Conmemoracións

PARABÉNS A TODOS¡¡¡Aínda que non puidemos asistir, porque só podían ir 5 persoas, en Santiago de Compostela, o 3 de outubro de 2024, entregounos a Fundación Antonio Fraguas Fraguas o premio da XIII Edición do Proxecto Didáctico. Representantes do CEIP Lamas de Abade (Santiago de Compostela), o CEIP Apóstolo Santiago (Santiago de Compostela) e oCEIP Pérez Viondi (A Estrada), na categoría de ensino primario polo proxecto Viva o entroido vivo! Lingua, festa e comunidade recibiron o galardón de mans do secretario xeral de Política Lingüística, Valentín García Gómez; a presidenta da Fundación Antonio Fraguas Fraguas, Concha Losada Vázquez; o secretario da Fundación, Francisco J. Sanjiao Otero; e o coordinador do proxecto, Bieito Pérez Outeiriño, nun acto celebrado na Biblioteca Baltar do Museo. 

Si, ese noso Entroido no que cada ano recibimos a un Entroido singular de Galicia e con el imos percorrendo tódolos centros da nosa Bisbarra acompañados do “abadiño e os seus secuaces” e  mais dos XENERAIS do ULLA repartindo vivas e atranques enriba dos seus cabalos

Trátase, en palabras de Concha Losada, dun "proxecto que supón unha riqueza para a Fundación e para o Museo do Pobo Galego, porque permite a oportunidade de traballar durante un ano enteiro cos centros educativos". Na mesma liña manifestouse o representante da Xunta, que definiu a iniciativa como "un proxecto que non para de darnos alegrías", que cada ano medra en difusión e participación e que "permite que os centros leven ese patrimonio cultural sempre con eles". 

 O galardón está dotado con 7.000 euros por cada modalidade, dos que 4.000 entregáronse xa nes momento da concesión, para que os centros os empreguen na realización do proxecto. Será no comezo do curso académico 2025-2026 cando expoñan o resultado no Museo do Pobo Galego de Santiago de Compostela.

O Proxecto Didáctico Antonio Fraguas Fraguas (PDAFF), convocado pola Fundación Antonio Fraguas Fraguas en colaboración co Padroado do Museo do Pobo Galego, e que conta co patrocinio da Secretaría Xeral de Política Lingüística da Xunta de Galicia, pretende alentar entre a comunidade escolar a realización dun traballo sistemático orientado a impulsar o coñecemento dos máis diversos elementos da cultura galega. Continúase así o labor docente desenvolvido por Antonio Fraguas con moitas xeracións, dende os seus comezos na Estrada en 1933 ata a súa xubilación no Instituto Rosalía de Castro de Compostela en 1975, e co seu labor por e para Galicia ata o seu pasamento. 

No caso do proxecto Viva o entroido vivo! Lingua, festa e comunidade, o xurado valorou a incorporación de todos os centros escolares dos distintos niveis educativos da contorna e o traballo desenvolvido durante máis dunha década na representación das distintas manifestacións etnográficas e culturais do Entroido, así como a presenza das mulleres en actividades nas que ata agora estaban infrarrepresentadas, como os altos, vivas e atranques. Tamén a incorporación de Entroidos doutras zonas de Galicia permitirá recoller as múltiples expresións das distintas manifestacións etnográficas e culturais que representa o Entroido, así como o feito de que a presenza no proxecto do CIFP de Imaxe e Son vaia permitir utilizar un tratamento innovador do entroido.

O xoves 16 para conmemorar o día das Letras Galegas no Lamas, parte do alumnado elaborou murais para lembrar a Luisa Villalta, autora homenaxeada este ano; mentres repasaban a súa vida e obra ían coloreando da súa man os retratos  da autora ..

“Se toda a nosa historia fose así, un construír, máis que un acumular, fragmentar e derrubar, se cada unha das nosas actuacións fosen un continuo cimentar máis que un utilizar e desgastar, gozaríamos da vida nun país seguro de si mesmo, acolledor, criativo e orgulloso”

. Luísa Villalta filóloga, violinista, escritora, poesía, teatro, narrativade ficción, ensaio, traducción colabora nas publicacións colectivas, intervén en recitais, escribe artigos...

Os seus poemas auscultan a respiración das fotografías, escoitan o seu pulso. As vidas das mulleres do Papagaio toman forma na voz dunha poeta que ergue nela a dignidade no medio da hipocrisía, da moral represora e da violencia patriarcal que equipara á violencia da especulación urbanística…

A voz da poeta adquire en O Papagaio unha inaudita reverberación.

A escritura de Luísa Villalta irradia exploración e movemento, desde o núcleo e á procura da formulación máis profunda desprega rexistros formais e estilísticos con texturas diversas. …. O poético sería, nesa exploración, liberdade, pensamento que se revela, reflexión, escoita e acontecemento.

Luísa Villalta falece inesperadamente na madrugada do 6 de marzo de 2004 na súa casa, mentres durmía. Unha meninxite fulminante pon fin á vida da escritora.

E todo se suspende.

Un violín soa fronte o mar no cemiterio de Santo Amaro. O sol quece o desamparo dun luns de marzo.

Catro meses despois do seu falecemento publícase En concreto.

Así vou eu
formando parte
Non me abandono e formo parte

Os acentos da súa voz, os focos do seu traballo, o alento da súa escrita fan dela unha autora que sorprende na súa singularidade; e sendo unha escritora que se incardina no seu tempo, traza no literario insólitos itinerarios. A solidez do edificio que constrúe emerxe nunha obra marcada pola exploración, o pensamento apaixonado, a procura do rigor. Luísa Villalta pon de relevo, unha vez máis e fóra de estereotipos, a amplitude do campo literario que se estende en trazos de autoras únicas.

Ana Romaní

O 2 de maio conmemoramos o Día Internacional contra o Acoso Escolar. Este día, proclamado polos Estados membros da UNESCO, destaca a importancia de crear un ambiente seguro para todos os nenos e nenas.

Con motivo do 8 M propoñemos sensibilización , formación e acción pola Igualdade, Seguridade e Liberdade das nenas e mulleres de todo o planeta. Poñemos tamén en valor a mulleres de tódolos ámbitos da vida

MANIFESTO POLA PAZ

DIA ESCOLAR POLA PAZ E A NON VIOLENCIA

2024 IES LAMAS DE ABADE

Estudantes, profesorado e tódalas persoas da comunidade educativa estamos preocupadas pola presenza de guerras, de manifestacións de xenocidio, intolerancia e violencia en tódalas súas formas.

Alarmadas polo incremento de conflitos armados nos (5 continentes, que estivemos visibilizando nos grupo de aula ), de abusos dos dereitos humanos, de actos intolerantes nas nosas cidades, ameazas e abusos, de actos e condutas denigrantes, agresivas e violentas en internet e nas redes sociais que atentan contra a integridade física e psicolóxica das persoas.

Hoxe queremos facer un xesto de VARRER AS GUERRAS porque AS GUERRAS IMOS PARAR, queremos CAMBIAR O MUNDO!!

Conscientes de que a paz non é só ausencia de conflitos queremos fortalecer o noso compromiso coa CULTURA DE PAZ, QUE IMPLICA:

O RESPECTO Á VIDA, Á FIN DA VIOLENCIA, A PROMOCIÓN E PRÁCTICAS DA NON VIOLENCIA POR MEDIO DO DIÁLOGO, A COOPERACIÓN E EN ESPECIAL DA EDUCACIÓN PARA A TOLERANCIA E A PAZ.

O respecto e a promoción da solidariedade e o dereito ao desenvolvemento humano e a protección do medio ambiente para nós e as xeracións futuras.

Lembramos neste día ás comunidades educativas, ás familias, periodistas, intelectuais, artistas e a toda a cidadanía en xeral, a responsabilidade que todas e todos temos no compromiso de mirar a realidade desde unha visión que impulse unha cultura de convivencia, tolerancia e paz, e de igual xeito, a responsabilidade e o papel informativo e educativo de cada persoa desde o seu lugar.

Sabemos que a PAZ se constrúe e comeza por respectar ás persoas que temos ao nosol lado.

Invitamos neste día a traballar e intentar facer realidade aquilo que dixo a UNESCO…“POSTO QUE AS GUERRAS NACEN NA MENTE DAS PERSOAS, É A MENTE DAS PERSOAS ONDE DEBE CONSTRUIRSE OS BALUARTES DA PAZ”

O MUNDO É NOSO !!

FELICES FESTAS DE NADAL 2023-2024

O alumnado de 2º CM de Farmacia e Parafarmacia do IES Lamas de Abade solidarizouse coa campaña internacional contra a SIDA celebrada o día 1 de decembro. Fíxose fincapé na importancia da información, detección precoz responsabilidade e prevención de todas as ETS.

Serías capaz de coller do mar un impresionante lumbrigante e, vendo que non cumpre a normativa de pesca ou que está cargado de ova, proceder a tiralo de novo pola borda? E unha centola apetitosa ou unhas nécoras?

E por riba estarías disposta ou disposto a perder moita parte do teu tempo libre, e superar a túa timidez, para aparecer en público facendo vídeos amenos nos que tentar transmitir valores como o coidado do “Medio Mariño”, a defensa da “Pesca Sostible” ou a necesidade de traballar en cada marea polo futuro dos bancos marisqueiros?.

Pois iso é o que fai a nosa ESTRELA da ecoloxía do Lamas de Abade. María Maceiras compaxina o seu traballo no mar de Muros cos estudos de 1º Curso do Ciclo de Coidados Auxiliares de Enfermaría no noso Instituto. Despois de coñecela por tik-tok (@mariabadernado) e instagram  xa estabamos orgullosos dela. Pero acabamos de recibir con inmensa ledicia a nova de que ten recibido o Premio Nacional de Gastronomía recentemente instaurado na categoría de “Novo Talento” polas súas prácticas de Pesca Sustentable e por transmitir todos eses valores a través da internet.

O xurado estaba composto por xuíces tan competentes na materia como o coñecido cociñeiro Dabid Muñoz, de DiverXO, Lourdes Plana (presidenta da Real Academia de Gastronomía), José Miguel Herrero (director da Industria Alimentaria) ou Joxe Mari Aizega, (responsable do Basque Culinary Center). Sen dúbida no Lamas non podemos deixar de transmitirlle os nosos enormes parabéns polo seu xeito de vida e polo galardón. Na foto podemos ver a María recollendo o premio entregado polo Ministro de Agricultura Luis Planas.