Volven, na súa cuarta edición, os Encontros con exalumnado. Dezaseis exalumnas/os volven a casa varios anos despois para baleirar a mochila e compartir experiencias, erros, acertos, incertidumes e, en definitiva, o camiño percorrido desde que abandonaron o instituto ata hoxe. O seu público, claro está, será o actual alumnado de 2º Bacharelato; a eles/as falarán, para guialos ou botar luz sobre as súas dúbidas, estudantes que hai non tanto estiveron aquí, nestas aulas, nestes pupitres e neste curso tolo no que agroman de súpeto tantos retos, eleccións e camiños por vivir.

O vindeiro martes 14 será o turno do exalumnado e alumnado de Ciencias, e o xoves 16 será a quenda dos de Ciencias Socias e Humanidades. Hora e media de encontro entre xeracións para compartir experiencias en ciclos, graos, erasmus, másters, prácticas ou incluso no mundo profesional. 

Comeza o proceso de admisión de alumnado en centros escolares sostidos con fondos autonómicos para o curso 2023/24, regulado pola Orde de 21 de outubro de 2022 e co seguinte calendario:

• Do 15 de xaneiro ao 4 de febreiro de 2023: prazo de reserva para o alumnado que finaliza etapa nun centro e pasa a outro.
• 22 de febreiro de 2023: publicación da listaxe de alumnado con posto reservado.
• Antes do 1 de marzo: sorteo público para os efectos de desempate.
• Do 1 ao 20 de marzo de 2023: prazo de solicitude de reserva para o alumnado que se incorpora por vez primeira ao sistema educativo galego ou para os que cambian de centro de maneira voluntaria.
• 25 de abril de 2023: publicación da listaxe provisional de admitidos. Cinco días hábiles para formular reclamacións a partir do día seguinte da súa publicación. 
• 15 de maio de 2023: publicación da listaxe definitiva de admitidos.
• 23 de xuño a 7 de xullo de 2023: unha vez admitido, prazo de formalización de matrícula.

Podes acceder a TODA A INFORMACIÓN DO PROCEDEMENTO na nosa web premendo AQUÍ, no taboleiro da Secretaría do centro ou a través da aplicacion admisiónalumnado.

Benvidos á nova páxina web do noso IES. Nova estrutura, formato e contidos para adaptala aos novos tempos e necesidades, e cos que agardamos se convirta en orgulloso lugar de encontro e de servizo para toda a comunidade educativa do noso centro. Nestes primeiros días, como é lóxico, estaremos aínda facendo axustes, pero desde xa mesmo convidámosvos a navegar por ela segundo os vosos intereses e roles. Desexamos que vos resulte atractiva, intuitiva e útil, e que vos ilusione tanto como a nós.

Na Benvida, contámosvos un pouco máis.

Hoxe comeza o primeiro período de reparto de froita fresca e leite deste curso. Dende hoxe e ata o venres 2 de decembro repartirase froita fresca nos recreos, que estará dispoñible na entrada do centro. No caso do leite, período de reparto estenderase ata o mércores 21 de decembro.

Á comunidade educativa do noso IES:

Corresponde no curso 2022/23 efectuar a renovación dos consellos escolares dos centros sostidos con fondos públicos. No IES San Paio toca levar a cabo renovación parcial de membros nos seguintes sectores: profesorado, nais/pais e alumnado.

Mediante esta circular, enviada tamén a través de Abalar, comunícase a data e hora do sorteo público para a elección dos membros da Xunta Electoral, que serán os responsables de organizar e supervisar o procedemento de elección dos novos membros do Consello Escolar do noso IES. O sorteo terá lugar o VENRES 28 DE OUTUBRO DE 2022, ÁS 12.25 h, na sala de profesorado, e designarase unha persoa titular e outra suplente por cada sector (profesorado, nais/pais, alumnado e persoal non docente). O mesmo día 28 publicaranse os resultados.

Pode consultarse a circular completa de comunicación da data e hora do sorteo, e toda a información do proceso electoral, no taboleiro da Secretaría do centro ou na nosa páxina web (Novas, Eleccións 2022), na seguinte ligazón: http://www.edu.xunta.gal/centros/iessanpaio/node/2851

Animamos desde aquí a toda a comunidade educativa a que participe destas eleccións, xa que o Consello Escolar é o órgano de maior representación e constitúe unha boa maneira de contribuír a un mellor funcionamento do ensino público.