Os departamentos de Lingua galega e Bioloxía colaboran desta vez na posta en marcha dunha exposición sobre o Prestige organizada polo CEIDA. Aproveitando o 20 aniversario desta traxedia ecolóxica, ambos departamentos e o seu profesorado queren lembrar aqueles tristes días de negrura e chapapote. A exposición componse de varios paneis explicativos, bibliografía e outros materiais que reflexionan sobre os problemas ecolóxicos e a necesidade de comprometerse co mantenemento do medio natural de xeito sostible. Estará colocada ata fins do mes de febreiro nas dependencias do laboratorio de Xeoloxía, onde poderá ser vista por todo o alumnado do centro.
Ademais da exposición, os rapaces da ESO asistirán o día 8 de febreiro a unha charla-conferencia sobre o accidente do Prestige.
O xoves día 11 de Xaneiro, Óscar Núñez, do colectivo Recreadores de Galicia pasou unha xornada co alumnado de Cultura clásica do noso centro para evocar o mundo dos lexionarios romanos. Os alumnos e alumnas de 3º e 4º de ESO asistiron a unha charla sobre o mundo do exército romano e despois puideron practicar algunhas das técnicas de loita das antigas lexións co material militar cedido polo propio monitor.
Un curso máis, chegados ao último día do primeiro trimestre o alumnado de todos os cursos do centro participou no Festival de Nadal. Neste ano os participantes amosaron moi variados talentos: houbo recitadoras de poesía, bailarinas, músicos individuais, cantantes e interpretacións de grupo. Non faltou a colaboración de varios profesores que deron tamén a nota (aínda que, desta vez, sen figurar nos boletíns) e o vídeo conmemorativo do Festival de Nadal do curso anterior.
CADRO DE ACTUACIÓNS DO FESTIVAL (Presentadoras: Cynthia e Jennifer, 2º Bacharelato)
1. Visionado dun vídeo sobre o festival do curso pasado. 2. Rebeca e Heloísa (4º ESO). Lectura dun poema en portugués. 3. Daniel (2º ESO). Interpretación de Promenade ao fagot. 4. Xan (2º ESO). Concertino de Brebal ao violoncelo. 5. Uriel (2º ESO). Feliz nadal, interpretada coa tuba. 6. Grupo de 2º ESO A: Impossible. 7. Uxía, León (4º ESO). Recitado dun poema en castelán. 8. Grupo de 2º ESO B: Romeo e Xulieta. 9. Grupo de 3º ESO A: El último mohicano. 10. Grupo de 3º ESO B: O son do ar. 11. Chemi (4º ESO) e Pedro (profesor): Loco enamorado. 12. Priscila (4º ESO) e Gemma (profesora): Alicia Keys. 13. Grupo de 4º ESO e BACHARELATO: recopilatorio do grupo ABBA, Dancing queen, Super trouper e Mamma Mía. 14. Baile: Andrea e Ana Beatriz (4º ESO) 15. Grupo de alumnado e profesores: Música tradicional.
O público escoitou aos participantes con atención e respecto. O resultado: un festival que quedará no recordo de todos os asistentes.
Os rapaces de 1º e 2º de ESO do IES Elviña estiveron o pasado día 1 de Decembro na pista de xeo de Marineda City nunha actividade sufragada ao abeiro do Programa Ao meu xeito! do Concello da Coruña. Coa axuda do profesor de Educación Física Francisco Pérez e dun monitor o alumnado adentrouse no mundo dos deslizamentos, as piruetas e as cuadas. Afortunadamente non houbo que lamentar ningunha víctima (malia unha pobre sela, que non tiña culpa de nada e que sufriu un delicado percance...).
Como xa ven sendo tradición do noso centro, no mes de Novembro o Departamento de dinamización de lingua galega dirixido pola nosa compañeira Pilar López organizou o seu Concurso de comidas de outono, de participación aberta a toda a comunidade educativa do instituto de Elviña. Boa parte dos alumnos e alumnas (e con eles, a bon seguro, as familias) quixeron participar cociñando para todos unha chea de pratos ben apetecibles. Houbo tamén este ano contribucións do profesorado, que, ademais de darlle a números e letras, tamén teñen o seu aquel entre os pucheiros, segundo parece. E tampouco faltou á cita o noso bedel Carlos Silva, que preparou un caldo de cocido que fixo relamberse ao máis pintado.
Entre os pratos víronse sobre todo doces e larpeiradas de todas as formas e tamaños: magdalenas, bombóns, tartaletas, biscoitos, galletiñas, pasteis, pastas, boliños, pastas de milfollas, mazapáns, tartas de améndoa, de piña, de limón, de chocolate, de queixo, de cabaza, de manteiga, de crema de leite, de doce de leite, de noces, de mazá, de viño tinto, e mellor non seguimos, que será a historia de nunca acabar. Abofé que temos no instituto bos reposteiros! Tamén se viron pratos salgados, entre eles dúas deliciosas tortillas con pataca galega de outono, e unha venerable receita extraída da De re coquinaria do escritor romano Apicio que prepararon os alumnos e alumnas de latín e cultura clásica, para amosar que isto da cociña non ten idade, pero si moita historia...
Unha folla de chocolate
Tres membros do xurado
No segundo lecer, ás 12:10, todos puideron desfrutar das comidas e votar polas súas receitas favoritas. O gañador foi o noso alumno de 1º de ESO C, Josué Rey Morón. Parabéns! Pilar López asegurou que, en datas próximas, publicará na web de normalización o libro das receitas do concurso.
Estade atentos os gulosos! (e as gulosas!)
O noso compañeiro Carlos, editou este vídeo que podedes ver na súa canle de YouTube.
As imaxes e vídeos contidos nesta páxina web corresponden ás actividades desenvolvidas dentro da Programación anual de actividades do noso centro polo noso alumnado. Todas as familias e responsables legais do alumnado que aparece nelas asinaron coa matrícula un permiso específico para permitir a difusión destas imaxes a través da web do instituto ou a través das contas en espazos web e en redes sociais que son de titularidade do IES Plurilingüe Elviña. Asimesmo, familias e responsables están tamén informados do seu dereito de revogar esa autorización de uso de imaxe. Lémbrase que a descarga destes materiais visuais e o seu uso por terceiros fóra do estrito marco dos espazos e funcións permitidos pola autorización citada (isto é, a difusión meramente informativa das nosas actividades complementarias e extraescolares a través da páxina web oficial do centro e a través das contas das que o centro é titular) son ilegais, poden e deben ser denunciados. O IES Plurilingüe Elviña non se fai responsable do uso que se poida facer destas imaxes por terceiros fóra do ámbito dos espazos web que son da súa titularidade.
EXPOSICIÓN CONMEMORATIVA
