A profesora do IES Agra de Raíces, María Chao, especialista en Pedagoxía Terapéutica, desenvolveu ao longo do presente curso diversas actividades que fomentan o traballo a prol da igualdade no eido educativo e cultural, centrándose especialmente na importancia do emprego dunha linguaxe inclusiva.
Tal e como refire María nas súas clases, a diversidade persoal, social e académica é unha realidade tanxible nas nosas aulas. Polo tanto, os docentes debemos dar resposta a esta situación a través da multiplicidade dos sistemas de comunicación existentes, combinando a linguaxe verbal co poder evocador das imaxes. Neste sentido, a utilización de pictogramas constitúe unha ferramenta de grande utilidade á hora de transmitir información e transformar tanto as palabras como o noso imaxinario social en manifestacións nucleares, icónicas e reais.
Por iso, María Chao e o seu alumnado de 1º ESO deseñaron dúas actividades de índole audiovisual que potencian a creatividade, a plasticidade, o poder suxestivo da música e a literatura coa comunicación emocional e multifuncional. A primeira delas é a recreación do relato infantil “Por cuatro esquinitas de nada”, no que acadan un papel protagonista os seus narradores principais (Xoel Domínguez e Daniel Louro, de 1º ESO B), apoiados polas voces corais dos seus compañeiros: Ainoa Liñeiro, Lucas Martínez, Lucía Canosa, Nahomy Montoya, Noemí Peña, Nuria Riveiro, Pablo Caamaño, Xoel Durán, Yeray Berbia e Yzan Caamaño (todos eles de 1º ESO B).
A peza, reelaborada con profunda tenrura, achega ao noso alumnado ás raíces da amizade, a aceptación, a superación, a autoestima, o respecto polas diferencias e atención á diversidade.
Parabéns a María e a todos os alumnos que colaboraron con ela por plasmar con extrema delicadeza e fonda sensibilidade a tristura inicial de Cuadradito, a empatía dos seus amigos, a frustración, o medo…; pero tamén o valor da integración e a inclusión. Grazas, ademais, por convidarnos a experimentar os sentimentos do seu protagonista e animarnos a preguntarnos se, ás veces, non esiximos transformacións e esforzos absurdos ou imposibles, no canto de adaptar a contorna ás súas necesidades.
