No DOG do día 20 de febreiro publicase a Orde do 4 de febreiro de 2019, pola que se convocan axudas para a realización de actividades de formación en linguas estranxeiras no ano 2019, destinadas ao alumnado dos centros docentes sostidos con fondos públicos, en réxime de concorrencia competitiva.

O prazo de presentación de solicitudes comeza o día 21 de febreiro e remata o día 20 de marzo.

A información sobre este programa, así como a aplicación "en liña" que se menciona na convocatoria, atópase na seguinte páxina web:

http://www.edu.xunta.es/axudasle 

O cartel foi elaborado polo alumno de 1ºBAC Alejandro García Rodríguez.

 Temi

A Consellería de Educación, Universidade e Formación vén de publicar a convocatoria da proba para que as persoas maiores de 20 anos obteñan o título de Bacharelato na modalidade de Ciencias e nos dous itinerarios da modalidade de Humanidades e Ciencias Sociais. O obxectivo é que as persoas que non obtiveron esta cualificación a través das ensinanzas reguladas poidan contar con este título a través da participación nunha proba libre. Cómpre lembrar que a Consellería, ademais de ofertar a posibilidade de cursar o Bacharelato para persoas adultas de forma presencial, semipresencial e a distancia, ten á disposición da cidadanía no portal educativo (http://www.edu.xunta.gal/portal/ea/materiais-didacticos) para a súa descarga gratuíta as guías didácticas precisas para o seu estudo.

Poderán participar nestas probas as persoas maiores de 20 anos (ou que os cumpran no 2019), que non dispoñan deste título ou equivalente e que non estean a cursar ensinanzas de Bacharelato en ningún dos réximes neste curso.

O prazo de presentación das solicitudes será entre o 25 de febreiro e o 11 de marzo de 2019. O exame celebrarase o día 26 de abril de 2019 en sesións de mañá e tarde no IES San Clemente de Santiago de Compostela.

A alumna de 1º de Bacharelato, Sandra Rodríguez Macía, que como xa informamos foi gañadora do concurso local de Biblioteca Pública de Lugo, acaba de gañar tamén a fase provincial dentro da súa categoría cun poema no que transmite a tristeza que a voz lírica padece pola perda dun ser querido nesas datas tan sinaladas.

Un Primeiro Premio que recollerá o próximo 22 de febreiro.

Noraboa!

Os alumnos do Ciclo Superior de Turismo, sempre tan colaborativos, prestáronse voluntarios para ser guías da Exposición que, ata o mércores, podemos ver no Centro e que está aberta ó público en xeral de 17:30 a 19:30. Prepararon unha presentación dos paneis que se expoñen na Biblioteca: nalgún caso explican á premiada de modo teatralizado, como si dela mesma se tratara, e noutros sintetizan moi amenamente aspectos da súa biografía e do seu traballo.

Despois da inauguración pola Secretaria Xeral de Igualdade e de que todo o alumnado do centro a visitase e incluso participase nunha Xincana, relacionada tamén co traballo "Pegadas de muller" que elaboraron, temos a sorte de contar no centro cuns guías que se preparan activamente para desenrolar o seu traballo. Moitas grazas a todos! Foi un placer escoitarvos.

A Consellería de Educación, Universidade e Formación Profesional vén de publicar no Diario Oficial de Galicia a resolución do 15 de xaneiro de 2019 pola que se convocan as probas para a obtención do título de graduado en educación secundaria obrigatoria para maiores de 18 anos nas convocatorias de maio e setembro de 2019. Poderán participar nestas probas as persoas maiores da devandita idade e que non estean en posesión do título correspondente nin matriculadas no curso 2018/19 en ensinanzas conducentes a obtelo.

O prazo de inscrición estará aberto do 11 ao 22 de marzo para a convocatoria de maio e do 1 ao 8 de xullo para a de setembro. As probas realizaranse o 24 de maio e o  6 de setembro.

O contido do exame estruturarase en  tres ámbitos: Ámbito Científico-tecnolóxico, Ámbito Social e Ámbito Comunicación. No primeiro deles incluiranse os exercicios das materias de Matemáticas, Bioloxía e Xeoloxía, Física e Química e Tecnoloxía, así como aspectos relacionados coa saúde e o medio natural recollidos no currículo de Educación Física. A proba do Ámbito Social inclúe os contidos relacionados coas materias de Xeografía e Historia, Economía, Iniciación á Actividade Emprendedora e Empresarial e aspectos perceptivos correspondentes ás materias de Educación Plástica, Visual e Audiovisual e Música. Finalmente, o Ámbito de Comunicación comprende os exercicios de Lingua Galega e Literatura, Lingua Castelá e Literatura e Lingua Estranxeira (inglés ou francés).

Na páxina web da Consellería atópanse as unidades didácticas precisas para a preparación destas probas:

Tras a boa acollida e o interese espertado coa primeira experiencia do programa "Tecnólogo por un día", a Amtega activa a súa segunda edición ofrecendo novas prazas para que estudantes de 12 a 17 anos coñezan en primeira persoa as dinámicas que dominan ás profesións tecnolóxicas da man de empresas TIC galegas.

O alumnado seleccionado compartirá unha xornada laboral participando nas distintas actividades e tarefas que teña na axenda o directivo asignado (reunións, visitas a clientes tecnolóxicos, comida de traballo, etc...), o que lle permitirá coñecer a dinámica de traballo nestas profesións ou resolver as súas dúbidas vocacionais.

O período de inscrición estará aberto desde o día 25 de xaneiro ata o 8 de febreiro. Poderán escoller entre as 65 novas prazas dispoñibles que oferta a Amtega xunto coas 14 empresas que colaboran nesta edición. As asignacións realizaranse a través do resultado dun sorteo que se realizará unha vez finalizado o prazo de inscricións e tendo en conta as preferencias do alumnado. Posteriormente, as empresas poranse en contacto cos/as participantes para concretar a data e o horario da xornada que se desenvolverán entre febreiro e marzo.

Para coñecer máis detalles e as instrucións para participar neste programa están dispoñibles os manuais do docente e o alumnado, xunto co modelo de autorización requirido para esta actividade, na sección Documentos do espazo web amtega.xunta.gal/tecnologo-por-un-dia-segunda-edicion. O prazo de presentación de solicitudes remata o 8 de febreiro de 2019 e para calquera dúbida poden poñerse en contacto coa Xefatura de Estudos do centro educativo.

As persoas seleccionadas ou interesadas nesta actividade poden tamén descargar e leer o manual do alumn@:

Hoxe, luns 28, a Secretaria Xeral de Igualdade, Susana López Abella, inaugurou a Exposición de fotos do "Premio Mª Josefa Wonenburger", que dende o pasado luns se pode ver na Biblioteca do centro e que (como explicamos noutra entrada) se enmarca no "Programa Donas de si", no plan proxecta.

A titular de igualdade explicoulles a un grupo de alumnos a importancia desas mulleres premiadas, das que se pode coñecer a biografía e os seus avances como pioneiras en diferentes campos da investigación. Tamén se interesou polos traballos elaborados polo alumnado e expostos á entrada da Biblioteca.

Os grupos de 1ºESO que estiveron presentes na inauguración e que traballan no proxecto de Igualdade "Donas de si", antes citado,  participaron en grupos nunha "Xincana Wonenburger" que consistiu nun xogo de 17 preguntas sobre o exposto nos paneis. A proposta foi elaborada por Carlos Parada e as dúas profesoras responsables do Proxecto (Tania Vázquez e Beatriz López).

Podedes ver nas seguintes fotografías algúns momentos do acontecido hoxe.