Equipo directivo

Tras ser publicadas pola Consellería as instrucións precisas para a volta ao centro o grupo de 2º de Bacharelato e a reanudación da actividade presencial, informamos ao alumnado das pautas que deben seguir no centro. Por outra banda, lembrar que non hai transporte escolar.

As clases comezarán xa o luns, día 25, ás 8:30. O horario será o habitual.

As devanditas PAUTAS recollidas no protocolo que tedes dispoñibles nesta publicación para descargar e imprimir son as seguintes:

• O alumnado que teña os síntomas da COVID 19 ou febre, absterase de vir ao centro. Se os sentise unha vez estado no centro, avisará inmediatamente ao profesorado ou ao Equipo directivo.
• A entrada e a saída no centro e nas aulas ha ser en fila de un en un e gardando a distancia de dous metros.
• Á entrada no centro entregarase cada día unha máscara a cada alumno/a. A máscara é obrigado tela posta en todos os movementos que se fagan polo centro. Só se poderá non tela posta durante as clases, sempre e cando esteamos sentados no noso pupitre como mínimo a dous metros dos/as compañeiros/as.
• Unha vez que se saia do centro non se poderá volver a acceder ata o día seguinte, a non ser ao finalizar o recreo.
• O alumnado ocupará sempre o mesmo sitio dentro da aula.
• Extremarase a orde do alumnado tanto nas clases, cada un/unha sempre na súa e mesma cadeira, coma no material ben recollido riba da mesa. Ningún libro nin material poderá quedar no centro dun día para outro.
• Hixiene de mans nas entradas a calquera estancia do centro ou cambio de aula. A tal efecto, en todas as estancias que estea permitido entrar hai xunto á porta un dispensador de hidro alcohol desinfectante para as mans.
• Cando usemos os aseos, lavaremos as mans con xabón ao menos durante 40 segundos.
• Cada alumno/a procederá á desinfección do seu pupitre e cadeira e resto de material empregado ao marchar ou cambiar de aula, sempre.
• Non se pode compartir material de uso propio con ningún/ha dos compañeiros/as.
• O alumnado debe permanecer nos seus sitios durante o cambio de clase, salvo que vaia tamén cambiar de aula. Poderá erguerse e estirarse, pero non abandonar o seu sitio.
• Se tivese que saír ao encerado para facer algún exercicio ou manipular algún dos elementos comúns da aula, procederá a lavarse as mans co xel hidro alcólico, ao inicio e ao rematar e tanto profesorado como alumnado respectarán a distancia de seguridade
• Durante o recreo procederase como durante o curso, poderase saír ao patio, ir á biblioteca ou saír do recinto. Segundo reza nas Normas de Organización e Funcionamento do Centro “ Os alumnos/as de Bacharelato poderán abandonar o centro nos recreos se son maiores de idade ou contan coa correspondente autorización paterna.” Sempre coa máscara e hixienizando as mans á saída e á entrada.
• Non se pode permanecer nos corredores. O desprazamento polo centro reducirase ao mínimo.

 Nas seguintes ligazóns poden acceder ao protocolo do centro e ás instrucións publicadas pola Consellería.

• Protocolo para o alumnado do IES do Camiño 
• Resolución, do 22-05-2020, da Consellería de Educación, Universidade e Formación Profesional, pola que se reinicia a actividade lectiva presencial no curso 2019/20, se determinan as instrucións para o que resta do presente curso e se adoptan medidas de prevención e hixiene para a reapertura parcial nos centros de ensino non universitario dependentes da Consellería. 

Os principais puntos a ter en conta son os seguintes: 

• Asignación de libros e contía das axudas (artigo 2)

Efectuarase por orde inversa á renda per cápita, e con preferencia para o alumnado en situación de garda ou tutela da Xunta de Galicia ou cunha discapacidade igual ou superior ao 65 %, con independencia da renda.

En todo caso a orde garante que:

a) O alumnado con renda per cápita familiar igual ou inferior a 6.000 € recibirá seis libros de texto.

b) O alumnado con renda per cápita familiar superior a 6.000 € e igual ou inferior a 10.000 € recibirá catro  libros de texto.

c) O alumnado en situación de garda ou tutela da Xunta de Galicia ou cunha discapacidade igual ou superior ao 65 % recibirá seis  libros con independencia da renda.

Alumnado con necesidades específicas de apoio que non usa os libros de texto do curso no que está matriculado. Previo informe do centro poderá recibir un vale de 240 € (renda per cápita familiar igual ou inferior a 6.000 € ou alumnado en situación de garda ou tutela da Xunta de Galicia cunha discapacidade igual ou superior ao 65 %) ou 160 € (renda per cápita familiar superior a 6.000 € e igual ou inferior a 10.000 €).

• Obriga das persoas beneficiarias (artigo 5)

Conservar e devolver os libros de texto e o material reutilizable recibidos o curso anterior. A falta de devolución será causa de exclusión da participación no fondo solidario e das axudas para adquirir libros de texto e material escolar no curso 2020/21.

• Presentación de solicitudes (artigo 10)

As solicitudes presentaranse preferiblemente por vía electrónica nos formularios normalizados dispoñibles na aplicación informática Fondolibros (https://www.edu.xunta.gal/fondolibros) a través da sede electrónica da Xunta de Galicia, https://sede.xunta.gal.

Opcionalmente, poden presentarse nos centros docentes ou en calquera dos lugares e rexistros establecidos na normativa reguladora do procedemento administrativo común.

A solicitude deberá estar asinada pola nai, pai, titor/a ou representante legal do alumnado.

• Prazos  

O prazo para presentar solicitudes é do 20 de maio ao  19 de xuño de 2020 (art. 11)

O prazo máximo para devolver os libros do presente curso (2019/20)  será o 7 de xullo 2020, agás para o alumnado que teña algunha materia pendente, que poderá quedarse co libro correspondente ata que se examine e, como máximo, ata o 7 de setembro de 2020. (art. 16)

O centro entregará os libros para o próximo curso 2020/21  a partir do 16 de setembro de 2020 e, en todo caso, antes do 25 de setembro. (art. 22)

O fondo solidario de libros de texto está integrado polos libros adquiridos coas axudas do curso anterior e polos libros voluntariamente cedidos polo alumnado.

A doazón dos libros de texto que xa non precises é beneficiosa para os alumnos e alumnas que si os necesitan. 

Se non é posible entregar as SOLICITUDES POR VÍA TELEMÁTICA poderedes ACUDIR AO INSTITUTO para recoller e entregar a SOLICITUDE, non obstante non esquezas:

• Horario do centro de 9:30 a 13:30
• Acceder ao instituto con mascarilla e traer o teu propio bolígrafo. 

Máis INFORMACIÓN nos seguintes enlaces: 

Para dar cumprimento ás Instrucións do 27 de abril de 2020, da Dirección Xeral de Educación, Formación Profesional e Innovación Educativa para o desenvolvemento do terceiro trimestre do curso académico 2019/20, nos centros docentes da Comunidade Autónoma de Galicia, publícase este documento de ADAPTACIÓN DAS PROGRAMACIÓNS DIDÁCTICAS para este devandito terceiro trimestre.

A avaliación do alumnado de 2º de Bacharelato será o día 8 de xuño e a entrega de notas o día 9 ás 10:30, ben a través da entrega dos boletíns de notas ou ben a través do servizo Abalar no que poderán consultar as súas cualificacións.

Así mesmo na aula virtual, no apartado de orientación, o alumando de 2º de Bach. ten á súa disposición o calendario das ABAU 2020 e o horario da convocatoria ordinaria de xullo, modificado como consecuencia da situación excepcional provocada polo COVID -19.  

O 27 de abril a Consellería de Educación publicou unhas instrucións a seguir para o 3º trimestre deste curso 2019/20. Os centros e o profesorado teñen que adaptar as programacións e flexibilizar as aprendizaxes e os criterios de avaliación, promoción e titulación. Para a semana poñeranse na páxina web do centro e noutros medios as concrecións das adaptacións coas flexibilizacións devanditas. As liñas fundamentais son estas:

1.     Flexibilización dos criterios de avaliación, promoción e titulación. A criterio do equipo docente poderase pasar de curso ou titular, tanto na ESO coma no Bacharelato, con algunha materia suspensa.

2.     A repetición de curso será excepcional. A decisión tomaraa o equipo docente de xeito colexiado e argumentada. O alumnado terá que matricularse das suspensas no seguinte curso se promocionase con algunha/as.

3.     A nota deste curso estará baseada nas dúas primeiras avaliacións. As actividades feitas na 3ª poderán redondear a nota, pero sempre á alza, nunca baixala.

4.     As aprendizaxes céntranse no repaso, recuperación e reforzo, sobre todo para quen teña algunha das avaliacións anteriores suspensa, que deberá recuperar segundo a programación de cada departamento. Poden ampliarse as aprendizaxes imprescindibles para asentar os contidos da 1ª e 2ª avaliación, pero non para seren avaliadas negativamente.

5.     Quen teña materias pendentes do curso pasado, ten que estar atento e en contacto co profesorado correspondente.

Máis información no seguinte enlace ás: 

• Instrucións do 27 de abril de 2020, da Dirección Xeral de Educación,Formación Profesional e Innovación Educativa para o desenvolvemento do terceiro trimestre do curso académico 2019/20, nos centros docentes da Comunidade Autónoma de Galicia.

Restablecese o prazo para a presentación das solicitudes de admisión de alumnado en centros docentes sostidos con fondos públicos, polo tempo que restaba cando se declarou o estado de alarma.

PROCEDEMENTO ORDINARIO DE ADMISIÓN:  

• Acceso por primeira vez a un centro: o procedemento de admisión  aplicarase ás alumnas e aos alumnos que accedan por primeira vez aos centros docentes sostidos con fondos públicos.
• Nos centros públicos que ofrezan varias etapas educativas o procedemento inicial de admisión realizarase ao comezo da que corresponda á de menor idade.
• A variación de curso, ciclo ou etapa non requirirá un novo procedemento de admisión, agás que coincida cun cambio de centro, sen prexuízo do establecido para os centros docentes adscritos.

PRAZO: do 11 ao 18 maio, ámbolos dous incluídos. 

Así mesmo establécense novos PRAZOS neste PROCEDEMENTO, que son os seguintes: 

• Presentación da documentación acreditativa dos criterios de baremo: ata o día 26 de maio de 2020.
• Publicación das listaxes provisionais do alumnado admitido e non admitido: antes do 9 de xuño de 2020.
• Poderanse formular reclamacións contra as listaxes provisionais no prazo de 3 días hábiles contados desde o seguinte ao da súa publicación.
• Publicación das listaxes definitivas do alumnado admitido e non admitido: ata o 26 de xuño de 2020.
• Formalización da matrícula en educación infantil e primaria: do 1 ao 10 xullo de 2020.
• Formalización da matrícula ordinaria en educación secundaria obrigatoria e bacharelato: do 1 ao 10 xullo. Prazo extraordinario: do 1 ao 10 de setembro de 2020.

LUGAR DE PRESENTACIÓN:

• Na secretaria do instituto 
• A través da aplicación «admisionalumnado» (https://www.edu.xunta.es/admisionalumnado) mediante o formulario normalizado (ED550A) que se publica como anexo I. 

HORARIO DO CENTRO: de 9:30 ás 13:30 horas.

Máis información nos seguintes enlaces:

• Resolución do 7 de maio do 2020: Restablecemento do procedemento de admisión.
• Anexo I.
• Anexo II.
• Anexo II (bis).
• Anuncio do sorteo público anual das letras de prioridade. 
• Resultado do sorteo anual de letras de prioridade no procedemento de admisión.

Hoxe 1 de maio é o Día do Traballador e da Traballadora. Celébrase este día porque é a conmemoración do movemento obreiro mundial. É unha xornada que se utilizou habitualmente para realizar diferentes reivindicacións sociais e laborais a favor das clases traballadoras por parte, fundamentalmente, dos movementos anarquistas e comunistas, entre outros.

Desde o seu establecemento na maioría de países por acordo do Congreso Obreiro Socialista da Segunda Internacional, celebrado en París en 1889, é unha xornada de loita reivindicativa e de homenaxe aos Mártires de Chicago. Estes sindicalistas anarquistas foron executados en Estados Unidos por participar nas xornadas de loita pola consecución da xornada laboral de oito horas, que tiveron a súa orixe na folga iniciada o 1 de maio de 1886 e o seu punto álxido tres días máis tarde, o 4 de maio, na Revolta de Haymarket. A partir de entón converteuse nunha xornada reivindicativa dos dereitos dos traballadores e traballadoras. 

Este ano Rocío, do Centro Pedagóxico Aloumiño de Palas de Rei,  propúxonos participar nun proxecto enriquecedor  e interdisciplinar, no que se puxeran en valor as diferentes profesións que hoxe máis que nunca non poden parar de traballar, así profesións que ata o momento non se lles daba o valor e a relevancia que teñen na nosa sociedade, coa situación que estamos a vivir, ponse de manifesto que son tan relevantes e fundamentais como o resto.

 Ademais esta idea que nace e é promovida por unha veciña de Palas de Rei que aposta por traballar e vivir no rural,  consegue aunar nun vídeo sentimentos, emocións, ilusións, traballo …da xente da comarca da Ulloa. É fundamental defender o noso, o noso país e poñelo en valor a través de iniciativas coma esta.

 Grazas Rocío por facer ao instituto partícipe desta iniciativa que, nestes momentos, é esencial para dar alento e esperanza a xente que tan necesitada está pola situación tan extraordinaria que estamos a vivir.  

 E para rematar que mellores verbas que as de Celso Emilio Ferreiro:

Monólogo do Vello Traballador 

Agora tomo o sol. Pero até agora
traballei cincoenta anos sin sosego.
Comín o pan suando día a día
nun labourar arreo.
Gastei o tempo co xornal dos sábados,
pasou a primavera, veu o inverno.
Dinlle ao patrón a frol do meu esforzo
i a miña mocedade. Nada teño.
O patrón está rico á miña conta,
eu, á súa, estou vello.
Ben pensado, o patrón todo mo debe.
Eu non lle debo
nin xiquera iste sol que agora tomo.
Mentras o tomo, espero.

Celso Emilio Ferreiro (1978) Longa noite de pedra en Obra completa, 

A resolución do 23 de abril de 2020, da Dirección Xeral de Educación, Formación Profesional e Innovación Educativa, pola que se adoptan medidas excepcionais no desenvolvemento das ensinanzas de formación profesional do sistema educativo e nas ensinanzas de réxime especial, ten por obxecto establecer medidas excepcionais en materia de ordenación e organización nas ensinanzas de formación profesional e nas ensinanzas de réxime especial, en desenvolvemento e aplicación das medidas de contención no ámbito educativo e de formación previstas no Real decreto 463/2020, do 14 de marzo, polo que se declara o estado de alarma para a xestión da situación de crise sanitaria ocasionada polo COVID-19, en centros educativos do ámbito de xestión da Comunidade Autónoma de Galicia durante o curso 2019-2020. 

Ante a situación de excepcionalidade e para os efectos de lle facilitar ao alumnado a realización do módulo de Formación en Centros de Traballo (FCT), flexibilízanse as condicións xerais do seu desenvolvemento. 

Así se establece que para realización da FCT no período ordinario, os centros educativos poderán nos ciclos de grao medio e de grao profesional básico, substituír a Formación en centros de traballo por unha proposta de actividades asociadas á contorna laboral, segundo o modelo do anexo I que aparece na resolución do 23 de abril de 2020. 

Actividades asociadas á contorna laboral nos ciclos de grao medio, nos ciclos de FP básica e nos programas formativos 

As actividades asociadas á contorna laboral consistirán na realización dun proxecto, programa ou plan recollido nun documento, que ten por finalidade a integración efectiva dos aspectos máis salientables da competencia xeral, e as competencias profesionais, persoais e sociais integradas no perfil profesional, e desenvolvidas nos restantes módulos do título ou programa formativo, partindo dos resultados de aprendizaxe e dos criterios de avaliación do módulo de FCT. Nos ciclos de FP básica soamente se terán en conta os módulos asociados ás unidades de competencia. 

O documento elaborarase de acordo coas características da contorna profesional do ciclo formativo, tendo en conta a prospectiva do título no sector ou nos sectores produtivos en que que se insire, as funcións propias de cada tipo de persoal técnico, e os elementos tecnolóxicos e organizativos que afectan as ocupacións e os postos de traballo desenvolvidos polos/as diferentes profesionais. No caso dos ciclos de grao medio, poderanse incluír o tratamento dos elementos relacionados coa xestión empresarial, as oportunidades de negocio e o desenvolvemento sustentable e equitativo. En todo caso, consideraranse os elementos esenciais da seguridade e A saúde laboral, a avaliación dos posibles riscos profesionais no desempeño das ocupacións, a planificación da prevención de riscos nos centros de traballo e a aplicación de medidas de prevención e protección nos postos de traballo. 

Para a elaboración do documento, poderanse utilizar como referente os modelos de guións que se detallan a continuación ou optar por outro. En calquera caso, o equipo docente deberá flexibilizar a súa elaboración e adaptar o seu contido ás circunstancias, ás características e ás capacidades do alumnado, e ás particularidades do ciclo ou do programa formativo. 

• MODELOS DE GUIÓN

Modelo A. Destinado a alumnado de ciclos de grao medio ou de FP básica 

Poderanse incluír soamente algúns dos apartados ou subapartados. 

1. Descrición das características dos sectores produtivos integrados no perfil profesional do ciclo ou programa. Poderá incluír: 

a) Características específicas dos sectores económicos vinculados en relación coa súa contorna económica. 

b) Estrutura e dimensión das empresas ou actividades produtivas. 

c) Ocupacións ou postos de traballo máis representativos. 

d) Evolución na formación dos/das traballadores/as en relación aos cambios tecnolóxicos e de planificación no sector. 

e) Influencia da tecnoloxía dixital nas empresas. 

f) Determinación dos puntos fortes e débiles do sector ou dos sectores produtivos.  

2. Identificación das necesidades dos sectores produtivos en relación co proxecto seleccionado. Poderá incluír:

a) Identificación dos produtos ou servizos máis demandados no ámbito dese actividade económica. 

b) Selección de posibles oportunidades para o desenvolvemento futuro das actividades produtivas do sector ou dos sectores. 

c) Indicación de se o proxecto trata de resolver unha necesidade detectada ou se centra nunha actividade propia do sector. 

d) Proposta dalgunha innovación, novos produtos ou servizos, ou forma de ofrecelos. 

e) Planificación dos recursos necesarios para acometer o plan. 

f) Valoración da viabilidade técnica, legal e económica do proxecto formulado (só nos ciclos de grao medio). 

g) Xustificación do proxecto seleccionado. 

3. Desenvolvemento. Dependendo da temática que se trate, poderá incluír: 

a) Definición e elaboración, de ser o caso, da documentación necesaria para o proxecto. 

b) Identificación da necesidade de autorización ou permisos para as actividades planificadas. 

c) Coordinación da execución con outros equipos de traballo. 

d) Planificación e control dos procesos ou dos servizos. 

e) Secuenciación das actividades que se vaian desenvolver. 

f) Identificación dos principais riscos laborais asociados á actividade e da súa solución. 

g) Recoñecemento dos dereitos e das obrigas de empresarios/as e traballadores/as en relación coa seguridade e a saúde laboral. 

h) Plan de igualdade entre homes e mulleres. 

i) Aplicación de medidas en relación ao respecto polo ambiente. 

j) Establecemento dos mecanismos de seguimento e control da execución do proxecto. 

k) Deseño dos mecanismos de corrección de posibles erros e desviacións. 

4. Conclusións e reflexión final. 

Modelo B. Destinado principalmente a alumnado de ciclos de FP básica ou programas formativos 

Poderanse incluír soamente algúns dos apartados ou subapartados. 

1. Descrición das características dos sectores produtivos integrados no perfil profesional do ciclo ou programa. Poderá incluír: 

a) Características específicas dos sectores económicos vinculados en relación coa súa contorna económica. 

b) Estrutura e dimensión das empresas ou actividades produtivas. 

c) Ocupacións ou postos de traballo máis representativos. 

d) Evolución na formación dos/das traballadores/as en relación aos cambios tecnolóxicos e de planificación no sector. 

e) Influencia da tecnoloxía dixital nas empresas. 

f) Determinación dos puntos fortes e débiles do sector ou dos sectores produtivos. 

2. Desenvolvemento de supostos prácticos relacionados cos resultados de aprendizaxe e cos criterios de avaliación, relativos ás actividades que o alumnado debe realizar en situacións reais nos centros de traballo. 

3.Conclusións e reflexión final. 

Orientacións pedagóxicas para as actividades asociadas á contorna laboral 

Atendendo ás circunstancias, ás características e ás capacidades do alumnado, e ás particularidades do ciclo ou programa formativo, fomentarase e valorarase o seguinte: 

1. Creatividade, autonomía e iniciativa persoal, espírito crítico e capacidade de innovación nos procesos realizados. 

2. Inclusión de elementos transversais do currículo dos ciclos ou dos programas formativos: 

a) Respecto polo ambiente. 

b) Igualdade efectiva entre homes e mulleres. 

c) Prevención de riscos profesionais. 

d) Non discriminación por ningunha condición ou circunstancia persoal nin social, nomeadamente en relación cos dereitos das persoas con discapacidade, etc. 

3. Tratamento de: 

a) Responsabilidade social e a súa conciliación cos obxectivos do desenvolvemento sustentable. 

b) Economía circular. 

c) Economía social. 

d) Desenvolvemento de aspectos que incidan na mellora das desigualdades demográficas existentes en Galicia ou que impulsen a Galicia rural. 

4. Uso das TIC. 

5. Utilización de: 

a) Documentación teórica auxiliar: bibliografía, planos, manuais de uso, guías, páxinas web de referencia, apuntamentos breves e lexislación

b) Distintos soportes documentais: vídeos, presentacións, elementos multimedia, etc. 

A avaliación das actividades asociadas á contorna laboral poderase complementar cunha entrevista profesional estruturada. 

Podedes acceder á resolución no seguinte enlace:

• Resolución do 23 de abril do 2020 

Ademais tedes a información colgada na aula virtual no apartado de orientación.