Estamos rematando o curso e imos facer un alto no camiño para recordar algunhas actividades pasadas.

En Outubro celebramos no cole o Samaín e o tradicional magosto.

E Bhawna fixo obradoiros con todo o alumnado do cole explicándonos o "Diwali", festival da luz na India.

En novembro volvemos conectar coa científica galega Sonia Villapol e conmemoramos o "Día en contra da violencia de xénero".

En decembro participamos no concurso de carteis proposto por "Domus VI" polo "Día das persoas con discapacidade" e mandáronnos un fermoso crebacabezas.

Comezou o novo ano e celebramos o "Día da Paz" cun fermoso mural colectivo.

E chegou febreiro e celebramos o día da nosa querida Rosalía de Castro cantando o seu poema "O Moucho".

En marzo celebramos o "Día da muller" lembrado ás mulleres da nosa vidae poñendo os nomes de todas elas colgando en lazos morados na entrada do cole.

E tamén a "Semana da prensa" na que traballamos con xornais nas aulas.

E para rematar o segundo trimestre conmemoramos o "Día da saúde".

Do 19 de maio ao 22 de xuño de 2022 está aberto o prazo para solicitar a participación no fondo solidario de libros de texto e para solicitar axudas para adquirir libros de texto e material escolar para o vindeiro curso 2022/2023.

Orde do 29 de maio de 2022 (DOG 18/05/2022)

A) Para todos os solicitantes:

• Anexos I (Solicitude) e Anexo II (comprobación de membros computables da unidade familiar).

• Copia do libro de familia ou equivalente (deben figurar todos os membros computables).

B) Casos especiais:

• Separación ou divorcio. (No que conste a atribución da custodia do/a menor).
• Discapacidade: Certificado acreditativo do grao de discapacidade.
• Violencia de xénero: na forma que detalla o artigo 5 da Lei 11/2007, do 27 de xullo.

(Os documentos deben ser válidos no momento da súa presentación e reflectir a situación persoal, familiar e económica a 31 de decembro de 2020)

No CEIP Rosalía de Castro- Bóveda, presentando dita documentación.

Ou a través da aplicación FONDOLIBROS.

NOVO PROTOCOLO DE ADAPTACIÓN AO CONTEXTO COVID-19 EN CENTROS DE ENSINO

https://www.edu.xunta.gal/portal/node/37051

E para rematar a semana, as familias viñeron dúas tardes a colaborar coa organización dos espazos do colexio.

O xoves rematouse o peche do galiñeiro e montouse a casiña de madeira para as pitas. O venres  centrámonos na cartelería para indicar a ubicación dos libros na biblioteca.

Un intenso traballo en equipo que,  dende o cole, agradecemos de corazón.

Unha aperta enorme!

Seguindo coas actividades do "Mes da Letras", puidemos gozar dunha divertida sesión de contacontos a cargo da profe Sara e o seu compañeiro de contos Álex.

Contaron e cantaron diferentes contos que deixaron ao noso alumnado marabillado!

Moitas grazas por vir e compartir con nós esta estupenda experiencia!

O 2 de maio conmemórase o día en contra do acoso escolar.

Nesta ocasión o C.E.I.P. Rosalía de Castro de Bóveda e o C.E.I.P. Ricardo Gasset de O Incio puxémonos en contacto cos autores da obra "Subnormal" baseada na historia de Iñaqui zubizarreta, ex-xogador de baloncesto que sufríu acoso escolar sendo neno.

Grazas ao traballo de artistas como Miguel e Fernando podemos poñer aos nenos e ás nenas en contacto con esta realidade ante a que cómpre estar alerta.

Moitas grazas pola vosa visita e por explicar tan ben ao noso alumnado o proceso creativo da banda deseñada!

Gustounos moito!

Dentro do proxecto "A nosa horta" no que contamos coa visita de todas as familias do alumnado de Infantil; hoxe tivemos con nós a Alba, a nai de Carlota, quen trouxo todos os materiais necesarios para facer un espantallo.

Despois dun proceso de creación colectiva, tocou poñerlle nome: o noso espantallo é unha espantalla e chámase Carlota.

Moitas grazas Alba por traernos esta estupenda actividade!

E despois de sementar o millo, velo medrar, colleitalo, degrañalo, levalo a moer e peneirar a fariña... o alumnado de infantil foi cocer ao forno.

Foi unha xornada moi especial onde puidemos ver a diferencia entre a fariña de millo e a fariña de trigo. Amasamos as dúas para facer a torta de millo e boliños preñados de chourizo.

Moitas grazas á avoa de María por aprendernos tantas cousas sobre o millo, a Sandra pola súa paciencia e bo facer coa masa de trigo e aos anfitrións Julia e David que nos acolleron na súa casa con todo o cariño do mundo. Un bico enorme!!!

A traxedia dos castiñeiros, do poemario Bebedeira de Florencio Delgado Gurriarán (Editorial Nós, 1934) é o poema escollido polo alumnado de 5º e 6º para realizar este recitado, ao que lle poñen voz: Carlos, Luca, Alba, Mary, Javier, Diana, Santi, Hugo, Sara, Diego, Iago e Luis. O CEIP Rosalía de Castro en colaboración co Colectivo Lemos Le, leva a cabo esta actividade baixo a supervisión da coordinadora de biblioteca Noelia Maceda e coa colaboración da titora Sara Lebedinsky.  Edición e montaxe Equipo TIC CEIP Rosalía de Castro.

O alumnado de 3º e 4º de Primaria recita o poema A lúa, branca pastora  do poemario Bebedeira de Florencio Delgado Gurriarán publicado pola Editorial Nós no ano 1934.  Álex, Luisa, Hugo, Aurora, Lara, Daniela e David grabaron estes versos baixo a supervisión da coordinadora de biblioteca Noelia Maceda, coa colaboración da titora Rocío Vilar. Edición e montaxe Equipo TIC CEIP Rosalía de Castro.