Esta tarde o Museo de Galicia da Cidade da Cultura acolleu unha reunión de traballo entre o conselleiro de Cultura, Educación e Ordenación Universitaria, Román Rodríguez, e responsables de distintas entidades involucradas na atención á diversidade e a educación inclusiva coas que a o Goberno autonómico ten asinado diversos acordos e convenios de colaboración.

O conselleiro destacou o excelente labor de cooperación educativa no que “gran parte do éxito radica no talento e talante dos profesionais e voluntarios que traballan nas diversas entidades que axudan a construír un sistema educativo máis inclusivo, integrador e onde se garanta a igualdade de oportunidades.”

Participaron na reunión, ademais dos responsables da Xunta, representantes de Amencer-Aspace, Aspace-A Coruña, Asociación Amicos, Autismo Ourense, Aspronaga, Aspanes-A Coruña, Asociación Nosa Señora de Chamorro, Fundación Menela, Federación galega de institucións para a Síndrome de Down (Down Galicia), Organización Nacional de Cegos Españois (ONCE), Asociación de Familias de Persoas con Parálise Cerebral, Confederación Galega de Persoas con Parálise Cerebral (COGAMI), Asociación galega de familias de persoas afectadas polo síndrome de Asperger (ASPERGA), Fundación María José Jove, Instituto Galego do TDAH e Trastornos Asociados (INGADA), Federación Galega de Asociacións de Persoas con TDAH, FADEMGA e a Federación de Asociacións de Persoas Xordas de Galicia (FAXPG).

Posta en común

A xuntanza serviu para poñer en común o labor realizado no ámbito da atención á diversidade e a escola inclusiva e analizar o desenvolvemento dos diferentes protocolos de actuación cos que se dá resposta aos retos e as situacións concretas que teñen a súa orixe na propia diversidade social.

Falouse tanto do camiño seguido para favorecer a atención educativa ao alumnado con algún tipo de discapacidade, establecendo medidas encamiñadas á súa atención, como do fomento entre o profesorado diversos programas de formación acaídos aos retos da diversidade.

A Consellería de Cultura e Educación e maila Asociación Raiolas, de Lugo, van intensificar a súa colaboración co fin de mellorar a atención educativa ao alumnado con Trastorno do Espectro Autista (TEA). Así quedou reflectido no convenio asinado hoxe entre o conselleiro Román Rodríguez e a presidenta de Raiolas, Mª Inés Flores, ao abeiro do cal se van poñer en marcha accións conxuntas dirixida a este colectivo.

Avanzar nun sistema educativo máis inclusivo, que dea unha resposta acaída á diversidade do alumnado, é unha das liñas estratéxicas da Consellería de Cultura e Educación. Por este motivo, o departamento que dirixe Román Rodríguez vén colaborando con diversas entidades e asociacións especializadas na atención a colectivos con necesidades educativas específicas para deseñar unha acción educativa integral ás súas peculiaridades.

Ao abeiro deste acordo, a Asociación Raiolas colaborará coa Consellería nas accións de formación do profesorado que atende aos alumnos con TEA, así como na elaboración e difusión de materiais e documentos que axuden a un maior coñecemento das circunstancias específicas do alumnado con este Trastorno.

Así mesmo, a Consellería facilitará que os profesionais desta entidade colaboren cos centros docentes en labores de asesoramento tanto do profesorado coma das familias, na orientación sobre as metodoloxías máis axeitadas, e na posta a disposición de información complementaria que lles poida servir de axuda no día a día tanto a nivel escolar como familiar.

O conselleiro de Cultura, Educación e Ordenación Universitaria, Román Rodríguez, e os representantes de diversas asociacións de atención á diversidade asinaron hoxe senllas addendas aos convenios de colaboración postos en marcha no curso 2015/2016 co obxectivo de facilitar o servizo de comedor e de transporte adaptado ao alumnado con discapacidades. Neste sentido, a Consellería destinará máis de 1,2 millóns de euros á prestación destes servizos complementarios, 280.000 euros máis que o ano pasado.

En concreto, no referente ao transporte adaptado beneficiaranse un total de 378 alumnos, 87 máis que no curso que vén de rematar, e mobilizarase un orzamento superior ao millón de euros. Por outra banda, o departamento que dirixe Román Rodríguez facilitará o comedor escolar –cunha achega de 163.148 euros–, a preto de 383 usuarios con discapacidades, tres máis que o ano pasado. En definitiva, a Xunta incrementa tanto o número de usuarios beneficiarios como o orzamento, co fin de facilitar os desprazamentos de ida e volta deste alumnado e o seu día a día no comedor escolar.

Neste contexto, o conselleiro tamén avanzou a próxima sinatura dun novo convenio de colaboración sobre comedor escolar coa Asociación BS A Esperanza do Val Miñor, que se sumará ao xa posto en marcha en materia de transporte. En virtude deste vindeiro acordo beneficiaranse 33 persoas, polo que a cifra final ascendería a 416 usuarios de comedor.  

Asociacións asinantes

As 14 asociacións que participan nesta colaboración son as seguintes: Asociación Comarcal de Educación Especial Santísimo Cristo del Amor (ACEESCA), Asociación de Atención a la Parálisis Cerebral y Afines AMENCER—ASPACE, Asociación de Familias de Persoas con Discapacidade Psíquica das Comarcas do Barbanza e Noia AMICOS, Centro Especial de Emprego sen ánimo de lucro ASCM—Ferrolterra, S.L., Asociación de Padres de Personas con Parálisis Cerebral–A Coruña (ASPACE), Asociación de Pais de Persoas con Trastornos do Espectro Autista da Provincia da Coruña ASPANAES, Asociación en Favor de las Personas con Discapacidad Intelectual de la Provincia de Pontevedra (ASPANAEX), Asociación Pro Personas con Discapacidad Intelectual de Galicia (ASPRONAGA), Asociación Autismo Ourense, Asociación BATA (Bayón, Asociación para el Tratamiento del Autismo), Cruz Roja Española, Asociación BS A Esperanza do Val Miñor, Fundación Menela e Asociación Nuestra Señora de Chamorro.

Desenvolvemento da autonomía persoal

Cómpre salientar que estes convenios enmárcase dentro do compromiso da Xunta de Galicia coa atención á diversidade, exemplificado no decreto 29/2011 e nas diferentes accións e protocolos postos en marcha para garantir unha atención específica e preferente, adaptada ás particularidades e circunstancias deste alumnado.

Esta estratexia, ademais, vese reforzada nos propios espazos escolares, posto que o comedor tamén axuda ao alumando con discapacidades a aprender e desenvolver habilidades que redundarán na súa autonomía persoal, favorecendo así a súa inclusión social.

O conselleiro de Cultura, Educación e Ordenación Universitaria, Román Rodríguez; asinou hoxe un convenio de cooperación educativa coa Asociación de Pais de Persoas con Trastorno de Espectro Autista (TEA) da provincia da Coruña (Aspanaes) para colaborar na atención do alumnado con TEA, ou con calquera outra síndrome ou trastorno relacionado, así como para o apoio aos seus docentes e familias. Este convenio afonda na liña de reforzo da atención ao alumnado con necesidades específicas que, neste caso, ten como base o Protocolo de tratamento educativo ao alumnado con Trastorno do Espectro do Autismo (TEA) do sistema educativo galego, publicado pola Consellería de Cultura e Educación e elaborado conxuntamente coas asociacións e colectivos implicados nesta diversidade. Así mesmo, a Consellería colabora tamén neste sentido coa Fundación Menela, BATA ou Asperga, a través tamén de convenios de cooperación educativa.

Ao abeiro deste convenio ambas as partes promoverán a sensibilización e a difusión de materiais e documentos que permitan un maior coñecemento das circunstancias específicas asociadas ao alumnado con TEA. Así mesmo, a Consellería impulsará a formación do profesorado nesta materia, de acordo coa asociación, cuxo persoal poderá tamén prestar apoio nos centros de ensino que conten con alumnado con estas necesidades especiais. As actuacións do persoal especialista de Aspanaes nos centros docentes entenderase dentro do principio de colaboración entre todas as persoas que atenden a un mesmo alumnos e coa finalidade de facilitarlle unha atención educativa inclusiva e axustada á súa particular forma de ser e de aprender.

Acadar o maior éxito escolar

Os centros docentes poderán solicitar a colaboración do persoal profesional de Aspanaes, que poderá artellarse tanto a través do asesoramento na atención educativa a estes estudantes, como na orientación sobre metodoloxías axeitadas á intervención educativa, ou da información e formación naqueles aspectos que o persoal dos centros docentes requira a este respecto.

O obxectivo é acadar o maior éxito escolar posible destes estudantes, unindo forzas e recursos. Neste sentido, Aspanaes é unha entidade non lucrativa de acción social fundada en 1979 que traballa para apoiar ás persoas con autismo e ás súas familias, creando oportunidades para mellorar a calidade da súa vida, á par que promoven a sensibilización da poboación arredor deste trastorno. Na actualidade a súa base social está formada por máis de 2.200 persoas e atenden a 402 na súa rede de centros e servizos.

Protocolo de orientación e intervención

O Protocolo de tratamento educativo do alumnado con Trastorno do Espectro do Autismo (TEA) foi publicado este curso co fin de servir como ferramenta para guiar a actuación de profesionais do ensino e familias.

Deste xeito, o documento busca establecer o camiño que se debe seguir desde a aparición dos primeiros indicios e procura, tamén, orientar a intervención educativa que se debe realizar por todas as persoas que participan na educación dese alumnado. A tal fin, articúlase en diferentes epígrafes centrados no concepto do TEA (conforme co manual de trastornos mentais DSM-5), a diagnose do mesmo, o tratamento educativo do alumnado con este trastorno, e o proceso de seguimento e avaliación. Finalmente achégase un pequeno glosario de termos ou conceptos utilizados ao longo do documento, referencias bibliográficas e tres anexos con textos que poden servir de axuda como indicadores do trastorno, con probas específicas de screening e cun esquema que sintetiza ou orienta o percorrido que cómpre seguir ante a sospeita dun caso de TEA.

O conselleiro de Cultura, Educación e Ordenación Universitaria, Román Rodríguez; e o director xeral da Fundación Menela, Cipriano Luís Jiménez Casas; asinaron hoxe un convenio de cooperación educativa para colaborar na atención do alumnado con Trastorno do Espectro do Autismo (TEA), ou con calquera outra síndrome ou trastorno relacionado. Deste xeito afóndase na liña de actuación que está a desenvolver o departamento educativo da Xunta neste sentido, que ten o seu fito clave na publicación do Protocolo de tratamento educativo do alumnado con Trastorno do Espectro do Autismo (TEA) do sistema educativo galego, un documento elaborado conxuntamente coas asociacións e colectivos implicados nesta diversidade, dada a importancia do traballo en común para acadar o maior éxito escolar posible destes estudantes.

Ao abeiro deste convenio ambas as partes promoverán a sensibilización e a difusión de materiais e documentos que permitan un maior coñecemento das circunstancias específicas asociadas ao alumnado con TEA. Así mesmo, a Consellería impulsará a formación do profesorado nesta materia, de acordo coa fundación, cuxo persoal poderá tamén prestar apoio nos centros de ensino que conten con alumnado con estas necesidades especiais.

O apoio da Fundación Menela poderá artellarse tanto a través do asesoramento na atención educativa a estes estudantes, como na orientación sobre metodoloxías axeitadas á intervención educativa, ou da información e formación naqueles aspectos que o persoal dos centros docentes requira a este respecto.

Protocolo TEA

Como base deste apoio os centros de ensino e a Fundación Menela terán o Protocolo de tratamento educativo do alumnado con Trastorno do Espectro do Autismo (TEA), publicado este curso co fin de servir como ferramenta para guiar a actuación de profesionais do ensino e familias.

Deste xeito, o documento busca establecer o camiño que se debe seguir desde a aparición dos primeiros indicios e procura, tamén, orientar a intervención educativa que se debe realizar por todas as persoas que participan na educación dese alumnado. A tal fin, articúlase en diferentes epígrafes centrados no concepto do TEA (conforme co manual de trastornos mentais DSM-5), a diagnose do mesmo, o tratamento educativo do alumnado con este trastorno, e o proceso de seguimento e avaliación. Finalmente achégase un pequeno glosario de termos ou conceptos utilizados ao longo do documento, referencias bibliográficas e tres anexos con textos que poden servir de axuda como indicadores do trastorno, con probas específicas de screening e cun esquema que sintetiza ou orienta o percorrido que cómpre seguir ante a sospeita dun caso de TEA.

O conselleiro de Cultura, Educación e Ordenación Universitaria, Román Rodríguez, e o delegado territorial da Organización Nacional de Cegos Españois en Galicia, Manuel Martínez Paz; asinaron hoxe unha addenda ao convenio de colaboración para prestar atención especializada a 352 alumnas e alumnos con discapacidade visual en centros educativos de toda Galicia. A través deste acordo, a Consellería destinará máis de 198.000 euros para que 6 profesores do corpo de mestres desenvolvan as súas tarefas profesionais nos equipos específicos da ONCE, prestando apoio ao alumnado cego ou con discapacidade visual, tanto en educación primaria, 1º e 2º da ESO, como en centros e unidades de educación especial.

Deste xeito facilítase o acceso do alumnado con discapacidade visual escolarizado en centros ordinarios aos recursos tecnolóxicos e a transcrición e gravación a braille dos libros de textos e dos materiais curriculares, co fin de favorecer a súa inclusión educativa no marco dunha atención especializada e axeitada ás súas necesidades.

Esta unión dos recursos humanos dos que dispón a Consellería cos recursos materiais da ONCE responde ao cumprimento do compromiso fixado pola Consellería a partir da publicación do Decreto 229/2011, do 7 de decembro, polo que se regula a atención á diversidade do alumnado dos centros docentes da Comunidade Autónoma de Galicia; e que se ve reflectido en diferentes colaboracións do departamento educativo da Xunta con entidades especializadas na atención a diversos colectivos.