O programa educativo Centros de Educación Ambiental facilita o acceso a estadías para o alumnado en centros de educación ambiental situados en zonas de gran interese natural.

O seu obxectivo é propiciar a adquisición de coñecementos, hábitos e condutas que incidan no coidado e mellora da contorna ambiental de maneira sostible, mediante a análise dos problemas derivados da relación do ser humano co medio e a participación en actividades que levan á reflexión, compromiso e actuación responsable cara á contorna para evitar a súa deterioración. Así mesmo, trata de fomentar hábitos de vida saudable e desenvolver un conxunto de valores como a responsabilidade, a perseveranza, o autocoñecemento, o respecto e a autoestima.

Esta actividade terá lugar nos centros de educación ambiental de Villardeciervos (Zamora) e Viérnoles (Cantabria), situados en enclaves naturais onde se ofertarán programas e actividades relacionados coa sostibilidade e a natureza.

A participación é gratuíta e ten unha duración de cinco días. O traslado dos participantes desde o seu lugar de residencia ata os centros de eduación ambiental mais o retorno a Galicia non está incluído nas axudas, polo que correrá a cargo dos/as interesados/as.

• Destinatarios/as: Alumnado de 5º e 6º de Educación Primaria, Educación Secundaria Obrigatoria e Formación Profesional Básica (20-23 grupos). Deberá ir acompañado de profesorado do centro, preferiblemente coa persoa titora (certificándose unha participación de 30 horas).
• Prazo de presentación de solicitudes: Desde o 6 de xaneiro ata o 6 de febreiro de 2023.
• Procedemento: Tramitarase a través da Dirección dos centros educativos, quen deberá facer unha solicitude na sede electrónica do Ministerio de Educación e Formación Profesional. Cada centro debe presentar o seu proxecto educativo con contidos e actividades a desenvolver, cun enfoque innovador e segundo o formato indicado polo Ministerio.
• Información completa e solicitudes a través desta ligazón.

A Federación de Asociacións de Persoas Xordas de Galicia (FAXPG) pon en marcha a sexta edición do seu Concurso Escolar de Cancións en Lingua de Signos Española "Cantamos coas Mans", co obxectivo de dar visibilidade á Lingua de Signos nas aulas dun xeito divertido, a través da música. 

A participación está aberta a todos os centros educativos de Galicia, en todos os niveis de ensinanza.

A través desta ligazón pódese acceder a toda a información, formulario de inscrición e outros documentos relevantes.

Prazo de presentación das obras: 13 de abril de 2023 ás 12.00 horas.

As iniciativas de aprendizaxe sobre a Unión Europea Jean Monnet contribúen a reforzar a identidade europea e a cidadanía activa entre o alumnado e o profesorado. Estas iniciativas están dirixidas a centros escolares e a centros de Formación Profesional (niveis CINE 1 a 4), que poderán ofrecer contidos específicos sobre temas relacionados coa Unión Europea (democracia, historia da UE, funcionamento da UE ou diversidade cultural, entre outros).

As actividades deben desenvolverse durante o curso escolar e poden incluír visitas de estudo e outras actividades de inmersión.

A información sobre os criterios de admisibilidade e concesión, así como as normas de financiamento, atópanse na nesta ligazón.

Prazo de presentación da solicitude de subvención: ata o 14 de febreiro ás 17.00 horas (hora de Bruselas).

O Ministerio de Educación e Formación Profesional abre o prazo de solicitude do distintivo "Sello Vida Saudable", dirixido a todos os centros educativos comprometidos coa mellora da calidade educativa e a promoción da saúde.

Recoñecemento público dos centros docentes, tanto públicos como privados sostidos con fondos públicos e privados, que fomenten a aprendizaxe da saúde no ámbito educativo, así como a asunción de prácticas de vida saudable e unha educación física que permita o adecuado desenvolvemento persoal e social ao longo da escolarización do alumnado.

PRAZO DE PRESENTACIÓN DE SOLICITUDES:
Desde o 1 de xaneiro ata o 28 de febreiro de 2023.

Máis información, instrucións e presentación de solicitudes a través desta ligazón.

O Centro Nacional de Exámenes do Servicio de Cooperación Educativa y Lingüística de la Embajada de Francia organiza un webinario para informar sobre as características das novas grellas de avaliación das certificacións de francés DELF-DALF.

Este webinario terá lugar o mércores 1 de febreiro ás 17.30h e vai dirixido a todo o profesorado de francés interesado.

As inscricións faranse a través do documento anexo, facendo click no botón azul "inscribirse".

A Asociación de Químicos de Galicia, coa colaboración do Colexio Oficial de Químicos de Galicia organiza, o 10 de marzo de 2023, nas sedes da Coruña, Lugo, Santiago, Ourense e Vigo a edición XL desta Olimpíada.

O evento vai dirixido ao alumnado de calquera centro público ou privado da Comunidade Autónoma de Galicia matriculado durante o curso 2022/23 no Bacharelato e que non teña cumpridos dezanove anos o 1 de outubro de 2023. Con carácter excepcional, tamén poderán tomar parte alumnos/as do 2º ciclo da ESO de excelentes capacidades.

As probas, cuxo contido versará sobre aqueles aspectos da Química que estean recollidos no Decreto 86/2015, do 25 de xuño, conterán tanto cuestións tipo test como problemas e interpretación dun suposto práctico de laboratorio.

O prazo para as solicitudes de participación é ata o 3 de marzo de 2023, indicando expresamente en que cidade quere realizar as probas.

Formulario de inscrición

Co gallo do Día Internacional da Muller e a Nena na Ciencia, o Instituto Galego de Física de Altas Enerxías (IGFAE), en colaboración co Grupo Internacional de Divulgación de Física e o  CERN (Organización Europea para a Investigación Nuclear), organizan a IV Masterclass de física de partículas dirixida exclusivamente a alumnas de 1º bacharelato de institutos de Galicia.

Este evento terá lugar na Escola Técnica Superior de Enxeñaría da USC, onde se impartirán unha serie de conferencias introdutorias á Física de Partículas actual e se fará unha práctica por ordenador en grupos con datos reais dun experimento do CERN. Posteriormente, discutiranse os resultados mediante videoconferencia co CERN e outros centros europeos que realicen a xornada simultaneamente. O número de prazas está limitado a 40 e 2 alumnas de 1º de bacharelato por instituto. O/A profesor/a acompañante das estudantes pode asistir e incluso participar activamente na masterclass, se así o desexa.

O prazo de solicitude estará aberto ata o 27 de xaneiro ás 23:59 h. As solicitudes serán atendidas por orde de chegada.

As seguintes ligazóns permiten ampliar a información anterior: Masterclass, Programa, Formulario de inscrición.

O Consello da Cultura Galega acolle as Xornadas "Libros informativos, divulgativos e de coñecemento para a infancia", organizadas por GÁLIX (Asocación Galega do Libro Infantil e Xuvenil), en colaboración con outras entidades educativas.

As ditas xornadas terán lugar o mércores 25 e o xoves 26 de xaneiro, así como o seguinte mércores 1 de febreiro, en horario de 17:00 a 20:00 horas. Existe a posibilidade de asistir de forma presencial e, ademais, serán retransmitidas en directo a través da canle de Youtube de GÁLIX.

Trátase dunha actividade de 9 horas con posibilidade de certificación, na que o profesorado se pode inscribir a través de FPROFE (código G2202035).

Pode consultarse toda a información sobre este evento no cartel anexo.

A Xunta vén de convocar os Premios Escolares Innovaugas 2022 para incentivar a educación ambiental entre as persoas máis novas arredor da utilización da auga e a preservación do medio natural.

Esta iniciativa propón a elaboración dunha peza audiovisual dunha duración entre 15 segundos e 1 minuto, pensada para difundir a través das redes sociais e que pode empregarse como un recurso máis para incentivar a curiosidade do alumnado por adquirir novos coñecementos e pola aprendizaxe de novos contidos relacionados coa auga.

• Alumnado destinatario: 1º e 2º de Educación Primaria.
• Prazo de presentación: ata o 31 de xaneiro de 2023.
• Premios: 3.000 € para o equipo gañador de cada provincia e un bidón de auga fabricado con plástico reciclado para todas as persoas integrantes dos equipos finalistas.

Premendo nas seguintes ligazóns pódese acceder á nova completa e á publicación da convocatoria no DOG, onde se poden consultar todas as bases do concurso.