IES Val do Tea   

Resolución do 28 de febreiro de 2024, da Dirección Xeral de Ordenación e Innovación Educativa, pola que se ditan instrucións para a acreditación das competencias dixitais do alumnado que cursa ensinanzas de educación secundaria obrigatoria e bacharelato na Comunidade Autónoma de Galicia no curso 2023/24 

Está aberto o prazo para a inscrición do alumnado que solicita participar nas probas de acreditación de competencias dixitais, o cal rematará o próximo 11 de marzo. 

Alumnado 4º ESO: o alumnado que obteña o título de graduada ou graduado na ESO recibirá o certificado que acredite o nivel de iniciación de competencia dixital. Este alumnado pode presentarse a unha proba específica co obxectivo de acreditar coñecementos, habilidades e actitudes propias do nivel intermedio. Quen titule ou supere a proba específica, recibirá a certificación ComDix correspondente. Esta acreditación terá unha validez de 5 anos a partir da data da proposta de título da alumna ou alumno ou da realización da proba específica.

Alumnado Bacharelato: a obtención do título de bacharel acredita que a alumna ou alumno ten os coñecementos, habilidades e actitudes das áreas de dominio 1,2,3, e 5 do nivel intermedio. O alumnado matriculado en 2º de bacharelato poderá presentarse a unha proba específica co obxectivo de acreditar os coñecementos, habilidades e actitudes propias da área de dominio 4 do nivel intermedio. No caso de que un alumno/a obteña o título de bacharel e ademais supere a proba específica da área de dominio 4 do nivel intermedio, recibirá a certificación ComDix que acredita o nivel intermedio.

O alumnado que desexe participar debe comunicalo ao equipo directivo para proceder á súa inscrición. Este alumnado debe estar matriculado en 4ºESO ou 2º Bacharelato.

• A proba específica que acredita a área de dominio 4 do nivel intermedio realizarase durante o mes de abril.
• A proba específica que acredita o nivel intermedio realizarase durante o mes de maio.
• As probas realizaranse no centro.

O alumnado que rematase a ESO nos cursos 2021/2022 ou 2022/2023 pode solicitar acreditación, de ter parcipado nun mínimo de 3 cursos no programa E-Dixgal.

 Para máis información, pódese visitar a páxina https://competenciasdixitais.xunta.gal/index.html ou preguntando no propio centro.

Como xa é habitual no noso centro, un ano máis o alumnado de 2º Bacharelato tivo a oportunidade de visitar a vila natal de Castelao e Manuel Antonio e achegarse así máis de preto á vida e obra destas grandes figuras da nosa historia. Malia que chova, Rianxo é visita obrigada!

Este sábado, as nosas alumnas de 1º Bacharelato, Iria M. e Lía B. participaron no concurso de recitado poético "Rosalía sempre viva", que organiza a Casa-Museo Manuel María (Outeiro de Rei). Un ano máis, a calidade de recitado de todas e todos os participantes foi realmente sorprendente, e desde o IES Val do Tea non podemos estar máis orgullosas e orgullosos das nosas alumnas e do seu magnífico traballo!

E para máis ledicia, Iria gañou o premio ao mellor recitado na Categoría de Bacharelato e Ciclos Formativos! Parabéns polo merecido premio!

Compartimos convosco un pequeno álbum con imaxes do paso do noso alumnado de PDC polo Ysgol Cwm Brombil (Port Talbot). Sen dúbida unha semana inesquecible, as imaxes non fan xustiza da experiencia vivida polas nosas alumnas e alumnos. 

Álbum: Curso 2023-24 -> Wales 2024

Esta semana, o alumnado de 2º Bacharelato de Artes achegouse á Escola de Arte e Superior de Deseño Antonio Faílde para coñecer mellor a oferta formativa que ofrece, pois é unha das escolas galegas de arte que pode resultar de interese para a súa formación futura. Estamos desexando saber que será destas artistas nun futuro!

O noso alumnado de PDC xa está en Port Talbot! Esta mañá reencontráronse cos seus compañeiros e compañeiras galesas e compartiron un interesante día de clase no Ysgol Cwm Brombil. 

Agárdanlles aínda outros catro días cheos de bonitas experiencias!

Podedes seguir máis de preto esta aventura no Instagram do Ysgol Cwm Brombil's International Club.

Este xoves, o alumnado de 4º ESO tivo a oportunidade de visitar a Feira das Ensinanzas que organiza o Concello de Ponteareas e coñecer máis de certa a oferta formativa dos arredores.

RESERVA CURSO 2024/25 PARA 1º ESO

Todas as solicitudes presentadas foron admitidas.

A listaxe estará publicada no taboleiro do centro.

Tamén pode consultarse a través de admisionalumnado coa chave 365 ou co certificado dixital.

O prazo de renuncia da praza reservada remata o 28 de febreiro.

Neste enlace poden consultar toda a información relativa ao procedemento de admisión e matrícula no centro.