Desta volta, o alumnado de 1º e 2º de Educación Primaria ( Martín, Iris, Carlota, Manuel, Manu e Martim) recita fragmentos do poema Vente, ventiño no norte. Esta actividade foi realizada en colaboración co Colectivo Lemos Le con motivo da celebración do Día das Letras Galegas 2022 dedicado a Florencio Delgado Gurriarán. Esta composición está publicada no poemario Bebedeira, de Florencio Delgado Gurriarán (Editorial Nós, 1934). Recitado polo alumnado de 1º e 2º de Primaria do CEIP Rosalía de Castro, de Bóveda (Lugo) Martín, Iris, Carlota, Manuel, Manu e Martim. Baixo a supervisión da titora, Natividad Rodríguez. Edición e montaxe Equipo TIC CEIP Rosalía de Castro.

O CEIP Rosalía de Castro, en colaboración co Colectivo Lemos Le presenta o poema Casoiro, recollido no poemario  Galicia infinda do escritor valdeorrés, Florencio Delgado Gurriarán. Publicado na Colección Salnés, da Editorial Galaxia no ano 1963. Este poema está recitado polo alumnado de infantil do CEIP Rosalía de Castro, de Bóveda (Lugo): Carlota, Liza, Daniela, Marcos, María, Sofía, Anxo, Enzo e Xoel, baixo a supervisión da titora de infantil Noelia Maceda. A edición e montaxe correu a cargo do  Equipo TIC do CEIP Rosalía de Castro - Bóveda (Lugo).

Listaxe definitiva de alumnado.

Curso 2022/2023.

Todo o alumnado que solicitou praza no CEIP Rosalía de Castro de Bóveda para o curso 2022/2023 están admitidos.

Un cordial saúdo.

E para rematar a semana tivemos a visita de Marcos e Eva (o pai e a nai de Daniela), que viñeron a axudarnos a poñer a punto a nosa horta.

Estivemos encantad@s escoitando as explicacións de Marcos e vendo como traballaba.

En breve iremos a sementar o millo e a plantar as plantiñas do sementeiro.

Moitas grazas por esta visita tan proveitosa!

^{A nosa biblioteca exterior xa case está a punto! Hoxe a familia de Xoel veu ao noso cole para axudarnos coa tarefa de montar}

^{un pequeno armario para gardar os libriños destinados a ler na zona verde. Quedou xenial!}

Moitas grazas por axudarnos e por compartir con nós o voso tempo!

O colexio de Bóveda ten o privilexio de contar cun dos patios escolares máis grandes e máis verdes da nosa contorna.

As rapazas e os rapaces do Obradoiro de Emprego do Concello de Bóveda e a súa monitora estiveron toda esta semana no noso centro realizando as labores de limpeza e debroce da área verde. Trouxéronnos e colocaron os bancos que nos deu o Concello para a nosa zona de lectura ao aire libre e realizaron animaliños de madeira para decorar o noso patio.

Moitas grazas polo voso traballo!!

O martes día 3 de maio, o pai de Enzo trouxo á clase de Infantil unha ducia de ovos "galados". Estivemos investigando como funciona a incubadora que nos prestou a nai de Liza e trouxemos libros da biblioteca que explican como vai ser o proceso.

En 21 días nacerán os nosos pitiños. Traeremos a unha galiña que nos presta a nai de Álex para que coide deles mentres son pequeniños.

Estamos desexando velos nacer e levalos por todas as clases para que os vexan os maiores!

E despois de facer o proxecto, solicitar os permisos e buscar os recursos... xa se está materializando o noso galiñeiro!!

O Concello preparou a base de cemento e fíxose cargo dos materiais necesarios. As familias (dous papás e un avó) están a realizar a montaxe do "peche"para que as nosas galiñas teñen un lugar seguro e confortable onde vivir.

Xa temos a incubadora no cole e na semana que vén montaremos a casetiña de madeira que mercamos para que vivan os pitiños.

Iremos informando dos novos avances!!

Rematando esta semana chea de actividades, viñestes as familias a tarde do xoves e a do venres para botar unha man no expurgo.

Baleirar os estantes, reorganizar o espazo,  seleccionar os fondos e volver colocar.

Un traballo inmenso e intenso que, como di o anuncio, non se paga con diñeiro.

Moitas grazas!!

Dende o equipo da biblioteca queremos agradecer a todas as familias a súa implicación nesta actividade. Os deseños que mandastes eran espectaculares e calquera deles podería representarnos con moito acerto.

Unha vez recibidos os debuxos tocounos a ingrata labor de escoller só 12 deles para entrar no proceso electoral. Priorizamos aqueles deseños que facían alusión á biblioteca escolar e tamén aos que tiveran relación co noso entorno (natureza, colexio...) buscando un equilibrio de xeito que todas as aulas dende Infantil a terceiro ciclo estiveran representadas.

No día de onte, alumnado, persoal non docente e docentes levamos a cabo o proceso electoral.

Despois dunha reñida votación, resultou elixido o morcego Plata.

Parabéns Plata! Benvido ao noso cole!