IES de Carral

Parabéns ao noso alumnado de 4º da ESO que se presentou para a obtención do diploma DELF de Francés, pois todas e todos eles conseguiron aprobar.

Estas semanas están a ser intensas no centro; ao final de curso xuntáronse diversos e emotivos momentos que recollemos neste artigo da nosa web. Ordenados pola data de celebración, destacamos en primeiro lugar a despedida do noso Auxiliar de Conversa en Francés, Paul. Este rapaz da Bretaña fíxose querer no centro e agardamos velo de novo o próximo curso. Case 100 alumnos déronlle unha despedida sorpresa.

O venres 10 de xuño celebrouse o acto de despedida do noso alumnado de 4º da ESO. Recollemos algunhas imaxes dese acto co que despedimos a promoción que nos acompañou desde o 2018 ao 2022:

 E falando de xente que nos acompañou, esta última semana tivemos a sorte de que nos visitaran exalumnos e exalumnas para celebrarmos unha Xornadas de Orientación nas que lle falaron ao noso alumnado máis maior, o de 3º e 4º da ESO: ciclos de FP de grao medio e superior, voluntariado no estranxeiro, Graos universitarios, 1º e 2º de Bacharelato... Unha chea de experiencias que lles agradecemos a todos os exalumnos/as que nos visitaron, e que nos enorgullece que pasaran non hai moito por este centro.

E, finalmente, destacamos o Obradoiro de Nutrición e Dietética que impartiu a nosa exalumna Susana Rodríguez para o alumnado de 2º da ESO, no que ademais de explicar o perigo do exceso de azucre, deron alternativas ás pizzas e aos zumes.

Este ano 2022 dedícase o Día das Letras Galegas a Florencio Delgado Gurriarán. No noso centro podemos ver unha exposición sobre a obra do autor. O alumnado de 2º da ESO gravou un vídeo coa lectura dos seus textos que podedes ver con outras actividades sobre o autor no Google Sites Carralengalego na seguinte ligazón: https://sites.google.com/view/carralengalego/letras-galegas-2022-florencio-delgado-gurriar%C3%A1n

A seguir, podemos ver o vídeo que a profesora María José Miranda realizou con alumnado de 2º da ESO:

O Departamento de Educación Física organizou uns torneos solidarios de bádmington, fútbol e.  Colpbol. Quen se apuntaba aos mesmos podía doar un paquetiño de comida de axuda para a xente de Ucraína. A idea foi todo un éxito e nas imaxes podedes ver o resultado das aportacións.

Nas imaxes podemos ver o alumnado de 4º da ESO colaborando na organización e embalaxe dos alimentos. A seguir, as imaxes das caixas no instituto e no palé cando se entregaron.