A ONG Accem pon á disposición do profesorado e outros/as profesionais do ámbito educativo e social ferramentas audiovisuais e dinámicas para traballar sobre a diversidade da sociedade, co fin de normalizar e valorar a riqueza que esta representa.

A campaña REFERENTES destaca persoas nacidas ou criadas en España, cultural e/ou etnicamente diversas, que sobresaen en distintos ámbitos pola súa traxectoria e os seus logros. O seu obxectivo é inspirar a miles de nenos/as e adolescentes que medran nunha sociedade na que non se senten representados/as.

Accem invita a todas as persoas interesadas a visitar a web de REFERENTES e a descargar GRATUITAMENTE todos os materiais audiovisuais e didácticos para aproveitalos co seu alumnado ou grupo de traballo.

O próximo martes 15 de novembro ás 18:00 proxectarase, no marco do Festival Cineuropa, unha selección de curtametraxes creadas polo alumnado do IES de Cacheiras coa interpretación en directo dalgunhas das bandas sonoras por parte do CMUS de Santiago. Trátase de curtametraxes que acadaron máis de 60 premios en festivais de cinema nacionais e internacionais.

O proxecto pedagóxico Aturuxo Films – Imaxinando Músicas cumpre 15 anos desenvolvendo a alfabetización cinematográfica e mediática no IES de Cacheiras e o Conservatorio Profesional de Música de Santiago de Compostela, obtendo numerosos recoñecementos como o 1º Premio Proxecta 2018 da Consellería de Educación ou o Premio Nacional de Boas Prácticas Educativas do Ministerio de Educación 2019.

As entradas son gratuítas e poden adquirirse a través da seguinte ligazón: https://www.compostelacultura.gal/espectaculos/evento/programa-especial-aturuxo-films-imaxinando-músicas.

Ademais, estas curtametraxes estarán dispoñibles na sección do Festival da plataforma FILMIN, un gran recoñecemento á calidade do proxecto e do traballo e talento do alumnado.

Un ano máis, Patrimonio Nacional convoca o Concurso de Pintura Infantil e Xuvenil para centros escolares, cuxo propósito é divulgar os monumentos, palacios e monasterios reais entre a xente nova a través da expresión plástica.

Trátase dun certame cun obxectivo cultural, investigador e docente que pretende achegar os centros educativos á realidade artística e cultural dos Reais Sitios.

Pódese ampliar esta información nos documentos que acompañan esta nova e mais a través da seguinte ligazón: https://www.patrimonionacional.es/concurso-de-pintura-infantil-y-juvenil.

• Data límite de inscrición: 12 de decembro de 2022.
• Data límite de envío das obras: 15 de marzo de 2023.

O pasado 19 de outubro inaugurouse na sede da Fundación Camilo José Cela a exposición "Se acabó el divagar. 80 anos da publicación de La familia de Pascual Duarte", que fai un percorrido pola xénese da primeira novela de Camilo José Cela.

Publicada en decembro de 1942, La familia de Pascual Duarte supuxo unha apertura no estancado panorama literario da España da posguerra. A exposición, que se pode visitar en Iria Flavia, recolle desde o manuscrito da novela ata as cartas da censura (que secuestrou a segunda edición), pasando pola edición en galego feita por Vicente Risco e prologada por Ramón Otero Pedrayo. Así mesmo, móstrase o escritorio no que Cela redactou a obra dende a súa oficina no Sindicato Nacional Textil onde traballaba.

Completan a mostra outros manuscritos, fotografías e obras pictóricas de autores da talla de Antonio Mingote ou Rafael Zabaleta. Sen esquecer a película "Pascual Duarte" do director Ricardo Franco, coa que o seu protagonista, o actor e académico José Luis Gómez, recibiu o premio á interpretación masculina no Festival de Cannes de 1976.

A exposición poderá visitarse ata o 31 de xaneiro de 2023, en horario de luns a venres, de 10.00 a 14.00 h.

O Instituto da Lingua Galega organiza xunto ao Centro de Línguas, Literaturas e Culturas da Universidade de Aveiro as seguintes xornadas de formación na Facultade de Filoloxía da USC:

I Xornada sobre Variación e Cambio Lingüístico, o vindeiro 14 de novembro. O prazo de inscrición estará aberto ata o día 10 de novembro a través ligazón que acompaña o título desta xornada.

Traballando a competencia discursiva na aula. Novos marcos, ferramentas e estratexias, o 18 e 19 de novembro. Esta actividade forma parte da oferta formativa do CAFI para o curso académico 2022/202. O profesorado que desexe asistir ao simposio terá que efectuar a inscrición, ata o 31 de outubro, a través da ligazón www.edu.xunta.es/fprofe (código do curso G2202025). O resto de asistentes poderá formalizar a inscrición cubrindo o formulario que se atopa nesta ligazón ata o día 12 de novembro.

A Fundación Eugenio Granell convida á inauguración da exposición “Pánico no museo. María Meijide” dentro do proxecto de “Artista en residencia” deste ano 2022.

A exposición inaugúrase o vindeiro mércores 26 de outubro ás 19.00h nas salas 4 e 5 da primeira planta.

Con motivo da celebración do Día da Biblioteca Escolar o vindeiro 24 de outubro, a Asociación Española de Amigos do Libro Infantil e Xuvenil, en colaboración con ANELE (Asociación Nacional de Editores de Libros e Material de Ensinanza), achega unha serie de recomendacións de libros, revistas, artigos e páxinas web. Deste xeito, trátase de apoiar e dar a coñecer o importante e necesario labor da Biblioteca Escolar no actual sistema educativo.

A Fundación Endesa convoca por sétimo ano consecutivo os premios á ecoinnovación no ámbito educativo.

Toda a información e as bases do concurso poden ser consultadas no arquivo anexo e mais a través da seguinte ligazón: www.fundacionendesa.org.