O noso alumno Mateo Pérez acadou hoxe un dobre galardón que se suma aos múltiples recoñecementos obtidos nos últimos tempos e derivados da extraordinaria calidade do seu traballo. Non só se converteu no gañador da Olimpíada de Química (celebrada o pasado 18 de marzo) na demarcación da Coruña, senón que lidera tamén a clasificación xeral correspondente á totalidade do ámbito autonómico. Mateo ocupa, polo tanto, o primeiro posto de entre os 126 candidatos que competiron na Olimpíada galega de Química. A esta distinción hai que engadir un éxito semellante na recente Olimpíada de Física, onde logrou tamén a medalla de ouro. Estes resultados garántenlle a participación directa na fase nacional das dúas disciplinas: a de Física, que terá lugar o vindeiro 29 de abril, e a de Química, que se celebrará o 8 de maio.
Trátase dunha dobre victoria sen precedentes na historia do noso centro, que o IES Agra de Raíces vive con emoción, pero tamén cunha infinita confianza depositada nas elevadísimas capacidades de Mateo, na súa incansable forza de vontade, na súa destreza para aplicar os coñecementos adquiridos a situacións completamente novas e no aplomo co que se enfronta a cada reto.
O resultado das probas de Química chegou ao IES Agra de Raíces de súpeto, no transcurso da última clase da mañá, que se viu interrompida por unha interminable ovación, exultantes vítores e efusivas felicitacións de todos os alumnos de 2º Bacharelato. Os estudantes das dúas aulas festexaron con verdadeira ledicia o trunfo de Mateo, que vai moito máis alá do plano académico. A brillantez indiscutible que demostra en cada materia extrapólase tamén aos ámbitos persoal e social. Mateo é extraordinariamente querido polos seus compañeiros debido á súa amabilidade, xenerosidade, camaradería e humildade. Todos os que o coñecemos estabamos seguros de que este ansiado primeiro posto chegaría, agás el mesmo, que contempla cada desafío conseguido coa sorpresa e a candidez de quen loita por todo, pero non espera nin dá nada por sentado.
Os parabéns do centro fanse tamén extensibles á nosa compañeira e xefa do departamento de Física e Química, María José Pena, que dedicou longas horas de traballo á formación, preparación e seguimento de Mateo en ambas disciplinas. Os dous lograron construír un vínculo sumamente estreito que se viu aínda máis solidificado polas cualidades que comparten. A seriedade que María José imprime ao seu traballo, a procura da excelencia, a súa sistematicidade á hora de pensar e actuar e a calidade que se autoesixe a diario fronte aos seus alumnos entroncaron directamente co entusiasmo, o esforzo e o talento de Mateo.
Parabéns aos dous por este éxito dobre, tan merecido, porque, como dicía Baltasar Gracián, saber e saber demostralo, con tesón e humildade, é valer dúas veces.
