actividades

Informamos ás familias do alumnado usuario de transporte escolar que, consultadas as empresas de transporte, os dous primeiros días do servizo (10 e 11 de setembro) o alumnado deberá estar na parada entre 5 e 10 minutos antes do horario habitual para facilitar a organización da hixiene de mans e asignación de asento.

Agradecemos de antemán a súa colaboración.

Este curso a incorporación do alumnado ó colexio farase de xeito escalonado atendendo ó seguinte calendario:

O horario para 4º EI será o que especifique individualmente a titora atendendo ó periodo de adaptación.

Para o resto dos grupos o horario é o habitual do centro do mes de setembro: 

-9.20 h: apertura do centro 

-9.30 h a 14.30 h: clases

-14.30 a 15.30 h: comedor (con adaptación de horario para entrada escalonada nos dous comedores e nas dúas quendas)

Á espera de que cheguen as últimas instrucións para a reapertura dos centros escolares, xa estamos preparando o colexio para que reúna as condicións necesarias de seguridade e poidamos afrontar o curso do xeito máis levadeiro posible.

Estase elaborando un Plan de adaptación que inclúe novidades con respecto a horarios, distribución e utilización de aulas e materiais, organización de entradas e saídas, así como de espazos destinados a recreos, servizo de comedor e servizo de limpeza. Todas estas novidades daranse a coñecer a través desta páxina web a primeira semana de setembro.

Estes días estanse a facer obras de acondicionamento no comedor:

-Baleirouse a aula de usos múltiples que está fronte ó comedor para ampliar a superficie deste e poder manter a distancia de seguridade durante o servizo de comida do mediodía. Só falta pintala e colocar as mesas e sillas que enviou a consellería.

-Ademais, instalouse no novo acceso ó comedor un lavabo con dúas piletas para garantir unha hixiene de mans axeitada entre o alumnado antes da entrada ó comedor.

Do mesmo xeito, xa nos abastecemos do material recomendado polas consellerías de sanidade e educación (panos desbotables, disolución desinfectante, xel hidroalcólico e cubos de pedal), que en breve será distribuido por todos os espazos do centro.

E xa temos no colexio as axendas para infantil e primaria que, ademais de utilizar o alumnado para as súas anotacións persoais, usaremos os mestres e as familias para estar en contacto.

Hoxe sae publicada no Portal da consellería a resolución da convocatoria da Dirección Xeral de Centros e Recursos Humanos sobre Bibliotecas Escolares Solidarias (Primaria), correspondente ao curso 2019/2020. Esta iniciativa realízase en colaboración coa Dirección Xeral de Xuventude, Participación e Voluntariado.

O noso centro, xunto con outros nove, foi seleccionado pola Comisión de Valoración logo de avaliar as 88 memorias de actividades recibidas por parte de centros adheridos á iniciativa “Voluntariado de lectura- A”, en función do interese e calidade das actividades realizadas.

Estes 10 centros seleccionados recibirán unha asignación de 600 euros para o desenvolvemento dun obradoiro especializado, destinado a un grupo de alumnos e alumnas que tivesen ao longo do curso un papel protagonista (dentro do grupo de voluntarios e voluntarias), participando directamente no deseño e xestión de actividades na biblioteca escolar.

Todo o alumnado voluntario recibirá un diploma pola súa colaboración como acción de voluntariado cultural.

Unha vez máis o noso agradecemento ó Equipo de Biblioteca coordinado pola mestra responsable Mª José Abelleira Pequeño.

As familias do alumnado que rematou 6º EP, xa poden pasar polo centro o xoves 8 e venres 9 de xullo de 10.00 a 11.00 h para recoller os historiais académicos dos seus fillos e fillas.