Taboleiro do alumnado

 Vintecatro alumnas e alumnos de primeiro curso de Bacharelato  coa súa profesora Cristina López Suárez, colaboraron voluntariamente no traslado de fondos do antigo museo da Sociedade Galega de Historia Natural en Méndez Núñez ao novo local na Avenida do Rei, na chamada "Casa do Coronel".

Esta colaboración permitíu ao noso alumnado comprobar a importancia dos fondos que a SGHN pon ao dispór de Ferrolterra e aportados durante máis de trinta anos por centos de socios e colaboradores da entidade naturalista. Esperamos poder seguir aportando o apoio da comunidade escolar do IES Sofía Casanova.

Foto: O alumnado premiado co Conselleiro e altos cargos de Educación.

O pasado venres 4 de marzo realizouse no Salón de Presidencia o acto de entrega dos Premios Extraordinarios de Bacharelato, dos Premios Extraordinarios de FP e dos Premios Hispanoamericanos de Ortografía. Dous ex-alumnos do IES Sofía Casanova, Eva Piñeiro Varela e Federico Pedreira Nores recolleron senllas distincións de FP e Bacharelato, convertindo ao IES Sofía Casanova no único centro de Galicia con dous alumnos galardonados.

Foron en total 19 os premiados en Bacharelato e 10 os premios extraordinarios de FP, o que da unha idea do mérito do alumnado que acada este recoñecemento.

Eva e Fedeico posan co director Juan Rodríguez Silvar

 Rosa Aneiros visita o Sofía Casanova para falar da súa obra narrativa.

O martes 8 o salón de actos do centro será escenario dun novo encontro literario do alumnado do Sofía con algunha das máis actuais persoalidades literarias de Galicia. Contido actualizado e fotos na seguinte páxina

Rosa Aneiros (Meirás-Valdoviño, 1976) é xornalista e traballa no Consello da Cultura Galega. Colabora habitualmente en distintos medios de comunicación impresos e dixitais, entre eles culturagalega.org (sección “Agardando as lagarteiras”), Diario de Pontevedra, El Progreso, Galicia Hoxe, Diario de Ferrol (a través da axencia AGN), El País, Grial, Fadamorgana ou Casa da Gramática, ademais do programa “Un día por diante” da Radio Galega. En 1999 presentou a súa primeira novela, Eu de maior quero ser á que seguiron Corazóns amolecidos en salitre (2002), Resistencia (Xerais, 2003, oito edicións dende a súa publicación), O xardín da media lúa (Galaxia, 2004), Veu visitarme o mar (Xerais, 2004), Ás de bolboreta (Xerais 2009), Premio Fundación Caixa Galicia de Literatura Xuvenil, Premio Fervenzas Literarias ao Mellor libro Xuvenil, 2009 e Premio The White Ravens (Internationale Jugend Bibliothek), 2010 e Sol de Inverno (Xerais, 2009), Premio Xerais de Novela 2009 e Premio Fervenzas Literarias a Mellor portada adultos, 2009. Ten publicados relatos nos volumes colectivos Narradoras (Xerais, 2000); Relatos (1999), Relatos gañadores do Pedrón de Ouro 1998-1999-2000 (2001) ), Seis ferroláns (2003), Alma de beiramar perdida (2003), Botella ao mar (2003) ou Narradio (Xerais, 2003). Conta, ademais, no seu haber con recoñecementos como o Modesto Rodríguez Figueiredo (Pedrón de Ouro, 1998); o Manuel Lueiro Rey (1996); o Manuel Murguía (2001), o Carvalho Calero (2001), o Premio Arcebispo Juan de San Clemente (2003), o Premio Careón 2006 ou o Premio da Crítica Losada Diéguez (2005), ademais do Premio Caixanova Francisco Fernández del Riego en 2007 polo artigo xornalístico “A última vaca”. Os seus artigos literarios restán recollidos nos volumes Agardando as lagarteiras (culturagalega.org, 2003) e Ao pé do abismo (Xerais, 2007).

A Universidade de Santiago de Compostela (USC) convoca un concurso de Relato Curto.

Límite: Tres participantes por centro. Prazo: Do 10 de xaneiro ao 29 de abril de 2011

CONCURSO Como te imaxinas na USC?

O obxectivo deste concurso é coñecer a visión que teñen os estudantes sobre os diferentes aspectos da vida universitaria. Por iso ofréceselles unha oportunidade para que a través da redacción dun relato curto manifesten as súas inquedanzas académicas e profesionais. A USC desexa coñecer as preferencias dos seus futuros alumnos para artellar os mecanismos necesarios que dean resposta ás súas expectativas. E tamén quere que opinen sobre todos os aspectos referidos á Universidade, unha institución académica que conxuga tradición e modernidade. Esta é unha boa ocasión para que os novos universitarios aporten suxestións para explotar mellor os múltiples recursos educativos que existen nos campus da USC e que configuran os diferentes aspectos da vida universitaria. Os traballos presentados deberán ser anónimos. Os datos persoais do alumno poñeranse nun folio aparte. Os traballos deberán ir acompañados dun texto complementario (non superior ás 20 liñas) no que se expliquen as razóns da elección temática, a xustificación das técnicas empregadas e o proceso seguido para realizar o traballo.

CRITERIOSDE AVALIACIÓN DO TRABALLO E XURADO

Valorarase a capacidade creativa, expresiva e comunicativa do estudante. Terase especialmente en conta ademais da corrección lingüística, a imaxinación e orixinalidade dos relatos, de xeito que se valorarán aquelas historias que máis exploten os aspectos creativos da Universidade en canto institución dinámica e moderna ou as múltiples facetas do estilo e vida universitaria, desde a visión de mozos e mozas.

PRESENTACIÓN PRAZO

Do 10 de xaneiro ao 29 de abril de 2011. Os traballos presentaranse nos centros de ensino medio e unha vez seleccionados enviaranse, co visto e prace do centro, a:

A PONTE ENTRE O ENSINO MEDIO E A USC

Pavillón estudantil. campus Sur 15782 - Santiago de Compostela

Tamén se poden enviar ao correo electrónico: aponte@usc.es

IMPORTANTE

Cada centro de ensino medio poderá presentar, como máximo, tres propostas. O centro dos estudantes gañadores tamén será premiado co mesmo agasallo.

REQUISITOS

1. Ser estudante de 4° de ESO, ciclos formativos ou bacharelato.

2. O relato curto deberá ter unha dimensión máxima de 3 folios (tamaño DIN A4).

PREMIOS

Concederase un primeiro premio e unha mención, se é do caso.

1° Premio: Un ordenador persoal portátil.

Mención: Un teléfono móbil.

Os premios entregaranse nun acto público que organizará a USC.