Actividades do 40 aniversario

ANDERSON COTÓN:
JUDOKA CON PRESENTE

     O alumnado do IES Elviña, ben o sabemos, é canteira viva de futuro: as enxeñeiras, os médicos, os biólogos e as xeólogas, as informáticas, os deseñadores, os novelistas e as poetas de mañá ocupan hoxe os seus pupitres, participando nas actividades do centro e facendo historia na nosa pequena e humilde escala cuotidiá. Xa noutras ocasións fixamos a mirada en antigos alumnos chegados á notoriedade por moi diversas causas ou no alumnado xoven e dinámico do presente cuxos logros non son menos abraiantes e que permeten albiscar carreiras cheas de coroas xa non lonxanas. Hoxe adicamos este espazo a un dos nosos rapaces de 2º de ESO, Anderson Cotón, do que xa non se pode dicir que sexa promesa de futuro senon absoluta realidade presente de éxitos no deporte do Judo tanto a nivel nacional coma internacional.

 Traxectoria vital e profesional
de Anderson Cotón

    Anderson ten agora catorce anos marabillosos e forma parte do Judo Club de Arteixo desde os nove. Chegou a España de moi pequecho procedente de Colombia. A súa é unha historia de loita e superación, desas que gosta escoitar nos seriais e ler nos xornais, porque teñen a perfección dun guión de cinema: abandoado, criado nun centro de acollida, ata que foi adoptado por unha familia española. Desde moi cedo, atopou no judo unha vía de perfeccionamento con numerosos logros: número 1 do ránking español na súa categoría o ano pasado, campión infantil nacional en categoría -50 kg, medalla de ouro na Copa de España como cadete (- 55 kg) en Hondarribia e de novo número 1 do ránking neste ano, 9º na Copa de Europa desputada neste mesmo febreiro en Follonica (Italia).

      Agora é un estudante encantador e un compañeiro exemplar no grupo de 2º ESO C do IES Plurilingüe Elviña e agarda pola European Cup de Fuengirola (do 14 ao 16 de febreiro) coa mente posta en gañar peso e, cos 15 cumpridos, aspirar xa aos galardóns das categorías superiores... Na mente se cadra xa unhas olimpiadas... Co entusiasmo que amosa e coas súas condicións físicas é seguro que conseguirá chegar ben lonxe. Ben o queremos todos os que formamos parte da comunidade educativa de Elviña, que buscaremos a partires de agora nos xornais todas as competicións de judo para atopar o seu nome entre os campións.

Moita sorte, Anderson! Ben a mereces!
O IES Elviña está contigo!

Historia viva de ELVIÑA

     Unha débeda pendente dos centros de ensino do noso país é a escaseza de vínculos co alumnado do seu pasado. O labor educativo, académico, remata cos exames finais e deixa ao alumnado na liberdade de continuar os seus estudos na Universidade, noutras ensinanzas ou de entrar no mercado de traballo.  Son moitas as ocasións en que antigos alumnos "regresan" ao centro sexa para matricular aos seus fillos, sexa para facer unha visita e lembrar tempos xuvenís, para facer algunha xestión administrativa, ou mesmo para traballar, desde esta barreira, coma profesorado agora, acolléndose ao claustro histórico do instituto de Elviña.

     Esperta certa envexa o coidado que noutras terras ponse no vencello entre a fría institución e as vidas intensas de quen pasou por ela. Por iso, abrimos aquí esta xanela ás novas que nos chegan de exalumnos e exalumnas, coma un xeito de subliñar o respecto e o orgullo co que, desde a actualidade, o IES Plurilingüe Elviña mira ao seu pasado, e a segura convicción que temos de que o noso alumnado actual encherá no futuro moitas páxinas ilustres no devir das ciencias e das artes.

Marisol Soengas: exalumna do IES ELVIÑA, autoridade na loita contra o melanoma

     Unha persoalidade de relevancia no mundo da investigación médica é Marisol Soengas que fixo os seus estudos de secundaria no noso centro para acadar despois a licenciatura e o doutoramento en Bioloxía pola Universidade Autónoma de Madrid e obter, a partir dos seus estudos, importantes logros laborais e distincións (como o premio Josefa Wonenburger no ano 2009).
     As súas investigacións no estudo do melanoma teñen sido noticia en distintas ocasións, e mesmo no mes de abril do ano pasado se lle adicou un número do dominical El País semanal sobre as mulleres españolas na ciencia actual (clicar na foto para acceder á entrevista). Adicámoslle un afectuoso recordo desde esta a nosa web. Sexa exemplo para as nosas estudantes do presente dos éxitos profesionais obtidos a base de estudo, paixón e traballo.

Luis Veira: tamén mestre fóra da cociña

    Dentro dos actos que o IES Plurilingüe Elviña está a organizar para a celebración do seu 40 aniversario, este luns 19 de Marzo tocoulle o turno a un artista da gastronomía, e máis tamén home do barrio, o cociñeiro Luis Veira, chef do restaurante Árbore da Veira da rúa de San Andrés.

      Luis Veira é un deses cociñeiros dos que se pode dicir que teñen algo máis que sona. O seu nome é un dos poucos que se escoitan cando se oe falar da alta cociña galega. Certamente, ten unha Estrela Michelín e traballa ben arreo para obter a segunda. Disque a xente de éxito vive alí enriba, encumiada na divinidade da súa gloria. Se cadra é así con algúns persoeiros, pero, desde logo, non é o caso de Luis Veira, que deu no noso instituto unha soberana lección de cercanía, de familiaridade e de entusiasmo polo seu traballo. Falou coa rapazada de ESO e Bacharelato como quen fala cuns amigos aos que hai tempo que non ve, e aos que pode dar consello afectuoso. Na súa charla, amena, directa, persoal, falou do seu restaurante e dos seus pratos, fixo reconto da súa vida, da súa época como estudante (“yo fui muy mal estudiante, pero muy malo”) e do seu esforzo diario para chegar ao éxito actual. Pode que, ás veces, as cousas non saian como un quixera, pero Luis deixou claro que ninguén chega lonxe se non se esforza e arrisca.

     En fin, a súa foi, ademais dunha estupenda charla, toda unha lección de filosofía de vida: non deixarse levar polo medo ao fracaso, a confianza no noso traballo ben feito son o segredo do éxito.

      Despois da súa charla, o noso convidado baixou ao xardín botánico do noso centro e apadriñou ao grupo de 1º de ESO C na prantación dunha árbore froiteira: un paraguaio (Prunus persica). A placa conmemorativa ficará coma testemuño da súa visita.

O xornal La Voz de Galicia publicou unha breve reseña da visita na súa edición do día 20 e na súa páxina web.