galicia para afrontar os retos futuros.

Información xeral Consellería de Educación, Ciencia, Universidades e Formación Profesional

Summary: 

As solicitudes presentaranse a través da plataforma da Escola Oficial de Idiomas dixital

Idioma Gallego

A Xunta de Galicia vén de convocar novos cursos preparatorios para as probas de acreditación de certificación de lingua galega (Celga), así como de linguaxe administrativa galega de nivel medio e superior en liña que se impartirán entre outubro deste ano e maio de 2025 nas Escolas Oficiais de Idiomas de Galicia (EOI) de oito cidades.

As persoas interesadas en participar nestes cursos deberán realizar unha inscrición telemática a través do enderezo web habilitado. O prazo vai do 6 ata o 12 de xullo de 2024 para os cursos do primeiro cuadrimestre (outubro-xaneiro), e do 11 ata o 22 de novembro de 2024 para os cursos do segundo cuadrimestre (febreiro-maio).

Tanto os cursos preparatorios Celga (de 60 horas de duración), como os de linguaxe administrativa galega, non teñen custo para o alumnado e pódenos solicitar aquelas persoas maiores de dezaseis anos, ou quen os faga en 2024, que desexen preparar as probas que convoca a Secretaría Xeral de Política Lingüística para certificaren a súa competencia en lingua galega, tal e como pode consultarse no Diario Oficial de Galicia.

No caso dos cursos de linguaxe administrativa galega de nivel medio e superior van dirixidos aos empregados públicos das administracións autonómica, local ou da Administración periférica do Estado na comunidade, agás o persoal docente e sanitario. Todos os solicitantes deberán estar en posesión dalgún certificado como o Celga 4, os cursos de iniciación e perfeccionamento de lingua galega, ou cursos básicos de linguaxe administrativa.

Información xeral Consellería de Educación, Ciencia, Universidades e Formación Profesional

Summary: 

Román Rodríguez subliña a calidade destas iniciativas de carácter científico que os alumnos implementan ao longo do curso e que contan coa colaboración empresarial

A rede de Centros Integrados de FP aglutina o 60% destas accións que son un exemplo de traballo colaborativo e transferencia de coñecemento

O Goberno galego leva mobilizados uns 10M€ en iniciativas de innovación aplicada na FP, co apoio de 66 centros, 2.400 docentes e 450 empresas

Idioma Gallego

Os centros galegos de Formación Profesional desenvolven este ano un total de 45 proxectos de innovación aplicada que contan co apoio da Xunta ao abeiro da convocatoria anual para este fin impulsada pola Consellería de Educación, Ciencia, Universidades e Formación Profesional e dotada con 1M€ de orzamento.

Tal e como avanzou hoxe o conselleiro de Educación, Román Rodríguez, todos eles veñen de ser recoñecidos cos Premios de Innovación da FP “polo seu destacado potencial innovador, o traballo colaborativo e a transferencia de coñecemento entre centros educativos, empresas e outras entidades”.

Así o sinalou esta mañá durante unha visita ao Centro Integrado de FP CIFP Politécnico de Santiago, que é un dos galardoados na convocatoria deste ano por un proxecto sobre recuperación e temperamento da gaita porteña e outras gaitas de chaves galegas, que recibiu 42.000 euros da Xunta de Galicia.

O titular de Educación do Goberno galego puido coñecer de primeira man esta iniciativa ao tempo que se informou da colaboración deste centro noutros proxectos como o Sunwind (estación de traballo móbil con enerxía fotovoltaica) co CIFP Ferrolterra e un de Modificación xenética de lévedos para a produción de beta-caroteno para uso na industria alimentaria co CIFP Coroso de Ribeira.  “A través de iniciativas coma esta avánzase na posta en valor o talento do alumnado da FP e na potenciación de iniciativas emprendedoras, contribuíndo ao desenvolvemento tecnolóxico e á mellora de competitividade do tecido produtivo galego”, abondou o conselleiro.

Impulso ao emprendemento

Así mesmo subliñou que o compromiso da Xunta “na procura da calidade e a excelencia na FP e o fomento do emprendemento” se plasma na mobilización de en torno a 10 millóns de euros en proxectos de innovación aplicada na Formación Profesional que contan co apoio de 66 centros educativos, 2.400 docentes e a participación de arredor de 450 empresas colaboradoras.

O apoio a proxectos de innovación compleméntase coa mellora de espazos e dotacións tecnolóxicas nos institutos e centros de Formación Profesional. Neste senso, o CIFP Politécnico de Santiago é un dos 80 centros galegos que o vindeiro curso van contar cunha aula de tecnoloxía aplicada que está a implantar a Xunta co obxectivo de mellorar a cualificación dos estudantes, permitíndolles a simulación de centros de traballo e contornas laborais reais.

Neste contexto, a Rede de Centros Integrados de FP -composta por 27 centros- constitúe un referente neste ámbito e actúa como polo tractor das dinámicas de innovación e emprendemento en relación co resto dos centros que imparten Formación Profesional. Non en balde, os centros da Rede concentran o 60% dos proxectos de innovación da FP que se desenvolven en Galicia. Ademais, cinco deles -que concentran un investimento de preto de 4,4M€ da Xunta- forma parten da Rede Estatal de Excelencia de FP como centros punteiros a nivel nacional en distintos ámbitos.

Orixinalidade e viabilidade

Na implementación dos 45 proxectos premiados participaron 32 centros coordinadores, 34 centros colaboradores e 94 entidades. Do total, 26 deles correspóndense á modalidade de innovación tecnolóxica e científica e 19 á modalidade de innovación didáctica.

Por provincias, 16 dos proxectos galardoados correspóndense con centros da provincia da Coruña, 13 de Pontevedra, 11 de Lugo e 5 de Ourense. En canto á distribución por familias profesionais, destacan os proxectos do eido de Hostalaría e turismo, Transporte e mantemento de vehículos, Electricidade e electrónica e Instalación e mantemento.

Para a súa selección tivéronse en conta aspectos como a súa orixinalidade, viabilidade, colaboración con institucións educativas ou empresariais, participación activa do alumnado, as oportunidades potenciais de emprego xeradas e a planificación do proxecto. Outros aspectos de relevancia foron a importancia e impacto nos sectores correspondentes, a mellora do proceso de ensino-aprendizaxe e a capacidade de transferir os resultados obtidos para outros centros de FP.

Tamén se valoraron especialmente aqueles proxectos susceptibles de ser continuados desde o Centro Galego da Innovación da FP Eduardo Barreiros, para dar lugar a proxectos de emprendemento industrial.

File: 

PROXECTOS DE INNOVACIÓN APLICADA NA FP GALEGA Información xeral Consellería de Educación, Ciencia, Universidades e Formación Profesional

Summary: 

O CTAG recibirá unha axuda de 4M€, mentres que AIMENT recibirá 3,2M€, Gradiant uns 263.000€ e CETIM 442.000€

Román Rodríguez destaca o compromiso do Goberno galego co fortalecemento e ampliación das capacidades científico-tecnolóxicas destes centros

O obxectivo é facilitar o seu crecemento potenciando a súa internacionalización e reforzar as súas actividades de transferencia cara o tecido produtivo

Idioma Gallego

O conselleiro de Educación, Ciencia, Universidades e FP, Román Rodríguez, acompañado pola directora da Axencia Galega de Innovación, Carmen Cotelo, mantivo hoxe un encontro con representantes de catro centros tecnolóxicos para dar conta do apoio do Goberno galego aos seus proxectos de mellora de infraestruturas de investigación e ensaio, acadando os case 8M€. Concretamente, o titular de Ciencia reuniuse cos centros tecnolóxicos CTAG e AIMEN, con sede en Porriño, Gradiant, localizado en Vigo, e CETIM, de Culleredo.

Con esta liña de axudas, a Xunta apoia a creación e ampliación das infraestruturas de investigación e experimentación destes centros galegos, cubrindo desde a adquisición de terreos e equipamento ata a construción ou ampliación de edificacións e activos inmateriais. “Con estas axudas queremos contribuír ao fortalecemento e ampliación das capacidades científico-tecnolóxicas destas entidades”, sinalou Román Rodríguez.

Durante o encontro, o representante do Goberno autonómico explicou que o obxectivo conxunto é “acadar unha I+D+i pioneira capaz de atraer talento e investimento privado, mellorando o posicionamento galego a nivel internacional, así como facilitar o seu crecemento, excelencia e actividades cara ao tecido produtivo”. Ademais, os proxectos están orientados á xeración de capacidade nos ámbitos estratéxicos da Estratexia de Especialización Intelixente (RIS3) de Galicia, evitando solapamentos coas infraestruturas xa existentes e favorecendo sinerxías entre elas.

Cada solicitude inclúe un plan de explotación adaptado ao tipo de infraestrutura que permitirá comprobar a sustentabilidade financeira das mesmas e estimar o seu impacto potencial no ecosistema galego de innovación. A intensidade dos apoios é a máxima permitida para este tipo de axudas, o 50%, cofinanciadas con fondos europeos no marco do programa Galicia Feder 2021-2027.

Infraestruturas apoiadas

O CTAG, que obtén unha axuda de 4M€, realizará un investimento de 8M€ en infraestruturas de investigación asociadas ás liñas de investigación da mobilidade autónoma, conectada, segura e ecolóxica que caracterizan o futuro da industria do automóbil.

No caso de AIMEN, que recibirá algo máis de 3,2M€ e contará cun investimento total de 6,4M€, construirase un novo centro de fabricación intelixente, onde se lanzarán novas liñas de infraestruturas singulares de fabricación avanzada e sustentable e de dixitalización punteiras en ámbitos de grande impacto para Galicia como o transporte, a enerxía e a construción, así como reforzar e fortalecer as xa existentes.

Gradiant cun apoio duns 263.000 euros, ten como obxectivo a adquisición e posta en marcha dunha infraestrutura de investigación e computación a baixa escala para a realización de actividades de I+D en tecnoloxías de alto impacto e potencial de aplicación en diversos ámbitos, cun orzamento total de preto de 526.000 euros. En concreto, ditas actividades propoñen a investigación en tecnoloxías cuánticas, micro-nanoelectrónica e fotónica, computación confidencial, análise multimedia, tecnoloxías da linguaxe e, en xeral, intelixencia artificial aplicada.

O CETIM recibirá unha axuda de preto de 442.000€ dos 883.000€ que vai investir na mellora da súa excelencia científica e de investigación no eido da Economía Circular a través do proxecto ‘Circular Excellence CETIM’. Focalizará os seus esforzos nos seis ámbitos de investigación estratéxica do centro: baterías, augas, hidróxeno verde, polímeros sustentables, materiais de construción sustentable e industria sustentable.

Mantemento de 516 postos de traballo

Esta terceira convocatoria permitirá mobilizar ao redor de 16M€ contribuíndo ao mantemento de 516 postos de persoal altamente cualificado. En total, a través das tres convocatorias desta liña de axudas (2018, 2020 e 2024) téñense apoiado 19 proxectos con axudas por importe de 17M€, mobilizando 35M€. Pero non son as únicas axudas a centros tecnolóxicos, desde o 2009 a Xunta de Galicia leva destinados un total de 207M€ de apoio.

Estas infraestruturas ocupan unha posición destacada no ecosistema galego de I+D+i, pois “o seu papel é esencial na transformación da economía polo seu potencial para xerar vantaxes competitivas no tecido empresarial”, concluíu o conselleiro de Ciencia.

Información xeral Consellería de Educación, Ciencia, Universidades e Formación Profesional

Summary: 

O conselleiro de Educación, Ciencia, Universidades e FP visita o centro acompañado da directora da Axencia Galega de Innovación, Carmen Cotelo

O representante da Xunta destaca a participación do centro en grandes proxectos estratéxicos como as Unidades Mixtas de Investigación ou Fábrica Intelixente e Sustentable

Idioma Gallego

O conselleiro de Educación, Ciencia, Universidades e Formación Profesional, Román Rodríguez, visitou esta mañá en Vigo ANFACO-CECOPESCA e destacou o papel clave que desenvolven os centros tecnolóxicos no impulso á innovación e á competitividade do tecido produtivo galego e, neste caso, da industria mar-alimentaria. O conselleiro estivo acompañado pola directora da Axencia Galega de Innovación, Carmen Cotelo, e polos presidente e secretario xeral de ANFACO-CECOPESCA, Iván Alonso-Jáudenes e Roberto Alonso, respectivamente. Este encontro enmárcase na rolda de visitas do titular de Ciencia aos centros tecnolóxicos galegos. 

Na visita, o representante da Xunta de Galicia tivo oportunidade de coñecer o Centro de Tecnoloxías Avanzadas de Investigación para a Industria Mariña e Alimentaria (CYTMA), un espazo de investigación tecnoloxicamente punteiro, que contou co apoio do Goberno galego e fondos FEDER para a súa dotación de infraestruturas e equipamento científico-tecnolóxico. 

Neste contexto, Román Rodríguez reivindicou o rol de aliado do centro tecnolóxico na dinamización da industria do mar-alimentaria e puxo como exemplo a participación do centro en instrumentos como as Unidades Mixtas de Investigación ou o programa Fábrica Intelixente e Sustentable da Xunta de Galicia. Liñas que fan posible unha maior integración dos axentes do ecosistema do I+D+i galego para resolver os retos existentes na cadena mar-alimentaria, un principio fundamental desta entidade viguesa.

Cooperación co tecido empresarial

ANFACO-CECOPESCA impulsou cinco unidades mixtas desde 2014 en cooperación co tecido empresarial co obxectivo de desenvolver actividades de I+D+i estratéxicas para Galicia, impulsar a transferencia de I+D ao tecido produtivo e atraer empresas cara Galicia. Actualmente, está a desenvolver unha Unidade Mixta de Investigación coas empresas Lagumar Seas e Angulas Aguinaga (ambas do grupo vasco Angulas Aguinaga) que está a investigar a mellora na produción de moluscos incorporando tecnoloxías avanzadas e dixitalización. 

Así mesmo, o centro tecnolóxico participou en tres proxectos do programa Fábrica Intelixente e Sustentable que persegue a modernización da industria galega en sectores estratéxicos. Na actualidade, ANFACO-CECOPESCA traballa nun proxecto que introduce as novas tecnoloxías para a xestión intelixente e sustentable do procesado no sector pesqueiro, liderado pola empresa Hermasa Canning Technology SA.

Por último, o conselleiro apuntou a participación do centro na Alianza Tecnolóxica Intersectorial de Galicia, que agrupa a sete centros tecnolóxicos galegos, e no Hub de Innovación Dixital DATAlife, que está a impulsar a transformación dixital das pemes de sectores como agro-mar-alimentación, forestal-madeira, biotecnoloxía e coidados-saúde.

Información xeral Consellería de Educación, Ciencia, Universidades e Formación Profesional

Summary: 

O conselleiro de Educación presenta a actuación que se licita hoxe mesmo e que se prevé completar a partir de 2025 cunha reordenación e incremento de espazos

“O obxectivo é dar resposta ás necesidades deste centro de referencia, mellorando o confort dunha comunidade educativa de máis de 1.550 alumnos e preto de 150 docentes”, di o conselleiro

Enmarca esta actuación no compromiso da Xunta co impulso á FP na área máis industrial de Galicia, “a única que oferta máis de 10.000 prazas novas“

Idioma Gallego

O conselleiro de Educación, Ciencia, Universidades e FP, Román Rodríguez, acompañado pola delegada territorial da Xunta en Vigo, Ana Ortiz, visitou hoxe o Centro Integrado de FP Manuel Antonio de Vigo co gallo da licitación das obras de rehabilitación, que constitúen a primeira fase da remodelación deste centro. Neste senso, explicou que o investimento desta primeira actuación superará os 1,6M€, co obxectivo de renovar e adaptar as infraestruturas do edificio.

A previsión é adxudicar a obra no mes de outubro, comezala en novembro e rematala para o verán 2025. A partir dese momento, a finais de 2025, a Consellería poderá xa licitar a segunda fase da actuación, para a ampliación e reordenación de espazos do centro.

O titular do departamento educativo da Xunta explicou que o obxectivo desta obra “é dar resposta ás necesidades deste centro de referencia na FP en Galicia, mellorando principalmente as súas cubertas e accesibilidade”. “O CIFP Manuel Antonio conta cunha comunidade educativa conformada por máis de 1.550 alumnos e preto de 150 docentes, e a finalidade última desta actuación é que redunde no confort diario de todos eles”, destacou o conselleiro.

Román Rodríguez enmarcou esta actuación no compromiso da Xunta co impulso á FP na área máis industrial de Galicia. “Non en balde, para o curso que vén a de Vigo é a única área que  oferta máis de 10.000 prazas novas en ciclos e másteres de FP”, destacou durante a visita, na que tamén participou a directora xeral de FP, Eugenia Pérez. De feito, o CIFP Manuel Antonio suma á súa oferta tres novos ciclos na modalidade dual intensiva, en concreto o de grao medio en Servizos en restauración, e os de grao superior en Dirección de cociña e en Procesos e calidade na industria, que suman 66 prazas.

Renovación de cubertas e mellora de accesibilidade

Esta primeira fase consistirá na limpeza e reparación dos 5.500 m² de cubertas, ás que se aplicará tamén impermeabilización e illamento, e a substitución dos lucernarios. Deste xeito solucionaranse os actuais problemas de estanqueidade do centro.

Por outra banda, mellorarase a accesibilidade do edificio que alberga a área sanitaria-química mediante a instalación dun ascensor no seu vestíbulo, así como coa habilitación de aseos adaptados. A maiores, acometerase unha redistribución dos laboratorios.

A obra enmárcase no Plan de Nova Arquitectura Pedagóxica, un programa posto en marcha polo Goberno galego para renovar os colexios, institutos e centros de FP, co fin de adaptalos ás esixencias actuais. O programa ten como obxectivo reformar os 1.600 edificios que forman os máis de 1.000 centros educativos galegos e adaptalos ás necesidades do ensino do século XXI.

Información xeral Consellería de Educación, Ciencia, Universidades e Formación Profesional

Summary: 

O conselleiro de Educación visita o centro, no que se investirán preto de 225.000€ para construír un novo edificio anexo ao existente

Está previsto que a obra comece en novembro e remate en maio, para o que o Concello vai conceder a licenza o vindeiro mércores

Idioma Gallego

O conselleiro de Educación, Ciencia, Universidades e FP, Román Rodríguez, visitou hoxe a Escola de Educación Infantil O Areal, en Baiona, para anunciar a súa ampliación. Segundo explicou o titular do departamento educativo da Xunta explicou que a actuación está xa licitada e conta cun orzamento de case 225.000€. A previsión é comezar as obras en novembro e rematalas en maio, para o que o Concello de Baiona vai conceder a licenza o vindeiro mércores, tal e como informou o alcalde, Jesús Vázquez Almuíña, na visita.

Román Rodríguez destacou a importancia desta actuación “dotar a esta escola dun espazo amplo onde poder desenvolver diferentes actividades, tanto didácticas como de ocio, tan importantes para o desenvolvemento do alumnado de Infantil”. “Seguimos os parámetros do Plan de Nova Arquitectura Pedagóxica, que aposta por espazos flexibles e polivalentes en continuidade coa natureza, como vai ser o que construamos neste centro”, detallou.

Deste xeito, a obra consiste na construción dun volume anexo á edificación existente que se adapta á altura do actual edificio, cunha superficie total de 107,75 m². O novo espazo será flexible e poderá usarse tanto de maneira independente como estendéndoo cara ao espazo exterior, achegando ademais un espazo cuberto que permita o seu uso en condicións climatolóxicas adversas.

Así mesmo, a folla de ruta da Xunta para a modernización dos centros educativos procura a eficiencia enerxética e o respecto ao medio ambiente. Neste sentido, a nova edificación da EEI O Areal terá a mínima pegada ecolóxica e a súa construción vai ser en seco, é dicir, executada sen necesidade de auga. A única excepción será a cimentación e a soleira do edificio, que se realizarán de xeito tradicional, con formigón armado.

A estrutura do novo edificio será de madeira laminada, con cerramentos de paneis de madeira-cemento, fiestras de madeira, divisións interiores de panel de xeso, pavimentos de tarima flotante de madeira e cuberta de zinc.

Información xeral Consellería de Educación, Ciencia, Universidades e Formación Profesional

Summary: 

O conselleiro destaca o papel dos docentes como “formadores das novas xeracións e encargados de preparar aos galegos para os retos do presente e do futuro”

Cun orzamento total de 11,4M€, ofértanse 132.531 prazas en 6.172 actividades e un total de 130.136 horas de formación

Créase un novo itinerario para afondar nas matemáticas e mellóranse os centrados no programa E-Dixgal e nos polos creativos

Ao itinerario para novos docentes creado no actual curso súmase outro específico para os funcionarios en prácticas

No curso que vén de rematar formouse o 87% do profesorado galego e emitíronse máis de 76.500 certificacións 

Idioma Gallego

O conselleiro de Educación, Ciencia, Universidades e FP, Román Rodríguez, presentou hoxe o Plan anual de formación do profesorado 2024/25, unha iniciativa a través da que a Xunta pon a disposición dos docentes un total de 132.531 prazas para reforzar e actualizar as súas competencias profesionais, un 7,5% máis ca no actual curso. Á presentación asistiron tamén os directores xerais de FP, Eugenia Pérez, e de Centros e Recursos Humanos, Jesús Álvarez.

O titular do departamento educativo da Xunta sinalou o papel dos docentes como “formadores das novas xeracións e encargados de preparar aos galegos para os retos do presente e do futuro”. “É fundamental poñer á vosa disposición as ferramentas necesarias para facelo con garantía de éxito nun marco de cambios constantes en metodoloxías educativas, dinámicas pedagóxica e transformacións sociais”, destacou.

Neste sentido, o conselleiro explicou que o plan inclúe un total de 130.136 horas, cun investimento total de 11,4M€, medio millón de euros máis. Serán un total de 6.172 actividades, dando especial protagonismo á formación en centros, contextualizada e personalizada, que supón o 73% das accións, seguida dos cursos e xornadas (21%) e a formación en liña (3%). 

As restantes actividades (3%) serán un total de 180 estadías en centros de traballo, enmarcadas na liña de actuación específica para a capacitación do profesorado de FP e réxime especial.

Catro prazas por docente

“Con esta nova oferta, o curso que vén cada docente de Galicia disporá dunha media de catro prazas de formación”, explicou Román Rodríguez, nun plan que fai especial fincapé nas competencias matemáticas e dixitais e en todas as relacionadas coa FP. De feito, o conselleiro destacou o incremento das prazas nas accións específicas para docentes de FP e ensinanzas de réxime especial, máis de 17.000, o que supón 5.700 (50% máis) prazas máis, en consonancia coa súa enorme relevancia no sistema educación galego.

O obxectivo deste plan é facilitar o traballo dos docentes, como piar do sistema educativo, ofrecéndolles formación gratuíta que lles permita facer fronte aos novos retos do ensino do século XXI. “Queremos avanzar nos retos presentes e futuros como a dixitalización, a innovación educativa e as novas metodoloxías e apostar por accións formativas que nos permitan reforzar valores como a inclusión, a convivencia ou o plurilingüismo”, dixo o conselleiro. 

“Este novo plan contribuirá a afondar nos novos currículos e a fortalecer as competencias en aspectos tan necesarios como a atención á diversidade ou a xestión tecnolóxica, e seguir traballando por un modelo inclusivo, innovador, flexible, cooperativo e axustado ás necesidades dos alumnos”, rematou.

400 actividades novas

A oferta do Plan xeral (o que non está dirixido especificamente a docentes de FP) está organizada en seis liñas formativas prioritarias: dixital, que supón o groso da formación (32%), didáctica (28%), innovación (15%), convivencia e inclusión (15%) e comunicación e plurilingüismo (10%). Estas liñas concrétanse en 23 itinerarios, catro máis ca no curso 2023/24, con tres niveles de desenvolvemento cada un: básico, medio e avanzado. Dentro deles, hai 400 actividades formativas que son completamente novas ou foron actualizadas. 

Entre as novidades cómpre salientar o deseño dun novo itinerario de fomento da competencia matemática dirixida ao ao profesorado de Infantil, Primaria e Secundaria cun marcado enfoque práctico e baseado na resolución de problemas que acheguen os sentidos matemáticos á realidade do alumnado. 

Incorpórase tamén un itinerario específico para o proxecto E-Dixgal, con actividades dirixidas a toda a comunidade educativa como as de manexo da plataforma para o profesorado, coordinación e dinamización para os coordinadores de centro, liderado dixital para as direccións e xornadas de achegamento ao programa para as familias.

Así mesmo, créase un itinerario para os funcionarios en prácticas, é dicir, os que acaban de superar a oposición, que se suma ao incorporado no actual curso para a formación integral dos docentes que entraban por primeira vez no sistema, e que adoitan facelo como interinos e substitutos. A maiores, actualízanse os itinerarios formativos de equipos directivos e novos docentes a partir de detección de necesidades

Tamén se redeseña o itinerario centrado nos polos creativos para potenciar a superación de retos, a creatividade e a experimentación nos centros educativos. 

Innovación e adaptación á nova lei na FP

O Plan de capacitación para o profesorado de FP e Réxime Especial distribúese tamén en seis liñas de actuación e faise fincapé na de innovación tecnolóxica, científica e didáctica, que supón o 44%. Céntrase na adquisición de habilidades tecnolóxicas e aplicación de ferramentas e recursos deste tipo, así como nos enfoques didácticos innovadores.

A segunda liña de máis peso é a de acreditación de competencias e orientación profesional (18%), seguida da de competencias para a implantación da nova lei de FP (15%), a formación en alta especialización (11%), as tecnoloxías emerxentes na contorna da FP (8%) e as competencias lingüísticas profesionais (4%).

As principais novidades neste ámbito son a incorporación de actividades específicas para a impartición dos novos módulos incluídos na lei de FP que se empeza a aplicar a partir de setembro, en concreto os de Itinerario Persoal para a Empregabilidade I, Sustentabilidade aplicada ao sistema produtivo, Dixitalización aplicada aos sectores produtivos e Inglés profesional.

Tamén se suma unha nova liña de actuación centrada nas tecnoloxías emerxentes na contorna da FP, co obxectivo de facilitar a integración da intelixencia artificial, a internet das cousas, a realidade virtual ou a realidade aumentada, entre outras.

Ademais, no marco da liña de actuación de acreditación de competencias, introdúcese como novidade un Módulo ARA, módulo para formarse no procedemento de acreditación de competencias e orientación profesional dirixida a todo o profesorado, orientadores, equipos directivos, persoal experto non docente, dinamizadores...

Balance do curso 2023/24

No curso que vén de rematar realizáronse un total de 5.854 actividades, un 6% máis ca no curso anterior, das que 152 foron estadías en empresas ou organismos equiparados. Isto supuxo 122.073 horas de formación impartidas e 123.341 prazas ofertadas, das que gozaron máis de 31.370 docentes, o 87% do profesorado galego. A falta dos datos definitivos, emitíronse 76.574 certificacións, o que implica que o 85% dos participantes remataron satisfactoriamente a formación. 

Neste ano académico intensificouse a liña de actuación para a acreditación das competencias dixitais do profesorado dentro do sistema educativo. A día de hoxe recibiron esta certificación 29.662 docentes. Así mesmo, concedéronse 69 licenzas de formación a docentes, cunha duración total de 206 meses e un orzamento de case 900.000 euros, con resultados e valoracións moi positivos.

File: 

PLAN ANUAL FORMACIÓN DO PROFESORADO Información xeral Consellería de Educación, Ciencia, Universidades e Formación Profesional

Summary: 

A Xunta formaliza así o compromiso con esta medida que se aplicará desde o día 10, coincidindo coa primeira quenda de matrículas nas universidades públicas galegas

Terán matrícula de balde todos os que inicien estudos en primeiro curso así como os de segundo e posteriores cursos que superen entre o 65% e o 90% dos créditos

A maiores, as taxas de máster continúan conxeladas para o conxunto do alumnado, ao igual que as de grao para aqueles que non cumpran con requisitos da gratuidade

Esta medida supón un aforro medio de 3.000 euros para as familias por cada fillo estudante de grao

Idioma Gallego

O publica hoxe os decretos de gratuidade da matrícula para os estudos de grao universitario así como para os de ensinanzas artísticas superiores (Música, Arte Dramática, Deseño e Conservación e Restauración de Bens Culturais) en centros públicos galegos, tanto no caso de novo ingreso como no de continuidade de estudos. A Xunta formaliza así o compromiso con esta medida que vai operar xa desde a próxima semana, cando o mércores se abra a primeira quenda de matrícula nas tres universidades públicas galegas.

Así pois, as familias cuxos fillos e fillas inicien por primeira vez estudos de grao universitario ou de grao en ensinanzas artísticas superiores no curso 2024-25 terán bonificado o prezo da matrícula, o que supón maior facilidade de entrada para todos os estudantes e contribúe á igualdade de oportunidades. Ademais, a medida supón un aforro medio de 3.000 euros para as familias por cada fillo estudante de grao universitario.

Bonificación do 99%

No que atinxe aos estudos de grao, todo o alumnado de novo ingreso obterá unha bonificación equivalente ao 99% da matrícula para iniciar os seus estudos nas tres universidades públicas galegas ou nun centro público galego de ensinanzas artísticas superiores. Isto supón que os alumnos que cumpran os requisitos tan só aboarán o 1% do custo da matrícula, o que se traduce nunha cantidade simbólica de 7,1 euros ao ano de media como taxa. É dicir, 0,6€ de media ao mes.

Para iso deberá cumprir co requisito de ter superado a ABAU nas convocatorias de 2024 ou ben as probas específicas para maiores de entre 25 e 45 anos organizadas pola Comisión Interuniversitaria de Galicia (CIUG) ou ter superado un ciclo de FP de grao superior no curso 2024.

No caso do alumnado de continuidade de 2º curso en adiante, deberá ter cursado estudos de grao en Galicia no 2023-24 e matricularse no curso 2024-25 na totalidade dos créditos correspondentes ás materias previstas para o curso de que se trate, nunha das tres universidades públicas galega.

A maiores, deberá ter superado as porcentaxes de crédito matriculados, algo que varía segundo a área de coñecemento: 90% dos créditos par as áreas de Artes e Humanidades e de Ciencias Sociais e Xurídicas, 80% para Ciencias da Saúde e 65% para as de Ciencias e Enxeñaría e Arquitectura.

Doutra banda, para aqueles alumnos universitarios que non cumpran cos requisitos de gratuidade, o DOG tamén ratifica de novo a conxelación das taxas de grao e máster para o vindeiro curso, co que Galicia levará 14 anos consecutivos coas taxas universitarias conxeladas. Así pois, todos os alumnos que cursen un máster universitario e aqueles que cursen un grao e queden excluídos da gratuidade por non cumprir os requisitos aboarán un prezo medio de 11,89€/crédito.

Ensinanzas artísticas Superiores

Así mesmo, o alumnado de ensinanzas artísticas superiores tamén se beneficia da gratuidade da matrícula destes estudos que, no caso dos de novo ingreso, deberán ter superado as probas específicas de acceso en Galicia. Quedan exentos deste requisito os que acceden directamente aos estudos superiores de Grao en Deseño ou en Conservación e restauración de Bens Culturais sen necesidade de realizar a proba específica de aceso ao ter acadado un título de técnico superior de Artes Plásticas e Deseño.

Para o alumnado de continuidade (de 2º a 4º curso), para optar á bonificación do 99%, requírese estar matriculado en curso completo nun centro público de Galicia no curso anterior e ter superado en primeira matrícula como mínimo o 90% das totalidade deses créditos.

Información xeral Consellería de Educación, Ciencia, Universidades e Formación Profesional

Summary: 

Os recoñecementos desta cuarta edición son os másteres en Enxeñería Química e Bioprocesos pola USC; Química Orgánica pola USC, UAM e UCM, e Ciencias, Tecnoloxías e Xestión Ambiental pola UDC

Son xa unha ducia as titulacións con este recoñecemento que lograron acreditar, nos últimos anos, a súa calidade a nivel científico, técnico e formativo

Idioma Gallego

O conselleiro de Educación, Ciencia, Universidades e FP, Román Rodríguez, enxalzou o modelo da universidade galega como “referente en España” durante o acto de recoñecemento aos másteres universitarios que acadan a Mención á Excelencia, “unha iniciativa pioneira que potencia a calidade das nosas universidades”. No acto tamén estivo presente o reitor da USC, Antonio López, e o secretario xeral de Universidades, José Alberto Díez.

O representante da Xunta participou nesta cita na que se recoñeceu o traballo de tres titulacións de máster: Enxeñería Química e Bioprocesos (Campus Santiago) da Universidade de Santiago de Compostela (USC); en Química Orgánica (Campus Santiago) da USC, a Universidade Autónoma de Madrid (UAM) e a Universidade Complutense de Madrid (UCM), e en Ciencias, Tecnoloxías e Xestión Ambiental (Campus Coruña) da Universidade da Coruña (UDC). Uns títulos que acadaron unha gran puntuación, “o que demostra o gran nivel que atesouran as nosas universidades independentemente da disciplina”, incidiu Román Rodríguez, quen aproveitou para trasladar os seus parabéns ás universidades e aos coordinadores dos másteres.

12 titulacións co selo de excelencia

Con estas novas incorporacións, xa son 12 as titulacións que contan con esta mención que reflicte a súa calidade e nivel de solvencia científica, técnica e formativa tras a súa primeira edición no curso 2019/20.

Os primeiros que obtiveron o recoñecemento foron os másteres en Enxeñería Informática e en Bioloxía Molecular, Celular e Xenética, ambos da UDC, así como o de Enxeñería Ambiental da USC. Tamén recibiron esta mención Bioinformática para Ciencias da Saúde (UDC), Biotecnoloxía Avanzada (conxunto entre UVigo e UDC) e  Tradución para a Comunicación Internacional (UVigo), Matemática Industrial (impartido entre USC, UDC e UVigo), Computación de Altas Prestacións (entre A Coruña e Santiago) e  Produción Xornalística e Audiovisual (da UDC).

Con este selo de excelencia “favorécese a competitividade destas titulacións, acreditando o seu elevado nivel académico e a solvencia científico técnica dos estudos”, sinalou o conselleiro de Universidades. “A través desta convocatoria anual queremos seguir amosando o noso compromiso coa excelencia na comunidade universitaria galega e coa mellora na formación especializada”, engadiu.

Iniciativas para potenciar calidade e especialización

Máis alá da Mención á Excelencia a titulacións universitarias oficiais de máster, Xunta e Sistema Universitario de Galicia (SUG) traballan en conxunto para fomentar a excelencia, a calidade e a adaptación da oferta formativa ás demandas da sociedade. A través do Mapa de Titulacións 2021-2026 estrearanse o curso que vén cinco másteres novos e estase traballando para poñer en marcha outros dous máis.

Así mesmo, as universidades galegas teñen un plan de financiamento plurianual estable, mobilizando case 3.200M€ para o período 2021-2026, trabállase para acadar o 1% do PIB de investimento de recursos públicos en dous anos, así como a implantación desde xa da gratuidade da 1ª matrícula para todas as titulacións.

Ademais, Galicia está sendo pioneira no deseño dun modelo de graos e másteres duais no que o alumnado combinará formación nas aulas, cun vínculo regrado e remunerado nunha empresa. “Uns datos importantes para seguir construíndo unha Universidade de primeiro nivel, con campus de alta especialización, proxectada ao escenario global, con suficiencia de financiamento e capaz de xerar resultados progresivos”, concluíu Román Rodríguez.

Información xeral Consellería de Educación, Ciencia, Universidades e Formación Profesional

Summary: 

Inclúe o cambio de cuberta do edificio principal, a mellora da accesibilidade e a renovación de fiestras do ximnasio, entre outras

Tamén se están a redactar proxectos para acometer melloras no CEIP O Foxo e no IES Manuel García Barros

Idioma Gallego

O conselleiro de Educación, Ciencia, Universidades e FP, Román Rodríguez, visitou hoxe o Colexio CEIP Pérez Viondi, onde anunciou a licitación da  rehabilitación integral do centro, que contará cun investimento de máis de 1M€. “A previsión é adxudicar a obra no mes de outubro e comezala en novembro”, explicou.

“Esta obra supón unha importante renovación para este colexio, que se suma aos case 2M€ que levamos investidos neste centro desde 2009”, destacou o titular do departamento educativo da Xunta. 

Román Rodríguez avanzou tamén que xa están en redacción os proxectos para outras dúas actuacións en centros educativos da Estrada, como a mellora en falsos teitos luminarias e instalación eléctrica do Colexio CEIP O Foxo (orzamento estimado de 175.000€) e a instalación dun ascensor no Instituto IES Manuel García Barros (orzamento estimado de 125.000€).

“Todas elas son actuacións incluídas no Plan de Nova Arquitectura Pedagóxica, a folla de ruta do Goberno galego para renovar os 1.600 edificios que forman os máis de 1.000 centros educativos galegos e adaptalos ás necesidades do ensino do século XXI, ao tempo que se mellora a súa eficiencia enerxética e o confort da comunidade escolar”, sinalou o conselleiro.

Illamento e accesibilidade

A rehabilitación integral do CEIP Pérez Viondi abranguerá o cambio de 2.500 m² da cuberta do edificio principal, así como a aplicación de material illante nas cámaras de aire, a substitución de falsos teitos, a colocación de novas luminarias led e a substitución de caldeira de gasóleo por outra de biomasa. A maiores, en prol dunha maior accesibilidade, instalarase un ascensor e un aseo adaptado. Tamén se acometerán outras pequenas reorganizacións de espazos interiores, en función das demandas do centro.

A actuación inclúe tamén a mellora do ximnasio, co cambio das súas 10 fiestras, a inxección de illante nas cámaras, a colocación de falso teito térmico e acústico e a instalación de novo pavimento deportivo. Xa no exterior, mellorarase o pavimento de caucho do patio de Infantil e habilitarase unha zona cuberta no acceso.

Información xeral Consellería de Educación, Ciencia, Universidades e Formación Profesional

Summary: 

Representantes do ecosistema de I+D+i de Galicia e do Norte de Portugal reuníronse esta mañá en Ponte de Lima (Portugal) para identificar as áreas prioritarias

Idioma Gallego

Máis dun cento de axentes do ecosistema de I+D+i da Eurorrexión Galicia-Norte de Portugal reuníronse esta mañá na Escola Superior Agraria de Ponte de Lima (Portugal) para definir, a través dun proceso participativo, as áreas prioritarias e as actuacións máis relevantes da Estratexia de Especialización Intelixente Transfronteiriza ata 2027. Esta xornada parte dos resultados extraídos no obradoiro celebrado no mes de maio en Vigo para avaliar a estratexia actual e rematará coa presentación no outono da nova Estratexia de Especialización Intelixente Transfronteiriza Galicia-Norte de Portugal (RIS3T).

A RIS3T é unha iniciativa pioneira, por tratarse da primeira RIS3 transfonteiriza en Europa, e foi recoñecida como caso de boas prácticas pola Comisión Europea. O seu obxectivo é aliñar as políticas de apoio á I+D+i na Eurorrexión e poñer en marcha proxectos coordinados. Para elo, na RIS3T 2014-2020 implementáronse actuacións encamiñadas a potenciar as capacidades das entidades da Eurorrexión e aproveitar as sinerxías entre elas, optimizando así recursos públicos, en seis áreas: enerxía do mar e biomasa, industrias agroalimentaria e biotecnolóxica, Industria 4.0, industrias de mobilidade, industrias turísticas e creativas e vida saudable e envellecemento activo.

Incremento de fondos ata os 518M€

Entre os principais resultados acadados, destaca o incremento nos fondos mobilizados en programas europeos de innovación respecto do obxectivo marcado: 517,8M€ acadados en Horizonte 2020 -programa marco de financiamento da I+D+i a nivel europeo- fronte aos 360M€ previstos. Así mesmo, cómpre subliñar o investimento mobilizado en programas de cooperación -como Interreg Poctep e Espazo Atlántico- polos axentes da Eurorrexión: 153M€.

Esta actividade enmárcase no proceso participativo con representantes do ecosistema de I+D+i -universidades, centros de coñecemento e tecnolóxicos, empresas e Administracións públicas-, que busca adecuar a RIS3T á evolución dos retos da Eurorrexión. Está organizada pola Axencia Galega de Innovación da Xunta de Galicia en colaboración coa Comissão de Coordenação e Desenvolvimento Regional do Norte (CCDR-NORTE) ao abeiro do proxecto GOBERNANZA_GNP_1_E, liderado pola Agrupación Europea de Cooperación Territorial Galicia-Norte de Portugal (GNP-AECT) e financiado polo Programa de Cooperación Transfronteiriza España-Portugal (POCTEP) da Unión Europea.

Información xeral Consellería de Educación, Ciencia, Universidades e Formación Profesional

Summary: 

O secretario xeral técnico da Consellería de Educación, Manuel Vila, explica ante a Comisión 4ª do Parlamento as obras que se están desenvolvendo no instituto

Tamén avanzou a remodelación da aula do semi-soto e a súa adecuación como aula de tecnoloxía e a reforma do laboratorio

Paralelamente están executándose as obras das cubertas por un importe de máis de 40.000 euros, coa previsión de que estean rematadas antes do inicio do curso

Idioma Gallego

O secretario xeral técnico da Consellería de Educación, Ciencia, Universidades e Formación Profesional, Manuel Vila, anunciou hoxe a adscrición “de facto” do Colexio CEIP Novo Mesoiro ao Instituto IES A Sardiñeira da Coruña, unha decisión que é froito “das escoitas e das demandas” da comunidade educativa.

Segundo explicou ante a ante a Comisión 4ª do Parlamento de Galicia, esta adscrición, que será oficial unha vez que se aprobe na Xunta Provincial de Directores, leva aparellado o servizo de transporte escolar gratuíto para os alumnos do Colexio Novo Mesoiro que decidan continuar os seus estudos no instituto do barrio dos Mallos.

A nova enmárcase no compromiso do Goberno galego por ofrecer unha educación de calidade, tanto desde a perspectiva académica e pedagóxica como de servizos e de infraestruturas escolares axeitadas.

Precisamente no eido da mellora das infraestruturas, Manuel Vila anunciou o  acondicionamento da aula do semi-soto como aula de tecnoloxía e a reforma do laboratorio, unha actuación que terá un coste estimado de arredor de 50.000 euros e que a Consellería traballa para poder realizar durante este verán.

Cambio da cuberta

Paralelamente, desde o pasado mes de xuño xa se está executando o cambio de cuberta do edificio de Formación Profesional,así como outras actuacións na cuberta dos edificios do instituto, por un importe de máis de 400.000 euros.

A actuación, que está previsto que estea rematada antes do inicio do curso, abrangue a retirada do actual teito e a colocación dun panel para evitar a filtracións de auga, así como a limpeza e impermeabilización dos canlóns e a substitución das baixantes. No que atinxe ao edificio do IES e o edificio anexo do ximnasio, levarase a cabo a limpeza da cuberta e a impermeabilización dos soportais e a renovación e protección de baixantes.

Información xeral Consellería de Educación, Ciencia, Universidades e Formación Profesional

Summary: 

As alumnas gañadoras pertencen aos institutos IES Plurilingüe Eusebio da Guarda da Coruña, IES Plurilingüe Rosalía de Castro de Santiago e IES Blanco Amor de Ourense

“Os premios demostran a calidade e o talento que atesouran os estudantes galegos e convido a afondar máis na formación STEM”, destaca o conselleiro

Como novidade, a partir do vindeiro curso, as universidades galegas recoñecerán con créditos a participación do alumnado de Bacharelato neste programa

Idioma Gallego

A Xunta de Galicia vén de recoñecer este curso, por primeira vez, os mellores proxectos de investigación realizados polos centros educativos no marco do Bacharelato de Excelencia en Ciencias e Tecnoloxía, STEMBach, unha iniciativa que ten como finalidade impulsar a formación STEM (ciencias, tecnoloxía, enxeñaría e matemáticas) e as habilidades científico-tecnolóxicas, en especial no tratamento de datos e na incorporación da intelixencia artificial á sociedade, así como fomentar as vocacións neste eido entre os máis novos. 

Na xornada de hoxe, os nove mellores proxectos do programa de STEMBach, dos 61 desenvoltos, defenderon os seus traballos ante un xurado. Nesta parte avaliáronse criterios como a puntuación acadada na fase preliminar e, se a exposición está ben estruturada e organizada. Finalmente seleccionaranse os tres mellores proxectos de investigación. O titular do departamento educativo galego destacou que estes proxectos “demostran a calidade e o talento que atesouran os estudantes galegos e convido a afondar máis na formación STEM”.

Os gañadores son o IES Eusebio da Guarda da Coruña co proxecto Novas dianas terapéuticas para o tratamento da artroses: un modelo con algas mariñas, realizado por Natalia Gómez e Ha Nul Kim; o IES Rosalía de Castro con Influencia das condicións meteorolóxicas na cantidade de raios cósmicos detectados na superficie, feito por Belén Carla Merino Pazos, e Tipo de redes neuronais: fundamentos teóricos e aplicacións, traballo de Aroa Álvarez, Andrea Dapena, Natalia Fernández e Alba Quintas, alumnas do IES Eduardo Blanco Amor. As premiadas, todas mulleres, irán de viaxe á feira SciFest de  Dublín, en Irlanda. 

Centro premiados

Alumnas participantes

Titoría do proxecto

Director de investigación

Proxecto

IES Plurilingüe Eusebio da Guarda (A Coruña)

Natalia Gómez López e Ha Nul Kim Youm

María Jesús Mourazos

Valetina Calamia e Carlos Vaamonde-García

Novas dianas terapéuticas para o tratamento da artroses: un modelo con algas mariñas

IES Plurilingüe Rosalía de Castro (Santiago de Compostela)

Belén Carla Merino Pazos

Enrique Cao Rodríguez

Cristina Cabo Landeira

Influencia das condicións meteorolóxicas na cantidade de raios cósmicos detectados na superficie

IES Eduardo Blanco Amor (Ourense)

Aroa Álvarez Pérez, Andrea Dapena Suárez, Natalia Fernández Valeiras e Alba Quintas Núñez

Carlos Ferreiro García

José Ángel Cid Araújo

Tipo de redes neuronais: fundamentos teóricos e aplicacións

 

Todos os proxectos realizaron prácticas para coñecer as aplicacións reais da ciencia e a técnica, así como adquirir unha formación actualizada e autónoma que lles estimule para os futuros estudos universitarios.

O xurado destacou a calidade dos proxectos que resultaron premiados así como do resto de finalistas, detallados a continuación:

Centro

Proxecto

IES Plurilingüe Eusebio da Guarda (A Coruña)

Medición da calidade lingüística de textos con técnicas de lingüística computacional

IES Plurilingüe Eusebio da Guarda (A Coruña)

Sistemas automáticos de recomendación de videoxogos

IES Agra do Orzán (A Coruña)

Sistema automático de recomendacións de videoxogos

IES Nosa Sra. dos Ollos Grandes (Lugo)

Materiais construtivos e procesos de deterioro da Catedral de Lugo e Capela do Carme

IES Nosa Sra. dos Ollos Grandes (Lugo)

Estimación do sexo, idade e talla en restos óseos humanos

CPR Plurilingüe Miralba (Vigo)

Explorando ambientes extremos como fonte de microorganismos produtores de enzimas de interese industrial

IES Plurilingüe Rosalía de Castro (Santiago de Compostela)

Sensoxenómica, descifrando a melodía xenética da saúde e a enfermidade

Novidades para o vindeiro curso

STEMbach é unha iniciativa que facilita a adquisición de competencias transversais como a creatividade,  o emprendemento, a resolución de problemas, o traballo en equipo, o pensamento crítico e a cidadanía global. Ademais, o programa pon especial foco na redución da fenda de xénero, mellorando a presenza de mulleres en carreiras do ámbito STEM e técnicas.

O titular do departamento galego, aproveitou esta xornada para destacar os bos resultados deste plan educativo. “O éxito da iniciativa pódese medir na calidade dos proxectos presentados e no volume de centros participantes, 45, e por ser cursado por 774 alumnos”, salientou. Os estudantes desenvolven un proxecto de investigación relacionado con calquera ámbito de recoñecemento de materias cursadas, que está codirixido por un docente pertencente a un departamento universitario ou entidade de investigación de Galicia e do que o alumno realiza unha defensa do traballo en sesión publica.

No acto tamén participaron a directora xeral de Ordenación e Innovación Educativa, Judith Fernández, a vicerreitora de Titulacións e Internacionalización da USC, María José López, a vicerreitora de Estudantando e Empregabilidade da UVigo, Natalia Caparrini, e a responsable do STEMbach da UDC, Susana Ladra.

A convocatoria do programa STEMBach para o vindeiro curso ten como novidade que as universidades recoñecerán con créditos ECTS a participación do alumnado de Bacharelato neste programa educativo. Grazas a iso, os estudantes que superen o STEMbach e se matriculen posteriormente nalgunha das universidades públicas galegas verá recoñecido con créditos de libre configuración gratuítos este mérito. En total, poderán obter 1,5 créditos ECTS por curso académico universitario, ata un máximo de 6 créditos ECTS. Este feito será aplicable tanto para os que titulen de aquí en diante como para os que xa o fixeron en cursos anteriores.

Información xeral Consellería de Educación, Ciencia, Universidades e Formación Profesional