Dinamización da Biblioteca

As tesoiras de Matisse e Pintores foron os contos que escolleu o equipo de biblioteca para a sesión de contacontos á que asisitiron tres grupos de infantil do CEIP A Sangriña, sesión que levou a avezada contacontos Beatriz Núñez, e na que o noso alumnado de 1º de ESO actuou como anfitrión.

O alumnado de infantil obsequiounos cun adorno de Nadal que colgamos na nosa árbore.

Hoxe celébrase o Día Universal da Infancia, día que serve para lembrar que os nenos e as nenas son o colectivo máis vulnerable, o que máis sofre a crise, as guerras e os problemas do mundo. Todos os nenos e nenas teñen dereito á saúde, á educación e á protección, independientemente do lugar do mundo no que nacesen.

Desde a biblioteca, este ano quixemos chamar a atención sobre as condicións tan inxustas que están a vivir miles de nenas e nenos refuxiados, en tantos lugares do mundo. E como pequeno xesto, o alumnado de 3° de ESO levou a cabo unha actividade que consistiu en debuxar nunha cartolina cadansúa man, de cor branca, e a palabra refuxiados en más de 30 linguas diferentes.