Lingua galega

Onte o alumnado de 3º e 4º ESO realizou unha saída a Celanova para coñecer de primeira man os espazos vitais de dous poetas fundamentais da nosa literatura: Manuel Curros Enríquez e Celso Emilio Ferreiro.

O programa deste día comezou coa visita á Capela de San Miguel, construción prerrománica de estilo mozárabe do século X.

A continuación acudimos á Casa dos Poetas, onde os nosos fantásticos guías (Paula e Aquilino) comentaron diversos aspectos da biografía do poeta do Rexurdimento.

Ás 13:00 coñecemos o órgano do Mosteiro de San Rosendo e desfrutamos dun pequeno concerto a cargo de Marisol Mendive, dentro do ciclo de concertos didácticos.

Tras a pausa para xantar, a tarde comezou coa realización dunha xincana sobre a biografía de Celso Emilio, que levou ao alumnado a percorrer os lugares máis significativos da vila.

Acudimos, a seguir, ao instituto da localidade para visitar a súa impoñente biblioteca, onde procedemos á lectura dalgúns textos dos poetas.

Trasladámonos, por último, a Vilanova dos Infantes. Alí tivemos a oportunidade de subir á Torre da Homenaxe e entrar na cova de San Vivián.

Un día longo e caloroso pero, sobre todo, rico en experiencias.

Chegamos á última entrega de Meteoescolas en Latín: xa entrou a primavera e con ela chega o bo tempo.

En canto comeza o ano hai máis horas de sol (como di o refraneiro “Xaneiro fóra, máis unha hora”) e a natureza comeza a revivir (“En febreiro sae o oso do oseiro” e “Entre marzo e abril sae o cuco do cubil”).

Porén a primavera é toliña (“Marzo marzán, pola mañá cariña de rosa, pola noite cara de can” e “Abril augas mil”) por iso tivemos que agardar ata agora para facer este último vídeo.

Pero non vos fiedes: “Sol de abril, ábrelle a man e déixao ir!"

Podedes visionar o resultado premendo no seguinte enlace: Solis.

Agardamos que vos guste.

O alumnado do CPI O Cruce visibiliza e apoia o uso do galego nos negocios de Cerceda a través da campaña Aquí tamén se fala, que se está desenvolvendo a nivel galego coa participación de arredor de 200 centros de ensino. Xa son preto de 50 os negocios do municipio adheridos á campaña

Xestorías, bares e restaurantes, gasolineiras, panadarías, fábricas…, son algunhas das empresas que o alumnado do CPI O Cruce de Cerceda xa visitou para animar e visibilizar o uso do galego. Na atención ao público xa se fai de xeito moi maioritario, tal e como puideron constatar, mais na rotulación e información escrita tamén é bastante frecuente nos establecementos da localidade.

Nesta semana comezou 4º da ESO polos negocios de Cerceda capital, e despois das vacacións de Semana Santa continuará alumnado dese e doutros cursos por establecementos doutras parroquias do municipio. As rapazas e os rapaces visitan as empresas, explican a campaña, animan a unirse a ela e visibilizala a través dun cartel co lema “Aquí tamén se fala galego” e fan unha foto, que despois se comparte a través das redes sociais. Ademais, fíxanse no emprego que se fai da lingua coa finalidade de, proximamente, recoñecer algunha empresa que destaque de maneira especial no uso do galego.

A recepción, tal e como indican as mozas e os mozos participantes, está sendo moi positiva, xa que todas as empresas visitadas se animan a participar e, ademais, incluso felicitan, aplauden e agradecen a iniciativa. De momento xa son preto de 50 as empresas do municipio visitadas e adheridas, que seguro que irán aumentando nas próxima semanas.

A campaña Aquí tamén se fala é un proxecto de dinamización lingüística realizada pola mocidade que se xestou nun instituto da Coruña, o IES Rafael Dieste, e que decontado se espallou por centros de todo o país, ata chegar aos arredor de 200 actuais, entre os que está desde o inicio o CPI O Cruce de Cerceda. Ademais dos miles de establecementos empresariais e comerciais que xa se adheriron á campaña (en Cerceda xa van preto de 50), tamén conta con recoñecidos apoios a través de vídeos nas redes sociais como, por exemplo, os dos actores Viggo Mortensen ou Tamar Novas, a actriz María Vázquez, a cantante Amaia ou as Tanxugueiras, os músicos James Rhodes ou Abraham Cupeiro etc., ademais dos clubs e xogadores de fútbol do Deportivo da Coruña, Celta de Vigo, Rácing de Ferrol ou Lugo.