Actividades complementarias e extraescolares
Viaxe a Madrid de 6º de Primaria
05/06/2013
A pasada semana, o noso alumnado de 6º de Primaria estivo visitando Madrid acompañado de Salvador Basoa e Andrés Cendán. Ademais, fixeron unha parada en Segovia (na ida) e outra en Ávila (á volta). Deixamos algunhas fotos (de Andrés Cendán) na nosa Galería.
Premiados no concurso literario sobre a froita
29/05/2013
Xa temos os gañadores!!
No recreo do xoves, entregarémoslles o premio na Biblioteca de Secundaria. Todos os seleccionados como finalistas (os traballos están expostos na entrada do colexio) recibirán tamén un agasallo por participaren no concurso.
Categoría | 1º premio | 2º premio |
Relato (1º/2º de ESO) |
Nerea Ameneiros (1º B) | |
Poesía (1º/2º de ESO) |
Alicia Santos (1º A) | Yaiza Méndez (2º B) |
Relato (3º/4º de ESO) |
Lara Castro (4º A) |
Christian Docal (4º A) |
Poesía (3º/4º de ESO) |
Melina Castro (4º C) | Diego García (4º A) |
O humor e os dereitos da Infancia
27/05/2013
Dende o luns día 27 de maio e ata o día 14 de xuño temos no noso centro a Exposición Itinerante O humor e os dereitos da Infancia, cedida polo Museo do Humor (Fene).
Trátase dunha exposición de humor gráfico na que se inclúe unha selección de debuxos de diferentes ilustradores/as de todo o mundo. Entre os artistas que expoñen, salientan nomes como Salas, Pinto e Chinto, Quico, Martirena, Malagón ou Elena Ospina (ao pé de cada obra está a ficha sobre o autor/a).
O obxectivo da mostra é facer reflexionar á sociedade sobre un tema tan importante como son os dereitos dos nenos/as.
É un proxecto iniciado polo Museo do Humor no verán do 2011: os autores colaboran de forma libre e altruísta, aportando a súa visión sobre cuestións como a educación, o xogo, o maltrato, ou o traballo infantil.
Cataluña 2013
22/05/2013
A semana pasada, o noso alumnado de 3º e 4º de ESO estivo de viaxe por Cataluña acompañado por José Piñón e Salvador Basoa. Polo que nos contan, foron uns días moi felices nos que se reforzaron moitas amizades e nos que non houbo ningún incidente. De momento, deixamos na nosa Galería algunhas fotos (de José) que a moitos farán sentir nostalxia das viaxes de cursos anteriores.
Distribución de froita fresca
15/05/2013
Ante o alarmante incremento da obesidade infantil e as enfermidades cardiovasculares dos adultos, a Unión Europea formulou un plan para a promoción de hábitos saudables como o consumo de froita desde idades temperás. Neste plan colaboran a Consellería de Sanidade e a de Educación e o noso centro solicitou a participación.
A vindeira semana a froita será a protagonista no CPI do Feal: ao saír ao recreo cada alumno recibirá unha peza de froita (laranxa, albaricoque, mazá, plátano e pexego). Teremos dous puntos de recollida dos desperdicios e haberá un grupo de alumnos voluntarios que ademais de repartir a froita entre os seus compañeiros, vixiarán que se respecte a limpeza do patio. Á parte dos días de consumo de froita, no centro estanse realizando distintas actividades que inciden no tema deste programa, e os alumnos están colaborando cos seus traballos creativos, dos que iremos dando conta.
Esperemos que esta campaña sexa un éxito e, sobre todo, que sexamos conscientes de que a froita é saúde.
Marcha ciclista 2013
15/05/2013
O noso alumnado de Primaria participou esta mañá na 6ª Marcha Ciclista Escolar do Concello de Narón. Dámoslle as grazas pola súa paciencia agardando pola saída e en xeral polo seu bo comportamento durante a actividade.
Temos algunhas fotos na nosa Galería, e un pequeno vídeo da saída que fai xa o número 100 do canal do Feal en YouTube (aberto o 16/01/2008).
Diario de Londres 2013
29/04/2013
Aínda que as crónicas da última viaxe a Londres do Feal xa levaban bastantes días publicadas, quedaba por actualizar o álbum fotográfico, subindo o tamaño das fotos máis pequenas e engadindo outras novas. Temos 80 imaxes cedidas por Alba, Erica, Carlos e Carla. Moitas grazas aos fotógraf@s!!
Visita á EOI de Ferrol 2013
19/04/2013
O noso alumnado de 3º e 4º de ESO visitou hoxe a Escola Oficial de Idiomas de Ferrol. Ademais de coñecer a súa organización e parte das súas instalacións, asistiron a unhas pequenas clases introdutorias de portugués, italiano e alemán. Podedes ver máis imaxes na nosa Galería.
Crónica do cuarto día en Londres
Alba Alonso, 19/04/2013
Como o voo saía pola tarde, puidemos aproveitar a mañá. Comezamos almorzando un típico English Breakfast nunha preciosa cafetería no mercado de Covent Garden. Todo estaba boísimo xa que o sitio tiña só produtos orgánicos. Aproveitamos para visitar as tendas e facer algunhas compras. Logo volvemos ao centro onde visitamos máis tendas como unha enorme da famosa marca M&M's de tres pisos!!! Collemos as provisións necesarias para a viaxe en Marks & Spencer e finalmente dirixímonos cara ao hotel para comezar a viaxe de volta á casa.
Como puidestes ver, foi unha viaxe intensa; vimos moitas cousas e quedamos realmente impresionados con Londres, tanto que no bus de volta todos querían volver!!
Quero aproveitar para felicitar ao alumnado polo seu excelente comportamento e o bo uso do inglés cando o necesitaron. Sodes os mellores!!
- « primeira
- ‹ anterior
- …
- 14
- 15
- 16
- 17
- 18
- 19
- 20
- 21
- 22
- …
- seguinte ›
- última »
Enderezos electrónicos
- Equipo directivo: cpi.feal@edu.xunta.gal
- ANPA: o.buxato.anpa.o.feal@gmail.com
- Coordinación da web: web.feal@gmail.com