O mellor rap feminista, en galego e dende O Condado. O martes día 23 de marzo, aterraron no IES; cos seus catro micros, os seus bafles, os seus pratos e os seus amplis as Flow de Toxo. O alumnado de 1º de bacharelato e de 1º de FPB puido coñecer, de primeira man, os ingredientes que se agochan detrás das letras e das actuacións dun dos mellores grupos de rap en Galiza. A formación, que está integrada, entre outras persoas, polas irmás de Taboexa Silvia e Rosi Mella (ex alumna do centro), desveláronlle moitas das súas vivencias de como conseguen loitar e abrirse un oco - tan importante - no patriarcado castelanizado e inglesizado musical que nos rodea. Ademáis, aproveitaron para obsequiar o seu público con algún do seus mellores temas. |