O pasado venres 10 de xaneiro, o alumnado de 1º de ESO acudiu a visitar a exposición organizada no Palacio de Congresos y Exposiciones da Coruña por Red Eléctrica EspañolaUnha autoestrada detrás do enchufe. A exposición ten por obxecto que os asistentes comprendan todo o proceso implicado na produción de electricidade, desde a xeneración da enerxía ata a súa transmisión aos nosos fogares ou aos diferentes usos que lle damos na nosa vida cotiá. Pablo Cobas e Carla Rodríguez acompañaron aos nosos curiosos estudantes e quixeron se retratar con eles.
17 de xaneiro, 2020 09:30 horas Vento do leste e choiva intensa
Grupo expedicionario de alumnos e alumnas de 1º de Bacharelato e2º de ESO do IES Elviña comandados polas xenerais de brigada Gemma López e Ana Rivera. Saíron en misión de aprendizaxe cara o Pazo da Ópera da cidade.
Misión: asistir á escoita (e desfrute) dun concerto de música clásica da OSG comandado polo director holandés Otto Tausk. En programa: a estrea mundial da obra "sol, quizás, o nada" (título moi axeitado para este día) do compositor Hugo Gómez Chao e o Concerto para dous pianos do compositor francés Francis Poulenc. Foron solistas os irmáns Lucas e Arthur Jussen, que tiveron moito éxito (non só musical). Amabilísimos, accederon a retratarse cos rapaces.
O luns e martes tivemos no aparcadoiro do centro un pouco típico visitante: un autobús educativo da compañía de tecnoloxías da información Huawei. O instituto concertou para estes días con este famoso xigante chinés das telecomunicacións esta visita en colaboración con CEIP Alborada. O Smartbus Huawei é un vehículo acondicionado coma aula de informática na que o alumnado interactúa con diversas actividades preparadas para informar da ciberseguridade, baixo o lema compartesinarriesgarte. O noso alumnado de 1º e 2º de ESO visitaron as súas instalacións.
O día 20 de decembro remataron as aulas do ano 2019. Triste circunstancia que celebramos cun alegre festival, no que cantamos e bailamos, como correspondía coa xornada. O plantel do festival deste ano non desmereceu, de feito, máis de un (e de unha) quedou abraiado coa calidade das voces e das interpretacións musicais. No IES Elviña hai talento á esgalla.
Felicidades para o ano novo
E despois do festival, chega o fin de ano! Como non podía ser menos, celebrámolo tomando as uvas noutro programa especial da Elviña Broadcasting Corporation. Que vostedes o desfruten!
Con catorce ou quince anos xa vai sendo hora de que os rapaces e rapazas vaian aprendendo a salvar vidas... Por esta causa, o Departamento de Educación Física, comandado polo seu intrépido capitán Francisco Pérez decididu solicitar os servizos de Federico, ousado monitor de Protección Civil, para dar unhas clases a todos os grumetes de 3º e 4º de ESO da nosa educativa fragata. Practicaron reanimacións e outras técnicas varias. Ás fotos nos remitimos...
Actividades do Dpto. de Orientación
Entre todas as actividades de novembro e decembro, a nosa orientadora Ana Rivera quíxolle facer un oco á reflexión sobre a igualdade de xénero e, moi especialmente, adicar esta reflexión ao colectivo trans (transxénero e transexual). No marco do Plan de igualdade e do Proxecto marco pola igualdade acudiu ao noso centro a ponente Cristina Palacios, presidenta da asociación Arelas (Asociación de familias de menores trans) para dar unhas charlas dirixidas a todo o alumnado do centro sobre transexualidade na infancia e na adolescencia. Fermosa iniciativa en prol da igualdade e do respecto.
Como as charlas informativas souberon a pouco, a orientadora preparou tamén outra actividade para o alumnado de Bacharelato. Esta vez no marco do plan de orientación universitaria para o alumnado que remata xa o seu ciclo de estudos de secundaria (e que sexa venturosamente!). Aproveitouse, polo tanto, a 14ª feira das universidades UNITOUR celebrada en Palexco o día 18 de decembro baixo o patrocinio de Círculo Formación, boa ocasión para abrir as mentes do alumnado ás finitas posibilidades do non lonxano futuro académico. Aí tedes as fotos do alumnado posando para a ocasión con Ana e Alberto. Hai que recoñecerlles que dan ben nos retratos!
Tecnoloxía e "Quenda seguinte"
E para rematar, un concurso. O Departamento de Tecnoloxía convocou para o mes de decembro o concurso científico Quenda seguinte en 4º curso de ESO. A bo seguro que o alumnado participante amosará a súa sabedoría na matemática e na ciencia. Polo pronto, velaí tedes aos profesionais presentadores da velada Brais, Adrián e Paula, no vídeo promocional para a Elviña Broadcasting Corporation.
As imaxes e vídeos contidos nesta páxina web corresponden ás actividades desenvolvidas dentro da Programación anual de actividades do noso centro polo noso alumnado. Todas as familias e responsables legais do alumnado que aparece nelas asinaron coa matrícula un permiso específico para permitir a difusión destas imaxes a través da web do instituto ou a través das contas en espazos web e en redes sociais que son de titularidade do IES Plurilingüe Elviña. Asimesmo, familias e responsables están tamén informados do seu dereito de revogar esa autorización de uso de imaxe. Lémbrase que a descarga destes materiais visuais e o seu uso por terceiros fóra do estrito marco dos espazos e funcións permitidos pola autorización citada (isto é, a difusión meramente informativa das nosas actividades complementarias e extraescolares a través da páxina web oficial do centro e a través das contas das que o centro é titular) son ilegais, poden e deben ser denunciados. O IES Plurilingüe Elviña non se fai responsable do uso que se poida facer destas imaxes por terceiros fóra do ámbito dos espazos web que son da súa titularidade.
