Di un coñecido aforismo do refraneiro popular que cando o esforzo se converte nun hábito, os éxitos transfórmanse nunha constante. Parece axeitado recordalo neste momento, no que o noso alumno Mateo Pérez se alza coa medalla de ouro na fase nacional das Olimpíadas de Física, celebradas o pasado 29 de abril, e compite hoxe polo mesmo galardón na modalidade de Química.
Aos seus compañeiros e a toda a comunidade educativa do IES Agra de Raíces esgótansenos por momentos as verbas para expresar a admiración e o orgullo que sentimos, non estritamente polos logros de Mateo, senón sobre todo pola perseveranza que se atopa detrás deles. Dicía Joseph Addison que, para acadar o éxito persoal no ámbito anhelado por cada un de nós, debiamos facer da perseveranza o noso amigo da alma, da experiencia o noso máis sabio conselleiro, da prudencia o noso irmán maior e da esperanza o noso xenio gardián. Todos eses atributos acompañaron a Mateo ao longo destes meses de traballo incansable, que están próximos a rematar cunha recompensa directamente proporcional ao seu esforzo, rozando case o que parecía imposible nun primeiro momento, como as cometas de John Neal que se elevan cada vez máis alto cando se desprazan contra e non a favor do vento. Parabéns, Mateo, por acadar ese soño que compartimos todos contigo.
Felicidades tamén a María José Pena por saber trasladar coñecementos, experiencia, método e rigor; pero tamén por converter a Mateo nun buscador que crece, aprende e descobre, no transurso do camiño, que el mesmo é o principal artífice e creador do que lle sucede; por animalo nos momentos de cansazo, por ensinarlle a ser feliz co que tiña mentres traballaba por lograr o que quería e por recordarlle, nos instantes de esgotamento, que nunca unha noite venceu a un amencer.