IES Xoán Montes

Un aguerrido grupo de estudantes de 2º e 4º ESO, comandado polo incansable profesor de Tecnoloxía Gerardo, completou o Camiño de Santiago o pasado 14 de maio. Tamén participaron Marta Coria, profesora de Xeografía e Historia do centro, e Luis Camilo Fernández director do CPI de Meaño.

Foi todo un reto camiñar os 101 quilómetros que separan Lugo de Santiago polo Camiño Primitivo en dúas xornadas e media. Noraboa polo esforzo!

Velaquí algunhas imaxes da aventura:

Chegada á Praza do Obradoiro

O alumnado de 1º BAC de Historia do Mundo Contemporáneo visitou no mes de maio o Museo Provincial de Lugo. 

A sala do tesouro, cos torques e arracadas, foi a que máis lles sorprendeu. Tamén desfrutaron de distintos obxectos decimonónicos realizados en materiais exóticos: abanos, reloxos, útiles de fumar, etc.

Ademais, contemplamos obras de distintos autores destacados como Xulia Mingullón, Castelao, Maruja Mallo, Laxeiro ou Seoane. As esculturas de Francisco Asorey (Ofrenda a San Ramón e San Francisco) tamén chamaron a atención do alumnado.

Alumnado no Museo Provincial de Lugo. Marta Coria. CC BY-SA

O alumnado de 1º BAC de Economía tivo a ooportunidade de visitar a planta de producción de Pull&Bear que se atopa en Narón, próxima a Ferrol.

Coñecimos en primeira persoa todo o proceso de producción dende que se deseña unha prenda ata que se distribúe cara ás distintas tendas no mundo. Visitamos a planta de almacenaxe e de distrubución. Chamounos moito a atención a automatización deste espazo, con numerosos robots que distribúen os produtos en caixas nos silos, cintas mecánicas e foso por medio da lectura de códigos QR.   

Na segunda parte da visita explicáronnos todo o proceso de deseño das prendas e o estudo de mercado, así como os distintos equipos de produción (xefe/a, deseñadores, deseñadores gráficos e proveedores).

Visitamos a fábrica de Pull&Bear. Marta Coria. CC BY-SA

O pasado luns 17 de abril tivemos un encontro na Biblioteca. 

Emma Pedreira, filóloga, poeta e escritora, trouxo  “A maleta azul dos libros raros”. Dela saíron libros redondos, panos, barallas, casas, miniaturas… que nos abríron os ollos á posibilidade de contar historias nun sin fin de formatos. Ás veces, non son necesarias as palabras, só a capacidade de ler. Os obxectos poden relatarnos as lembranzas da familia, formas de vida (pensemos nese libro-casa tan marabilloso!) doutras culturas e tempos, épocas de represión, de liberdade, cartas-poesía, de amor… En definitiva, a demostración de que calquera peza, non só os libros, poden conlevar un relato, en moitas ocasións subxectivo. E todo isto metido dentro dunha maleta!

Moitas grazas, Emma.

Alumnado con Emma Pedreira na biblioteca. Meri García.

A semana pasada tivemos a sorte de contar cunha visita moi especial! Dúas integrantes da plantilla do Ensino Lugo CB achegáronse ao IES Xoán Montes para compartir con nós a súa experiencia deportiva e transmitir hábitos de vida saudable.

Por unha banda, a base lucense Esther Castedo, contounos a súa experiencia como xogadora na selección española e o seu retorno a Lugodespois de catro anos na liga universitaria de Estados Unidos (a NCAA).

Por outra, Catarina Pollini, explicounos a súa traxectoria dende xogadora na súa cidade natal Vicenza, o seu paso pola selección italiana ata ao papel de manager na actualidade do equipo lucense Ensino.

Un pracer coñecer de preto a estes dous grandes exemplos do deporte.

Esther Castedo compartindo a súa experiencia deportiva. Marta Coria. CC BY-SA