Hoxe, 30 de abril, é o Día do Pampallín.

O EDLG está a desenvolver un proxecto multidisciplinar e interxeneracional que pretende recuperar a memoria e revalorizar esta festa tradicional de Outes, de grande riqueza cultural.

Con este proxecto pretendemos espertar no alumnado o interese pola cultura galega e as súas tradicións. Tamén fomentar a relación entre o alumnado e os maiores, facéndolles ver que estes últimos son unha fonte de información da cultura galega. Do mesmo xeito, tamén queremos facer ver ás xeracións maiores que, grazas a eles, temos un patrimonio propio do que forma parte a lingua e que nós debemos valorar e así contribuír a manter e, se cabe, aumentar o uso da lingua en tódolos aspectos.

Esperamos que este proxecto sirva ás novas xeracións para coñecer o seu pasado e así poder tecer o seu futuro.

As actividades que fomos desenvolvendo co alumnado de 1ºESO e 2ºESO foron as seguintes:

1. Un traballo de campo que consistiu en diversas entrevistas feitas polo alumnado aos seus maiores para recoller información sobre este rito e para saber como se celebraba outrora.

2. A recreación e fotografado no centro escolar de diferentes escenas do Pampallín.

3. A posterior selección dalgunhas desas fotografías para, en colaboración co Concello de Outes, elaborar unhas postais que se repartirán polo pobo e arredores.

4. Unha xornada de convivencia co CEIP de Outes no que o alumnado de 2ºESO foi contar como foi o traballo que realizaron, que aprenderon e a súa experiencia.

Aquí vos deixamos unhas fotografías das diferentes actividades. Esperamos que vos gusten!