O alumnado de Hª da Música e da Danza de 2º de Bacharelato asistiu o xoves 4 de abril, por cortesía da Sociedade Filharmónica de Pontevedra, ó concerto da Orquestra Sinfónica de Galicia que tivo lugar no auditorio da Fundación Abanca. A pesar de que o repertorio presentaba un certo nivel de desafío ós ouvintes pola súa complexidade, extensión e modernidade, os mozos e mozas desfrutaron da experiencia de escoitar unha orquestra deste calibre en directo, e de coñecer música diferente á que se pode escoitar habitualmente, mesmo nos concertos deste tipo.
Por outra banda, o vindeiro xoves 11 de abril terá lugar a IV edición da convocatoria Musiqueando-(#nosimportalamúsica), que organiza a Confederación de Asociaciones de Educación Musical (COAEM), e que rexistra a estas horas unha participación superior ós 45.000 alumnos e alumnas de Música de cerca de 450 centros de toda España, tanto de Primaria como de Secundaria. A actividade consiste nunha actuación musical no lugar que elixa cada centro, para compartir coa sociedade o traballo que se realiza nas aulas de Música dos colexios e institutos. Os músicos do Ramón Cabanillas actuarán na praza de Fefiñáns polas 11 da mañá. Achegádevos!
