Lexislación

Summary: 

A directora xeral de FP, Eugenia Pérez, reúnese con representantes da fundación para facer balance do éxito da iniciativa, que se renova e amplía no presente curso

Destaca a boa valoración da experiencia que fan tanto alumnos como empresas colaboradoras, que xa ofreceron traballo a algúns dos titulados

Idioma Gallego

A directora xeral de FP, Eugenia Pérez, reuniuse hoxe con Nathalie Chaix, Juan Carlos Hergueta e Manuel Montesinos, representantes da Fondation Amigo, para facer seguimento do acordo establecido entre a Consellería de Educación, Ciencia, Universidades e FP e esta entidade para a formación de alumnos dos centros integrados de FP Compostela e Politécnico de Santiago. No encontro participaron tamén os directores dos centros, Ramiro Esparís e Nicolás Espasandín, respectivamente.

En concreto o curso pasado 19 alumnos destes centros puideron cursar os ciclos de grao medio en Atención a persoas en situación de dependencia e de grao básico en Carpintería e moble na modalidade de FP Dual Intensiva con bolsas da Fondation Amigo. Parte deles obtiveron ofertas de emprego nas empresas nas que fixeron a formación, pero a maioría dos alumnos optaron por seguir completando os seus estudos na FP galega.

A directora xeral enmarcou este acordo na aposta do Goberno galego por estender a modalidade dual intensiva a cada vez máis alumnos e agradeceu a colaboración da Fondation Amigo, que se fai cargo dos custes de contratación dos bolseiros por parte das empresas. Ademais, destacou a boa valoración da experiencia que fan tanto alumnos como empresas colaboradoras. De feito, dado o éxito da iniciativa, esta colaboración ampliarase este curso á familia de Artes Gráficas do CIFP Compostela.

Atención a persoas en situación de dependencia

No caso do CIFP Compostela beneficiáronse do acordo oito alumnas do ciclo de grao medio en Atención a persoas en situación de dependencia. Todas elas acadaron o título e seis recibiron proposta de contrato por parte das empresas nas que complementaron a súa formación.

Participaron na formación como empresas colaboradoras o centro ocupacional e de día Aspas, o Centro de día Salgueiriños-AGADEA, a Asociación de persoas con discapacidade da comarca de Noia (MISELA) e as delegacións de Servisenior Santiago, Brión e Brión I.

Carpintería e moble

No que atinxe ao CIFP Politécnico de Santiago, participaron na iniciativa 11 alumnos do ciclo de grao básico en Carpintería e moble, dos que titularon 10 e un non puido por enfermidade. Tres deles conseguiron unha oferta de traballo na empresa na que realizaron a formación.

Neste caso as empresas participantes foron Carpidiser, Carpintería Marquéz y Vilela, Carpintería Senin, Carpintería y montaje O Sixto SC, Togar Cocinas, Estudio Sangiovanni, JSeoane Design, Jorge Gato Gómez e Ángel Otero Fernández.

Información xeral Consellería de Educación, Ciencia, Universidades e Formación Profesional

Summary: 

O secretario xeral de Universidades e a directora da Axencia Galega de Innovación visitan o centro por ser “referente de Galicia na investigación da intelixencia artificial”

Idioma Gallego

O secretario xeral de Universidades, José Alberto Díez, e a directora da Axencia Galega de Innovación, Carmen Cotelo, visitaron esta mañá o Centro Singular de Investigación en Tecnoloxías Intelixentes (CiTIUS), da Universidade de Santiago de Compostela, que puxeron en valor como un dos centros referentes de Galicia na investigación da intelixencia artificial, especialmente no eido das tecnoloxías lingüísticas, o ámbito de maior impacto actual neste eido.

Os representantes da Consellería de Educación, Ciencia, Universidades e FP, no marco das visitas conxuntas que están realizando aos centros de investigación e tecnolóxicos para coñecer o seu funcionamento e atender as necesidades no eido da investigación, coñeceron de primeira man os ámbitos de traballo do CITIUS.

Guiados polo director científico do centro, Senén Barro, afondaron nas investigacións que xiran arredor dos dispositivos e a computación verde e intelixente, así como nos fundamentos da intelixencia artificial. Ademais, o centro traballa as tecnoloxías intelixentes tendo en conta o marco ético, social, económico e cultural que os engloba para facer da intelixencia artificial unha ferramenta confiable.

A Xunta de Galicia está a investir case 6M€ neste centro, un dos 13 que compoñen a rede de Centros de Investigación de Excelencia do Sistema Universitario de Galicia. Grazas a este apoio, os máis de 100 investigadores que traballan no CITIUS están a desenvolver iniciativas como o Proxecto Nós para incorporar o galego ás novas linguaxes dixitais. Entre outras actuacións destacadas, tamén traballan en proxectos arredor da monitorización preditiva e causalidade para rehabilitación cardíaca ou de observación e predición da calidade do aire a escala urbana.

Cómpre destacar a estratexia de transferencia do CITIUS baseada na cooperación co sector industrial a partir dos seus resultados científicos. No ano 2023, asinou 13 novos contratos, por un valor de máis de 2,6M€ con empresas como Avensis, Finsa ou Repsol. Ademais, no período 2020-23 captou 16,5M€ en convocatorias competitivas.

Información xeral Consellería de Educación, Ciencia, Universidades e Formación Profesional

Summary: 

Rueda destaca a “revolución silenciosa” destas ensinanzas que xa teñen “o dobre” de alumnos que no curso 2008-2009

Asegura que estes datos acreditan que “imos polo bo camiño” no traballo da Xunta por modernizar, mellorar e adaptar a FP ás necesidades do tecido produtivo

As titulacións de alta especialización, exclusivas de Galicia, así como os másteres de FP, lideran o incremento de matrículas cunha suba do 59% en ambos os casos

O éxito da FP afiánzase de xeito xeneralizado nos distintos niveis e modalidades e no conxunto do territorio, cunha medra de case o 8% no eido rural, onde hai máis alumnos ca nunca

Confírmase a potencialidade dos 28 centros que forman a Rede de centros integrados de FP, que aglutinan case o 49% dos estudantes destas ensinanzas en centros públicos

Idioma Gallego

O presidente da Xunta, Alfonso Rueda, destacou hoxe que as ensinanzas de formación profesional en Galicia volven rexistrar este curso “un novo récord” con 68.823 alumnos, o que supón “un incremento dun 7%” (4.235 estudantes máis) con respecto ao ano pasado, e “o dobre” que no curso 2008/09 (34.766 matriculados).

Rueda salientou que isto amosa a “revolución silenciosa” que a FP está a vivir en Galicia nos últimos anos e é froito do traballo feito polo Executivo autonómico para mellorar, modernizar e adaptar estes estudos ás necesidades do tecido produtivo galego. “O crecemento é xeneralizado en todas as modalidades de FP e en todo o territorio da comunidade”, sinalou o presidente, quen apuntou que “estes datos acreditan que imos polo bo camiño”.

Tal e como se reflicte nun informe da Consellería de Educación, Ciencia, Universidades e FP elevado ao Consello da Xunta, este crecemento de matrículas é xeneralizado en todas as modalidades de FP, así como no conxunto do territorio, e deriva principalmente do deseño dunha oferta ampla, variada e actualizada que chega a todas as áreas xeográficas e que se viu reforzada este ano no eido da tecnificación e a alta cualificación, garantindo así unha formación á carta que se adapta aos intereses e ás necesidades de cada persoa, tal como marca a Estratexia da FP Galicia 2030.

Aposta pola alta cualificación

Neste sentido, Rueda destacou especialmente o crecemento da matrícula nos títulos de alta especialización, “unha formación exclusiva da nosa comunidade autónoma”, cun 59% de suba entre as 24 titulacións deste tipo ofertadas para este curso. Trátase de titulacións exclusivas de Galicia que foron deseñadas atendendo a unha demanda específica por parte do sistema produtivo, co deseño de propostas ad hoc e que este ano foron especialmente reforzadas por parte da Consellería.

O mesmo acontece cos másteres de FP, cuxa matrícula se volve incrementar este ano tamén cunha suba da demanda do 59% así como a modalidade de FP dual intensiva, que acada un incremento de matriculados do 36%.

Neste curso hai 5.643 persoas matriculadas nun ciclo formativo básico (un aumento do 5,4%), 25.397 nun ciclo de grao medio (4,1% máis) e 37.783 persoas matriculadas nun ciclo de grao superior (un 8,5% máis).

 Nestes momentos, tendo en conta a evolución demográfica, estímase que se está acadando o teito de matrícula de FP polas vías convencionais cunha estabilización de cara aos vindeiros anos. Dado este contexto, a Xunta de Galicia está traballando en abrir un novo paradigma da FP a través do Plan FPGal360, explorando fórmulas innovadoras de aproveitamento do potencial destas ensinanzas que permitan seguir atraendo persoas á FP galega.

 Demanda alcista no rural

Así pois, con estes datos, a formación profesional galega afianza o seu éxito cun crecemento xeneralizado de matrículas en distintos niveis e modalidades, así como no conxunto do territorio.

Cómpre destacar que o reforzo da oferta de FP no rural -co maior número de prazas dispoñibles ata o de agora- tamén se reflicte nun aumento da demanda neste eido, cun aumento de matrícula de case o 8% e con máis alumnos ca nunca. Esta suba vai parella co deseño dunha oferta obxectiva, realista, actualizada e axustada ás necesidades do eido rural, onde este ano os estudantes puideron escoller entre un total de 7.631 prazas, un 11,5% máis (789 prazas máis) que o pasado ano.

Galicia avanza así na consolidación dun modelo educativo propio onde a igualdade de oportunidades, independentemente de onde se viva, é un dos seus sinais de identidade.

 O impulso da Rede de centros integrados de FP

Neste éxito de matrícula cómpre destacar o papel que desempeña a Rede de centros integrados de FP (CIFP), que non parou de medrar nos últimos anos, ao pasar dos 9 que había en 2009 aos 28 actuais tras a recente incorporación dos Audiovisual de Vigo, Montecelo de Pontevedra e Vilamarín de Ourense, en 2023, e da Escola de Cantaría de Galicia (Poio), en 2024.

Non en balde, estes 28 centros que conforman a Rede incrementaron este ano o número de matriculados en case un 9% e concentran o 49% do total de alumnado de FP matriculado en Galicia.

Unha oferta axeitada ás demandas

O crecemento xeneralizado da matrícula reflicte unha resposta positiva á oferta ampla e variada de ciclos de FP deseñada pola Consellería de Educación para este curso, con 46.714 prazas de novo ingreso que foron deseñadas logo dun proceso de diálogo coa comunidade educativa e cos sectores socioeconómicos galegos.

Neste sentido, os matriculados puideron escoller entre 214 titulacións diferentes -17 delas de nova implantación- repartidas en 153 ciclos de grao medio, básico e superior, 22 másteres, 24 títulos de alta especialización e 15 programas formativos orientados a persoas con necesidades educativas especiais.

Esta planificación da oferta é o resultado final da aplicación das conclusións do Plan Conecta FP Galicia, onde, en coordinación e colaboración cos eidos socioeconómicos e territoriais, se deseñou unha proposta de formación á medida das necesidades e demandas dos sectores produtivos, e que se seguirá enriquecendo nos vindeiros anos.

Os datos analizados hoxe no Consello da Xunta fan fincapé nas principais cifras de matrícula de FP neste curso, das cales o conselleiro de Educación, Ciencia, Universidades e Formación Profesional informará mañá martes de xeito máis detallado.

Información xeral Consellería de Educación, Ciencia, Universidades e Formación Profesional

Summary: 

Nesta edición incorpóranse un total de 21 instrutores que impartirán os seus coñecementos en máis de 100 centros educativos galegos

Esta iniciativa, na que Galicia é pioneira, está dirixida ao alumnado de 3º de Educación Secundaria e nela participaron xa 1.400 estudantes  

Idioma Gallego

A Xunta de Galicia comezou esta semana, na sede da Escola Galega de Administración Pública, as novas xornadas de formación YAM (Youth Aware of Mental Health). Nelas, 21 instrutores formáronse para impartir os seus coñecementos en preto dun centenar de centros educativos galegos ao longo do curso 2024-2025. Entre os asistentes atópase persoal docente e sanitario co fin de crear equipos multidisciplinares.

Ao acto de inauguración asistiron a directora xeral de Ordenación e Innovación Educativa, Judith Fernández; a subdirectora xeral de Atención á Saúde Mental do Servizo Galego de Saúde, Almudena Díaz; e o coordinador asistencial de Saúde Mental, Manuel Arrojo.

O Proxecto YAM é un programa de prevención do suicidio dirixido ao alumnado de 3º de Educación Secundaria, recoñecido polas recomendacións da OMS e Save the Children como o modelo de intervención máis eficaz. O seu obxectivo é reducir as condutas suicidas e ampliar os recursos do Plan de Prevención do Suicidio en Galicia. 

Este proxecto é un traballo colaborativo entre a Consellería de Sanidade e a de Educación, Ciencia, Universidades e FP, e atópase cofinanciado pola Unión Europea a través do Programa FSE+ de Galicia 2021-2027. Trátase dunha iniciativa na que a comunidade foi pioneira e ata agora participaron nela máis de 1.400 estudantes. 

Un ano máis, o Goberno galego segue a traballar na promoción da saúde mental na infancia e a prevención do suicidio na mocidade galega.

Información xeral Consellería de Educación, Ciencia, Universidades e Formación Profesional

Summary: 

Van dirixidos ao alumnado que rematou estudos de Arte Dramática, Conservación e Restauración de Bens Culturais, Deseño e Música o pasado curso nos centros dependentes da Xunta de Galicia

Cada galardoado recibirá 3.500€ e un diploma acreditativo

Idioma Gallego

A Xunta de Galicia ten aberta a convocatoria dos Premios fin de carreira das ensinanzas artísticas superiores, en concreto para o alumnado que rematou no curso 2023/24 os seus estudos artísticos superiores de Música, de Deseño, de Arte Dramática ou de Conservación e Restauración de Bens Culturais en centros públicos de Galicia.

En total, poderán concederse ata seis premios, a razón de dous para as ensinanzas artísticas superiores de Música, outros dous para as de Deseño, un para as de Arte Dramática e outro para as de Conservación e Restauración de Bens Culturais. Para poder acceder a este recoñecemento, os candidatos deben contar cunha puntuación media no expediente académico igual ou superior a 8,5 puntos.

Os interesados deberán formular as solicitudes na sede electrónica da Xunta de Galicia. O prazo para presentar as solicitudes estará aberto ata o 28 de outubro. As persoas galardoadas recibirán unha dotación económica dun máximo de 3.500 euros e un diploma acreditativo do recoñecemento.

A Consellería de Educación, Ciencia, Universidades e Formación Profesional instaurou estes premios por primeira vez no ano 2020, co fin de que o alumnado destas ensinanzas artísticas superiores estea en igualdade de condicións e de oportunidades que os titulados universitarios, que xa contan con galardóns deste tipo desde hai anos. O seu obxectivo é recoñecer a excelencia no rendemento académico e o esforzo, traballo e dedicación dos alumnos destas ensinanzas.

Información xeral Consellería de Educación, Ciencia, Universidades e Formación Profesional

Summary: 

Estas mobilidades realízanse ao abeiro dos programas EduFrance, EduMob e PicassoMob nas rexións Hauts-de-France, Bretagne, Académique, Grand Est e Bourgogne-Granche Comté

Idioma Gallego

Un total de 350 alumnos participan este curso en programas da Xunta de Galicia de intercambio de estudantes con institutos franceses. Concretamente, estas mobilidades realízanse ao abeiro dos programas EduFrance, no que participan 150 alumnos galegos e outros tantos franceses; EduMob, ao que se suman 20 mozos de cada rexión, e PicassoMob, un programa que naceu no 2023 e no que participarán este ano cinco estudantes galegos e outros cinco de Francia.

O obxectivo destes intercambios escolares é propiciar o coñecemento mutuo das culturas e linguas de ambos países mediante a asistencia do alumnado a centros educativos e a convivencia en familias doutro país. A Estratexia Edulingüe 2030 de linguas estranxeiras da Consellería de Educación, Ciencia, Universidades e FP promove este tipo de accións como chave para achegar ao alumnado galego a un contexto internacional real, tanto no ámbito académico como no da convivencia diaria.

No caso do programa EduFrance, serán 150 os alumnos de 3º e 4º da ESO e 1º de Bacharelato de 10 centros públicos galegos que participarán nun intercambio cultural e lingüístico con alumnado de centros educativos franceses das rexións académicas Hauts-de-France e Bretagne, ambas no país galo.

Durante o período de intercambio, o alumnado galego participante –de 15 escolares por cada centro– deberá asistir ás clases no lycée ou collège que lle fose asignado pola Région Académique correspondente e aloxarase na casa dunha familia francesa, e viceversa no caso da viaxe dos estudantes franceses en Galicia. A estancia do alumnado galego en Francia terá unha duración dun máximo de 10 días naturais e poderá desenvolverse en calquera momento do curso 2024/2025. No que respecta ao programa EduMob, un total de 20 alumnos de 1º de Bacharelato procedentes de nove centros educativos residirán coa familia do seu homólogo estranxeiro e asistirán as clases no instituto ao que este matriculado o seu anfitrión na rexión académica de Grand Est. No caso do alumnado francés que veña a Galicia, tamén residirá na casa da familia dun alumno galego e asistirá ao mesmo centro deste.

Os cinco alumnos galegos de 1º de Bacharelato participantes no PicassoMob proceden dos institutos IES Canido de Ferrol e IES de Rodeira de Cangas. Comezaron a súa estadía o pasado 16 de setembro e estarán aloxados ata o 11 de outubro nun domicilio dun estudante francés da rexión Bourgogne-Granche Comté, acudindo a clase ao seu centro de ensino. En réxime de reciprocidade, acollerán no seu domicilio e no seu centro de estudos o alumnado francés do 14 de outubro ao 8 de novembro.

A relación de centros que participarán nestas tres experiencias, cos gastos de viaxe cubertos pola Xunta, é a reflectida na seguinte táboa:

CONCELLO

CENTRO

REXIÓN ACADÉMICA

PROVINCIA DA CORUÑA

Arzúa

IES de Arzúa

Hauts-de-France

Betanzos

IES Francisco Aguiar

Grand Est

Boiro

IES A Cachada

Bretagne

Brión

IES Brión

Grand Est

Brión

IES Brión

Bretagne

Ferrol

IES Canido

Bourgonge-Franche Comté

Ferrol

IES Canido

Bourgonge-Franche Comté

Ferrol

IES Canido

Bourgonge-Franche Comté

Ferrol

IES Sofía Casanova

Grand Est

Santiago de Compostela

IES Arcebispo Xelmírez I

Bretagne

PROVINCIA DE LUGO

Mondoñedo

IES Plurilingüe San Rosendo

Bretagne

Rábade

IES Río Miño

Grand Est

PROVINCIA DE OURENSE

Viana do Bolo

IES Carlos Casares

Hauts-de-France

PROVINCIA DE PONTEVEDRA

A Guarda

IES A Sangriña

Grand Est

Caldas de Reis

IES Plurilingüe Aquis Celenis

Hauts-de-France

Cangas

IES de Rodeira

Bourgonge-Franche Comté

Cangas

IES de Rodeira

Bourgonge-Franche Comté

Gondomar

IES Auga da Laxe

Grand Est

Meis

CPI de Mosteiro-Meis

Hauts-de-France

Nigrán

IES Val Miñor

Bretagne

Poio

IES de Poio

Grand Est

Salceda de Caselas

IES Pedras Rubias

Grand Est

Vigo

IES República Oriental de Uruguai

Grand Est

Vilagarcía de Arousa

IES Castro Alobre

Hauts-de-France

 

Incremento dos coñecementos de francés

Galicia continúa mellorando os resultados nas probas lingüísticas de francés Delf escolar, no que a nosa Comunidade ocupa o 4º posto en España no que se refire ao número de candidatos ás probas, só superado por Cataluña, Andalucía e Madrid -todas con moita máis poboación-.

Neste 2024, os resultados desta proba experimentaron unha alza do 1,4% no número de inscritos en Galicia, mentres que a nivel nacional apréciase unha baixada dun 3%. Do total das 986 persoas de 119 centros educativos galegos que se presentaron, a taxa de aprobados supera o 90% en todos os niveis. Concretamente, o nivel A2 conta cun 95,65% de aprobados; o B1, con 94,02%, e o B2 logra o 91,12% de aprobados.

Información xeral Consellería de Educación, Ciencia, Universidades e Formación Profesional

Summary: 

Román Rodríguez destaca a aposta da Xunta por un modelo plurilingüe de calidade, que sitúa aos alumnos galegos no grupo de cabeza estatal en coñecemento de linguas

As aulas galegas contan este curso cun total de 665 auxiliares de conversa que prestan apoio en 511 centros educativos

Idioma Gallego

O conselleiro de Educación, Ciencia, Universidades e Formación Profesional, Román Rodríguez, e o copresidente da Comisión Fulbright pola Delegación estadounidense, Jon Piechowski, asinaron hoxe un convenio que consolida a Galicia como a comunidade autónoma que concentra o maior número de auxiliares de conversa Fulbright en toda España. A través deste acordo, sélase a incorporación de 40 auxiliares estadounidense de alto perfil académico ás aulas galegas neste curso, do total de 184 para o conxunto de España. 

A sinatura do mesmo tivo lugar esta mañá no decurso dunha xornada de benvida na que participaron os auxiliares, así como os representantes dos centros educativos nos que van a prestar o seu apoio para o reforzo da aprendizaxe da lingua inglesa.  

Froito deste acordo, así como dos que se establecen co Ministerio no marco do Acordo de Cooperación Territorial, co Instituto Confucio ou co Instituto Camões, Galicia acada este curso a cifra máis alta de auxiliares de conversa rexistrada ata o de agora, con 665 auxiliares que se incorporan a 511 centros educativos de todo o territorio galego. Isto permite que o 75% dos centros educativos sostidos con fondos públicos poidan desenvolver programas plurilingües en diversas etapas educativas, Educación Infantil, Primaria, ESO, Bacharelato e Formación Profesional. 

Román Rodríguez puxo en valor as accións do Goberno galego desenvolvidas a través da Estratexia de Educación en Linguas Estranxeiras, Edulingüe 2030, grazas ás cales o alumnado de Galicia sitúase hoxe como o segundo con mellor nivel de toda España, segundo o informe de avaliación de EF, referencia nesta materia. 

Non obstante, subliñou o compromiso do Goberno galego por seguir afondando nesta liña e o acordo coa Comisión Fulbraight “reforza a nosa aposta por un sistema educativo plurilingüe e de calidade, que non só forma aos alumnos en linguas estranxeiras, senón que tamén achega un valor cultural ao traer profesionais altamente cualificados que contribúen ao intercambio” afirmou o conselleiro. “Galicia lidera a presenza de auxiliares de conversa Fulbright en España, e iso é un motivo de orgullo”, recalcou o titular de Educación. 

O conselleiro de Educación destacou que “estes auxiliares non só colaboran no ensino da lingua inglesa, senón que tamén traen consigo unha visión internacional que abre as portas dos nosos estudantes ao mundo. Nun momento no que o contacto con outras culturas é máis importantes ca nunca, estes programas permítennos preparar aos nosos mozos e mozas para un futuro globalizado”.

Ademais, o convenio recolle que os auxiliares de conversa conten co apoio e supervisión dunha persoa profesora titora-coordinadora en cada centro, o que lles permitirá integrarse de forma efectiva nas aulas. Durante os nove meses de colaboración, achegarán ao alumnado galego non só coñecementos sobre a lingua inglesa, senón tamén sobre a cultura dos Estados Unidos, facilitando unha aprendizaxe máis inmersiva e enriquecedora.

“O noso obxectivo non é só mellorar as competencias lingüísticas do alumnado, senón tamén fomentar a súa curiosidade e apertura cara ao mundo. O contacto directo con persoas de diferentes culturas axuda a ampliar horizontes e a crear unha mentalidade global, algo fundamental na educación actual”, resaltou o conselleiro.

O acordo entre a Xunta e a Comisión Fulbright, cun investimento total de 544.320€, será financiado en gran parte pola Administración autonómica, que achega o 87% dos fondos, mentres que a Comisión Fulbright cubre o 13% restante. Este convenio reforza o compromiso de Galicia cunha educación de calidade, que aposta por preparar ás novas xeracións para os desafíos do futuro.

Información xeral Consellería de Educación, Ciencia, Universidades e Formación Profesional

Summary: 

O conselleiro de Ciencia anuncia este aumento, ata acadar un total de 4,1M€, durante unha visita ao Clúster da Acuicultura (CETGA) en Ribeira

Este centro sitúase como referente internacional en acuicultura de peixes planos

Idioma Gallego

O conselleiro de Educación, Ciencia, Universidades e FP, Román Rodríguez, anunciou hoxe un incremento dun millón de euros neste ano para gastos de estruturación dos centros tecnolóxicos galegos, ata acadar un total de 4,1M€. Trátase dunha convocatoria plurianual, correspondente aos anos 2023/24, está pensada para que os centros poidan “destinar o diñeiro que aportamos desde o Goberno galego ás súas necesidades para así lograr un mellor funcionamento”, sinalou Román Rodríguez.

Así o asegurou durante unha visita ao Centro Tecnolóxico do Clúster da Acuicultura (CETGA) en Ribeira,  que con este incremento recibirá un total de 285.627 euros, 70.000 máis que a achega inicial. O representante da Xunta de Galicia fixo fincapé na importancia “do traballo que realizan os centros tecnolóxicos na mellora das principais áreas económicas en Galicia”. Concretamente, o CETGA ten como fin mellorar o sector da acuicultura coa calidade do produto, garantías para o consumidor, innovación, formación e procura dos factores que satisfagan ao mercado, o que o sitúa como referente internacional en acuicultura de peixes planos.

Na visita, guiada polo director do centro Santiago Cabaleiro, o titular de Ciencia puido coñecer de primeira man como funciona o CETGA e o seu traballo na busca de solucións innovadoras para mellora de produtos e sistemas a través da I+D+i, así como a visión da intelixencia artificial na cadea produtiva das instalacións acuícolas ou o uso de novas ferramentas para actividades como o control de enfermidades infecciosas.

Visita aos laboratorios e a planta piloto

Entre os proxectos máis destacados do CETGA atópase Aquatrofic, co que se busca potenciar o cultivo de microalgas e outras especies de interese, e o Mivali, para desenvolver novas vacinas con un efecto protector a longo prazo. Así mesmo, o centro conta con oito laboratorios: autovacinas, bioloxía molecular, experimentación animal, análises químicos, microbioloxía, preparación de mostras, cultivo celular e microscopía. Ademais, conta cunha planta piloto para realizar un cultivo completo de calquera especie, cunha dilatada experiencia en cultivo de rodaballo, linguado, robaliza, dourada e mero.

Román Rodríguez comprometeu o apoio da Xunta de Galicia a actividade do CETGA, que xa leva recibido uns 2,8M€ do Goberno autonómico, dos que case 2M€ foron achegados desde a Axencia Galega de Innovación, dependente da Consellería de Ciencia. “É a nosa obriga como Administración pública apoiar aos centros tecnolóxicos galegos polo papel que desenvolven na dinamización da innovación entre o tecido empresarial”, concluíu.

Información xeral Consellería de Educación, Ciencia, Universidades e Formación Profesional

Summary: 

O obxectivo é mellorar a resposta das políticas públicas aos retos actuais da sociedade en I+D+i, potenciando o papel de Galicia como referente neste eido

A directora da Axencia Galega de Innovación participa na reunión do grupo técnico da Comisión Interdepartamental de I+D+i

Idioma Gallego

A directora da Axencia Galega de Innovación, Carmen Cotelo, presidiu hoxe a reunión da Comisión Interdepartamental de I+D+i, un encontro que se centrou en avanzar na elaboración do novo Plan Galego de investigación e innovación 2025-2027.

O Goberno galego traballa para ter aprobado este plan a final de ano, co fin último de mellorar a resposta das políticas públicas aos retos actuais da sociedade no eido da I+D+i, potenciando o papel de Galicia como referente neste eido.

Para iso, a Consellería de Educación, Ciencia, Universidades e FP parte dunha avaliación, xa en marcha, da Estratexia de Especialización Intelixente de Galicia do período anterior, e contará coa participación dos membros do ecosistema galego de I+D+i e coa opinión contrastada dun grupo de expertos na materia. De xeito paralelo, no seo da Comisión Interdepartamental, estase a definir o enfoque estratéxico do plan para proceder despois á redacción do seu anteproxecto e á súa aprobación polo Consello Reitor da Axencia Galega de Innovación e polo Consello da Xunta de Galicia.

O Plan galego de investigación e innovación 2025-2027 ten entre os seus obxectivos acadar unha maior eficiencia e impacto das accións impulsadas desde a Administración para o impulso da investigación, a transferencia, a valorización e a innovación en Galicia; a coordinación dos axentes do ecosistema de I+D+i e dos recursos dispoñibles, favorecendo a colaboración público-privada; a coordinación da Comunidade Autónoma nos plans e programas nacionais e internacionais, o fomento da innovación e da súa xestión e a medición e avaliación dos resultados acadados en relación cos obxectivos propostos.

Información xeral Consellería de Educación, Ciencia, Universidades e Formación Profesional

Summary: 

Destaca a pioneira implantación da matrícula gratuíta nas universidades para garantir a igualdade de oportunidades

Idioma Gallego

O presidente da Xunta, Alfonso Rueda, apostou hoxe por implantar políticas transversais que axuden a fomentar e reter o talento, a través de medidas como un sistema educativo moderno e accesible e de políticas de apoio á innovación.

Así o destacou hoxe durante a clausura do foro Next Spain, organizado polo grupo Vocento, que se centrou nesta edición no empoderamento do talento e na innovación local. “En Galicia hai talento de sobra, polo que a obriga das Administracións é facer que aflore, potencialo e coidalo para que se atope a gusto aquí”, afirmou o presidente.

O titular do Executivo galego eloxiou a pertinencia de escoller a cidade da Coruña para acoller este foro. Neste sentido, lembrou que a cidade herculina foi elixida sede da Axencia Estatal de Supervisión de Intelixencia Artificial (Aesia), que conta coa Cidade das TiC e que ten un ecosistema de I+D+i moi relevante.

En canto ás políticas públicas para potenciar o talento, apelou a facelo desde un sistema educativo adaptado aos retos actuais e que valore a cultura do esforzo. Asegurou, tamén, que “a educación ten que ser universal e accesible para que sexa verdadeira educación”, como en Galicia, onde este curso se implantou a matrícula gratuíta nas universidades e estudos artísticos superiores.

En canto á innovación, valorou o abano de axudas que ten posto en marcha a nosa comunidade nos últimos anos para atraer investigadores e apoialos en diferentes etapas. Unhas medidas que teñen demostrado o seu éxito, xa que nos últimos anos o persoal dedicado ao I+D+i en Galicia aumentou nun 43 %.

Información xeral Consellería de Educación, Ciencia, Universidades e Formación Profesional

Summary: 

Divídese en seis apartados con obxectivos diferentes, desde micro-experiencias de aprendizaxe ata entrevistas con recoñecidos expertos en tendencias emerxentes

Establécese unha sección específica para axudar ao profesorado a iniciarse na intelixencia artificial, un dos principais retos do ensino a medio prazo

A iniciativa forma parte das accións de Xunta para atender os retos tecnolóxicos do ensino galego, que inicia a súa maior modernización dos últimos 30 anos

Idioma Gallego

O conselleiro de Educación, Ciencia, Universidades e Formación Profesional, Román Rodríguez, participou hoxe na presentación de Ágora Dixital, unha nova plataforma de recursos para axudar ao profesorado a desenvolver metodoloxías innovadoras na aula e que xorde da necesidade de contar cun espazo público no que atopar ideas, estratexias e actividades para empregar na clase, especialmente no relativo ás competencias STEM e tecnolóxicas, que se enfrontan na actualidade a unha constante actualización e novos retos.

O representante da Xunta agradeceu a colaboración dos docentes que participaron na elaboración dos 120 primeiros recursos xa dispoñibles e animou a todos a colaborar no enriquecemento da plataforma, “un traballo en equipo para mellorar a aprendizaxe do alumnado e para dar visibilidade ás boas prácticas do profesorado da Comunidade”.

Neste momento hai máis materiais en produción e desde a Consellería vaise favorecer a creación de novos contidos. Para iso, abrirase un apartado en Ágora Dixital baixo o título Tes unha idea? O obxectivo é que os profesores que presenten unha proposta poidan compartila e darlle forma no Centro de Innovación Educativa e Dixital de Galicia.

Román Rodríguez, acompañado pola directora xeral de Ordenación e Innovación Educativa, Judith Fernández, lembrou que este curso comeza a maior modernización do ensino galego dos últimos 30 anos e nesa meta intégrase Ágora Dixital para responder aos retos tecnolóxicos. “É unha ferramenta creada por docentes e para docentes para facerlles máis doado o seu traballo e ofrecer a mellor formación ao alumnado”.

Espazo aberto á comunidade escolar

Ágora Dixital funciona como unha praza aberta á comunidade educativa na que os docentes poden atopar recursos dixitais para empregar na aula e elaborar outros novos. Os materiais están baseados nunha aprendizaxe experimental, significativa, flexible, de curta duración e moi específica co fin de facilitar a transformación educativa nun clic.

Diferénciase doutros repositorios de contidos na rede pola súa fiabilidade, dado que son materiais elaborados por profesores e expertos, pola súa practicidade, dado que están testados en contextos reais na aula, e pola súa dispoñibilidade en galego e en castelán. Todos eles presentan unhas características comúns, con etiquetas para clasificar, organizar e facer buscas entre todas as publicacións que se recollen.

Seis laboratorios de aprendizaxe

As publicacións de Ágora Dixital están estruturadas en seis apartados ou laboratorios: LAB-Microsecuencias, LAB-Espazos, LAB-Estratexias, LAB-Ideas, LAB-Expert, LAB-IA

O LAB-Microsecuencias propón microexperiencias de aprendizaxe reproducibles na aula, por exemplo aprender como funciona o sensor de aparcamento dun coche empregando materiais de robótica; mentres que no LAB-Espazos se ofrecen consellos para a creación de novos espazos de aprendizaxe en base ás experiencias doutros centros, como o uso das aulas sensoriais.

Pola súa banda, o LAB-Estratexias céntrase en propoñer metodoloxías de aprendizaxe innovadoras (como o discurso lóstrego) e o LAB-Ideas funciona como unha porta aberta a outros recursos ou convocatorias de interese. Neste último apartado pode atoparse, por exemplo, un achegamento aos recursos didácticos en liña do CERN.

LAB-Expert céntrase en entrevistas, en formato vídeo curto, con persoas expertas do mundo dixital e STEM e a educación sobre tendencias emerxentes. No catálogo actual pódese atopar unha conversa na que a pedagoga Nélida Zaitegi aborda a convivencia positiva, eido no que é unha recoñecida experta, ou co investigador e especialista en intelixencia artificial do Centro de Investigación en TIC da Universidade da Coruña, Francisco Bellas, que afonda no impacto desta no ensino, entre outras entrevistas.

Precisamente o último dos apartados da plataforma, LAB-IA, dedícase aos docentes que desexen iniciarse na  intelixencia artificial, un dos grandes desafíos do ensino a medio prazo. Inclúe pequenas achegas sobre a implementación da Intelixencia Artificial a nivel educativo para persoas que desexen iniciarse nesta temática, arredor de conceptos como a árbore de decisións ou a aplicación ChatGPT.

Información xeral Consellería de Educación, Ciencia, Universidades e Formación Profesional

Summary: 

A directora xeral de FP reúnese cos coordinadores de emprendemento da Rede de centros integrados de FP para intensificar a colaboración entre eles

Idioma Gallego

A directora xeral de Formación Profesional, Eugenia Pérez, reuniuse hoxe no CIFP Compostela cos coordinadores de emprendemento dos centros integrados de Formación Profesional para reforzar o impulso deste espírito emprendedor a través do plan Eduemprende. Esta iniciativa da Xunta de Galicia, que leva máis dunha década fomentando a cultura emprendedora no alumnado de FP, é un dos piares da estratexia educativa galega para promover a creación de proxectos empresariais e a innovación.

No marco deste encontro, Eugenia Pérez tamén lembrou que a convocatoria do plan Eduemprende está actualmente aberta e finaliza o vindeiro 14 de outubro. Este, dirixido ao alumnado de ciclos formativos de grao medio e superior, ensinanzas deportivas, artes plásticas e deseño, así como ao alumnado de Bacharelato, ESO e Primaria, ten como obxectivo promover a cultura do emprendemento e facilitar a transición da vida académica á laboral.

O principal obxectivo deste encontro é potenciar o traballo colaborativo e xerar novas sinerxías. A representante da Consellería de Educación, Ciencia, Universidades e FP destacou a relevancia do plan Eduemprende no desenvolvemento de habilidades emprendedoras, que permiten ao alumnado crear os seus propios proxectos empresariais, ademais de facilitar o acceso aos viveiros de empresa dispoñibles en toda Galicia. “Queremos formar profesionais non só con competencias técnicas, senón tamén con capacidade de innovación e iniciativa para emprender os seus propios proxectos", afirmou a directora xeral.

Aulas de emprendemento

Eugenia Pérez subliñou tamén na reunión o impacto das aulas de emprendemento, postas en marcha en 100 centros de Galicia, que lograr fomentar a iniciativa entre un gran número de estudantes. A través da colaboración e o traballo en rede dos coordinadores de emprendemento dos CIFP ao abeiro do plan, búscase continuar incrementando a participación de centros e alumnado. Vén completar á rede de 33 viveiros de empresa en centros educativos, que facilitan que os alumnos poñan en marcha as súas ideas de negocio.

Os centros interesados en participar nesta iniciativa deberán presentar as súas solicitudes a través da Sede Electrónica da Xunta de Galicia antes da data límite. Con este programa, búscase que o alumnado adquira competencias empresariais e coñecementos que lles permitan desenvolver proxectos propios no futuro.

Con esta reunión, e co conxunto das iniciativas impulsadas pola Xunta de Galicia, a Formación Profesional continúa avanzando cara a unha maior conexión co tecido empresarial e un reforzo do espírito emprendedor entre o alumnado galego. Desta maneira, asegúrase unha formación integral, orientada ao futuro e que responda ás necesidades do mercado laboral.

Información xeral Consellería de Educación, Ciencia, Universidades e Formación Profesional

Summary: 

O secretario xeral de Universidades, José Alberto Díez, visita o Campus de Ourense acompañado polo decano da Facultade, Julio Prada

Idioma Gallego

O secretario xeral de Universidades, José Alberto Díez, destacou hoxe a traxectoria das titulacións de Historia que se imparten na Universidade de Vigo, todas con máis de 10 edicións. Fíxoo nunha visita na que estivo acompañado polo decano da Facultade, Julio Prada, onde puxo en valor que arredor de 300 estudantes elixiron a Facultade para a súa formación. 

O representante da Consellería recordou que, desde este curso, Galicia é a primeira comunidade en implantar a matrícula gratuíta para todos os universitarios que aproben, medida da que se benefician 20.000 mozos, e animou a futuros estudantes a matricularse nas titulacións da Facultade de Historia, que leva anos formando a numerosos alumnos, facilitando a coordinación con outras institucións do Sistema Universitario Galego (SUG) e adaptándose aos novos tempos.

Entre os estudos da Facultade de Historia, atópase o máster en Arqueoloxía e Ciencias da Antigüidade, que cumpre este curso 2024/2025 a súa primeira década, e que é interuniversitario coas Universidade de Santiago de Compostela e a Universidade da Coruña. 

Ademais, a Facultade tamén acolle o máster en Valoración, Xestión e Protección do Patrimonio Cultural, que se imparte de maneira semipresencial desde a súa creación no curso 2014/2015.

Pola súa banda, o grao en Xeografía e Historia, que deriva da antiga licenciatura en Historia, ten tamén unha longa traxectoria e ofrece 40 prazas para os estudantes.

Información xeral Consellería de Educación, Ciencia, Universidades e Formación Profesional

Summary: 

Compromete un investimento de 12 M€ para poñer en marcha o novo edificio universitario 

O Goberno autonómico investirá 40 M€ ata 2026 para melloras nas infraestruturas dos sete campus galegos

Recorda que este é o primeiro curso académico coa matrícula universitaria gratuíta, unha medida pioneira en toda España e da que xa se benefician “máis de 10.000 alumnos”

Resalta o traballo da Xunta para avanzar cara unha universidade máis “accesible e universal”

Idioma Gallego

O presidente da Xunta, Alfonso Rueda, destacou hoxe que a nova facultade de Farmacia da Universidade de Santiago de Compostela (USC), na que o Goberno galego investirá 12 millóns de euros, permitirá afianzar a esta universidade na vangarda académica. “Se unha universidade busca a excelencia ten que ter boas infraestruturas, un bo equipo humano e un alumnado que tamén procure esa excelencia”, indicou.

Así o destacou hoxe durante a presentación en Santiago de Compostela do proxecto para o cal o Goberno galego aportará aproximadamente a metade do seu custo total. “Serán unhas infraestruturas á altura da titulación; unhas instalacións como necesita e merece a comunidade educativa”, indicou.

Esta colaboración coa USC enmárcase nunha liña de acción de goberno máis ampla que ten como obxectivo consolidar a excelencia do Sistema Universitario Galego e mellorar a súa accesibilidade. A Xunta investirá 40 millóns de euros ata 2026 para melloras nas infraestruturas dos sete campus galegos. En total, grazas a este plan, mobilizaranse arredor de 100 millóns de euros para construír novos edificios ou rehabilitar outros.

Estes investimentos en infraestruturas son complementarios ao Plan galego de financiamento universitario 2022-2026, un plan plurianual -Galicia é unha das poucas comunidades autónomas que conta cunha planificación a varios anos- e consensuado que ten como obxectivo mobilizar case 3.200 millóns de euros durante a súa vixencia.

Ademais, Rueda recordou que este é o primeiro curso académico no que a matrícula universitaria será gratuíta nas universidades públicas ou centros de ensinanzas artísticas superiores. Nesta liña, destacou que xa son “máis de 10.000” os alumnos beneficiarios desta medida que busca avanzar nunha “universidade accesible e universal”. 

Por último, lembrou o compromiso do Goberno galego para que nesta lexislatura Galicia se converta na primeira comunidade en chegar ao 1% do PIB en recursos transferidos ou captados polas universidades públicas. 

Información xeral Consellería de Educación, Ciencia, Universidades e Formación Profesional

Summary: 

A Consellería de Ciencia organiza unha xornada informativa sobre as axudas do Consello Europeo de Investigación (ERC) para atraer, captar e reter talento

Na cita presentouse o Programa de traballo do ERC de 2025, así como a actual convocatoria Synergy Grant

Idioma Gallego

A Axencia Galega de Innovación acolleu hoxe unha xornada informativa sobre o programa do Consello Europeo de Investigación (ERC) e a convocatoria Synergy Grant. O obxectivo da cita é dinamizar novas candidaturas con garantías de éxito, que forma parte do esquema de apoios do Programa Oportunius.

A directora da Axencia Galega de Innovación, Carmen Cotelo, agradeceu aos relatores e asistentes a súa participación e puxo en valor o programa Oportunius, impulsado no 2014 pola Xunta de Galicia para promover, reter, atraer e retornar o mellor talento científico internacional na rexión. “O fin último do programa é incrementar o número de investigadores en centros de coñecemento galegos que sexan titulares de axudas do ERC, consideradas un indicador de referencia da excelencia científica en Europa”, sinalou a representante da Consellería de Educación, Ciencia, Universidades e FP.

Durante a cita informativa, presentouse o esquema de apoios do Programa Oportunius. Este paquete de axudas diríxese tanto aos titulares de axudas ERC, mediante contratos de persoal investigador distinguido e achegas económicas complementarias (durante e despois da vixencia do financiamento do ERC), como ás persoas finalistas en convocatorias previas do ERC, ofrecéndolles asesoramento e apoio económico, así como servizos de apoio e formación ao persoal investigador con potencial para presentar candidaturas gañadoras.

Participantes na xornada

A xornada contou coa colaboración da Fundación Española para a Ciencia e Tecnoloxía (FECYT), a través de Leticia Riaza, punto nacional de contacto do European Research Council (ERC) en España, que presentou o Programa de Traballo do ERC de 2025, así como a actual convocatoria Synergy Grant. Así mesmo, participaron tamén algúns dos investigadores máis destacados do sistema, gañadores de axudas do ERC e contratados a través do Programa Oportunius. Entre eles estaban o investigador Oportunius adscrito ao CiQUS da Universidade de Santiago de Compostela e gañador dunha ERC Synergy Grant (2020), Diego Peña; o investigador Oportunius adscrito ao CRETUS da Universidade de Santiago de Compostela e gañador dunha ERC Consolidator Grant (2020), Sebastián Villasante, e a investigadora Ramón e Cajal adscrita ao CICA da Universidade da Coruña e gañadora dunha ERC Starting Grant (2019), Elena Pazos. O coloquio foi moderado por José Mahía Saavedra, director da Oficina de Captación de Persoal Investigador da Universidade da Coruña.

Impacto do programa Oportunius

Desde a súa creación ata 2024, o programa Oportunius deu apoio económico a 31 gañadores de axudas ERC, dos cales 18 contan cun contrato de persoal investigador distinguido coa Axencia Galega de Innovación. En conxunto, estas 31 persoas lideran 39 proxectos, que recibiron financiamento europeo por valor de 57,8 millóns de euros.

Ata 2023, a gañadores ERC de Galicia xeraran 1.932 publicacións científicas, das cales un 83% publicáronse en revistas Q1, as máis importantes das súas disciplinas, e os grupos liderados por estes investigadores e investigadoras (un 22,5% son mulleres) obtiveron outros 30M€ en convocatorias competitivas de proxectos, accións de transferencia e outras actividades complementarias. Ademais do impacto económico, os proxectos ERC desenvoltos en Galicia teñen un significativo impacto científico e propician a creación de empregos cualificados.

Información xeral Consellería de Educación, Ciencia, Universidades e Formación Profesional

Summary: 

Asegura que xa son máis de 10.300 os beneficiarios e a cifra vaise incrementar unha vez que peche o derradeiro prazo de matrícula e o Ministerio resolva as súas bolsas

Salienta que o Goberno galego aboará ás universidades un pagamento inicial de preto de 5,6 M€ este mes en concepto de compensación, “dous meses antes sobre o previsto”, cifra que se seguirá ampliando en próximos pagamentos

Idioma Gallego

O presidente da Xunta, Alfonso Rueda, informou hoxe de que “xa son 9.659 estudantes de grao e 647 de ensinanzas artísticas” que se beneficiaron da gratuidade da matrícula para este curso en Galicia e que a previsión é que finalmente esta cifra se duplique e se chegue “arredor de 20.000 estudantes ao longo de todo o curso”.

 

Segundo o informe elevado pola Consellería de Educación, Ciencia, Universidades e FP ao Consello da Xunta, estímase que a cifra de beneficiarios da matrícula de balde aumente logo de que nos próximos meses peche o derradeiro prazo de matrícula en outubro, e se resolvan as bolsas de estudo estatais entre xaneiro e febreiro do próximo ano. Trátase, por tanto, de estudantes que cumpren coas condicións para a matrícula gratuíta da Xunta pero están pendentes doutras exencións que, de non obtelas, se lles aplicaría a bonificación autonómica.

 

Así pois, no caso dos estudos de grao universitario, a día de hoxe aínda quedan arredor duns 8.000 posibles novos beneficiarios pendentes da bonificación por estaren pendentes da aplicación dalgunha das exencións previstas como ser beneficiario dunha bolsa do Ministerio, ter matrícula de honra, persoal universitario ou familia numerosa entre outros, ou ben estar pendente da revisión dalgunha incidencia. Isto é, que as persoas que solicitaron outras exencións, se finalmente non as obteñen pero cumpren cos requisitos establecidos pola Xunta, vanse beneficiar da gratuidade, o que elevará a cifra final.

 

Tal e como explicou o presidente, a gratuidade da matrícula supón “un déficit na tesourería das universidades públicas” e, por iso, o Consello acordou “adiantar” o pago ás universidades “en compensación pola baixada de ingresos” ante esta medida. En concreto, a Xunta vai aboar 5,6 M€ ao longo deste mes aos campus, “é dous meses antes do prazo pactado inicialmente”.

 

Por universidades e especialidades

Por universidades, a Universidade de Santiago vai recibir 2,2M€ correspondentes ás 3.933 matrículas certificadas ata o momento, a Universidade de Vigo recibirá 1,6M€ por 2.889 matrículas validadas e a Universidade da Coruña 1,7M€ por 2.837 matrículas. O investimento derivado das fases posteriores irase aboando a medida que se avance no proceso.

 

No que atinxe ás matrículas das Ensinanzas Artísticas Superiores, xa se beneficiaron da gratuidade un total de 647 estudantes  a razón de 337 da especialidade de Deseño, 214 da de Música, 70 de Arte Dramática e 26 de Conservación e Restauración de Bens Culturais, o que implica un desembolso de 276.397€ por parte da Xunta de Galicia. Non obstante, estímase que a cifra final de beneficiarios acade os 1.000, logo de que se resolvan as exencións que aínda están pendentes de aplicar.

 

Medida pioneira en España

Cómpre lembrar que a Xunta de Galicia implantou por primeira vez neste curso a medida pioneira da gratuidade da matrícula para todos os estudantes de grao coa bonificación equivalente ao 99 % das taxas para todos aqueles que inician os seus estudos nas tres universidades públicas galegas, e para os alumnos de continuidade de 2º curso en diante que superasen durante o curso anterior porcentaxes de créditos que varían entre o 65 % e o 90 %, segundo a área de coñecemento. Tamén se benefician desta medida os estudantes de Ensinanzas Artísticas Superiores.

 

A posta en práctica desta medida supón redobrar a aposta da Xunta de Galicia polo apoio ás familias coa gratuidade da educación para o alumnado desde que entra na gardaría, na etapa 0-3 anos, ata que remata os seus estudos universitarios, ao tempo que se fomenta a cultura do esforzo, premiando o interese, a dedicación e o bo aproveitamento académico.

 

Información xeral Consellería de Educación, Ciencia, Universidades e Formación Profesional

Summary: 

Rueda informa que o Goberno galego “inxectará 12M€ ata 2026” para a construción deste centro a través do Plan de infraestruturas

Destaca que, ademais desa inxección directa, a Xunta autoriza á USC a “negociar coas entidades bancarias o aprazamento da débeda doutros case 10M€, o que lle dá unha dispoñibilidade de fondos de 22M€”

Deste xeito, impúlsase a mellora das infraestruturas universitarias públicas galegas, no marco do Plan de infraestruturas da Xunta, que mobilizará máis de 100M€

Idioma Gallego

O presidente da Xunta, Alfonso Rueda, informou hoxe de que a Universidade de Santiago de Compostela (USC) ten luz verde para construír a nova Facultade de Farmacia na capital Galicia, “un dos edificios máis demandados pola comunidade educativa”. Así se desprende do informe analizado no Consello, polo que a Xunta confirma a dispoñibilidade de fondos para a edificación desta facultade e evitar así que o alumnado “teña que repartirse entre outras facultades”, tal e como apuntou o titular do Goberno galego.

 

Para iso, o Goberno galego “inxectará 12M€ á USC ata 2026” para a construción deste edificio a través do Plan de infraestruturas universitarias, a razón de 4M€ nas anualidades de 2024, 2025 e 2026. Súmanse aos 4M€ que xa se transferiron á universidade compostelá ao abeiro deste plan en 2023, e que se están a destinar fundamentalmente á rehabilitación da Facultade de Química. Entre os compromisos de colaboración entre Xunta e USC en materia de infraestruturas tamén se mantén o compromiso co traslado da Facultade de Formación do Profesorado de Lugo.

 

Por outra banda, tal e como salientou Rueda, a Universidade de Santiago de Compostela “poderá negociar coas entidades bancarias o aprazamento do pagamento da débeda doutros case 10M€, o que lle dará á universidade unha dispoñibilidade de fondos de 22M€”.

 

Con estes fondos, a USC comprométese a executar un proxecto de construción para a Facultade de Farmacia de 24,5M€. “O resto do financiamento, 2,5 M€, sairá dos fondos propios da universidade”, engadiu, ao tempo que sinalou que a previsión da USC é “comezar as obras de construción o ano que vén e que  a nova facultade estea rematada no 2027”.

 

Desta forma impúlsase a mellora das infraestruturas universitarias públicas galegas, no marco do Plan de infraestruturas que o Goberno galego habilitou o pasado ano para este fin, cun orzamento total de 40M€.

 

Nova Cidade da Saúde

A Universidade de Santiago de Compostela fixou entre os seus obxectivos no marco do Plan de infraestruturas a creación da nova Cidade da Saúde na capital galega, un conxunto de edificios que acollerá a Facultade de Enfermaría, a Facultade de Farmacia, un centro de investigación na área de Ciencias da Saúde e un aparcadoiro.  A previsión é construír módulos enerxeticamente eficientes, cunha baixa demanda e con produción propia de enerxía mediante fontes renovables.

 

Coa nova inxección económica garántese a viabilidade, dentro da Cidade da Saúde, da nova Facultade de Farmacia, un dos edificios máis demandados pola comunidade universitaria, dada a deterioración do edificio actual, que leva afectando o alumnado e docentes desde hai case unha década.

 

Mobilizar máis de 100M€

Ambas as actuacións enmárcanse no Plan de infraestruturas universitarias da Xunta, a través do que inxecta ás tres universidades públicas galegas ata 2026 un total de 40M€ para a mellora dos seus centros e facultades. A través deste plan, complementario aos recursos propios das universidades e a outro tipo de axudas que poidan percibir, prevese mobilizar arredor de 100M€.

 

O obxectivo é seguir avanzando na consolidación da excelencia e calidade do Sistema universitario de Galicia, a través de melloras nas infraestruturas dos sete campus, tanto rehabilitacións como construción de novos edificios modernos para facultades e centros de investigación adaptados aos retos de futuro.

 

Este investimento súmase, como unha cantidade adicional, ao Plan galego de financiamento universitario 2022-2026, a folla de ruta de financiamento estable e certo coa que contan as universidades galegas. Engádese, ademais, ao convenio asinado en 2021, por importe de 4,5M€, para a mellora da eficiencia enerxética das infraestruturas universitarias, como anticipo a este plan de Infraestruturas.

 

Información xeral Consellería de Educación, Ciencia, Universidades e Formación Profesional

Summary: 

A Consellería de Educación publicará nos próximos días a convocatoria para que os centros presenten os seus proxectos de mellora

Afondarán en eidos como as matemáticas e a lectura, a igualdade, a convivencia, o benestar emocional, as altas capacidades ou o contacto con outros centros de Europa

É a terceira medida do Plan MEGA que se pon en marcha, tras os programas Promociona e Proa+

Idioma Gallego

A Xunta vai impulsar este curso a creación dunha rede de centros educativos de referencia en materia de inclusión e innovación educativa. Farao a través dun dos seis programas que compoñen o Plan MEGA de mellora educativa de Galicia, a estratexia do Goberno autonómico para a transformación e consolidación definitiva do sistema educativo galego.

 

A Consellería de Educación, Ciencia, Universidades e FP publicará nos próximos días a convocatoria para que os centros presenten os seus proxectos de mellora. Poderán facelo arredor de dúas modalidades, unha centrada na inclusión educativa e outra na innovación pedagóxica.

 

Os centros seleccionados desenvolverán o seu proxecto ao longo do curso 2024/25. Para iso, contarán co apoio específico do departamento educativo da Xunta a través de asesoramento, formación específica e difusión de boas prácticas. Asemade, dotarase aos centros dunha asignación extraordinaria para o desenvolvemento dos proxectos, para o que a convocatoria está dotada cun orzamento de ata 2M€.

 

O obxectivo deste programa é que os centros educativos seleccionados poidan influír positivamente noutros centros similares e converterse en exemplos de boas practicas promovendo actuacións e metodoloxías que poidan ser replicadas e adaptadas por outros centros.

 

É a terceira medida Plan MEGA que se pon en marcha, tras os programas Promociona e Proa+, cun novo enfoque que vén substituír os antigos contratos-programa, modernizándoos.

 

Amplo abano de boas prácticas

Poderán participar neste programa os centros públicos que impartan ensinanzas de Educación Infantil, Educación Primaria e Educación Secundaria. Deberán elaborar un proxecto educativo centrado nalgunha das oito áreas de mellora ou ámbitos presentados na convocatoria: igualdade, convivencia, inclusión, benestar emocional, competencia matemática, competencia lectora, internacionalización e sostibilidade.

 

No eido da igualdade valoraranse os proxectos que fomenten a promoción da igualdade de oportunidades entre mulleres e homes, a prevención, a detección e o tratamento das violencias machistas e a o respecto pola diversidade afectivo-sexual e de xénero; mentres que no da convivencia os proxectos deberán incluír medidas que favorezan o clima escolar ou actuacións preventivas de condutas violentas ou discriminatorias, entre outras.

 

En materia de inclusión seleccionaranse proxectos con actuacións dirixidas á atención a diversidade, a inclusión educativa e social de todo o alumnado, a mellora das necesidades educativas do alumnado de altas capacidades e do alumnado absentista e en risco de abandono temperán.

 

Pensamento crítico e empatía

No caso do benestar emocional, priorizaranse as iniciativas dirixidas a mellorar a competencia socioemocional da comunidade educativa, así como o desenvolvemento de estratexias que favorezan o aumento da autoestima, a empatía e a resiliencia, a superación, a identificación das emocións dos demais e o coñecemento das propias, en lina coa Estratexia galega de convivencia escolar, Educonvives.

 

O programa para o impulso de centros referentes tamén impulsa o reforzo das competencias matemáticas e lectora. No primeiro dos ámbitos os centros deberán elaborar proxectos que aposten por enfoques educativos innovadores, no fomento do pensamento critico e no estímulo da resolución de problemas de xeito interdisciplinar e práctico.

 

No que atinxe á competencia lectora, seleccionaranse iniciativas que impulsen actividades de lectura que cheguen a todos os membros da comunidade escolar e que lles sirvan como vía de entretemento e de crecemento persoal.

 

Interese por outros idiomas e cultura

Na área de internacionalización búscase favorecer o contacto dos centros educativos galegos con centros educativos de Europa que implican a alumnado e profesorado para fomentar un maior interese por outras culturas e realidades, así como a promoción de actividades ou proxectos centrados no coñecemento e emprego por parte do alumnado das distintas linguas, orais ou signadas.

 

Finalmente, no ámbito da sostibilidade seleccionaranse proxectos que propoñan medidas organizativas, metodolóxicas ou actividades deseñadas para que os centros evolucionen cara a un funcionamento ambientalmente responsable.

 

Información xeral Consellería de Educación, Ciencia, Universidades e Formación Profesional

Summary: 

O conselleiro de Educación, Ciencia, Universidades e FP inaugura o programa cunha actividade destinada á xestión de centros educativos

A Xunta inviste máis de 11 M€ en formar ao profesorado a través de seis liñas: dixital, didáctica, innovación, convivencia e inclusión e comunicación e plurilingüismo

Román Rodríguez destaca o papel dos docentes como “piar fundamental do sistema educativo para preparar aos galegos para os retos do presente e futuro”

Idioma Gallego

O conselleiro de Educación, Ciencia, FP e Universidades, Román Rodríguez, inaugurou hoxe o Plan anual de formación do profesorado 2024/2025 nunha xornada sobre o uso das aplicacións institucionais na xestión dos centros educativos destinada aos equipos directivos. O titular de Educación explicou que a Xunta “pon a disposición dos docentes un total de 132.531 prazas para reforzar e actualizar as súas competencias profesionais, un 7,5 % máis”.

Así o sinalou durante a benvida aos participantes na xornada, na que estivo acompañado polo director xeral de Centros e Recursos Humanos, Jesús Álvarez, e coa que se busca dar a coñecer as diferentes ferramentas de xestión do ensino galego, así como familiarizar aos equipos directivos co uso destas tecnoloxías. Así mesmo, na formación resólvense dúbidas sobre o emprego de Xade, Abalar, Fondolibros ou Webex, entre outras opcións.

Román Rodríguez agradeceu o traballo de toda a comunidade educativa, facendo especial fincapé no papel dos docentes, que son “o piar fundamental do sistema educativo para preparar aos galegos para os retos do presente e futuro”. “Con formacións como a de hoxe -afirmou-, poñemos á vosa disposición as ferramentas necesarias para formar as novas xeracións con garantía de éxito nun marco de cambios constantes en metodoloxías educativas, dinámicas pedagóxica e transformacións sociais”.

6.172 actividades desde  Matemáticas a FP

Neste sentido, o representante da Xunta de Galicia explicou que o Plan de formación do profesorado deste curso inclúe un total de 130.136 horas, cun investimento total de 11,4 M€, medio millón de euros máis que o pasado curso. “Este ano, cun total de 6.172 actividades, daremos especial protagonismo á formación nos propios centros, máis personalizada, así como cursos e xornadas e formacións en liña”, engadiu.

O Plan deste ano aposta especialmente polas competencias matemáticas e dixitais e as relacionadas coa FP. De feito, o conselleiro destacou o incremento das prazas nas accións específicas para docentes de FP e ensinanzas de réxime especial, máis de 17.000, un 50 % máis. “O obxectivo é facilitar o traballo dos docentes, ofrecéndolles formación gratuíta que lles permita facer fronte aos novos retos do ensino do século XXI”, remarcou.

Deste xeito, este novo Plan contribuirá a afondar nos novos currículos e a fortalecer as competencias en aspectos tan necesarios como a atención á diversidade ou a xestión tecnolóxica, e seguir traballando por un modelo inclusivo, innovador, flexible, cooperativo e axustado ás necesidades dos alumnos. A oferta está organizada en seis liñas formativas prioritarias: dixital, didáctica, innovación, convivencia e inclusión e comunicación e plurilingüísimo. Estas liñas concrétanse en 23 itinerarios con tres niveis de desenvolvemento cada un e, dentro deles, 400 actividades formativas que son completamente novas ou foron actualizadas.

Información xeral Consellería de Educación, Ciencia, Universidades e Formación Profesional

Idioma Gallego

O conselleiro de Educación, Ciencia, Universidades e Formación Profesional, Román Rodríguez, visitou hoxe o stand de FP na XXXVI Feira do Moble de Galicia, un espazo que promociona os ciclos formativos das familias profesionais de Madeira, Moble e Cortiza e favorece o establecemento de relacións coas empresas do sector.

O titular de Educación da Xunta animou á mocidade a achegarse ao expositor para coñecer de primeira man “a ampla oferta formativa e as numerosas saídas profesionais” que ofrecen estes ciclos, nos que Galicia “é un referente a nivel estatal”. A feira conta, ademais, cunha exposición de pezas elaboradas polo alumnado de Formación Profesional do Instituto IES Plurilingüe Antón Losada Diéguez, que este ano estreou un novo edificio de talleres grazas a un investimento de 3M€ por parte da Xunta de Galicia. Os asistentes poden tamén experimentar coa realidade virtual no simulador de taller de carpintería.

Información xeral Consellería de Educación, Ciencia, Universidades e Formación Profesional